໙. ອິນ຺ທ຺ຣິຍສມ຺ປນ຺ນສຸຕ຺ຕໍ

໑໕໔. ອຖ ໂຂ ອຎ຺ຎຕໂຣ ຠິກ຺ຂຸ ເຍນ ຠຄວາ ເຕນຸປສງ຺ກມິ…ເປ… ເອກມນ຺ຕໍ ນິສິນ຺ໂນ ໂຂ ໂສ ຠິກ຺ຂຸ ຠຄວນ຺ຕໍ ເອຕທໂວຈ – ‘‘‘ອິນ຺ທ຺ຣິຍສມ຺ປນ຺ໂນ, ອິນ຺ທ຺ຣິຍສມ຺ປນ຺ໂນ’ຕິ, ຠນ຺ເຕ, ວຸຈ຺ຈຕິ. ກິຕ຺ຕາວຕາ ນຸ ໂຂ, ຠນ຺ເຕ, ອິນ຺ທ຺ຣິຍສມ຺ປນ຺ໂນ ໂຫຕີ’’ຕິ?

‘‘ຈກ຺ຂຸນ຺ທ຺ຣິເຍ ເຈ, ຠິກ຺ຂຸ, ອຸທຍພ຺ພຍານຸປສ຺ສີ ວິຫຣນ຺ໂຕ ຈກ຺ຂຸນ຺ທ຺ຣິເຍ ນິພ຺ພິນ຺ທຕິ…ເປ… ຊິວ຺ຫິນ຺ທ຺ຣິເຍ ເຈ, ຠິກ຺ຂຸ, ອຸທຍພ຺ພຍານຸປສ຺ສີ ວິຫຣນ຺ໂຕ ຊິວ຺ຫິນ຺ທ຺ຣິເຍ ນິພ຺ພິນ຺ທຕິ…ເປ… ມນິນ຺ທ຺ຣິເຍ ເຈ, ຠິກ຺ຂຸ, ອຸທຍພ຺ພຍານຸປສ຺ສີ ວິຫຣນ຺ໂຕ ມນິນ຺ທ຺ຣິເຍ ນິພ຺ພິນ຺ທຕິ. ນິພ຺ພິນ຺ທໍ ວິຣຊ຺ຊຕິ…ເປ… ວິມຸຕ຺ຕສ຺ມິໍ ວິມຸຕ຺ຕມິຕິ ຎາຓໍ ໂຫຕິ. ‘ຂີຓາ ຊາຕິ, ວຸສິຕໍ ພ຺ຣຫ຺ມຈຣິຍໍ, ກຕໍ ກຣຓີຍໍ, ນາປຣໍ ອິຕ຺ຖຕ຺ຕາຍາ’ຕິ ປຊານາຕິ. ເອຕ຺ຕາວຕາ ໂຂ, ຠິກ຺ຂຸ, ອິນ຺ທ຺ຣິຍສມ຺ປນ຺ໂນ ໂຫຕີ’’ຕິ. ນວມໍ.