໒. ອວິຕກ຺ກສຸຕ຺ຕໍ

໓໓໓. ສາວຕ຺ຖິນິທານໍ. ອທ຺ທສາ ໂຂ ອາຍສ຺ມາ ອານນ຺ໂທ…ເປ… ອາຍສ຺ມນ຺ຕໍ ສາຣິປຸຕ຺ຕໍ ເອຕທໂວຈ – ‘‘ວິປ຺ປສນ຺ນານິ ໂຂ ເຕ, ອາວຸໂສ ສາຣິປຸຕ຺ຕ, ອິນ຺ທ຺ຣິຍານິ; ປຣິສຸທ຺ໂຘ ມຸຂວຓ຺ໂຓ ປຣິໂຍທາໂຕ. ກຕເມນາຍສ຺ມາ ສາຣິປຸຕ຺ໂຕ ອຊ຺ຊ ວິຫາເຣນ ວິຫາສີ’’ຕິ?

‘‘ອິຘາຫໍ, ອາວຸໂສ, ວິຕກ຺ກວິຈາຣານໍ ວູປສມາ ອຊ຺ຌຕ຺ຕໍ ສມ຺ປສາທນໍ ເຈຕໂສ ເອໂກທິຠາວໍ ອວິຕກ຺ກໍ ອວິຈາຣໍ ສມາຘິຊໍ ປີຕິສຸຂໍ ທຸຕິຍໍ ຌານໍ ອຸປສມ຺ປຊ຺ຊ ວິຫຣາມິ. ຕສ຺ສ ມຍ຺ຫໍ, ອາວຸໂສ, ນ ເອວໍ ໂຫຕິ – ‘ອຫໍ ທຸຕິຍໍ ຌານໍ ສມາປຊ຺ຊາມີ’ຕິ ວາ ‘ອຫໍ ທຸຕິຍໍ ຌານໍ ສມາປນ຺ໂນ’ຕິ ວາ ‘ອຫໍ ທຸຕິຍາ ຌານາ ວຸຏ຺ຐິໂຕ’ຕິ ວາ’’ຕິ. ‘‘ຕຖາ ຫິ ປນາຍສ຺ມໂຕ ສາຣິປຸຕ຺ຕສ຺ສ ທີຆຣຕ຺ຕໍ ອຫງ຺ກາຣມມງ຺ກາຣມານານຸສຍາ ສຸສມູຫຕາ. ຕສ຺ມາ ອາຍສ຺ມໂຕ ສາຣິປຸຕ຺ຕສ຺ສ ນ ເອວໍ ໂຫຕິ – ‘ອຫໍ ທຸຕິຍໍ ຌານໍ ສມາປຊ຺ຊາມີ’ຕິ ວາ ‘ອຫໍ ທຸຕິຍໍ ຌານໍ ສມາປນ຺ໂນ’ຕິ ວາ ‘ອຫໍ ທຸຕິຍາ ຌານາ ວຸຏ຺ຐິໂຕ’ຕິ ວາ’’ຕິ. ທຸຕິຍໍ.