໑໐. ມຓິຈູຬກສຸຕ຺ຕໍ

໓໖໒. ເອກໍ ສມຍໍ ຠຄວາ ຣາຊຄເຫ ວິຫຣຕິ ເວຬຸວເນ ກລນ຺ທກນິວາເປ. ເຕນ ໂຂ ປນ ສມເຍນ ຣາຊນ຺ເຕປຸເຣ ຣາຊປຣິສາຍ ສນ຺ນິສິນ຺ນານໍ ສນ຺ນິປຕິຕານໍ ອຍມນ຺ຕຣາກຖາ ອຸທປາທິ – ‘‘ກປ຺ປຕິ ສມຓານໍ ສກ຺ຍປຸຕ຺ຕິຍານໍ ຊາຕຣູປຣຊຕໍ, ສາທິຍນ຺ຕິ ສມຓາ ສກ຺ຍປຸຕ຺ຕິຍາ ຊາຕຣູປຣຊຕໍ, ປຏິຄ຺ຄຓ຺ຫນ຺ຕິ ສມຓາ ສກ຺ຍປຸຕ຺ຕິຍາ ຊາຕຣູປຣຊຕ’’ນ຺ຕິ!

ເຕນ ໂຂ ປນ ສມເຍນ ມຓິຈູຬໂກ ຄາມຓິ ຕສ຺ສໍ ປຣິສາຍໍ ນິສິນ຺ໂນ ໂຫຕິ. ອຖ ໂຂ ມຓິຈູຬໂກ ຄາມຓິ ຕໍ ປຣິສໍ ເອຕທໂວຈ – ‘‘ມາ ອຍ຺ໂຍ [ອຍ຺ຍາ (ສີ. ປີ.)] ເອວໍ ອວຈຸຕ຺ຖ. ນ ກປ຺ປຕິ ສມຓານໍ ສກ຺ຍປຸຕ຺ຕິຍານໍ ຊາຕຣູປຣຊຕໍ, ນ ສາທິຍນ຺ຕິ ສມຓາ ສກ຺ຍປຸຕ຺ຕິຍາ ຊາຕຣູປຣຊຕໍ, ນປ຺ປຏິຄ຺ຄຓ຺ຫນ຺ຕິ ສມຓາ ສກ຺ຍປຸຕ຺ຕິຍາ ຊາຕຣູປຣຊຕໍ, ນິກ຺ຂິຕ຺ຕມຓິສຸວຓ຺ຓາ ສມຓາ ສກ຺ຍປຸຕ຺ຕິຍາ ອເປຕຊາຕຣູປຣຊຕາ’’ຕິ. ອສກ຺ຂິ ໂຂ ມຓິຈູຬໂກ ຄາມຓິ ຕໍ ປຣິສໍ ສຎ຺ຎາເປຕຸໍ. ອຖ ໂຂ ມຓິຈູຬໂກ ຄາມຓິ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ມຓິຈູຬໂກ ຄາມຓິ ຠຄວນ຺ຕໍ ເອຕທໂວຈ – ‘‘ອິຘ, ຠນ຺ເຕ, ຣາຊນ຺ເຕປຸເຣ ຣາຊປຣິສາຍ ສນ຺ນິສິນ຺ນານໍ ສນ຺ນິປຕິຕານໍ ອຍມນ຺ຕຣາກຖາ ອຸທປາທິ – ‘ກປ຺ປຕິ ສມຓານໍ ສກ຺ຍປຸຕ຺ຕິຍານໍ ຊາຕຣູປຣຊຕໍ, ສາທິຍນ຺ຕິ ສມຓາ ສກ຺ຍປຸຕ຺ຕິຍາ ຊາຕຣູປຣຊຕໍ, ປຏິຄ຺ຄຓ຺ຫນ຺ຕິ ສມຓາ ສກ຺ຍປຸຕ຺ຕິຍາ ຊາຕຣູປຣຊຕ’ນ຺ຕິ. ເອວໍ ວຸຕ຺ເຕ, ອຫໍ, ຠນ຺ເຕ, ຕໍ ປຣິສໍ ເອຕທໂວຈໍ – ‘ມາ ອຍ຺ໂຍ ເອວໍ ອວຈຸຕ຺ຖ. ນ ກປ຺ປຕິ ສມຓານໍ ສກ຺ຍປຸຕ຺ຕິຍານໍ ຊາຕຣູປຣຊຕໍ, ນ ສາທິຍນ຺ຕິ ສມຓາ ສກ຺ຍປຸຕ຺ຕິຍາ ຊາຕຣູປຣຊຕໍ, ນປ຺ປຏິຄ຺ຄຓ຺ຫນ຺ຕິ ສມຓາ ສກ຺ຍປຸຕ຺ຕິຍາ ຊາຕຣູປຣຊຕໍ, ນິກ຺ຂິຕ຺ຕມຓິສຸວຓ຺ຓາ ສມຓາ ສກ຺ຍປຸຕ຺ຕິຍາ ອເປຕຊາຕຣູປຣຊຕາ’ຕິ. ອສກ຺ຂິໍ ຂ຺ວາຫໍ, ຠນ຺ເຕ, ຕໍ ປຣິສໍ ສຎ຺ຎາເປຕຸໍ. ກຈ຺ຈາຫໍ, ຠນ຺ເຕ, ເອວໍ ພ຺ຍາກຣມາໂນ ວຸຕ຺ຕວາທີ ເຈວ ຠຄວໂຕ ໂຫມິ, ນ ຈ ຠຄວນ຺ຕໍ ອຠູເຕນ ອພ຺ຠາຈິກ຺ຂາມິ, ຘມ຺ມສ຺ສ ຈານຸຘມ຺ມໍ ພ຺ຍາກໂຣມິ, ນ ຈ ໂກຈິ ສຫຘມ຺ມິໂກ ວາທານຸວາໂທ ຄາຣຍ຺ຫໍ ຐານໍ ອາຄຈ຺ຉຕີ’’ຕິ?

‘‘ຕຄ຺ຆ ຕ຺ວໍ, ຄາມຓິ, ເອວໍ ພ຺ຍາກຣມາໂນ ວຸຕ຺ຕວາທີ ເຈວ ເມ ໂຫສິ, ນ ຈ ມໍ ອຠູເຕນ ອພ຺ຠາຈິກ຺ຂສິ, ຘມ຺ມສ຺ສ ຈານຸຘມ຺ມໍ ພ຺ຍາກໂຣສິ, ນ ຈ ໂກຈິ ສຫຘມ຺ມິໂກ ວາທານຸວາໂທ ຄາຣຍ຺ຫໍ ຐານໍ ອາຄຈ຺ຉຕິ. ນ ຫິ, ຄາມຓິ, ກປ຺ປຕິ ສມຓານໍ ສກ຺ຍປຸຕ຺ຕິຍານໍ ຊາຕຣູປຣຊຕໍ, ນ ສາທິຍນ຺ຕິ ສມຓາ ສກ຺ຍປຸຕ຺ຕິຍາ ຊາຕຣູປຣຊຕໍ, ນປ຺ປຏິຄ຺ຄຓ຺ຫນ຺ຕິ ສມຓາ ສກ຺ຍປຸຕ຺ຕິຍາ ຊາຕຣູປຣຊຕໍ, ນິກ຺ຂິຕ຺ຕມຓິສຸວຓ຺ຓາ ສມຓາ ສກ຺ຍປຸຕ຺ຕິຍາ ອເປຕຊາຕຣູປຣຊຕາ. ຍສ຺ສ ໂຂ, ຄາມຓິ, ຊາຕຣູປຣຊຕໍ ກປ຺ປຕິ, ປຎ຺ຈປິ ຕສ຺ສ ກາມຄຸຓາ ກປ຺ປນ຺ຕິ. ຍສ຺ສ ປຎ຺ຈ ກາມຄຸຓາ ກປ຺ປນ຺ຕິ ( ) [(ຕສ຺ສປິ ຊາຕຣູປຣຊຕໍ ກປ຺ປຕິ,) (ສ຺ຍາ. ກໍ.)], ເອກໍເສເນຕໍ, ຄາມຓິ, ຘາເຣຍ຺ຍາສິ ອສ຺ສມຓຘມ຺ໂມ ອສກ຺ຍປຸຕ຺ຕິຍຘມ຺ໂມຕິ. ອປິ ຈາຫໍ, ຄາມຓິ, ເອວໍ ວທາມິ – ຕິຓໍ ຕິຓຕ຺ຖິເກນ ປຣິເຍສິຕພ຺ພໍ, ທາຣຸ ທາຣຸຕ຺ຖິເກນ ປຣິເຍສິຕພ຺ພໍ, ສກຏໍ ສກຏຕ຺ຖິເກນ ປຣິເຍສິຕພ຺ພໍ, ປຸຣິໂສ ປຸຣິສຕ຺ຖິເກນ ປຣິເຍສິຕພ຺ໂພ [ປຣິເຍສິຕພ຺ໂພ’’ຕິ (?)]. ນຕ຺ເວວາຫໍ, ຄາມຓິ, ເກນຈິ ປຣິຍາເຍນ ‘ຊາຕຣູປຣຊຕໍ ສາທິຕພ຺ພໍ ປຣິເຍສິຕພ຺ພ’ນ຺ຕິ ວທາມີ’’ຕິ. ທສມໍ.