໔. ທຸຕິຍກຸລປຸຕ຺ຕສຸຕ຺ຕໍ

໑໐໗໔. ‘‘ເຍ ຫິ ເກຈິ, ຠິກ຺ຂເວ, ອຕີຕມທ຺ຘານໍ ກຸລປຸຕ຺ຕາ ສມ຺ມາ ອຄາຣສ຺ມາ ອນຄາຣິຍໍ ປພ຺ພຊິຕາ ຍຖາຠູຕໍ ອຠິສເມສຸໍ, ສພ຺ເພ ເຕ ຈຕ຺ຕາຣິ ອຣິຍສຈ຺ຈານິ ຍຖາຠູຕໍ ອຠິສເມສຸໍ. ເຍ ຫິ ເກຈິ, ຠິກ຺ຂເວ, ອນາຄຕມທ຺ຘານໍ ກຸລປຸຕ຺ຕາ ສມ຺ມາ ອຄາຣສ຺ມາ ອນຄາຣິຍໍ ປພ຺ພຊິຕາ ຍຖາຠູຕໍ ອຠິສເມສ຺ສນ຺ຕິ, ສພ຺ເພ ເຕ ຈຕ຺ຕາຣິ ອຣິຍສຈ຺ຈານິ ຍຖາຠູຕໍ ອຠິສເມສ຺ສນ຺ຕິ. ເຍ ຫິ ເກຈິ, ຠິກ຺ຂເວ, ເອຕຣຫິ ກຸລປຸຕ຺ຕາ ສມ຺ມາ ອຄາຣສ຺ມາ ອນຄາຣິຍໍ ປພ຺ພຊິຕາ ຍຖາຠູຕໍ ອຠິສເມນ຺ຕິ, ສພ຺ເພ ເຕ ຈຕ຺ຕາຣິ ອຣິຍສຈ຺ຈານິ ຍຖາຠູຕໍ ອຠິສເມນ຺ຕິ.

‘‘ກຕມານິ ຈຕ຺ຕາຣິ? ທຸກ຺ຂໍ ອຣິຍສຈ຺ຈໍ, ທຸກ຺ຂສມຸທຍໍ ອຣິຍສຈ຺ຈໍ, ທຸກ຺ຂນິໂຣຘໍ ອຣິຍສຈ຺ຈໍ, ທຸກ຺ຂນິໂຣຘຄາມິນີ ປຏິປທາ ອຣິຍສຈ຺ຈໍ. ເຍ ຫິ ເກຈິ, ຠິກ຺ຂເວ, ອຕີຕມທ຺ຘານໍ ກຸລປຸຕ຺ຕາ ສມ຺ມາ ອຄາຣສ຺ມາ ອນຄາຣິຍໍ ປພ຺ພຊິຕາ ຍຖາຠູຕໍ ອຠິສເມສຸໍ …ເປ… ອຠິສເມສ຺ສນ຺ຕິ…ເປ… ອຠິສເມນ຺ຕິ, ສພ຺ເພ ເຕ ອິມານິ ຈຕ຺ຕາຣິ ອຣິຍສຈ຺ຈານິ ຍຖາຠູຕໍ ອຠິສເມນ຺ຕິ.

‘‘ຕສ຺ມາຕິຫ, ຠິກ຺ຂເວ, ‘ອິທໍ ທຸກ຺ຂ’ນ຺ຕິ ໂຍໂຄ ກຣຓີໂຍ…ເປ… ‘ອຍໍ ທຸກ຺ຂນິໂຣຘຄາມິນີ ປຏິປທາ’ຕິ ໂຍໂຄ ກຣຓີໂຍ’’ຕິ. ຈຕຸຕ຺ຖໍ.