໑. ຈຓ຺ຑສຸຕ຺ຕໍ

໓໕໓. ສາວຕ຺ຖິນິທານໍ. ອຖ ໂຂ ຈຓ຺ໂຑ ຄາມຓິ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ຈຓ຺ໂຑ ຄາມຓິ ຠຄວນ຺ຕໍ ເອຕທໂວຈ – ‘‘ໂກ ນຸ ໂຂ, ຠນ຺ເຕ, ເຫຕຸ, ໂກ ປຈ຺ຈໂຍ ເຍນ ມິເຘກຈ຺ໂຈ ຈຓ຺ໂຑ ຈຓ຺ໂຑຕ຺ເວວ [ເຍນ ມິເຘກຈ຺ໂຈ ຈຓ຺ໂຑເຕວ (ສີ. ປີ.)] ສງ຺ຂໍ ຄຈ຺ຉຕິ. ໂກ ປນ, ຠນ຺ເຕ, ເຫຕຸ, ໂກ ປຈ຺ຈໂຍ ເຍນ ມິເຘກຈ຺ໂຈ ໂສຣໂຕ ໂສຣໂຕຕ຺ເວວ [ເຍນ ມິເຘກຈ຺ໂຈ ສຸຣໂຕເຕວ (ສີ. ປີ.)] ສງ຺ຂໍ ຄຈ຺ຉຕີ’’ຕິ? ‘‘ອິຘ, ຄາມຓິ, ເອກຈ຺ຈສ຺ສ ຣາໂຄ ອປ຺ປຫີໂນ ໂຫຕິ. ຣາຄສ຺ສ ອປ຺ປຫີນຕ຺ຕາ ປເຣ ໂກເປນ຺ຕິ, ປເຣຫິ ໂກປິຍມາໂນ ໂກປໍ ປາຕຸກໂຣຕິ. ໂສ ຈຓ຺ໂຑຕ຺ເວວ ສງ຺ຂໍ ຄຈ຺ຉຕິ. ໂທໂສ ອປ຺ປຫີໂນ ໂຫຕິ. ໂທສສ຺ສ ອປ຺ປຫີນຕ຺ຕາ ປເຣ ໂກເປນ຺ຕິ, ປເຣຫິ ໂກປິຍມາໂນ ໂກປໍ ປາຕຸກໂຣຕິ. ໂສ ຈຓ຺ໂຑຕ຺ເວວ ສງ຺ຂໍ ຄຈ຺ຉຕິ. ໂມໂຫ ອປ຺ປຫີໂນ ໂຫຕິ. ໂມຫສ຺ສ ອປ຺ປຫີນຕ຺ຕາ ປເຣ ໂກເປນ຺ຕິ, ປເຣຫິ ໂກປິຍມາໂນ ໂກປໍ ປາຕຸກໂຣຕິ. ໂສ ຈຓ຺ໂຑຕ຺ເວວ ສງ຺ຂໍ ຄຈ຺ຉຕິ. ອຍໍ ໂຂ, ຄາມຓິ, ເຫຕຸ, ອຍໍ ປຈ຺ຈໂຍ ເຍນ ມິເຘກຈ຺ໂຈ ຈຓ຺ໂຑ ຈຓ຺ໂຑຕ຺ເວວ ສງ຺ຂໍ ຄຈ຺ຉຕິ’’.

‘‘ອິຘ ປນ, ຄາມຓິ, ເອກຈ຺ຈສ຺ສ ຣາໂຄ ປຫີໂນ ໂຫຕິ. ຣາຄສ຺ສ ປຫີນຕ຺ຕາ ປເຣ ນ ໂກເປນ຺ຕິ, ປເຣຫິ ໂກປິຍມາໂນ ໂກປໍ ນ ປາຕຸກໂຣຕິ. ໂສ ໂສຣໂຕຕ຺ເວວ ສງ຺ຂໍ ຄຈ຺ຉຕິ. ໂທໂສ ປຫີໂນ ໂຫຕິ. ໂທສສ຺ສ ປຫີນຕ຺ຕາ ປເຣ ນ ໂກເປນ຺ຕິ, ປເຣຫິ ໂກປິຍມາໂນ ໂກປໍ ນ ປາຕຸກໂຣຕິ. ໂສ ໂສຣໂຕຕ຺ເວວ ສງ຺ຂໍ ຄຈ຺ຉຕິ. ໂມໂຫ ປຫີໂນ ໂຫຕິ. ໂມຫສ຺ສ ປຫີນຕ຺ຕາ ປເຣ ນ ໂກເປນ຺ຕິ, ປເຣຫິ ໂກປິຍມາໂນ ໂກປໍ ນ ປາຕຸກໂຣຕິ. ໂສ ໂສຣໂຕຕ຺ເວວ ສງ຺ຂໍ ຄຈ຺ຉຕິ. ອຍໍ ໂຂ, ຄາມຓິ, ເຫຕຸ ອຍໍ ປຈ຺ຈໂຍ ເຍນ ມິເຘກຈ຺ໂຈ ໂສຣໂຕ ໂສຣໂຕຕ຺ເວວ ສງ຺ຂໍ ຄຈ຺ຉຕີ’’ຕິ.

ເອວໍ ວຸຕ຺ເຕ, ຈຓ຺ໂຑ ຄາມຓິ ຠຄວນ຺ຕໍ ເອຕທໂວຈ – ‘‘ອຠິກ຺ກນ຺ຕໍ, ຠນ຺ເຕ, ອຠິກ຺ກນ຺ຕໍ, ຠນ຺ເຕ! ເສຍ຺ຍຖາປິ, ຠນ຺ເຕ, ນິກ຺ກຸຊ຺ຊິຕໍ ວາ ອຸກ຺ກຸຊ຺ເຊຍ຺ຍ, ປຏິຈ຺ຉນ຺ນໍ ວາ ວິວເຣຍ຺ຍ, ມູຬ຺ຫສ຺ສ ວາ ມຄ຺ຄໍ ອາຈິກ຺ເຂຍ຺ຍ, ອນ຺ຘກາເຣ ວາ ເຕລປຊ຺ໂຊຕໍ ຘາເຣຍ຺ຍ – ຈກ຺ຂຸມນ຺ໂຕ ຣູປານິ ທກ຺ຂນ຺ຕີຕິ; ເອວເມວໍ ຠຄວຕາ ອເນກປຣິຍາເຍນ ຘມ຺ໂມ ປກາສິໂຕ. ເອສາຫໍ, ຠນ຺ເຕ, ຠຄວນ຺ຕໍ ສຣຓໍ ຄຈ຺ຉາມິ ຘມ຺ມຎ຺ຈ ຠິກ຺ຂຸສງ຺ຆຎ຺ຈ. ອຸປາສກໍ ມໍ ຠຄວາ ຘາເຣຕຸ ອຊ຺ຊຕຄ຺ເຄ ປາຓຸເປຕໍ ສຣຓໍ ຄຕ’’ນ຺ຕິ. ປຐມໍ.