໓. ປີຕິສຸຕ຺ຕໍ

໓໓໔. ສາວຕ຺ຖິນິທານໍ. ອທ຺ທສາ ໂຂ ອາຍສ຺ມາ ອານນ຺ໂທ…ເປ… ‘‘ວິປ຺ປສນ຺ນານິ ໂຂ ເຕ, ອາວຸໂສ ສາຣິປຸຕ຺ຕ, ອິນ຺ທ຺ຣິຍານິ; ປຣິສຸທ຺ໂຘ ມຸຂວຓ຺ໂຓ ປຣິໂຍທາໂຕ. ກຕເມນາຍສ຺ມາ ສາຣິປຸຕ຺ໂຕ ອຊ຺ຊ ວິຫາເຣນ ວິຫາສີ’’ຕິ?

‘‘ອິຘາຫໍ, ອາວຸໂສ, ປີຕິຍາ ຈ ວິຣາຄາ ອຸເປກ຺ຂໂກ ຈ ວິຫາສິໍ ສໂຕ ຈ ສມ຺ປຊາໂນ ສຸຂຎ຺ຈ ກາເຍນ ປຏິສໍເວເທມິ; ຍໍ ຕໍ ອຣິຍາ ອາຈິກ຺ຂນ຺ຕິ ‘ອຸເປກ຺ຂໂກ ສຕິມາ ສຸຂວິຫາຣີ’ຕິ ຕຕິຍໍ ຌານໍ ອຸປສມ຺ປຊ຺ຊ ວິຫຣາມິ. ຕສ຺ສ ມຍ຺ຫໍ, ອາວຸໂສ, ນ ເອວໍ ໂຫຕິ – ‘ອຫໍ ຕຕິຍໍ ຌານໍ ສມາປຊ຺ຊາມີ’ຕິ ວາ ‘ອຫໍ ຕຕິຍໍ ຌານໍ ສມາປນ຺ໂນ’ຕິ ວາ ‘ອຫໍ ຕຕິຍາ ຌານາ ວຸຏ຺ຐິໂຕ’ຕິ ວາ’’ຕິ. ‘‘ຕຖາ ຫິ ປນາຍສ຺ມໂຕ ສາຣິປຸຕ຺ຕສ຺ສ ທີຆຣຕ຺ຕໍ ອຫງ຺ກາຣມມງ຺ກາຣມານານຸສຍາ ສຸສມູຫຕາ. ຕສ຺ມາ ອາຍສ຺ມໂຕ ສາຣິປຸຕ຺ຕສ຺ສ ນ ເອວໍ ໂຫຕິ – ‘ອຫໍ ຕຕິຍໍ ຌານໍ ສມາປຊ຺ຊາມີ’ຕິ ວາ ‘ອຫໍ ຕຕິຍໍ ຌານໍ ສມາປນ຺ໂນ’ຕິ ວາ ‘ອຫໍ ຕຕິຍາ ຌານາ ວຸຏ຺ຐິໂຕ’ຕິ ວາ’’ຕິ. ຕຕິຍໍ.