໒. ທຸຕິຍມຫານາມສຸຕ຺ຕໍ

໑໐໑໘. ເອວໍ ເມ ສຸຕໍ – ເອກໍ ສມຍໍ ຠຄວາ ສກ຺ເກສຸ ວິຫຣຕິ ກປິລວຕ຺ຖຸສ຺ມິໍ ນິຄ຺ໂຣຘາຣາເມ. ອຖ ໂຂ ມຫານາໂມ ສກ຺ໂກ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ມຫານາໂມ ສກ຺ໂກ ຠຄວນ຺ຕໍ ເອຕທໂວຈ – ‘‘ອິທໍ, ຠນ຺ເຕ, ກປິລວຕ຺ຖຸ ອິທ຺ຘຎ຺ເຈວ ຜີຕຎ຺ຈ ພາຫຸຊຎ຺ຎໍ ອາກິຓ຺ຓມນຸສ຺ສໍ ສມ຺ພາຘພ຺ຍູຫໍ. ໂສ ຂ຺ວາຫໍ, ຠນ຺ເຕ, ຠຄວນ຺ຕໍ ວາ ປຍິຣຸປາສິຕ຺ວາ ມໂນຠາວນີເຍ ວາ ຠິກ຺ຂູ ສາຍນ຺ຫສມຍໍ ກປິລວຕ຺ຖຸໍ ປວິສນ຺ໂຕ; ຠນ຺ເຕນປິ ຫຕ຺ຖິນາ ສມາຄຈ຺ຉາມິ; ຠນ຺ເຕນປິ ອສ຺ເສນ ສມາຄຈ຺ຉາມິ; ຠນ຺ເຕນປິ ຣເຖນ ສມາຄຈ຺ຉາມິ; ຠນ຺ເຕ, ນປິ ສກເຏນ ສມາຄຈ຺ຉາມິ; ຠນ຺ເຕ, ນປິ ປຸຣິເສນ ສມາຄຈ຺ຉາມິ. ຕສ຺ສ ມຍ຺ຫໍ, ຠນ຺ເຕ, ຕສ຺ມິໍ ສມເຍ ມຸສ຺ສເຕວ ຠຄວນ຺ຕໍ ອາຣພ຺ຠ ສຕິ, ມຸສ຺ສຕິ ຘມ຺ມໍ ອາຣພ຺ຠ ສຕິ, ມຸສ຺ສຕິ ສງ຺ຆໍ ອາຣພ຺ຠ ສຕິ. ຕສ຺ສ ມຍ຺ຫໍ, ຠນ຺ເຕ, ເອວໍ ໂຫຕິ – ‘ອິມມ຺ຫິ ຈາຫໍ ສມເຍ ກາລໍ ກເຣຍ຺ຍໍ, ກາ ມຍ຺ຫໍ ຄຕິ, ໂກ ອຠິສມ຺ປຣາໂຍ’’’ຕິ?

‘‘ມາ ຠາຍິ, ມຫານາມ, ມາ ຠາຍິ, ມຫານາມ! ອປາປກໍ ເຕ ມຣຓໍ ຠວິສ຺ສຕິ ອປາປິກາ ກາລໍກິຣິຍາ. ຈຕູຫິ ໂຂ, ມຫານາມ, ຘມ຺ເມຫິ ສມນ຺ນາຄໂຕ ອຣິຍສາວໂກ ນິພ຺ພານນິນ຺ໂນ ໂຫຕິ ນິພ຺ພານໂປໂຓ ນິພ຺ພານປພ຺ຠາໂຣ. ກຕເມຫິ ຈຕູຫິ? ອິຘ, ມຫານາມ, ອຣິຍສາວໂກ ພຸທ຺ເຘ ອເວຈ຺ຈປ຺ປສາເທນ ສມນ຺ນາຄໂຕ ໂຫຕິ – ອິຕິປິ ໂສ ຠຄວາ…ເປ… ສຕ຺ຖາ ເທວມນຸສ຺ສານໍ ພຸທ຺ໂຘ ຠຄວາຕິ. ຘມ຺ເມ…ເປ… ສງ຺ເຆ …ເປ… ອຣິຍກນ຺ເຕຫິ ສີເລຫິ ສມນ຺ນາຄໂຕ ໂຫຕິ ອຂຓ຺ເຑຫິ…ເປ… ສມາຘິສໍວຕ຺ຕນິເກຫິ.

‘‘ເສຍ຺ຍຖາປິ, ມຫານາມ, ຣຸກ຺ໂຂ ປາຈີນນິນ຺ໂນ ປາຈີນໂປໂຓ ປາຈີນປພ຺ຠາໂຣ, ໂສ ມູລຈ຺ຉິນ຺ໂນ ກຕເມນ ປປເຕຍ຺ຍາ’’ຕິ? ‘‘ເຍນ, ຠນ຺ເຕ, ນິນ຺ໂນ ເຍນ ໂປໂຓ ເຍນ ປພ຺ຠາໂຣ’’ຕິ. ‘‘ເອວເມວ ໂຂ, ມຫານາມ, ອິເມຫິ ຈຕູຫິ ຘມ຺ເມຫິ ສມນ຺ນາຄໂຕ ອຣິຍສາວໂກ ນິພ຺ພານນິນ຺ໂນ ໂຫຕິ ນິພ຺ພານໂປໂຓ ນິພ຺ພານປພ຺ຠາໂຣ’’ຕິ. ທຸຕິຍໍ.