໒. ສຕ຺ຕສຸຕ຺ຕໍ

໑໖໑. ສາວຕ຺ຖິນິທານໍ. ເອກມນ຺ຕໍ ນິສິນ຺ໂນ ໂຂ ອາຍສ຺ມາ ຣາໂຘ ຠຄວນ຺ຕໍ ເອຕທໂວຈ – ‘‘‘ສຕ຺ໂຕ, ສຕ຺ໂຕ’ຕິ, ຠນ຺ເຕ, ວຸຈ຺ຈຕິ. ກິຕ຺ຕາວຕາ ນຸ ໂຂ, ຠນ຺ເຕ, ສຕ຺ໂຕຕິ ວຸຈ຺ຈຕີ’’ຕິ? ‘‘ຣູເປ ໂຂ, ຣາຘ, ໂຍ ຉນ຺ໂທ ໂຍ ຣາໂຄ ຍາ ນນ຺ທີ ຍາ ຕຓ຺ຫາ, ຕຕ຺ຣ ສຕ຺ໂຕ, ຕຕ຺ຣ ວິສຕ຺ໂຕ, ຕສ຺ມາ ສຕ຺ໂຕຕິ ວຸຈ຺ຈຕິ. ເວທນາຍ… ສຎ຺ຎາຍ… ສງ຺ຂາເຣສຸ… ວິຎ຺ຎາເຓ ໂຍ ຉນ຺ໂທ ໂຍ ຣາໂຄ ຍາ ນນ຺ທີ ຍາ ຕຓ຺ຫາ, ຕຕ຺ຣ ສຕ຺ໂຕ, ຕຕ຺ຣ ວິສຕ຺ໂຕ, ຕສ຺ມາ ສຕ຺ໂຕຕິ ວຸຈ຺ຈຕິ’’.

‘‘ເສຍ຺ຍຖາປິ, ຣາຘ, ກຸມາຣກາ ວາ ກຸມາຣິກາໂຍ ວາ ປໍສ຺ວາຄາຣເກຫິ ກີຬນ຺ຕິ. ຍາວກີວຎ຺ຈ ເຕສຸ ປໍສ຺ວາຄາຣເກສຸ ອວິຄຕຣາຄາ ໂຫນ຺ຕິ ອວິຄຕຈ຺ຉນ຺ທາ ອວິຄຕເປມາ ອວິຄຕປິປາສາ ອວິຄຕປຣິຬາຫາ ອວິຄຕຕຓ຺ຫາ, ຕາວ ຕານິ ປໍສ຺ວາຄາຣການິ ອລ຺ລີຍນ຺ຕິ ເກຬາຍນ຺ຕິ ຘນາຍນ຺ຕິ [ມນາຍນ຺ຕິ (ສີ. ປີ. ກ.)] ມມາຍນ຺ຕິ. ຍໂຕ ຈ ໂຂ, ຣາຘ, ກຸມາຣກາ ວາ ກຸມາຣິກາໂຍ ວາ ເຕສຸ ປໍສ຺ວາຄາຣເກສຸ ວິຄຕຣາຄາ ໂຫນ຺ຕິ ວິຄຕຈ຺ຉນ຺ທາ ວິຄຕເປມາ ວິຄຕປິປາສາ ວິຄຕປຣິຬາຫາ ວິຄຕຕຓ຺ຫາ, ອຖ ໂຂ ຕານິ ປໍສ຺ວາຄາຣການິ ຫຕ຺ເຖຫິ ຈ ປາເທຫິ ຈ ວິກິຣນ຺ຕິ ວິຘມນ຺ຕິ ວິທ຺ຘໍເສນ຺ຕິ ວິກີຬນິຍໍ [ວິກີຬນິກໍ (ສີ. ສ຺ຍາ. ກໍ. ປີ.)] ກໂຣນ຺ຕິ. ເອວເມວ ໂຂ, ຣາຘ, ຕຸມ຺ເຫປິ ຣູປໍ ວິກິຣຖ ວິຘມຖ ວິທ຺ຘໍເສຖ ວິກີຬນິຍໍ ກໂຣຖ ຕຓ຺ຫາກ຺ຂຍາຍ ປຏິປຊ຺ຊຖ. ເວທນໍ ວິກິຣຖ ວິຘມຖ ວິທ຺ຘໍເສຖ ວິກີຬນິຍໍ ກໂຣຖ ຕຓ຺ຫາກ຺ຂຍາຍ ປຏິປຊ຺ຊຖ. ສຎ຺ຎໍ… ສງ຺ຂາເຣ ວິກິຣຖ ວິຘມຖ ວິທ຺ຘໍເສຖ ວິກີຬນິຍໍ ກໂຣຖ ຕຓ຺ຫາກ຺ຂຍາຍ ປຏິປຊ຺ຊຖ. ວິຎ຺ຎາຓໍ ວິກິຣຖ ວິຘມຖ ວິທ຺ຘໍເສຖ ວິກີຬນິຍໍ ກໂຣຖ ຕຓ຺ຫາກ຺ຂຍາຍ ປຏິປຊ຺ຊຖ. ຕຓ຺ຫາກ຺ຂໂຍ ຫິ, ຣາຘ, ນິພ຺ພານ’’ນ຺ຕິ. ທຸຕິຍໍ.