໑໐. ນິຣຸຕ຺ຕິປຖສຸຕ຺ຕໍ

໖໒. ສາວຕ຺ຖິນິທານໍ. ‘‘ຕໂຍເມ, ຠິກ຺ຂເວ, ນິຣຸຕ຺ຕິປຖາ ອຘິວຈນປຖາ ປຎ຺ຎຕ຺ຕິປຖາ ອສງ຺ກິຓ຺ຓາ ອສງ຺ກິຓ຺ຓປຸພ຺ພາ, ນ ສງ຺ກີຍນ຺ຕິ, ນ ສງ຺ກີຍິສ຺ສນ຺ຕິ, ອປ຺ປຏິກຸຏ຺ຐາ ສມເຓຫິ ພ຺ຣາຫ຺ມເຓຫິ ວິຎ຺ຎູຫິ. ກຕເມ ຕໂຍ? ຍໍ, ຠິກ຺ຂເວ, ຣູປໍ ອຕີຕໍ ນິຣຸທ຺ຘໍ ວິປຣິຓຕໍ ‘ອໂຫສີ’ຕິ ຕສ຺ສ ສງ຺ຂາ, ‘ອໂຫສີ’ຕິ ຕສ຺ສ ສມຎ຺ຎາ, ‘ອໂຫສີ’ຕິ ຕສ຺ສ ປຎ຺ຎຕ຺ຕິ; ນ ຕສ຺ສ ສງ຺ຂາ ‘ອຕ຺ຖີ’ຕິ, ນ ຕສ຺ສ ສງ຺ຂາ ‘ຠວິສ຺ສຕີ’’’ຕິ.

‘‘ຍາ ເວທນາ ອຕີຕາ ນິຣຸທ຺ຘາ ວິປຣິຓຕາ ‘ອໂຫສີ’ຕິ ຕສ຺ສາ ສງ຺ຂາ, ‘ອໂຫສີ’ຕິ ຕສ຺ສາ ສມຎ຺ຎາ, ‘ອໂຫສີ’ຕິ ຕສ຺ສາ ປຎ຺ຎຕ຺ຕິ; ນ ຕສ຺ສາ ສງ຺ຂາ ‘ອຕ຺ຖີ’ຕິ, ນ ຕສ຺ສາ ສງ຺ຂາ ‘ຠວິສ຺ສຕີ’’’ຕິ.

‘‘ຍາ ສຎ຺ຎາ… ເຍ ສງ຺ຂາຣາ ອຕີຕາ ນິຣຸທ຺ຘາ ວິປຣິຓຕາ ‘ອເຫສຸ’ນ຺ຕິ ເຕສໍ ສງ຺ຂາ, ‘ອເຫສຸ’ນ຺ຕິ ເຕສໍ ສມຎ຺ຎາ, ‘ອເຫສຸ’ນ຺ຕິ ເຕສໍ ປຎ຺ຎຕ຺ຕິ; ນ ເຕສໍ ສງ຺ຂາ ‘ອຕ຺ຖີ’ຕິ, ນ ເຕສໍ ສງ຺ຂາ ‘ຠວິສ຺ສນ຺ຕີ’’’ຕິ.

‘‘ຍໍ ວິຎ຺ຎາຓໍ ອຕີຕໍ ນິຣຸທ຺ຘໍ ວິປຣິຓຕໍ, ‘ອໂຫສີ’ຕິ ຕສ຺ສ ສງ຺ຂາ, ‘ອໂຫສີ’ຕິ ຕສ຺ສ ສມຎ຺ຎາ, ‘ອໂຫສີ’ຕິ ຕສ຺ສ ປຎ຺ຎຕ຺ຕິ; ນ ຕສ຺ສ ສງ຺ຂາ ‘ອຕ຺ຖີ’ຕິ, ນ ຕສ຺ສ ສງ຺ຂາ ‘ຠວິສ຺ສຕີ’’’ຕິ.

‘‘ຍໍ, ຠິກ຺ຂເວ, ຣູປໍ ອຊາຕໍ ອປາຕຸຠູຕໍ, ‘ຠວິສ຺ສຕີ’ຕິ ຕສ຺ສ ສງ຺ຂາ, ‘ຠວິສ຺ສຕີ’ຕິ ຕສ຺ສ ສມຎ຺ຎາ, ‘ຠວິສ຺ສຕີ’ຕິ ຕສ຺ສ ປຎ຺ຎຕ຺ຕິ; ນ ຕສ຺ສ ສງ຺ຂາ ‘ອຕ຺ຖີ’ຕິ, ນ ຕສ຺ສ ສງ຺ຂາ ‘ອໂຫສີ’’’ຕິ.

‘‘ຍາ ເວທນາ ອຊາຕາ ອປາຕຸຠູຕາ, ‘ຠວິສ຺ສຕີ’ຕິ ຕສ຺ສາ ສງ຺ຂາ, ‘ຠວິສ຺ສຕີ’ຕິ ຕສ຺ສາ ສມຎ຺ຎາ, ‘ຠວິສ຺ສຕີ’ຕິ ຕສ຺ສາ ປຎ຺ຎຕ຺ຕິ; ນ ຕສ຺ສາ ສງ຺ຂາ ‘ອຕ຺ຖີ’ຕິ, ນ ຕສ຺ສາ ສງ຺ຂາ ‘ອໂຫສີ’’’ຕິ.

‘‘ຍາ ສຎ຺ຎາ… ເຍ ສງ຺ຂາຣາ ອຊາຕາ ອປາຕຸຠູຕາ, ‘ຠວິສ຺ສນ຺ຕີ’ຕິ ເຕສໍ ສງ຺ຂາ, ‘ຠວິສ຺ສນ຺ຕີ’ຕິ ເຕສໍ ສມຎ຺ຎາ, ‘ຠວິສ຺ສນ຺ຕີ’ຕິ ເຕສໍ ປຎ຺ຎຕ຺ຕິ; ນ ເຕສໍ ສງ຺ຂາ ‘ອຕ຺ຖີ’ຕິ, ນ ເຕສໍ ສງ຺ຂາ ‘ອເຫສຸ’’’ນ຺ຕິ.

‘‘ຍໍ ວິຎ຺ຎາຓໍ ອຊາຕໍ ອປາຕຸຠູຕໍ, ‘ຠວິສ຺ສຕີ’ຕິ ຕສ຺ສ ສງ຺ຂາ, ‘ຠວິສ຺ສຕີ’ຕິ ຕສ຺ສ ສມຎ຺ຎາ, ‘ຠວິສ຺ສຕີ’ຕິ ຕສ຺ສ ປຎ຺ຎຕ຺ຕິ; ນ ຕສ຺ສ ສງ຺ຂາ ‘ອຕ຺ຖີ’ຕິ, ນ ຕສ຺ສ ສງ຺ຂາ ‘ອໂຫສີ’’’ຕິ.

‘‘ຍໍ, ຠິກ຺ຂເວ, ຣູປໍ ຊາຕໍ ປາຕຸຠູຕໍ, ‘ອຕ຺ຖີ’ຕິ ຕສ຺ສ ສງ຺ຂາ, ‘ອຕ຺ຖີ’ຕິ ຕສ຺ສ ສມຎ຺ຎາ, ‘ອຕ຺ຖີ’ຕິ ຕສ຺ສ ປຎ຺ຎຕ຺ຕິ; ນ ຕສ຺ສ ສງ຺ຂາ ‘ອໂຫສີ’ຕິ, ນ ຕສ຺ສ ສງ຺ຂາ ‘ຠວິສ຺ສຕີ’’’ຕິ.

‘‘ຍາ ເວທນາ ຊາຕາ ປາຕຸຠູຕາ, ‘ອຕ຺ຖີ’ຕິ ຕສ຺ສາ ສງ຺ຂາ, ‘ອຕ຺ຖີ’ຕິ ຕສ຺ສາ ສມຎ຺ຎາ, ‘ອຕ຺ຖີ’ຕິ ຕສ຺ສາ ປຎ຺ຎຕ຺ຕິ; ນ ຕສ຺ສາ ສງ຺ຂາ ‘ອໂຫສີ’ຕິ, ນ ຕສ຺ສາ ສງ຺ຂາ ‘ຠວິສ຺ສຕີ’’’ຕິ.

‘‘ຍາ ສຎ຺ຎາ… ເຍ ສງ຺ຂາຣາ ຊາຕາ ປາຕຸຠູຕາ, ‘ອຕ຺ຖີ’ຕິ ເຕສໍ ສງ຺ຂາ, ‘ອຕ຺ຖີ’ຕິ ເຕສໍ ສມຎ຺ຎາ, ‘ອຕ຺ຖີ’ຕິ ເຕສໍ ປຎ຺ຎຕ຺ຕິ; ນ ເຕສໍ ສງ຺ຂາ ‘ອເຫສຸ’ນ຺ຕິ, ນ ເຕສໍ ສງ຺ຂາ, ‘ຠວິສ຺ສນ຺ຕີ’’’ຕິ.

‘‘ຍໍ ວິຎ຺ຎາຓໍ ຊາຕໍ ປາຕຸຠູຕໍ, ‘ອຕ຺ຖີ’ຕິ ຕສ຺ສ ສງ຺ຂາ, ‘ອຕ຺ຖີ’ຕິ ຕສ຺ສ ສມຎ຺ຎາ, ‘ອຕ຺ຖີ’ຕິ ຕສ຺ສ ປຎ຺ຎຕ຺ຕິ; ນ ຕສ຺ສ ສງ຺ຂາ ‘ອໂຫສີ’ຕິ, ນ ຕສ຺ສ ສງ຺ຂາ ‘ຠວິສ຺ສຕີ’’’ຕິ.

‘‘ອິເມ ໂຂ, ຠິກ຺ຂເວ, ຕໂຍ ນິຣຸຕ຺ຕິປຖາ ອຘິວຈນປຖາ ປຎ຺ຎຕ຺ຕິປຖາ ອສງ຺ກິຓ຺ຓາ ອສງ຺ກິຓ຺ຓປຸພ຺ພາ, ນ ສງ຺ກີຍນ຺ຕິ, ນ ສງ຺ກີຍິສ຺ສນ຺ຕິ, ອປ຺ປຏິກຸຏ຺ຐາ ສມເຓຫິ ພ຺ຣາຫ຺ມເຓຫິ ວິຎ຺ຎູຫິ. ເຍປິ ເຕ, ຠິກ຺ຂເວ, ອເຫສຸໍ ອຸກ຺ກລາ ວສ຺ສຠຎ຺ຎາ [ໂອກ຺ກລາ ວຍຠິຎ຺ຎາ (ມ. ນິ. ໓.໓໔໓)] ອເຫຕຸກວາທາ ອກິຣິຍວາທາ ນຕ຺ຖິກວາທາ, ເຕປິເມ ຕໂຍ ນິຣຸຕ຺ຕິປເຖ ອຘິວຈນປເຖ ປຎ຺ຎຕ຺ຕິປເຖ ນ ຄຣຫິຕພ຺ພໍ ນປ຺ປຏິກ຺ໂກສິຕພ຺ພໍ ອມຎ຺ຎິໍສຸ. ຕໍ ກິສ຺ສ ເຫຕຸ? ນິນ຺ທາຆຏ຺ຏນພ຺ຍາໂຣສອຸປາຣມ຺ຠຠຍາ’’ຕິ [ນິນ຺ທາພ຺ຍາໂຣສອຸປາຣມ຺ຠຠຍາຕິ (ສີ. ສ຺ຍາ. ກໍ. ປີ.) ມ. ນິ. ໓.໓໔໓].

ອຸປຍວຄ຺ໂຄ ຉຏ຺ໂຐ.

ຕສ຺ສຸທ຺ທານໍ –

ອຸປໂຍ ພີຊໍ ອຸທານໍ, ອຸປາທານປຣິວຕ຺ຕໍ;

ສຕ຺ຕຏ຺ຐານຎ຺ຈ ສມ຺ພຸທ຺ໂຘ, ປຎ຺ຈມຫາລິ ອາທິຕ຺ຕາ.

ວຄ຺ໂຄ ນິຣຸຕ຺ຕິປເຖນ ຈາຕິ.