໑. ມາຣສຸຕ຺ຕໍ

໑໖໐. ສາວຕ຺ຖິນິທານໍ. ອຖ ໂຂ ອາຍສ຺ມາ ຣາໂຘ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ອາຍສ຺ມາ ຣາໂຘ ຠຄວນ຺ຕໍ ເອຕທໂວຈ –

‘‘‘ມາໂຣ, ມາໂຣ’ຕິ, ຠນ຺ເຕ, ວຸຈ຺ຈຕິ. ກິຕ຺ຕາວຕາ ນຸ ໂຂ, ຠນ຺ເຕ, ມາໂຣ’’ຕິ? ‘‘ຣູເປ ໂຂ, ຣາຘ, ສຕິ ມາໂຣ ວາ ອສ຺ສ ມາເຣຕາ ວາ ໂຍ ວາ ປນ ມີຍຕິ. ຕສ຺ມາຕິຫ ຕ຺ວໍ, ຣາຘ, ຣູປໍ ມາໂຣຕິ ປສ຺ສ, ມາເຣຕາຕິ ປສ຺ສ, ມີຍຕີຕິ ປສ຺ສ, ໂຣໂຄຕິ ປສ຺ສ, ຄຓ຺ໂຑຕິ ປສ຺ສ, ສລ຺ລນ຺ຕິ ປສ຺ສ, ອຆນ຺ຕິ ປສ຺ສ, ອຆຠູຕນ຺ຕິ ປສ຺ສ. ເຍ ນໍ ເອວໍ ປສ຺ສນ຺ຕິ ເຕ ສມ຺ມາ ປສ຺ສນ຺ຕິ. ເວທນາຍ ສຕິ… ສຎ຺ຎາຍ ສຕິ… ສງ຺ຂາເຣສຸ ສຕິ… ວິຎ຺ຎາເຓ ສຕິ ມາໂຣ ວາ ອສ຺ສ ມາເຣຕາ ວາ ໂຍ ວາ ປນ ມີຍຕິ. ຕສ຺ມາຕິຫ ຕ຺ວໍ, ຣາຘ, ວິຎ຺ຎາຓໍ ມາໂຣຕິ ປສ຺ສ, ມາເຣຕາຕິ ປສ຺ສ, ມີຍຕີຕິ ປສ຺ສ, ໂຣໂຄຕິ ປສ຺ສ, ຄຓ຺ໂຑຕິ ປສ຺ສ, ສລ຺ລນ຺ຕິ ປສ຺ສ, ອຆນ຺ຕິ ປສ຺ສ, ອຆຠູຕນ຺ຕິ ປສ຺ສ. ເຍ ນໍ ເອວໍ ປສ຺ສນ຺ຕິ, ເຕ ສມ຺ມາ ປສ຺ສນ຺ຕີ’’ຕິ.

‘‘ສມ຺ມາທສ຺ສນໍ ປນ, ຠນ຺ເຕ, ກິມຕ຺ຖິຍ’’ນ຺ຕິ? ‘‘ສມ຺ມາທສ຺ສນໍ ໂຂ, ຣາຘ, ນິພ຺ພິທຕ຺ຖໍ’’. ‘‘ນິພ຺ພິທາ ປນ, ຠນ຺ເຕ, ກິມຕ຺ຖິຍາ’’ຕິ? ‘‘ນິພ຺ພິທາ ໂຂ, ຣາຘ, ວິຣາຄຕ຺ຖາ’’. ‘‘ວິຣາໂຄ ປນ, ຠນ຺ເຕ, ກິມຕ຺ຖິໂຍ’’ຕິ? ‘‘ວິຣາໂຄ ໂຂ, ຣາຘ, ວິມຸຕ຺ຕຕ຺ໂຖ’’. ‘‘ວິມຸຕ຺ຕິ ປນ, ຠນ຺ເຕ, ກິມຕ຺ຖິຍາ’’ຕິ? ‘‘ວິມຸຕ຺ຕິ ໂຂ, ຣາຘ, ນິພ຺ພານຕ຺ຖາ’’. ‘‘ນິພ຺ພານໍ ປນ, ຠນ຺ເຕ, ກິມຕ຺ຖິຍ’’ນ຺ຕິ? ‘‘ອຈ຺ຈຍາສິ [ອຈ຺ຈສຣາ (ສີ. ສ຺ຍາ. ກໍ.), ອສ຺ສ (ປີ.), ອຈ຺ຈຍາ (ກ.)], ຣາຘ, ປຎ຺ຫໍ, ນາສກ຺ຂິ ປຎ຺ຫສ຺ສ ປຣິຍນ຺ຕໍ ຄເຫຕຸໍ. ນິພ຺ພາໂນຄຘຎ຺ຫິ, ຣາຘ, ພ຺ຣຫ຺ມຈຣິຍໍ ວຸສ຺ສຕິ, ນິພ຺ພານປຣາຍນໍ ນິພ຺ພານປຣິໂຍສານ’’ນ຺ຕິ. ປຐມໍ.