໓. ຍມກສຸຕ຺ຕໍ

໘໕. ເອກໍ ສມຍໍ ອາຍສ຺ມາ ສາຣິປຸຕ຺ໂຕ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຍມກສ຺ສ ນາມ ຠິກ຺ຂຸໂນ ເອວຣູປໍ ປາປກໍ ທິຏ຺ຐິຄຕໍ ອຸປ຺ປນ຺ນໍ ໂຫຕິ – ‘‘ຕຖາຫໍ ຠຄວຕາ ຘມ຺ມໍ ເທສິຕໍ ອາຊານາມິ, ຍຖາ ຂີຓາສໂວ ຠິກ຺ຂຸ ກາຍສ຺ສ ເຠທາ ອຸຈ຺ຉິຊ຺ຊຕິ ວິນສ຺ສຕິ, ນ ໂຫຕິ ປຣໍ ມຣຓາ’’ຕິ.

ອສ຺ໂສສຸໍ ໂຂ ສມ຺ພຫຸລາ ຠິກ຺ຂູ ຍມກສ຺ສ ກິຣ ນາມ ຠິກ຺ຂຸໂນ ເອວຣູປໍ ປາປກໍ ທິຏ຺ຐິຄຕໍ ອຸປ຺ປນ຺ນໍ ໂຫຕິ – ‘‘ຕຖາຫໍ ຠຄວຕາ ຘມ຺ມໍ ເທສິຕໍ ອາຊານາມິ, ຍຖາ ຂີຓາສໂວ ຠິກ຺ຂຸ ກາຍສ຺ສ ເຠທາ ອຸຈ຺ຉິຊ຺ຊຕິ ວິນສ຺ສຕິ, ນ ໂຫຕິ ປຣໍ ມຣຓາ’’ຕິ. ອຖ ໂຂ ເຕ ຠິກ຺ຂູ ເຍນາຍສ຺ມາ ຍມໂກ ເຕນຸປສງ຺ກມິໍສຸ; ອຸປສງ຺ກມິຕ຺ວາ ອາຍສ຺ມຕາ ຍມເກນ ສທ຺ຘິໍ ສມ຺ໂມທິໍສຸ. ສມ຺ໂມທນີຍໍ ກຖໍ ສາຣຓີຍໍ ວີຕິສາເຣຕ຺ວາ ເອກມນ຺ຕໍ ນິສີທິໍສຸ. ເອກມນ຺ຕໍ ນິສິນ຺ນາ ໂຂ ເຕ ຠິກ຺ຂູ ອາຍສ຺ມນ຺ຕໍ ຍມກໍ ເອຕທໂວຈຸໍ –

‘‘ສຈ຺ຈໍ ກິຣ ເຕ, ອາວຸໂສ ຍມກ, ເອວຣູປໍ ປາປກໍ ທິຏ຺ຐິຄຕໍ ອຸປ຺ປນ຺ນໍ – ‘ຕຖາຫໍ ຠຄວຕາ ຘມ຺ມໍ ເທສິຕໍ ອາຊານາມິ, ຍຖາ ຂີຓາສໂວ ຠິກ຺ຂຸ ກາຍສ຺ສ ເຠທາ ອຸຈ຺ຉິຊ຺ຊຕິ ວິນສ຺ສຕິ, ນ ໂຫຕິ ປຣໍ ມຣຓາ’’’ຕິ? ‘‘ເອວໍ ຂ຺ວາຫໍ, ອາວຸໂສ, ຠຄວຕາ ຘມ຺ມໍ ເທສິຕໍ ອາຊານາມິ – ‘ຂີຓາສໂວ ຠິກ຺ຂຸ ກາຍສ຺ສ ເຠທາ ອຸຈ຺ຉິຊ຺ຊຕິ ວິນສ຺ສຕິ, ນ ໂຫຕິ ປຣໍ ມຣຓາ’’’ຕິ.

‘‘ມາ, ອາວຸໂສ ຍມກ, ເອວໍ ອວຈ, ມາ ຠຄວນ຺ຕໍ ອພ຺ຠາຈິກ຺ຂິ. ນ ຫິ ສາຘຸ ຠຄວໂຕ ອພ຺ຠາຈິກ຺ຂນໍ. ນ ຫິ ຠຄວາ ເອວໍ ວເທຍ຺ຍ – ‘ຂີຓາສໂວ ຠິກ຺ຂຸ ກາຍສ຺ສ ເຠທາ ອຸຈ຺ຉິຊ຺ຊຕິ ວິນສ຺ສຕິ, ນ ໂຫຕິ ປຣໍ ມຣຓາ’’’ຕິ. ເອວມ຺ປິ ໂຂ ອາຍສ຺ມາ ຍມໂກ ເຕຫິ ຠິກ຺ຂູຫິ ວຸຈ຺ຈມາໂນ ຕເຖວ ຕໍ ປາປກໍ ທິຏ຺ຐິຄຕໍ ຖາມສາ ປຣາມາສາ ອຠິນິວິສ຺ສ ໂວຫຣຕິ – ‘‘ຕຖາຫໍ ຠຄວຕາ ຘມ຺ມໍ ເທສິຕໍ ອາຊານາມິ, ຍຖາ ຂີຓາສໂວ ຠິກ຺ຂຸ ກາຍສ຺ສ ເຠທາ ອຸຈ຺ຉິຊ຺ຊຕິ ວິນສ຺ສຕິ, ນ ໂຫຕິ ປຣໍ ມຣຓາ’’ຕິ.

ຍໂຕ ໂຂ ເຕ ຠິກ຺ຂູ ນາສກ຺ຂິໍສຸ ອາຍສ຺ມນ຺ຕໍ ຍມກໍ ເອຕສ຺ມາ ປາປກາ ທິຏ຺ຐິຄຕາ ວິເວເຈຕຸໍ, ອຖ ໂຂ ເຕ ຠິກ຺ຂູ ອຸຏ຺ຐາຍາສນາ ເຍນາຍສ຺ມາ ສາຣິປຸຕ຺ໂຕ ເຕນຸປສງ຺ກມິໍສຸ; ອຸປສງ຺ກມິຕ຺ວາ ອາຍສ຺ມນ຺ຕໍ ສາຣິປຸຕ຺ຕໍ ເອຕທໂວຈຸໍ – ‘‘ຍມກສ຺ສ ນາມ, ອາວຸໂສ ສາຣິປຸຕ຺ຕ, ຠິກ຺ຂຸໂນ ເອວຣູປໍ ປາປກໍ ທິຏ຺ຐິຄຕໍ ອຸປ຺ປນ຺ນໍ – ‘ຕຖາຫໍ ຠຄວຕາ ຘມ຺ມໍ ເທສິຕໍ ອາຊານາມິ ຍຖາ ຂີຓາສໂວ ຠິກ຺ຂຸ ກາຍສ຺ສ ເຠທາ ອຸຈ຺ຉິຊ຺ຊຕິ ວິນສ຺ສຕິ, ນ ໂຫຕິ ປຣໍ ມຣຓາ’ຕິ. ສາຘາຍສ຺ມາ ສາຣິປຸຕ຺ໂຕ ເຍນ ຍມໂກ ຠິກ຺ຂຸ ເຕນຸປສງ຺ກມຕຸ ອນຸກມ຺ປໍ ອຸປາທາຍາ’’ຕິ. ອຘິວາເສສິ ໂຂ ອາຍສ຺ມາ ສາຣິປຸຕ຺ໂຕ ຕຸຓ຺ຫີຠາເວນ. ອຖ ໂຂ ອາຍສ຺ມາ ສາຣິປຸຕ຺ໂຕ ສາຍນ຺ຫສມຍໍ ປຏິສລ຺ລານາ ວຸຏ຺ຐິໂຕ ເຍນາຍສ຺ມາ ຍມໂກ ເຕນຸປສງ຺ກມິ; ອຸປສງ຺ກມິຕ຺ວາ ອາຍສ຺ມຕາ ຍມເກນ ສທ຺ຘິໍ ສມ຺ໂມທິ…ເປ… ເອກມນ຺ຕໍ ນິສິນ຺ໂນ ໂຂ ອາຍສ຺ມາ ສາຣິປຸຕ຺ໂຕ ອາຍສ຺ມນ຺ຕໍ ຍມກໍ ເອຕທໂວຈ –

‘‘ສຈ຺ຈໍ ກິຣ ເຕ, ອາວຸໂສ ຍມກ, ເອວຣູປໍ ປາປກໍ ທິຏ຺ຐິຄຕໍ ອຸປ຺ປນ຺ນໍ – ‘ຕຖາຫໍ ຠຄວຕາ ຘມ຺ມໍ ເທສິຕໍ ອາຊານາມິ, ຍຖາ ຂີຓາສໂວ ຠິກ຺ຂຸ ກາຍສ຺ສ ເຠທາ ອຸຈ຺ຉິຊ຺ຊຕິ ວິນສ຺ສຕິ, ນ ໂຫຕິ ປຣໍ ມຣຓາ’’’ຕິ? ‘‘ເອວໍ ຂ຺ວາຫໍ, ອາວຸໂສ, ຠຄວຕາ ຘມ຺ມໍ ເທສິຕໍ ອາຊານາມິ, ຍຖາ ຂີຓາສໂວ ຠິກ຺ຂຸ ກາຍສ຺ສ ເຠທາ ອຸຈ຺ຉິຊ຺ຊຕິ ວິນສ຺ສຕິ, ນ ໂຫຕິ ປຣໍ ມຣຓາ’’ຕິ.

‘‘ຕໍ ກິໍ ມຎ຺ຎສິ, ອາວຸໂສ ຍມກ, ຣູປໍ ນິຈ຺ຈໍ ວາ ອນິຈ຺ຈໍ ວາ’’ຕິ? ‘‘ອນິຈ຺ຈໍ, ອາວຸໂສ’’. ‘‘ເວທນາ ນິຈ຺ຈາ… ສຎ຺ຎາ… ສງ຺ຂາຣາ… ວິຎ຺ຎາຓໍ ນິຈ຺ຈໍ ວາ ອນິຈ຺ຈໍ ວາ’’ຕິ? ‘‘ອນິຈ຺ຈໍ, ອາວຸໂສ’’. ຕສ຺ມາຕິຫ…ເປ… ເອວໍ ປສ຺ສໍ…ເປ… ນາປຣໍ ອິຕ຺ຖຕ຺ຕາຍາຕິ ປຊານາຕີ’’ຕິ.

‘‘ຕໍ ກິໍ ມຎ຺ຎສິ, ອາວຸໂສ ຍມກ, ຣູປໍ ຕຖາຄໂຕຕິ ສມນຸປສ຺ສສີ’’ຕິ? ‘‘ໂນ ເຫຕໍ, ອາວຸໂສ’’ … ‘‘ເວທນໍ ຕຖາຄໂຕຕິ ສມນຸປສ຺ສສີ’’ຕິ? ‘‘ໂນ ເຫຕໍ, ອາວຸໂສ’’… ‘‘ສຎ຺ຎໍ… ສງ຺ຂາເຣ… ວິຎ຺ຎາຓໍ ຕຖາຄໂຕຕິ ສມນຸປສ຺ສສີ’’ຕິ? ‘‘ໂນ ເຫຕໍ, ອາວຸໂສ’’.

‘‘ຕໍ ກິໍ ມຎ຺ຎສິ, ອາວຸໂສ ຍມກ, ຣູປສ຺ມິໍ ຕຖາຄໂຕຕິ ສມນຸປສ຺ສສີ’’ຕິ? ‘‘ໂນ ເຫຕໍ, ອາວຸໂສ’’. ‘‘ອຎ຺ຎຕ຺ຣ ຣູປາ ຕຖາຄໂຕຕິ ສມນຸປສ຺ສສີ’’ຕິ? ‘‘ໂນ ເຫຕໍ, ອາວຸໂສ’’. ‘‘ເວທນາຍ… ອຎ຺ຎຕ຺ຣ ເວທນາຍ…ເປ… ສຎ຺ຎາຍ… ອຎ຺ຎຕ຺ຣ ສຎ຺ຎາຍ… ສງ຺ຂາເຣສຸ… ອຎ຺ຎຕ຺ຣ ສງ຺ຂາເຣຫິ… ວິຎ຺ຎາຓສ຺ມິໍ ຕຖາຄໂຕຕິ ສມນຸປສ຺ສສີ’’ຕິ? ‘‘ໂນ ເຫຕໍ, ອາວຸໂສ’’. ‘‘ອຎ຺ຎຕ຺ຣ ວິຎ຺ຎາຓາ ຕຖາຄໂຕຕິ ສມນຸປສ຺ສສີ’’ຕິ? ‘‘ໂນ ເຫຕໍ, ອາວຸໂສ’’.

‘‘ຕໍ ກິໍ ມຎ຺ຎສິ, ອາວຸໂສ ຍມກ, ຣູປໍ… ເວທນໍ… ສຎ຺ຎໍ… ສງ຺ຂາເຣ… ວິຎ຺ຎາຓໍ ຕຖາຄໂຕຕິ ສມນຸປສ຺ສສີ’’ຕິ? ‘‘ໂນ ເຫຕໍ, ອາວຸໂສ’’.

‘‘ຕໍ ກິໍ ມຎ຺ຎສິ, ອາວຸໂສ ຍມກ, ອຍໍ ໂສ ອຣູປີ… ອເວທໂນ… ອສຎ຺ຎີ… ອສງ຺ຂາໂຣ… ອວິຎ຺ຎາໂຓ ຕຖາຄໂຕຕິ ສມນຸປສ຺ສສີ’’ຕິ? ‘‘ໂນ ເຫຕໍ, ອາວຸໂສ’’. ‘‘ເອຕ຺ຖ ຈ ເຕ, ອາວຸໂສ ຍມກ, ທິຏ຺ເຐວ ຘມ຺ເມ ສຈ຺ຈໂຕ ເຖຕໂຕ [ຕຖໂຕ (ສ຺ຍາ. ກໍ.)] ຕຖາຄເຕ ອນຸປລພ຺ຠິຍມາເນ [ຕຖາຄເຕ ອນຸປລພ຺ຠມາເນ (?)], ກລ຺ລໍ ນຸ ເຕ ຕໍ ເວຍ຺ຍາກຣຓໍ – ‘ຕຖາຫໍ ຠຄວຕາ ຘມ຺ມໍ ເທສິຕໍ ອາຊານາມິ, ຍຖາ ຂີຓາສໂວ ຠິກ຺ຂຸ ກາຍສ຺ສ ເຠທາ ອຸຈ຺ຉິຊ຺ຊຕິ ວິນສ຺ສຕິ, ນ ໂຫຕິ ປຣໍ ມຣຓາ’’’ຕິ?

‘‘ອຫຸ ໂຂ ເມ ຕໍ, ອາວຸໂສ ສາຣິປຸຕ຺ຕ, ປຸພ຺ເພ ອວິທ຺ທສຸໂນ ປາປກໍ ທິຏ຺ຐິຄຕໍ; ອິທຎ຺ຈ ປນາຍສ຺ມໂຕ ສາຣິປຸຕ຺ຕສ຺ສ ຘມ຺ມເທສນໍ ສຸຕ຺ວາ ຕຎ຺ເຈວ ປາປກໍ ທິຏ຺ຐິຄຕໍ ປຫີນໍ, ຘມ຺ໂມ ຈ ເມ ອຠິສມິໂຕ’’ຕິ.

‘‘ສເຈ ຕໍ, ອາວຸໂສ ຍມກ, ເອວໍ ປຸຈ຺ເຉຍ຺ຍຸໍ – ‘ໂຍ ໂສ, ອາວຸໂສ ຍມກ, ຠິກ຺ຂຸ ອຣຫໍ ຂີຓາສໂວ ໂສ ກາຍສ຺ສ ເຠທາ ປຣໍ ມຣຓາ ກິໍ ໂຫຕີ’ຕິ? ເອວໍ ປຸຏ຺ໂຐ ຕ຺ວໍ, ອາວຸໂສ ຍມກ, ກິນ຺ຕິ ພ຺ຍາກເຣຍ຺ຍາສີ’’ຕິ? ‘‘ສເຈ ມໍ, ອາວຸໂສ, ເອວໍ ປຸຈ຺ເຉຍ຺ຍຸໍ – ‘ໂຍ ໂສ, ອາວຸໂສ ຍມກ, ຠິກ຺ຂຸ ອຣຫໍ ຂີຓາສໂວ ໂສ ກາຍສ຺ສ ເຠທາ ປຣໍ ມຣຓາ ກິໍ ໂຫຕີ’ຕິ? ເອວໍ ປຸຏ຺ໂຐຫໍ, ອາວຸໂສ, ເອວໍ ພ຺ຍາກເຣຍ຺ຍໍ – ‘ຣູປໍ ໂຂ, ອາວຸໂສ, ອນິຈ຺ຈໍ. ຍທນິຈ຺ຈໍ ຕໍ ທຸກ຺ຂໍ; ຍໍ ທຸກ຺ຂໍ ຕໍ ນິຣຸທ຺ຘໍ ຕທຕ຺ຖງ຺ຄຕໍ. ເວທນາ… ສຎ຺ຎາ… ສງ຺ຂາຣາ… ວິຎ຺ຎາຓໍ ອນິຈ຺ຈໍ. ຍທນິຈ຺ຈໍ ຕໍ ທຸກ຺ຂໍ; ຍໍ ທຸກ຺ຂໍ ຕໍ ນິຣຸທ຺ຘໍ ຕທຕ຺ຖງ຺ຄຕ’ນ຺ຕິ. ເອວໍ ປຸຏ຺ໂຐຫໍ, ອາວຸໂສ, ເອວໍ ພ຺ຍາກເຣຍ຺ຍ’’ນ຺ຕິ.

‘‘ສາຘຸ ສາຘຸ, ອາວຸໂສ ຍມກ! ເຕນ ຫາວຸໂສ, ຍມກ, ອຸປມໍ ເຕ ກຣິສ຺ສາມິ ເອຕສ຺ເສວ ອຕ຺ຖສ຺ສ ຠິຍ຺ໂຍໂສມຕ຺ຕາຍ ຎາຓາຍ. ເສຍ຺ຍຖາປິ, ອາວຸໂສ ຍມກ, ຄຫປຕິ ວາ ຄຫປຕິປຸຕ຺ໂຕ ວາ ອຑ຺ໂຒ ມຫທ຺ຘໂນ ມຫາໂຠໂຄ; ໂສ ຈ ອາຣກ຺ຂສມ຺ປນ຺ໂນ. ຕສ຺ສ ໂກຈິເທວ ປຸຣິໂສ ອຸປ຺ປຊ຺ເຊຍ຺ຍ ອນຕ຺ຖກາໂມ ອຫິຕກາໂມ ອໂຍຄກ຺ເຂມກາໂມ ຊີວິຕາ ໂວໂຣເປຕຸກາໂມ. ຕສ຺ສ ເອວມສ຺ສ – ‘ອຍໍ ໂຂ ຄຫປຕິ ວາ ຄຫປຕິປຸຕ຺ໂຕ ວາ ອຑ຺ໂຒ ມຫທ຺ຘໂນ ມຫາໂຠໂຄ; ໂສ ຈ ອາຣກ຺ຂສມ຺ປນ຺ໂນ; ນາຍໍ [ນ ຫາຍໍ (ສ຺ຍາ. ກໍ.)] ສຸກໂຣ ປສຍ຺ຫ ຊີວິຕາ ໂວໂຣເປຕຸໍ. ຍໍນູນາຫໍ ອນຸປຂຊ຺ຊ ຊີວິຕາ ໂວໂຣເປຍ຺ຍ’ນ຺ຕິ. ໂສ ຕໍ ຄຫປຕິໍ ວາ ຄຫປຕິປຸຕ຺ຕໍ ວາ ອຸປສງ຺ກມິຕ຺ວາ ເອວໍ ວເທຍ຺ຍ – ‘ອຸປຏ຺ຐເຫຍ຺ຍໍ ຕໍ, ຠນ຺ເຕ’ຕິ. ຕເມນໍ ໂສ ຄຫປຕິ ວາ ຄຫປຕິປຸຕ຺ໂຕ ວາ ອຸປຏ຺ຐາເປຍ຺ຍ. ໂສ ອຸປຏ຺ຐເຫຍ຺ຍ ປຸພ຺ພຸຏ຺ຐາຍີ ປຈ຺ຉານິປາຕີ ກິໍກາຣປຏິສ຺ສາວີ ມນາປຈາຣີ ປິຍວາທີ. ຕສ຺ສ ໂສ ຄຫປຕິ ວາ ຄຫປຕິປຸຕ຺ໂຕ ວາ ມິຕ຺ຕໂຕປິ ນໍ ສທ຺ທເຫຍ຺ຍ [ທເຫຍ຺ຍ (ສ຺ຍາ. ກໍ. ປີ. ກ.)]; ສຸຫຊ຺ຊໂຕປິ ນໍ ສທ຺ທເຫຍ຺ຍ; ຕສ຺ມິຎ຺ຈ ວິສ຺ສາສໍ ອາປຊ຺ເຊຍ຺ຍ. ຍທາ ໂຂ, ອາວຸໂສ, ຕສ຺ສ ປຸຣິສສ຺ສ ເອວມສ຺ສ – ‘ສໍວິສ຺ສຕ຺ໂຖ ໂຂ ມ຺ຍາຍໍ ຄຫປຕິ ວາ ຄຫປຕິປຸຕ຺ໂຕ ວາ’ຕິ, ອຖ ນໍ ຣໂຫຄຕໍ ວິທິຕ຺ວາ ຕິຓ຺ເຫນ ສຕ຺ເຖນ ຊີວິຕາ ໂວໂຣເປຍ຺ຍ.

‘‘ຕໍ ກິໍ ມຎ຺ຎສິ, ອາວຸໂສ ຍມກ, ຍທາ ຫິ ໂສ ປຸຣິໂສ ອມຸໍ ຄຫປຕິໍ ວາ ຄຫປຕິປຸຕ຺ຕໍ ວາ ອຸປສງ຺ກມິຕ຺ວາ ເອວໍ ອາຫ – ‘ອຸປຏ຺ຐເຫຍ຺ຍໍ ຕໍ, ຠນ຺ເຕ’ຕິ, ຕທາປິ ໂສ ວຘໂກວ. ວຘກຎ຺ຈ ປນ ສນ຺ຕໍ ນ ອຎ຺ຎາສິ – ‘ວຘໂກ ເມ’ຕິ. ຍທາປິ ໂສ ອຸປຏ຺ຐຫຕິ ປຸພ຺ພຸຏ຺ຐາຍີ ປຈ຺ຉານິປາຕີ ກິໍກາຣປຏິສ຺ສາວີ ມນາປຈາຣີ ປິຍວາທີ, ຕທາປິ ໂສ ວຘໂກວ. ວຘກຎ຺ຈ ປນ ສນ຺ຕໍ ນ ອຎ຺ຎາສິ – ‘ວຘໂກ ເມ’ຕິ. ຍທາປິ ນໍ ຣໂຫຄຕໍ ວິທິຕ຺ວາ ຕິຓ຺ເຫນ ສຕ຺ເຖນ ຊີວິຕາ ໂວໂຣເປຕິ, ຕທາປິ ໂສ ວຘໂກວ. ວຘກຎ຺ຈ ປນ ສນ຺ຕໍ ນ ອຎ຺ຎາສິ – ‘ວຘໂກ ເມ’’’ຕິ. ‘‘ເອວມາວຸໂສ’’ຕິ. ‘‘ເອວເມວ ໂຂ, ອາວຸໂສ, ອສ຺ສຸຕວາ ປຸຖຸຊ຺ຊໂນ ອຣິຍານໍ ອທສ຺ສາວີ ອຣິຍຘມ຺ມສ຺ສ ອໂກວິໂທ ອຣິຍຘມ຺ເມ ອວິນີໂຕ, ສປ຺ປຸຣິສານໍ ອທສ຺ສາວີ ສປ຺ປຸຣິສຘມ຺ມສ຺ສ ອໂກວິໂທ ສປ຺ປຸຣິສຘມ຺ເມ ອວິນີໂຕ ຣູປໍ ອຕ຺ຕໂຕ ສມນຸປສ຺ສຕິ, ຣູປວນ຺ຕໍ ວາ ອຕ຺ຕານໍ; ອຕ຺ຕນິ ວາ ຣູປໍ, ຣູປສ຺ມິໍ ວາ ອຕ຺ຕານໍ. ເວທນໍ… ສຎ຺ຎໍ… ສງ຺ຂາເຣ… ວິຎ຺ຎາຓໍ ອຕ຺ຕໂຕ ສມນຸປສ຺ສຕິ, ວິຎ຺ຎາຓວນ຺ຕໍ ວາ ອຕ຺ຕານໍ; ອຕ຺ຕນິ ວາ ວິຎ຺ຎາຓໍ, ວິຎ຺ຎາຓສ຺ມິໍ ວາ ອຕ຺ຕານໍ’’.

‘‘ໂສ ອນິຈ຺ຈໍ ຣູປໍ ‘ອນິຈ຺ຈໍ ຣູປ’ນ຺ຕິ ຍຖາຠູຕໍ ນປ຺ປຊານາຕິ. ອນິຈ຺ຈໍ ເວທນໍ ‘ອນິຈ຺ຈາ ເວທນາ’ຕິ ຍຖາຠູຕໍ ນປ຺ປຊານາຕິ. ອນິຈ຺ຈໍ ສຎ຺ຎໍ ‘ອນິຈ຺ຈາ ສຎ຺ຎາ’ຕິ ຍຖາຠູຕໍ ນປ຺ປຊານາຕິ. ອນິຈ຺ເຈ ສງ຺ຂາເຣ ‘ອນິຈ຺ຈາ ສງ຺ຂາຣາ’ຕິ ຍຖາຠູຕໍ ນປ຺ປຊານາຕິ. ອນິຈ຺ຈໍ ວິຎ຺ຎາຓໍ ‘ອນິຈ຺ຈໍ ວິຎ຺ຎາຓ’ນ຺ຕິ ຍຖາຠູຕໍ ນປ຺ປຊານາຕິ.

‘‘ທຸກ຺ຂໍ ຣູປໍ ‘ທຸກ຺ຂໍ ຣູປ’ນ຺ຕິ ຍຖາຠູຕໍ ນປ຺ປຊານາຕິ. ທຸກ຺ຂໍ ເວທນໍ… ທຸກ຺ຂໍ ສຎ຺ຎໍ… ທຸກ຺ເຂ ສງ຺ຂາເຣ… ທຸກ຺ຂໍ ວິຎ຺ຎາຓໍ ‘ທຸກ຺ຂໍ ວິຎ຺ຎາຓ’ນ຺ຕິ ຍຖາຠູຕໍ ນປ຺ປຊານາຕິ.

‘‘ອນຕ຺ຕໍ ຣູປໍ ‘ອນຕ຺ຕາ ຣູປ’ນ຺ຕິ ຍຖາຠູຕໍ ນປ຺ປຊານາຕິ. ອນຕ຺ຕໍ ເວທນໍ… ອນຕ຺ຕໍ ສຎ຺ຎໍ… ອນຕ຺ເຕ ສງ຺ຂາເຣ… ອນຕ຺ຕໍ ວິຎ຺ຎາຓໍ ‘ອນຕ຺ຕໍ ວິຎ຺ຎາຓ’ນ຺ຕິ ຍຖາຠູຕໍ ນປ຺ປຊານາຕິ.

‘‘ສງ຺ຂຕໍ ຣູປໍ ‘ສງ຺ຂຕໍ ຣູປ’ນ຺ຕິ ຍຖາຠູຕໍ ນປ຺ປຊານາຕິ. ສງ຺ຂຕໍ ເວທນໍ… ສງ຺ຂຕໍ ສຎ຺ຎໍ… ສງ຺ຂເຕ ສງ຺ຂາເຣ… ສງ຺ຂຕໍ ວິຎ຺ຎາຓໍ ‘ສງ຺ຂຕໍ ວິຎ຺ຎາຓ’ນ຺ຕິ ຍຖາຠູຕໍ ນປ຺ປຊານາຕິ.

‘‘ວຘກໍ ຣູປໍ ‘ວຘກໍ ຣູປ’ນ຺ຕິ ຍຖາຠູຕໍ ນປ຺ປຊານາຕິ. ວຘກໍ ເວທນໍ ‘ວຘກາ ເວທນາ’ຕິ… ວຘກໍ ສຎ຺ຎໍ ‘ວຘກາ ສຎ຺ຎາ’ຕິ… ວຘເກ ສງ຺ຂາເຣ ‘ວຘກາ ສງ຺ຂາຣາ’ຕິ ຍຖາຠູຕໍ ນປ຺ປຊານາຕິ. ວຘກໍ ວິຎ຺ຎາຓໍ ‘ວຘກໍ ວິຎ຺ຎາຓ’ນ຺ຕິ ຍຖາຠູຕໍ ນປ຺ປຊານາຕິ.

‘‘ໂສ ຣູປໍ ອຸເປຕິ ອຸປາທິຍຕິ ອຘິຏ຺ຐາຕິ ‘ອຕ຺ຕາ ເມ’ຕິ. ເວທນໍ… ສຎ຺ຎໍ… ສງ຺ຂາເຣ… ວິຎ຺ຎາຓໍ ອຸເປຕິ ອຸປາທິຍຕິ ອຘິຏ຺ຐາຕິ ‘ອຕ຺ຕາ ເມ’ຕິ. ຕສ຺ສິເມ ປຎ຺ຈຸປາທານກ຺ຂນ຺ຘາ ອຸເປຕາ ອຸປາທິນ຺ນາ ທີຆຣຕ຺ຕໍ ອຫິຕາຍ ທຸກ຺ຂາຍ ສໍວຕ຺ຕນ຺ຕິ.

‘‘ສຸຕວາ ຈ ໂຂ, ອາວຸໂສ, ອຣິຍສາວໂກ ອຣິຍານໍ ທສ຺ສາວີ…ເປ… ສປ຺ປຸຣິສຘມ຺ເມ ສຸວິນີໂຕ ນ ຣູປໍ ອຕ຺ຕໂຕ ສມນຸປສ຺ສຕິ, ນ ຣູປວນ຺ຕໍ ອຕ຺ຕານໍ; ນ ອຕ຺ຕນິ ຣູປໍ, ນ ຣູປສ຺ມິໍ ອຕ຺ຕານໍ. ນ ເວທນໍ… ນ ສຎ຺ຎໍ… ນ ສງ຺ຂາເຣ… ນ ວິຎ຺ຎາຓໍ ອຕ຺ຕໂຕ ສມນຸປສ຺ສຕິ, ນ ວິຎ຺ຎາຓວນ຺ຕໍ ອຕ຺ຕານໍ; ນ ອຕ຺ຕນິ ວິຎ຺ຎາຓໍ, ນ ວິຎ຺ຎາຓສ຺ມິໍ ອຕ຺ຕານໍ.

‘‘ໂສ ອນິຈ຺ຈໍ ຣູປໍ ‘ອນິຈ຺ຈໍ ຣູປ’ນ຺ຕິ ຍຖາຠູຕໍ ປຊານາຕິ. ອນິຈ຺ຈໍ ເວທນໍ … ອນິຈ຺ຈໍ ສຎ຺ຎໍ… ອນິຈ຺ເຈ ສງ຺ຂາເຣ … ອນິຈ຺ຈໍ ວິຎ຺ຎາຓໍ ‘ອນິຈ຺ຈໍ ວິຎ຺ຎາຓ’ນ຺ຕິ ຍຖາຠູຕໍ ປຊານາຕິ.

‘‘ທຸກ຺ຂໍ ຣູປໍ ‘ທຸກ຺ຂໍ ຣູປ’ນ຺ຕິ ຍຖາຠູຕໍ ປຊານາຕິ. ທຸກ຺ຂໍ ເວທນໍ… ທຸກ຺ຂໍ ສຎ຺ຎໍ… ທຸກ຺ເຂ ສງ຺ຂາເຣ… ທຸກ຺ຂໍ ວິຎ຺ຎາຓໍ ‘ທຸກ຺ຂໍ ວິຎ຺ຎາຓ’ນ຺ຕິ ຍຖາຠູຕໍ ປຊານາຕິ.

‘‘ອນຕ຺ຕໍ ຣູປໍ ‘ອນຕ຺ຕາ ຣູປ’ນ຺ຕິ ຍຖາຠູຕໍ ປຊານາຕິ. ອນຕ຺ຕໍ ເວທນໍ… ອນຕ຺ຕໍ ສຎ຺ຎໍ… ອນຕ຺ເຕ ສງ຺ຂາເຣ… ອນຕ຺ຕໍ ວິຎ຺ຎາຓໍ ‘ອນຕ຺ຕາ ວິຎ຺ຎາຓ’ນ຺ຕິ ຍຖາຠູຕໍ ປຊານາຕິ.

‘‘ສງ຺ຂຕໍ ຣູປໍ ‘ສງ຺ຂຕໍ ຣູປ’ນ຺ຕິ ຍຖາຠູຕໍ ປຊານາຕິ. ສງ຺ຂຕໍ ເວທນໍ… ສງ຺ຂຕໍ ສຎ຺ຎໍ… ສງ຺ຂເຕ ສງ຺ຂາເຣ… ສງ຺ຂຕໍ ວິຎ຺ຎາຓໍ ‘ສງ຺ຂຕໍ ວິຎ຺ຎາຓ’ນ຺ຕິ ຍຖາຠູຕໍ ປຊານາຕິ.

‘‘ວຘກໍ ຣູປໍ ‘ວຘກໍ ຣູປ’ນ຺ຕິ ຍຖາຠູຕໍ ປຊານາຕິ. ວຘກໍ ເວທນໍ… ວຘກໍ ສຎ຺ຎໍ… ວຘເກ ສງ຺ຂາເຣ ‘‘ວຘກາ ສງ຺ຂາຣາ’’ຕິ ຍຖາຠູຕໍ ປຊານາຕິ. ວຘກໍ ວິຎ຺ຎາຓໍ ‘ວຘກໍ ວິຎ຺ຎາຓ’ນ຺ຕິ ຍຖາຠູຕໍ ປຊານາຕິ.

‘‘ໂສ ຣູປໍ ນ ອຸເປຕິ, ນ ອຸປາທິຍຕິ, ນາຘິຏ຺ຐາຕິ – ‘ອຕ຺ຕາ ເມ’ຕິ. ເວທນໍ… ສຎ຺ຎໍ… ສງ຺ຂາເຣ… ວິຎ຺ຎາຓໍ ນ ອຸເປຕິ, ນ ອຸປາທິຍຕິ, ນາຘິຏ຺ຐາຕິ – ‘ອຕ຺ຕາ ເມ’ຕິ. ຕສ຺ສິເມ ປຎ຺ຈຸປາທານກ຺ຂນ຺ຘາ ອນຸເປຕາ ອນຸປາທິນ຺ນາ ທີຆຣຕ຺ຕໍ ຫິຕາຍ ສຸຂາຍ ສໍວຕ຺ຕນ຺ຕີ’’ຕິ. ‘‘ເອວເມຕໍ, ອາວຸໂສ ສາຣິປຸຕ຺ຕ, ໂຫຕິ ເຍສໍ ອາຍສ຺ມນ຺ຕານໍ ຕາທິສາ ສພ຺ຣຫ຺ມຈາຣິໂນ ອນຸກມ຺ປກາ ອຕ຺ຖກາມາ ໂອວາທກາ ອນຸສາສກາ. ອິທຎ຺ຈ ປນ ເມ ອາຍສ຺ມໂຕ ສາຣິປຸຕ຺ຕສ຺ສ ຘມ຺ມເທສນໍ ສຸຕ຺ວາ ອນຸປາທາຍ ອາສເວຫິ ຈິຕ຺ຕໍ ວິມຸຕ຺ຕ’’ນ຺ຕິ. ຕຕິຍໍ.