໑. ປຐມມາຣປາສສຸຕ຺ຕໍ

໑໑໔. ‘‘ສນ຺ຕິ, ຠິກ຺ຂເວ, ຈກ຺ຂຸວິຎ຺ເຎຍ຺ຍາ ຣູປາ, ອິຏ຺ຐາ ກນ຺ຕາ ມນາປາ ປິຍຣູປາ ກາມູປສໍຫິຕາ ຣຊນີຍາ. ຕຎ຺ເຈ, ຠິກ຺ຂຸ, ອຠິນນ຺ທຕິ ອຠິວທຕິ ອຊ຺ໂຌສາຍ ຕິຏ຺ຐຕິ – ອຍໍ ວຸຈ຺ຈຕິ, ຠິກ຺ຂເວ, ຠິກ຺ຂຸ ອາວາສຄໂຕ ມາຣສ຺ສ, ມາຣສ຺ສ ວສໍ ຄໂຕ [ວສຄໂຕ (ສີ. ອຏ຺ຐ. ສ຺ຍາ. ອຏ຺ຐ.)], ປຏິມຸກ຺ກສ຺ສ ມາຣປາໂສ. ພທ຺ໂຘ ໂສ ມາຣພນ຺ຘເນນ ຍຖາກາມກຣຓີໂຍ ປາປິມໂຕ…ເປ….

‘‘ສນ຺ຕິ, ຠິກ຺ຂເວ, ຊິວ຺ຫາວິຎ຺ເຎຍ຺ຍາ ຣສາ, ອິຏ຺ຐາ ກນ຺ຕາ ມນາປາ ປິຍຣູປາ ກາມູປສໍຫິຕາ ຣຊນີຍາ. ຕຎ຺ເຈ ຠິກ຺ຂຸ ອຠິນນ຺ທຕິ ອຠິວທຕິ ອຊ຺ໂຌສາຍ ຕິຏ຺ຐຕິ – ອຍໍ ວຸຈ຺ຈຕິ, ຠິກ຺ຂເວ, ຠິກ຺ຂຸ ອາວາສຄໂຕ ມາຣສ຺ສ, ມາຣສ຺ສ ວສໍ ຄໂຕ, ປຏິມຸກ຺ກສ຺ສ ມາຣປາໂສ. ພທ຺ໂຘ ໂສ ມາຣພນ຺ຘເນນ…ເປ….

‘‘ສນ຺ຕິ, ຠິກ຺ຂເວ, ມໂນວິຎ຺ເຎຍ຺ຍາ ຘມ຺ມາ, ອິຏ຺ຐາ ກນ຺ຕາ ມນາປາ ປິຍຣູປາ ກາມູປສໍຫິຕາ ຣຊນີຍາ. ຕຎ຺ເຈ ຠິກ຺ຂຸ ອຠິນນ຺ທຕິ ອຠິວທຕິ ອຊ຺ໂຌສາຍ ຕິຏ຺ຐຕິ – ອຍໍ ວຸຈ຺ຈຕິ, ຠິກ຺ຂເວ, ຠິກ຺ຂຸ ອາວາສຄໂຕ ມາຣສ຺ສ, ມາຣສ຺ສ ວສໍ ຄໂຕ, ປຏິມຸກ຺ກສ຺ສ ມາຣປາໂສ. ພທ຺ໂຘ ໂສ ມາຣພນ຺ຘເນນ ຍຖາກາມກຣຓີໂຍ ປາປິມໂຕ.

‘‘ສນ຺ຕິ ຈ ໂຂ, ຠິກ຺ຂເວ, ຈກ຺ຂຸວິຎ຺ເຎຍ຺ຍາ ຣູປາ, ອິຏ຺ຐາ ກນ຺ຕາ ມນາປາ ປິຍຣູປາ ກາມູປສໍຫິຕາ ຣຊນີຍາ. ຕຎ຺ເຈ ຠິກ຺ຂຸ ນາຠິນນ຺ທຕິ ນາຠິວທຕິ ນາຊ຺ໂຌສາຍ ຕິຏ຺ຐຕິ – ອຍໍ ວຸຈ຺ຈຕິ, ຠິກ຺ຂເວ, ຠິກ຺ຂຸ ນາວາສຄໂຕ ມາຣສ຺ສ, ນ ມາຣສ຺ສ ວສໍ ຄໂຕ, ອຸມ຺ມຸກ຺ກສ຺ສ ມາຣປາໂສ. ມຸຕ຺ໂຕ ໂສ ມາຣພນ຺ຘເນນ ນ ຍຖາກາມກຣຓີໂຍ ປາປິມໂຕ…ເປ….

‘‘ສນ຺ຕິ, ຠິກ຺ຂເວ, ຊິວ຺ຫາວິຎ຺ເຎຍ຺ຍາ ຣສາ, ອິຏ຺ຐາ ກນ຺ຕາ ມນາປາ ປິຍຣູປາ ກາມູປສໍຫິຕາ ຣຊນີຍາ. ຕຎ຺ເຈ ຠິກ຺ຂຸ ນາຠິນນ຺ທຕິ ນາຠິວທຕິ ນາຊ຺ໂຌສາຍ ຕິຏ຺ຐຕິ – ອຍໍ ວຸຈ຺ຈຕິ, ຠິກ຺ຂເວ, ຠິກ຺ຂຸ ນາວາສຄໂຕ ມາຣສ຺ສ, ນ ມາຣສ຺ສ ວສໍ ຄໂຕ, ອຸມ຺ມຸກ຺ກສ຺ສ ມາຣປາໂສ. ມຸຕ຺ໂຕ ໂສ ມາຣພນ຺ຘເນນ ນ ຍຖາກາມກຣຓີໂຍ ປາປິມໂຕ…ເປ….

‘‘ສນ຺ຕິ, ຠິກ຺ຂເວ, ມໂນວິຎ຺ເຎຍ຺ຍາ ຘມ຺ມາ, ອິຏ຺ຐາ ກນ຺ຕາ ມນາປາ ປິຍຣູປາ ກາມູປສໍຫິຕາ ຣຊນີຍາ. ຕຎ຺ເຈ ຠິກ຺ຂຸ ນາຠິນນ຺ທຕິ ນາຠິວທຕິ ນາຊ຺ໂຌສາຍ ຕິຏ຺ຐຕິ – ອຍໍ ວຸຈ຺ຈຕິ, ຠິກ຺ຂເວ, ຠິກ຺ຂຸ ນາວາສຄໂຕ ມາຣສ຺ສ, ນ ມາຣສ຺ສ ວສໍ ຄໂຕ, ອຸມ຺ມຸກ຺ກສ຺ສ ມາຣປາໂສ. ມຸຕ຺ໂຕ ໂສ ມາຣພນ຺ຘເນນ ນ ຍຖາກາມກຣຓີໂຍ ປາປິມໂຕ’’ຕິ. ປຐມໍ.