໘. ສງ຺ຂຘມສຸຕ຺ຕໍ

໓໖໐. ເອກໍ ສມຍໍ ຠຄວາ ນາຬນ຺ທາຍໍ ວິຫຣຕິ ປາວາຣິກມ຺ພວເນ. ອຖ ໂຂ ອສິພນ຺ຘກປຸຕ຺ໂຕ ຄາມຓິ ນິຄຓ຺ຐສາວໂກ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ນໍ ໂຂ ອສິພນ຺ຘກປຸຕ຺ຕໍ ຄາມຓິໍ ຠຄວາ ເອຕທໂວຈ – ‘‘ກຖໍ ນຸ ໂຂ, ຄາມຓິ, ນິຄຓ຺ໂຐ ນາຏປຸຕ຺ໂຕ ສາວການໍ ຘມ຺ມໍ ເທເສຕີ’’ຕິ? ‘‘ເອວໍ ໂຂ, ຠນ຺ເຕ, ນິຄຓ຺ໂຐ ນາຏປຸຕ຺ໂຕ ສາວການໍ ຘມ຺ມໍ ເທເສຕິ – ‘ໂຍ ໂກຈິ ປາຓໍ ອຕິປາເຕຕິ, ສພ຺ໂພ ໂສ ອາປາຍິໂກ ເນຣຍິໂກ, ໂຍ ໂກຈິ ອທິນ຺ນໍ ອາທິຍຕິ, ສພ຺ໂພ ໂສ ອາປາຍິໂກ ເນຣຍິໂກ, ໂຍ ໂກຈິ ກາເມສຸ ມິຈ຺ຉາ ຈຣຕິ, ສພ຺ໂພ ໂສ ອາປາຍິໂກ ເນຣຍິໂກ, ໂຍ ໂກຈິ ມຸສາ ຠຓຕິ ສພ຺ໂພ, ໂສ ອາປາຍິໂກ ເນຣຍິໂກ. ຍໍພຫຸລໍ ຍໍພຫຸລໍ ວິຫຣຕິ, ເຕນ ເຕນ ນີຍຕີ’ຕິ. ເອວໍ ໂຂ, ຠນ຺ເຕ, ນິຄຓ຺ໂຐ ນາຏປຸຕ຺ໂຕ ສາວການໍ ຘມ຺ມໍ ເທເສຕີ’’ຕິ. ‘‘‘ຍໍພຫຸລໍ ຍໍພຫຸລຎ຺ຈ, ຄາມຓິ, ວິຫຣຕິ, ເຕນ ເຕນ ນີຍຕິ’, ເອວໍ ສນ຺ເຕ ນ ໂກຈິ ອາປາຍິໂກ ເນຣຍິໂກ ຠວິສ຺ສຕິ, ຍຖາ ນິຄຓ຺ຐສ຺ສ ນາຏປຸຕ຺ຕສ຺ສ ວຈນໍ’’.

‘‘ຕໍ ກິໍ ມຎ຺ຎສິ, ຄາມຓິ, ໂຍ ໂສ ປຸຣິໂສ ປາຓາຕິປາຕີ ຣຕ຺ຕິຍາ ວາ ທິວສສ຺ສ ວາ ສມຍາສມຍໍ ອຸປາທາຍ, ກຕໂມ ພຫຸຕໂຣ ສມໂຍ, ຍໍ ວາ ໂສ ປາຓມຕິປາເຕຕິ, ຍໍ ວາ ໂສ ປາຓໍ ນາຕິປາເຕຕີ’’ຕິ? ‘‘ໂຍ ໂສ, ຠນ຺ເຕ, ປຸຣິໂສ ປາຓາຕິປາຕີ ຣຕ຺ຕິຍາ ວາ ທິວສສ຺ສ ວາ ສມຍາສມຍໍ ອຸປາທາຍ, ອປ຺ປຕໂຣ ໂສ ສມໂຍ ຍໍ ໂສ ປາຓມຕິປາເຕຕິ, ອຖ ໂຂ ສ຺ເວວ ພຫຸຕໂຣ ສມໂຍ ຍໍ ໂສ ປາຓໍ ນາຕິປາເຕຕີ’’ຕິ. ‘‘‘ຍໍພຫຸລໍ ຍໍພຫຸລຎ຺ຈ, ຄາມຓິ, ວິຫຣຕິ ເຕນ ເຕນ ນີຍຕີ’ຕິ, ເອວໍ ສນ຺ເຕ ນ ໂກຈິ ອາປາຍິໂກ ເນຣຍິໂກ ຠວິສ຺ສຕິ, ຍຖາ ນິຄຓ຺ຐສ຺ສ ນາຏປຸຕ຺ຕສ຺ສ ວຈນໍ’’.

‘‘ຕໍ ກິໍ ມຎ຺ຎສິ, ຄາມຓິ, ໂຍ ໂສ ປຸຣິໂສ ອທິນ຺ນາທາຍີ ຣຕ຺ຕິຍາ ວາ ທິວສສ຺ສ ວາ ສມຍາສມຍໍ ອຸປາທາຍ, ກຕໂມ ພຫຸຕໂຣ ສມໂຍ, ຍໍ ວາ ໂສ ອທິນ຺ນໍ ອາທິຍຕິ, ຍໍ ວາ ໂສ ອທິນ຺ນໍ ນາທິຍຕີ’’ຕິ. ‘‘ໂຍ ໂສ, ຠນ຺ເຕ, ປຸຣິໂສ ອທິນ຺ນາທາຍີ ຣຕ຺ຕິຍາ ວາ ທິວສສ຺ສ ວາ ສມຍາສມຍໍ ອຸປາທາຍ ອປ຺ປຕໂຣ ໂສ ສມໂຍ, ຍໍ ໂສ ອທິນ຺ນໍ ອາທິຍຕິ, ອຖ ໂຂ ສ຺ເວວ ພຫຸຕໂຣ ສມໂຍ, ຍໍ ໂສ ອທິນ຺ນໍ ນາທິຍຕີ’’ຕິ. ‘‘‘ຍໍພຫຸລໍ ຍໍພຫຸລຎ຺ຈ, ຄາມຓິ, ວິຫຣຕິ ເຕນ ເຕນ ນີຍຕີ’ຕິ, ເອວໍ ສນ຺ເຕ ນ ໂກຈິ ອາປາຍິໂກ ເນຣຍິໂກ ຠວິສ຺ສຕິ, ຍຖາ ນິຄຓ຺ຐສ຺ສ ນາຏປຸຕ຺ຕສ຺ສ ວຈນໍ’’.

‘‘ຕໍ ກິໍ ມຎ຺ຎສິ, ຄາມຓິ, ໂຍ ໂສ ປຸຣິໂສ ກາເມສຸມິຈ຺ຉາຈາຣີ ຣຕ຺ຕິຍາ ວາ ທິວສສ຺ສ ວາ ສມຍາສມຍໍ ອຸປາທາຍ, ກຕໂມ ພຫຸຕໂຣ ສມໂຍ, ຍໍ ວາ ໂສ ກາເມສຸ ມິຈ຺ຉາ ຈຣຕິ, ຍໍ ວາ ໂສ ກາເມສຸ ມິຈ຺ຉາ ນ ຈຣຕີ’’ຕິ? ‘‘ໂຍ ໂສ, ຠນ຺ເຕ, ປຸຣິໂສ ກາເມສຸມິຈ຺ຉາຈາຣີ ຣຕ຺ຕິຍາ ວາ ທິວສສ຺ສ ວາ ສມຍາສມຍໍ ອຸປາທາຍ, ອປ຺ປຕໂຣ ໂສ ສມໂຍ ຍໍ ໂສ ກາເມສຸ ມິຈ຺ຉາ ຈຣຕິ, ອຖ ໂຂ ສ຺ເວວ ພຫຸຕໂຣ ສມໂຍ, ຍໍ ໂສ ກາເມສຸ ມິຈ຺ຉາ ນ ຈຣຕີ’’ຕິ. ‘‘‘ຍໍພຫຸລໍ ຍໍພຫຸລຎ຺ຈ, ຄາມຓິ, ວິຫຣຕິ ເຕນ ເຕນ ນີຍຕີ’ຕິ, ເອວໍ ສນ຺ເຕ ນ ໂກຈິ ອາປາຍິໂກ ເນຣຍິໂກ ຠວິສ຺ສຕິ, ຍຖາ ນິຄຓ຺ຐສ຺ສ ນາຏປຸຕ຺ຕສ຺ສ ວຈນໍ’’.

‘‘ຕໍ ກິໍ ມຎ຺ຎສິ, ຄາມຓິ, ໂຍ ໂສ ປຸຣິໂສ ມຸສາວາທີ ຣຕ຺ຕິຍາ ວາ ທິວສສ຺ສ ວາ ສມຍາສມຍໍ ອຸປາທາຍ, ກຕໂມ ພຫຸຕໂຣ ສມໂຍ, ຍໍ ວາ ໂສ ມຸສາ ຠຓຕິ, ຍໍ ວາ ໂສ ມຸສາ ນ ຠຓຕີ’’ຕິ? ‘‘ໂຍ ໂສ, ຠນ຺ເຕ, ປຸຣິໂສ ມຸສາວາທີ ຣຕ຺ຕິຍາ ວາ ທິວສສ຺ສ ວາ ສມຍາສມຍໍ ອຸປາທາຍ, ອປ຺ປຕໂຣ ໂສ ສມໂຍ, ຍໍ ໂສ ມຸສາ ຠຓຕິ, ອຖ ໂຂ ສ຺ເວວ ພຫຸຕໂຣ ສມໂຍ, ຍໍ ໂສ ມຸສາ ນ ຠຓຕີ’’ຕິ. ‘‘‘ຍໍພຫຸລໍ ຍໍພຫຸລຎ຺ຈ, ຄາມຓິ, ວິຫຣຕິ ເຕນ ເຕນ ນີຍຕີ’ຕິ, ເອວໍ ສນ຺ເຕ ນ ໂກຈິ ອາປາຍິໂກ ເນຣຍິໂກ ຠວິສ຺ສຕິ, ຍຖາ ນິຄຓ຺ຐສ຺ສ ນາຏປຸຕ຺ຕສ຺ສ ວຈນໍ’’.

‘‘ອິຘ, ຄາມຓິ, ເອກຈ຺ໂຈ ສຕ຺ຖາ ເອວໍວາທີ ໂຫຕິ ເອວໍທິຏ຺ຐິ [ເອວໍທິຏ຺ຐີ (ກ.)] – ‘ໂຍ ໂກຈິ ປາຓມຕິປາເຕຕິ, ສພ຺ໂພ ໂສ ອາປາຍິໂກ ເນຣຍິໂກ, ໂຍ ໂກຈິ ອທິນ຺ນໍ ອາທິຍຕິ, ສພ຺ໂພ ໂສ ອາປາຍິໂກ ເນຣຍິໂກ, ໂຍ ໂກຈິ ກາເມສຸ ມິຈ຺ຉາ ຈຣຕິ, ສພ຺ໂພ ໂສ ອາປາຍິໂກ ເນຣຍິໂກ, ໂຍ ໂກຈິ ມຸສາ ຠຓຕິ, ສພ຺ໂພ ໂສ ອາປາຍິໂກ ເນຣຍິໂກ’ຕິ. ຕສ຺ມິໍ ໂຂ ປນ, ຄາມຓິ, ສຕ຺ຖຣິ ສາວໂກ ອຠິປ຺ປສນ຺ໂນ ໂຫຕິ. ຕສ຺ສ ເອວໍ ໂຫຕິ – ‘ມຍ຺ຫໍ ໂຂ ສຕ຺ຖາ ເອວໍວາທີ ເອວໍທິຏ຺ຐິ – ໂຍ ໂກຈິ ປາຓມຕິປາເຕຕິ, ສພ຺ໂພ ໂສ ອາປາຍິໂກ ເນຣຍິໂກຕິ. ອຕ຺ຖິ ໂຂ ປນ ມຍາ ປາໂຓ ອຕິປາຕິໂຕ, ອຫມ຺ປມ຺ຫິ ອາປາຍິໂກ ເນຣຍິໂກຕິ ທິຏ຺ຐິໍ ປຏິລຠຕິ. ຕໍ, ຄາມຓິ, ວາຈໍ ອປ຺ປຫາຍ ຕໍ ຈິຕ຺ຕໍ ອປ຺ປຫາຍ ຕໍ ທິຏ຺ຐິໍ ອປ຺ປຏິນິສ຺ສຊ຺ຊິຕ຺ວາ ຍຖາຠຕໍ ນິກ຺ຂິຕ຺ໂຕ ເອວໍ ນິຣເຍ. ມຍ຺ຫໍ ໂຂ ສຕ຺ຖາ ເອວໍວາທີ ເອວໍທິຏ຺ຐິ – ໂຍ ໂກຈິ ອທິນ຺ນໍ ອາທິຍຕິ, ສພ຺ໂພ ໂສ ອາປາຍິໂກ ເນຣຍິໂກຕິ. ອຕ຺ຖິ ໂຂ ປນ ມຍາ ອທິນ຺ນໍ ອາທິນ຺ນໍ ອຫມ຺ປມ຺ຫິ ອາປາຍິໂກ ເນຣຍິໂກຕິ ທິຏ຺ຐິໍ ປຏິລຠຕິ. ຕໍ, ຄາມຓິ, ວາຈໍ ອປ຺ປຫາຍ ຕໍ ຈິຕ຺ຕໍ ອປ຺ປຫາຍ ຕໍ ທິຏ຺ຐິໍ ອປ຺ປຏິນິສ຺ສຊ຺ຊິຕ຺ວາ ຍຖາຠຕໍ ນິກ຺ຂິຕ຺ໂຕ ເອວໍ ນິຣເຍ. ມຍ຺ຫໍ ໂຂ ສຕ຺ຖາ ເອວໍວາທີ ເອວໍທິຏ຺ຐິ – ໂຍ ໂກຈິ ກາເມສຸ ມິຈ຺ຉາ ຈຣຕິ, ສພ຺ໂພ ໂສ ອາປາຍິໂກ ເນຣຍິໂກ’ຕິ. ອຕ຺ຖິ ໂຂ ປນ ມຍາ ກາເມສຸ ມິຈ຺ຉາ ຈິຓ຺ຓໍ. ‘ອຫມ຺ປມ຺ຫິ ອາປາຍິໂກ ເນຣຍິໂກ’ຕິ ທິຏ຺ຐິໍ ປຏິລຠຕິ. ຕໍ, ຄາມຓິ, ວາຈໍ ອປ຺ປຫາຍ ຕໍ ຈິຕ຺ຕໍ ອປ຺ປຫາຍ ຕໍ ທິຏ຺ຐິໍ ອປ຺ປຏິນິສ຺ສຊ຺ຊິຕ຺ວາ ຍຖາຠຕໍ ນິກ຺ຂິຕ຺ໂຕ ເອວໍ ນິຣເຍ. ມຍ຺ຫໍ ໂຂ ສຕ຺ຖາ ເອວໍວາທີ ເອວໍທິຏ຺ຐິ – ໂຍ ໂກຈິ ມຸສາ ຠຓຕິ, ສພ຺ໂພ ໂສ ອາປາຍິໂກ ເນຣຍິໂກຕິ. ອຕ຺ຖິ ໂຂ ປນ ມຍາ ມຸສາ ຠຓິຕໍ. ‘ອຫມ຺ປມ຺ຫິ ອາປາຍິໂກ ເນຣຍິໂກ’ຕິ ທິຏ຺ຐິໍ ປຏິລຠຕິ. ຕໍ, ຄາມຓິ, ວາຈໍ ອປ຺ປຫາຍ ຕໍ ຈິຕ຺ຕໍ ອປ຺ປຫາຍ ຕໍ ທິຏ຺ຐິໍ ອປ຺ປຏິນິສ຺ສຊ຺ຊິຕ຺ວາ ຍຖາຠຕໍ ນິກ຺ຂິຕ຺ໂຕ ເອວໍ ນິຣເຍ.

‘‘ອິຘ ປນ, ຄາມຓິ, ຕຖາຄໂຕ ໂລເກ ອຸປ຺ປຊ຺ຊຕິ ອຣຫໍ ສມ຺ມາສມ຺ພຸທ຺ໂຘ ວິຊ຺ຊາຈຣຓສມ຺ປນ຺ໂນ ສຸຄໂຕ ໂລກວິທູ ອນຸຕ຺ຕໂຣ ປຸຣິສທມ຺ມສາຣຖິ ສຕ຺ຖາ ເທວມນຸສ຺ສານໍ ພຸທ຺ໂຘ ຠຄວາ. ໂສ ອເນກປຣິຍາເຍນ ປາຓາຕິປາຕໍ ຄຣຫຕິ ວິຄຣຫຕິ, ‘ປາຓາຕິປາຕາ ວິຣມຖາ’ຕິ ຈາຫ. ອທິນ຺ນາທານໍ ຄຣຫຕິ ວິຄຣຫຕິ, ‘ອທິນ຺ນາທານາ ວິຣມຖາ’ຕິ ຈາຫ. ກາເມສຸມິຈ຺ຉາຈາຣໍ ຄຣຫຕິ, ວິຄຣຫຕິ ‘ກາເມສຸມິຈ຺ຉາຈາຣາ ວິຣມຖາ’ຕິ ຈາຫ. ມຸສາວາທໍ ຄຣຫຕິ ວິຄຣຫຕິ ‘ມຸສາວາທາ ວິຣມຖາ’ຕິ ຈາຫ. ຕສ຺ມິໍ ໂຂ ປນ, ຄາມຓິ, ສຕ຺ຖຣິ ສາວໂກ ອຠິປ຺ປສນ຺ໂນ ໂຫຕິ. ໂສ ອິຕິ ປຏິສຎ຺ຈິກ຺ຂຕິ – ‘ຠຄວາ ໂຂ ອເນກປຣິຍາເຍນ ປາຓາຕິປາຕໍ ຄຣຫຕິ ວິຄຣຫຕິ, ປາຓາຕິປາຕາ ວິຣມຖາຕິ ຈາຫ. ອຕ຺ຖິ ໂຂ ປນ ມຍາ ປາໂຓ ອຕິປາຕິໂຕ ຍາວຕໂກ ວາ ຕາວຕໂກ ວາ. ໂຍ ໂຂ ປນ ມຍາ ປາໂຓ ອຕິປາຕິໂຕ ຍາວຕໂກ ວາ ຕາວຕໂກ ວາ, ຕໍ ນ ສຸຏ຺ຐຸ, ຕໍ ນ ສາຘຸ. ອຫຎ຺ເຈວ [ອຫຎ຺ເຈ (?)] ໂຂ ປນ ຕປ຺ປຈ຺ຈຍາ ວິປ຺ປຏິສາຣີ ອສ຺ສໍ. ນ ເມຕໍ ປາປໍ ກມ຺ມໍ [ປາປກມ຺ມໍ (ສ຺ຍາ. ກໍ. ປີ. ກ.)] ອກຕໍ ຠວິສ຺ສຕີ’ຕິ. ໂສ ອິຕິ ປຏິສງ຺ຂາຍ ຕຎ຺ເຈວ ປາຓາຕິປາຕໍ ປຊຫຕິ. ອາຍຕິຎ຺ຈ ປາຓາຕິປາຕາ ປຏິວິຣໂຕ ໂຫຕິ. ເອວເມຕສ຺ສ ປາປສ຺ສ ກມ຺ມສ຺ສ ປຫານໍ ໂຫຕິ. ເອວເມຕສ຺ສ ປາປສ຺ສ ກມ຺ມສ຺ສ ສມຕິກ຺ກໂມ ໂຫຕິ.

‘‘‘ຠຄວາ ໂຂ ອເນກປຣິຍາເຍນ ອທິນ຺ນາທານໍ ຄຣຫຕິ ວິຄຣຫຕິ, ອທິນ຺ນາທານາ ວິຣມຖາຕິ ຈາຫ. ອຕ຺ຖິ ໂຂ ປນ ມຍາ ອທິນ຺ນໍ ອາທິນ຺ນໍ ຍາວຕກໍ ວາ ຕາວຕກໍ ວາ. ຍໍ ໂຂ ປນ ມຍາ ອທິນ຺ນໍ ອາທິນ຺ນໍ ຍາວຕກໍ ວາ ຕາວຕກໍ ວາ ຕໍ ນ ສຸຏ຺ຐຸ, ຕໍ ນ ສາຘຸ. ອຫຎ຺ເຈວ ໂຂ ປນ ຕປ຺ປຈ຺ຈຍາ ວິປ຺ປຏິສາຣີ ອສ຺ສໍ, ນ ເມຕໍ ປາປໍ ກມ຺ມໍ ອກຕໍ ຠວິສ຺ສຕີ’ຕິ. ໂສ ອິຕິ ປຏິສງ຺ຂາຍ ຕຎ຺ເຈວ ອທິນ຺ນາທານໍ ປຊຫຕິ. ອາຍຕິຎ຺ຈ ອທິນ຺ນາທານາ ປຏິວິຣໂຕ ໂຫຕິ. ເອວເມຕສ຺ສ ປາປສ຺ສ ກມ຺ມສ຺ສ ປຫານໍ ໂຫຕິ. ເອວເມຕສ຺ສ ປາປສ຺ສ ກມ຺ມສ຺ສ ສມຕິກ຺ກໂມ ໂຫຕິ.

‘‘‘ຠຄວາ ໂຂ ປນ ອເນກປຣິຍາເຍນ ກາເມສຸມິຈ຺ຉາຈາຣໍ ຄຣຫຕິ ວິຄຣຫຕິ, ກາເມສຸມິຈ຺ຉາຈາຣາ ວິຣມຖາຕິ ຈາຫ. ອຕ຺ຖິ ໂຂ ປນ ມຍາ ກາເມສຸ ມິຈ຺ຉາ ຈິຓ຺ຓໍ ຍາວຕກໍ ວາ ຕາວຕກໍ ວາ. ຍໍ ໂຂ ປນ ມຍາ ກາເມສຸ ມິຈ຺ຉາ ຈິຓ຺ຓໍ ຍາວຕກໍ ວາ ຕາວຕກໍ ວາ ຕໍ ນ ສຸຏ຺ຐຸ, ຕໍ ນ ສາຘຸ. ອຫຎ຺ເຈວ ໂຂ ປນ ຕປ຺ປຈ຺ຈຍາ ວິປ຺ປຏິສາຣີ ອສ຺ສໍ, ນ ເມຕໍ ປາປໍ ກມ຺ມໍ ອກຕໍ ຠວິສ຺ສຕີ’ຕິ. ໂສ ອິຕິ ປຏິສງ຺ຂາຍ ຕຎ຺ເຈວ ກາເມສຸມິຈ຺ຉາຈາຣໍ ປຊຫຕິ, ອາຍຕິຎ຺ຈ ກາເມສຸມິຈ຺ຉາຈາຣາ ປຏິວິຣໂຕ ໂຫຕິ. ເອວເມຕສ຺ສ ປາປສ຺ສ ກມ຺ມສ຺ສ ປຫານໍ ໂຫຕິ. ເອວເມຕສ຺ສ ປາປສ຺ສ ກມ຺ມສ຺ສ ສມຕິກ຺ກໂມ ໂຫຕິ.

‘‘‘ຠຄວາ ໂຂ ປນ ອເນກປຣິຍາເຍນ ມຸສາວາທໍ ຄຣຫຕິ ວິຄຣຫຕິ, ມຸສາວາທາ ວິຣມຖາຕິ ຈາຫ. ອຕ຺ຖິ ໂຂ ປນ ມຍາ ມຸສາ ຠຓິຕໍ ຍາວຕກໍ ວາ ຕາວຕກໍ ວາ. ຍໍ ໂຂ ປນ ມຍາ ມຸສາ ຠຓິຕໍ ຍາວຕກໍ ວາ ຕາວຕກໍ ວາ ຕໍ ນ ສຸຏ຺ຐຸ, ຕໍ ນ ສາຘຸ. ອຫຎ຺ເຈວ ໂຂ ປນ ຕປ຺ປຈ຺ຈຍາ ວິປ຺ປຏິສາຣີ ອສ຺ສໍ, ນ ເມຕໍ ປາປໍ ກມ຺ມໍ ອກຕໍ ຠວິສ຺ສຕີ’ຕິ. ໂສ ອິຕິ ປຏິສງ຺ຂາຍ ຕຎ຺ເຈວ ມຸສາວາທໍ ປຊຫຕິ, ອາຍຕິຎ຺ຈ ມຸສາວາທາ ປຏິວິຣໂຕ ໂຫຕິ. ເອວເມຕສ຺ສ ປາປສ຺ສ ກມ຺ມສ຺ສ ປຫານໍ ໂຫຕິ. ເອວເມຕສ຺ສ ປາປສ຺ສ ກມ຺ມສ຺ສ ສມຕິກ຺ກໂມ ໂຫຕິ.

‘‘ໂສ ປາຓາຕິປາຕໍ ປຫາຍ ປາຓາຕິປາຕາ ປຏິວິຣໂຕ ໂຫຕິ. ອທິນ຺ນາທານໍ ປຫາຍ ອທິນ຺ນາທານາ ປຏິວິຣໂຕ ໂຫຕິ. ກາເມສຸມິຈ຺ຉາຈາຣໍ ປຫາຍ ກາເມສຸມິຈ຺ຉາຈາຣາ ປຏິວິຣໂຕ ໂຫຕິ. ມຸສາວາທໍ ປຫາຍ ມຸສາວາທາ ປຏິວິຣໂຕ ໂຫຕິ. ປິສຸຓໍ ວາຈໍ ປຫາຍ ປິສຸຓາຍ ວາຈາຍ ປຏິວິຣໂຕ ໂຫຕິ. ຜຣຸສໍ ວາຈໍ ປຫາຍ ຜຣຸສາຍ ວາຈາຍ ປຏິວິຣໂຕ ໂຫຕິ. ສມ຺ຜປ຺ປລາປໍ ປຫາຍ ສມ຺ຜປ຺ປລາປາ ປຏິວິຣໂຕ ໂຫຕິ. ອຠິຊ຺ຌໍ ປຫາຍ ອນຠິຊ຺ຌາລຸ ໂຫຕິ. ພ຺ຍາປາທປ຺ປໂທສໍ ປຫາຍ ອພ຺ຍາປນ຺ນຈິຕ຺ໂຕ ໂຫຕິ. ມິຈ຺ຉາທິຏ຺ຐິໍ ປຫາຍ ສມ຺ມາທິຏ຺ຐິໂກ ໂຫຕິ.

‘‘ສ ໂຂ ໂສ, ຄາມຓິ, ອຣິຍສາວໂກ ເອວໍ ວິຄຕາຠິຊ຺ໂຌ ວິຄຕພ຺ຍາປາໂທ ອສມ຺ມູຬ຺ໂຫ ສມ຺ປຊາໂນ ປຏິສ຺ສໂຕ ເມຕ຺ຕາສຫຄເຕນ ເຈຕສາ ເອກໍ ທິສໍ ຜຣິຕ຺ວາ ວິຫຣຕິ, ຕຖາ ທຸຕິຍໍ, ຕຖາ ຕຕິຍໍ, ຕຖາ ຈຕຸຕ຺ຖໍ. ອິຕິ ອຸທ຺ຘມໂຘ ຕິຣິຍໍ ສພ຺ພຘິ ສພ຺ພຕ຺ຕຕາຍ ສພ຺ພາວນ຺ຕໍ ໂລກໍ ເມຕ຺ຕາສຫຄເຕນ ເຈຕສາ ວິປຸເລນ ມຫຄ຺ຄເຕນ ອປ຺ປມາເຓນ ອເວເຣນ ອພ຺ຍາປຊ຺ເຊນ ຜຣິຕ຺ວາ ວິຫຣຕິ. ເສຍ຺ຍຖາປິ, ຄາມຓິ, ພລວາ ສງ຺ຂຘໂມ ອປ຺ປກສິເຣເນວ ຈຕຸທ຺ທິສາ ວິຎ຺ຎາເປຍ຺ຍ; ເອວເມວ ໂຂ, ຄາມຓິ, ເອວໍ ຠາວິຕາຍ ເມຕ຺ຕາຍ ເຈໂຕວິມຸຕ຺ຕິຍາ ເອວໍ ພຫຸລີກຕາຍ ຍໍ ປມາຓກຕໍ ກມ຺ມໍ, ນ ຕໍ ຕຕ຺ຣາວສິສ຺ສຕິ, ນ ຕໍ ຕຕ຺ຣາວຕິຏ຺ຐຕິ.

‘‘ສ ໂຂ ໂສ, ຄາມຓິ, ອຣິຍສາວໂກ ເອວໍ ວິຄຕາຠິຊ຺ໂຌ ວິຄຕພ຺ຍາປາໂທ ອສມ຺ມູຬ຺ໂຫ ສມ຺ປຊາໂນ ປຏິສ຺ສໂຕ ກຣຸຓາສຫຄເຕນ ເຈຕສາ…ເປ… ມຸທິຕາສຫຄເຕນ ເຈຕສາ…ເປ…. ອຸເປກ຺ຂາສຫຄເຕນ ເຈຕສາ ເອກໍ ທິສໍ ຜຣິຕ຺ວາ ວິຫຣຕິ, ຕຖາ ທຸຕິຍໍ, ຕຖາ ຕຕິຍໍ, ຕຖາ ຈຕຸຕ຺ຖໍ. ອິຕິ ອຸທ຺ຘມໂຘ ຕິຣິຍໍ ສພ຺ພຘິ ສພ຺ພຕ຺ຕຕາຍ ສພ຺ພາວນ຺ຕໍ ໂລກໍ ອຸເປກ຺ຂາສຫຄເຕນ ເຈຕສາ ວິປຸເລນ ມຫຄ຺ຄເຕນ ອປ຺ປມາເຓນ ອເວເຣນ ອພ຺ຍາປຊ຺ເຊນ ຜຣິຕ຺ວາ ວິຫຣຕິ. ເສຍ຺ຍຖາປິ, ຄາມຓິ, ພລວາ ສງ຺ຂຘໂມ ອປ຺ປກສິເຣເນວ ຈຕຸທ຺ທິສາ ວິຎ຺ຎາເປຍ຺ຍ; ເອວເມວ ໂຂ, ຄາມຓິ, ເອວໍ ຠາວິຕາຍ ອຸເປກ຺ຂາຍ ເຈໂຕວິມຸຕ຺ຕິຍາ ເອວໍ ພຫຸລີກຕາຍ ຍໍ ປມາຓກຕໍ ກມ຺ມໍ ນ ຕໍ ຕຕ຺ຣາວສິສ຺ສຕິ, ນ ຕໍ ຕຕ຺ຣາວຕິຏ຺ຐຕີ’’ຕິ. ເອວໍ ວຸຕ຺ເຕ, ອສິພນ຺ຘກປຸຕ຺ໂຕ ຄາມຓິ ຠຄວນ຺ຕໍ ເອຕທໂວຈ – ‘‘ອຠິກ຺ກນ຺ຕໍ, ຠນ຺ເຕ, ອຠິກ຺ກນ຺ຕໍ, ຠນ຺ເຕ…ເປ… ອຸປາສກໍ ມໍ ຠຄວາ ຘາເຣຕຸ ອຊ຺ຊຕຄ຺ເຄ ປາຓຸເປຕໍ ສຣຓໍ ຄຕ’’ນ຺ຕິ. ອຏ຺ຐມໍ.