໗. ທຸຕິຍມິຕ຺ຕາມຈ຺ຈສຸຕ຺ຕໍ

໑໐໑໓. ‘‘ເຍ ເຕ, ຠິກ຺ຂເວ, ອນຸກມ຺ເປຍ຺ຍາຖ, ເຍ ຈ ໂສຕພ຺ພໍ ມຎ຺ເຎຍ຺ຍຸໍ – ມິຕ຺ຕາ ວາ ອມຈ຺ຈາ ວາ ຎາຕີ ວາ ສາໂລຫິຕາ ວາ – ເຕ, ຠິກ຺ຂເວ, ຈຕູສຸ ໂສຕາປຕ຺ຕິຍງ຺ເຄສຸ ສມາທເປຕພ຺ພາ, ນິເວເສຕພ຺ພາ, ປຕິຏ຺ຐາເປຕພ຺ພາ. ກຕເມສຸ ຈຕູສຸ? ພຸທ຺ເຘ ອເວຈ຺ຈປ຺ປສາເທ ສມາທເປຕພ຺ພາ, ນິເວເສຕພ຺ພາ, ປຕິຏ຺ຐາເປຕພ຺ພາ – ອິຕິປິ ໂສ ຠຄວາ…ເປ… ສຕ຺ຖາ ເທວມນຸສ຺ສານໍ ພຸທ຺ໂຘ ຠຄວາ’’ຕິ.

‘‘ສິຍາ, ຠິກ຺ຂເວ, ຈຕຸນ຺ນໍ ມຫາຠູຕານໍ ອຎ຺ຎຖຕ຺ຕໍ – ປຖວີຘາຕຸຍາ, ອາໂປຘາຕຸຍາ, ເຕໂຊຘາຕຸຍາ, ວາໂຍຘາຕຸຍາ – ນ ຕ຺ເວວ ພຸທ຺ເຘ ອເວຈ຺ຈປ຺ປສາເທນ ສມນ຺ນາຄຕສ຺ສ ອຣິຍສາວກສ຺ສ ສິຍາ ອຎ຺ຎຖຕ຺ຕໍ. ຕຕ຺ຣິທໍ ອຎ຺ຎຖຕ຺ຕໍ – ໂສ ວຕ ພຸທ຺ເຘ ອເວຈ຺ຈປ຺ປສາເທນ ສມນ຺ນາຄໂຕ ອຣິຍສາວໂກ ນິຣຍໍ ວາ ຕິຣຈ຺ຉານໂຍນິໍ ວາ ເປຕ຺ຕິວິສຍໍ ວາ ອຸປປຊ຺ຊິສ຺ສຕີ’’ຕິ – ເນຕໍ ຐານໍ ວິຊ຺ຊຕິ. ‘‘ຘມ຺ເມ…ເປ… ສງ຺ເຆ…ເປ… ອຣິຍກນ຺ເຕສຸ ສີເລສຸ ສມາທເປຕພ຺ພາ, ນິເວເສຕພ຺ພາ, ປຕິຏ຺ຐາເປຕພ຺ພາ ອຂຓ຺ເຑສຸ…ເປ… ສມາຘິສໍວຕ຺ຕນິເກສຸ. ສິຍາ, ຠິກ຺ຂເວ, ຈຕຸນ຺ນໍ ມຫາຠູຕານໍ ອຎ຺ຎຖຕ຺ຕໍ – ປຖວີຘາຕຸຍາ, ອາໂປຘາຕຸຍາ, ເຕໂຊຘາຕຸຍາ, ວາໂຍຘາຕຸຍາ – ນ ຕ຺ເວວ ອຣິຍກນ຺ເຕຫິ ສີເລຫິ ສມນ຺ນາຄຕສ຺ສ ອຣິຍສາວກສ຺ສ ສິຍາ ອຎ຺ຎຖຕ຺ຕໍ. ຕຕ຺ຣິທໍ ອຎ຺ຎຖຕ຺ຕໍ – ໂສ ວຕ ອຣິຍກນ຺ເຕຫິ ສີເລຫິ ສມນ຺ນາຄໂຕ ອຣິຍສາວໂກ ນິຣຍໍ ວາ ຕິຣຈ຺ຉານໂຍນິໍ ວາ ເປຕ຺ຕິວິສຍໍ ວາ ອຸປປຊ຺ຊິສ຺ສຕີຕິ – ເນຕໍ ຐານໍ ວິຊ຺ຊຕິ. ເຍ ເຕ, ຠິກ຺ຂເວ, ອນຸກມ຺ເປຍ຺ຍາຖ, ເຍ ຈ ໂສຕພ຺ພໍ ມຎ຺ເຎຍ຺ຍຸໍ – ມິຕ຺ຕາ ວາ ອມຈ຺ຈາ ວາ ຎາຕີ ວາ ສາໂລຫິຕາ ວາ – ເຕ, ຠິກ຺ຂເວ, ອິເມສຸ ຈຕູສຸ ໂສຕາປຕ຺ຕິຍງ຺ເຄສຸ ສມາທເປຕພ຺ພາ, ນິເວເສຕພ຺ພາ, ປຕິຏ຺ຐາເປຕພ຺ພາ’’ຕິ. ສຕ຺ຕມໍ.