໒. ທຸຕິຍມາຣປາສສຸຕ຺ຕໍ

໑໑໕. ‘‘ສນ຺ຕິ, ຠິກ຺ຂເວ, ຈກ຺ຂຸວິຎ຺ເຎຍ຺ຍາ ຣູປາ, ອິຏ຺ຐາ ກນ຺ຕາ ມນາປາ ປິຍຣູປາ ກາມູປສໍຫິຕາ ຣຊນີຍາ. ຕຎ຺ເຈ ຠິກ຺ຂຸ ອຠິນນ຺ທຕິ ອຠິວທຕິ ອຊ຺ໂຌສາຍ ຕິຏ຺ຐຕິ – ອຍໍ ວຸຈ຺ຈຕິ, ຠິກ຺ຂເວ, ຠິກ຺ຂຸ ພທ຺ໂຘ ຈກ຺ຂຸວິຎ຺ເຎຍ຺ເຍສຸ ຣູເປສຸ, ອາວາສຄໂຕ ມາຣສ຺ສ, ມາຣສ຺ສ ວສໍ ຄໂຕ, ປຏິມຸກ຺ກສ຺ສ ມາຣປາໂສ. ພທ຺ໂຘ ໂສ ມາຣພນ຺ຘເນນ ຍຖາກາມກຣຓີໂຍ ປາປິມໂຕ…ເປ….

‘‘ສນ຺ຕິ, ຠິກ຺ຂເວ, ຊິວ຺ຫາວິຎ຺ເຎຍ຺ຍາ ຣສາ…ເປ… ສນ຺ຕິ, ຠິກ຺ຂເວ, ມໂນວິຎ຺ເຎຍ຺ຍາ ຘມ຺ມາ, ອິຏ຺ຐາ ກນ຺ຕາ ມນາປາ ປິຍຣູປາ ກາມູປສໍຫິຕາ ຣຊນີຍາ. ຕຎ຺ເຈ ຠິກ຺ຂຸ ອຠິນນ຺ທຕິ ອຠິວທຕິ ອຊ຺ໂຌສາຍ ຕິຏ຺ຐຕິ – ອຍໍ ວຸຈ຺ຈຕິ, ຠິກ຺ຂເວ, ຠິກ຺ຂຸ ພທ຺ໂຘ ມໂນວິຎ຺ເຎຍ຺ເຍສຸ ຘມ຺ເມສຸ, ອາວາສຄໂຕ ມາຣສ຺ສ, ມາຣສ຺ສ ວສໍ ຄໂຕ, ປຏິມຸກ຺ກສ຺ສ ມາຣປາໂສ. ພທ຺ໂຘ ໂສ ມາຣພນ຺ຘເນນ ຍຖາກາມກຣຓີໂຍ ປາປິມໂຕ…ເປ….

‘‘ສນ຺ຕິ ຈ ໂຂ, ຠິກ຺ຂເວ, ຈກ຺ຂຸວິຎ຺ເຎຍ຺ຍາ ຣູປາ, ອິຏ຺ຐາ ກນ຺ຕາ ມນາປາ ປິຍຣູປາ ກາມູປສໍຫິຕາ ຣຊນີຍາ. ຕຎ຺ເຈ ຠິກ຺ຂຸ ນາຠິນນ຺ທຕິ ນາຠິວທຕິ ນາຊ຺ໂຌສາຍ ຕິຏ຺ຐຕິ – ອຍໍ ວຸຈ຺ຈຕິ, ຠິກ຺ຂເວ, ຠິກ຺ຂຸ ມຸຕ຺ໂຕ ຈກ຺ຂຸວິຎ຺ເຎຍ຺ເຍຫິ ຣູເປຫິ, ນາວາສຄໂຕ ມາຣສ຺ສ, ນ ມາຣສ຺ສ ວສໍ ຄໂຕ, ອຸມ຺ມຸກ຺ກສ຺ສ ມາຣປາໂສ. ມຸຕ຺ໂຕ ໂສ ມາຣພນ຺ຘເນນ ນ ຍຖາກາມກຣຓີໂຍ ປາປິມໂຕ…ເປ….

‘‘ສນ຺ຕິ, ຠິກ຺ຂເວ, ຊິວ຺ຫາວິຎ຺ເຎຍ຺ຍາ ຣສາ…ເປ… ສນ຺ຕິ, ຠິກ຺ຂເວ, ມໂນວິຎ຺ເຎຍ຺ຍາ ຘມ຺ມາ, ອິຏ຺ຐາ ກນ຺ຕາ ມນາປາ ປິຍຣູປາ ກາມູປສໍຫິຕາ ຣຊນີຍາ. ຕຎ຺ເຈ ຠິກ຺ຂຸ ນາຠິນນ຺ທຕິ ນາຠິວທຕິ ນາຊ຺ໂຌສາຍ ຕິຏ຺ຐຕິ – ອຍໍ ວຸຈ຺ຈຕິ, ຠິກ຺ຂເວ, ຠິກ຺ຂຸ ມຸຕ຺ໂຕ ມໂນວິຎ຺ເຎຍ຺ເຍຫິ ຘມ຺ເມຫິ, ນາວາສຄໂຕ ມາຣສ຺ສ, ນ ມາຣສ຺ສ ວສໍ ຄໂຕ, ອຸມ຺ມຸກ຺ກສ຺ສ ມາຣປາໂສ. ມຸຕ຺ໂຕ ໂສ ມາຣພນ຺ຘເນນ ນ ຍຖາກາມກຣຓີໂຍ ປາປິມໂຕ’’ຕິ. ທຸຕິຍໍ.