໘. ອຕ຺ຖິນຸໂຂປຣິຍາຍສຸຕ຺ຕໍ

໑໕໓. ‘‘ອຕ຺ຖິ ນຸ ໂຂ, ຠິກ຺ຂເວ, ປຣິຍາໂຍ ຍໍ ປຣິຍາຍໍ ອາຄມ຺ມ ຠິກ຺ຂຸ ອຎ຺ຎຕ຺ເຣວ ສທ຺ຘາຍ, ອຎ຺ຎຕ຺ຣ ຣຸຈິຍາ, ອຎ຺ຎຕ຺ຣ ອນຸສ຺ສວາ, ອຎ຺ຎຕ຺ຣ ອາກາຣປຣິວິຕກ຺ກາ, ອຎ຺ຎຕ຺ຣ ທິຏ຺ຐິນິຊ຺ຌານກ຺ຂນ຺ຕິຍາ ອຎ຺ຎໍ ພ຺ຍາກເຣຍ຺ຍ – ‘ຂີຓາ ຊາຕິ, ວຸສິຕໍ ພ຺ຣຫ຺ມຈຣິຍໍ, ກຕໍ ກຣຓີຍໍ, ນາປຣໍ ອິຕ຺ຖຕ຺ຕາຍາ’ຕິ ປຊານາມີ’’ຕິ [ປຊານາຕີຕິ (ສ຺ຍາ. ກໍ. ປີ. ກ.)]? ‘‘ຠຄວໍມູລກາ ໂນ, ຠນ຺ເຕ, ຘມ຺ມາ, ຠຄວໍເນຕ຺ຕິກາ ຠຄວໍປຏິສຣຓາ. ສາຘຸ ວຕ, ຠນ຺ເຕ, ຠຄວນ຺ຕໍເຍວ ປຏິຠາຕຸ ເອຕສ຺ສ ຠາສິຕສ຺ສ ອຕ຺ໂຖ. ຠຄວໂຕ ສຸຕ຺ວາ ຠິກ຺ຂູ ຘາເຣສ຺ສນ຺ຕີ’’ຕິ. ‘‘ເຕນ ຫິ, ຠິກ຺ຂເວ, ສຸຓາຖ, ສາຘຸກໍ ມນສິ ກໂຣຖ; ຠາສິສ຺ສາມີ’’ຕິ. ‘‘ເອວໍ, ຠນ຺ເຕ’’ຕິ ໂຂ ເຕ ຠິກ຺ຂູ ຠຄວໂຕ ປຈ຺ຈສ຺ໂສສຸໍ. ຠຄວາ ເອຕທໂວຈ – ‘‘ອຕ຺ຖິ, ຠິກ຺ຂເວ, ປຣິຍາໂຍ ຍໍ ປຣິຍາຍໍ ອາຄມ຺ມ ຠິກ຺ຂຸ ອຎ຺ຎຕ຺ເຣວ ສທ຺ຘາຍ, ອຎ຺ຎຕ຺ຣ ຣຸຈິຍາ, ອຎ຺ຎຕ຺ຣ ອນຸສ຺ສວາ, ອຎ຺ຎຕ຺ຣ ອາກາຣປຣິວິຕກ຺ກາ, ອຎ຺ຎຕ຺ຣ ທິຏ຺ຐິນິຊ຺ຌານກ຺ຂນ຺ຕິຍາ ອຎ຺ຎໍ ພ຺ຍາກເຣຍ຺ຍ – ‘ຂີຓາ ຊາຕິ, ວຸສິຕໍ ພ຺ຣຫ຺ມຈຣິຍໍ, ກຕໍ ກຣຓີຍໍ, ນາປຣໍ ອິຕ຺ຖຕ຺ຕາຍາ’ຕິ ປຊານາມີ’’ຕິ.

‘‘ກຕໂມ ຈ, ຠິກ຺ຂເວ, ປຣິຍາໂຍ, ຍໍ ປຣິຍາຍໍ ອາຄມ຺ມ ຠິກ຺ຂຸ ອຎ຺ຎຕ຺ເຣວ ສທ຺ຘາຍ…ເປ… ອຎ຺ຎຕ຺ຣ ທິຏ຺ຐິນິຊ຺ຌານກ຺ຂນ຺ຕິຍາ ອຎ຺ຎໍ ພ຺ຍາກໂຣຕິ – ‘ຂີຓາ ຊາຕິ, ວຸສິຕໍ ພ຺ຣຫ຺ມຈຣິຍໍ, ກຕໍ ກຣຓີຍໍ, ນາປຣໍ ອິຕ຺ຖຕ຺ຕາຍາຕິ ປຊານາມີ’ຕິ? ອິຘ, ຠິກ຺ຂເວ, ຠິກ຺ຂຸ ຈກ຺ຂຸນາ ຣູປໍ ທິສ຺ວາ ສນ຺ຕໍ ວາ ອຊ຺ຌຕ຺ຕໍ ຣາຄໂທສໂມຫໍ, ອຕ຺ຖິ ເມ ອຊ຺ຌຕ຺ຕໍ ຣາຄໂທສໂມໂຫຕິ ປຊານາຕິ; ອສນ຺ຕໍ ວາ ອຊ຺ຌຕ຺ຕໍ ຣາຄໂທສໂມຫໍ, ນຕ຺ຖິ ເມ ອຊ຺ຌຕ຺ຕໍ ຣາຄໂທສໂມໂຫຕິ ປຊານາຕິ. ຍໍ ຕໍ, ຠິກ຺ຂເວ, ຠິກ຺ຂຸ ຈກ຺ຂຸນາ ຣູປໍ ທິສ຺ວາ ສນ຺ຕໍ ວາ ອຊ຺ຌຕ຺ຕໍ ຣາຄໂທສໂມຫໍ, ອຕ຺ຖິ ເມ ອຊ຺ຌຕ຺ຕໍ ຣາຄໂທສໂມໂຫຕິ ປຊານາຕິ; ອສນ຺ຕໍ ວາ ອຊ຺ຌຕ຺ຕໍ ຣາຄໂທສໂມຫໍ, ນຕ຺ຖິ ເມ ອຊ຺ຌຕ຺ຕໍ ຣາຄໂທສໂມໂຫຕິ ປຊານາຕິ. ອປິ ນຸເມ, ຠິກ຺ຂເວ, ຘມ຺ມາ ສທ຺ຘາຍ ວາ ເວທິຕພ຺ພາ, ຣຸຈິຍາ ວາ ເວທິຕພ຺ພາ, ອນຸສ຺ສເວນ ວາ ເວທິຕພ຺ພາ, ອາກາຣປຣິວິຕກ຺ເກນ ວາ ເວທິຕພ຺ພາ, ທິຏ຺ຐິນິຊ຺ຌານກ຺ຂນ຺ຕິຍາ ວາ ເວທິຕພ຺ພາ’’ຕິ? ‘‘ໂນ ເຫຕໍ, ຠນ຺ເຕ’’. ‘‘ນນຸເມ, ຠິກ຺ຂເວ, ຘມ຺ມາ ປຎ຺ຎາຍ ທິສ຺ວາ ເວທິຕພ຺ພາ’’ຕິ? ‘‘ເອວໍ, ຠນ຺ເຕ’’. ‘‘ອຍໍ ໂຂ, ຠິກ຺ຂເວ, ປຣິຍາໂຍ ຍໍ ປຣິຍາຍໍ ອາຄມ຺ມ ຠິກ຺ຂຸ ອຎ຺ຎຕ຺ເຣວ ສທ຺ຘາຍ, ອຎ຺ຎຕ຺ຣ ຣຸຈິຍາ, ອຎ຺ຎຕ຺ຣ ອນຸສ຺ສວາ, ອຎ຺ຎຕ຺ຣ ອາກາຣປຣິວິຕກ຺ກາ, ອຎ຺ຎຕ຺ຣ ທິຏ຺ຐິນິຊ຺ຌານກ຺ຂນ຺ຕິຍາ ອຎ຺ຎໍ ພ຺ຍາກໂຣຕິ – ‘ຂີຓາ ຊາຕິ, ວຸສິຕໍ ພ຺ຣຫ຺ມຈຣິຍໍ, ກຕໍ ກຣຓີຍໍ, ນາປຣໍ ອິຕ຺ຖຕ຺ຕາຍາ’ຕິ ປຊານາມີ’’ຕິ…ເປ….

‘‘ປຸນ ຈປຣໍ, ຠິກ຺ຂເວ, ຠິກ຺ຂຸ ຊິວ຺ຫາຍ ຣສໍ ສາຍິຕ຺ວາ ສນ຺ຕໍ ວາ ອຊ຺ຌຕ຺ຕໍ…ເປ… ຣາຄໂທສໂມໂຫຕິ ປຊານາຕິ; ອສນ຺ຕໍ ວາ ອຊ຺ຌຕ຺ຕໍ ຣາຄໂທສໂມຫໍ, ນຕ຺ຖິ ເມ ອຊ຺ຌຕ຺ຕໍ ຣາຄໂທສໂມໂຫຕິ ປຊານາຕິ. ຍໍ ຕໍ, ຠິກ຺ຂເວ, ຊິວ຺ຫາຍ ຣສໍ ສາຍິຕ຺ວາ ສນ຺ຕໍ ວາ ອຊ຺ຌຕ຺ຕໍ ຣາຄໂທສໂມຫໍ, ອຕ຺ຖິ ເມ ອຊ຺ຌຕ຺ຕໍ ຣາຄໂທສໂມໂຫຕິ ປຊານາຕິ; ອສນ຺ຕໍ ວາ ອຊ຺ຌຕ຺ຕໍ ຣາຄໂທສໂມຫໍ, ນຕ຺ຖິ ເມ ອຊ຺ຌຕ຺ຕໍ ຣາຄໂທສໂມໂຫຕິ ປຊານາຕິ; ອປິ ນຸເມ, ຠິກ຺ຂເວ, ຘມ຺ມາ ສທ຺ຘາຍ ວາ ເວທິຕພ຺ພາ, ຣຸຈິຍາ ວາ ເວທິຕພ຺ພາ, ອນຸສ຺ສເວນ ວາ ເວທິຕພ຺ພາ, ອາກາຣປຣິວິຕກ຺ເກນ ວາ ເວທິຕພ຺ພາ, ທິຏ຺ຐິນິຊ຺ຌານກ຺ຂນ຺ຕິຍາ ວາ ເວທິຕພ຺ພາ’’ຕິ? ‘‘ໂນ ເຫຕໍ, ຠນ຺ເຕ’’. ‘‘ນນຸເມ, ຠິກ຺ຂເວ, ຘມ຺ມາ ປຎ຺ຎາຍ ທິສ຺ວາ ເວທິຕພ຺ພາ’’ຕິ? ‘‘ເອວໍ, ຠນ຺ເຕ’’. ‘‘ອຍມ຺ປິ ໂຂ, ຠິກ຺ຂເວ, ປຣິຍາໂຍ ຍໍ ປຣິຍາຍໍ ອາຄມ຺ມ ຠິກ຺ຂຸ ອຎ຺ຎຕ຺ເຣວ ສທ຺ຘາຍ, ອຎ຺ຎຕ຺ຣ ຣຸຈິຍາ, ອຎ຺ຎຕ຺ຣ ອນຸສ຺ສວາ, ອຎ຺ຎຕ຺ຣ ອາກາຣປຣິວິຕກ຺ກາ, ອຎ຺ຎຕ຺ຣ ທິຏ຺ຐິນິຊ຺ຌານກ຺ຂນ຺ຕິຍາ ອຎ຺ຎໍ ພ຺ຍາກໂຣຕິ – ‘ຂີຓາ ຊາຕິ, ວຸສິຕໍ ພ຺ຣຫ຺ມຈຣິຍໍ, ກຕໍ ກຣຓີຍໍ, ນາປຣໍ ອິຕ຺ຖຕ຺ຕາຍາ’ຕິ ປຊານາມີ’’ຕິ [ປຊານາຕີຕິ (ສ຺ຍາ. ກໍ. ປີ. ກ.)] …ເປ….

‘‘ປຸນ ຈປຣໍ, ຠິກ຺ຂເວ, ຠິກ຺ຂຸ ມນສາ ຘມ຺ມໍ ວິຎ຺ຎາຍ ສນ຺ຕໍ ວາ ອຊ຺ຌຕ຺ຕໍ ຣາຄໂທສໂມຫໍ, ອຕ຺ຖິ ເມ ອຊ຺ຌຕ຺ຕໍ ຣາຄໂທສໂມໂຫຕິ ປຊານາຕິ; ອສນ຺ຕໍ ວາ ອຊ຺ຌຕ຺ຕໍ ຣາຄໂທສໂມຫໍ, ນຕ຺ຖິ ເມ ອຊ຺ຌຕ຺ຕໍ ຣາຄໂທສໂມໂຫຕິ ປຊານາຕິ. ຍໍ ຕໍ, ຠິກ຺ຂເວ, ຠິກ຺ຂຸ ມນສາ ຘມ຺ມໍ ວິຎ຺ຎາຍ ສນ຺ຕໍ ວາ ອຊ຺ຌຕ຺ຕໍ ຣາຄໂທສໂມຫໍ, ອຕ຺ຖິ ເມ ອຊ຺ຌຕ຺ຕໍ ຣາຄໂທສໂມໂຫຕິ ປຊານາຕິ; ອສນ຺ຕໍ ວາ ອຊ຺ຌຕ຺ຕໍ ຣາຄໂທສໂມຫໍ, ນຕ຺ຖິ ເມ ອຊ຺ຌຕ຺ຕໍ ຣາຄໂທສໂມໂຫຕິ ປຊານາຕິ; ອປິ ນຸເມ, ຠິກ຺ຂເວ, ຘມ຺ມາ ສທ຺ຘາຍ ວາ ເວທິຕພ຺ພາ, ຣຸຈິຍາ ວາ ເວທິຕພ຺ພາ, ອນຸສ຺ສເວນ ວາ ເວທິຕພ຺ພາ, ອາກາຣປຣິວິຕກ຺ເກນ ວາ ເວທິຕພ຺ພາ, ທິຏ຺ຐິນິຊ຺ຌານກ຺ຂນ຺ຕິຍາ ວາ ເວທິຕພ຺ພາ’’ຕິ? ‘‘ໂນ ເຫຕໍ, ຠນ຺ເຕ’’. ‘‘ນນຸເມ, ຠິກ຺ຂເວ, ຘມ຺ມາ ປຎ຺ຎາຍ ທິສ຺ວາ ເວທິຕພ຺ພາ’’ຕິ? ‘‘ເອວໍ, ຠນ຺ເຕ’’. ‘‘ອຍມ຺ປິ ໂຂ, ຠິກ຺ຂເວ, ປຣິຍາໂຍ ຍໍ ປຣິຍາຍໍ ອາຄມ຺ມ ຠິກ຺ຂຸ ອຎ຺ຎຕ຺ເຣວ ສທ຺ຘາຍ, ອຎ຺ຎຕ຺ຣ ຣຸຈິຍາ, ອຎ຺ຎຕ຺ຣ ອນຸສ຺ສວາ, ອຎ຺ຎຕ຺ຣ ອາກາຣປຣິວິຕກ຺ກາ, ອຎ຺ຎຕ຺ຣ ທິຏ຺ຐິນິຊ຺ຌານກ຺ຂນ຺ຕິຍາ ອຎ຺ຎໍ ພ຺ຍາກໂຣຕິ – ‘ຂີຓາ ຊາຕິ, ວຸສິຕໍ ພ຺ຣຫ຺ມຈຣິຍໍ, ກຕໍ ກຣຓີຍໍ, ນາປຣໍ ອິຕ຺ຖຕ຺ຕາຍາ’ຕິ ປຊານາມີ’’ຕິ. ອຏ຺ຐມໍ.