໖. ຂນ຺ຘສຸຕ຺ຕໍ

໔໘. ສາວຕ຺ຖິນິທານໍ. ‘‘ປຎ຺ຈ, ຠິກ຺ຂເວ, ຂນ຺ເຘ ເທເສສ຺ສາມິ, ປຎ຺ຈຸປາທານກ຺ຂນ຺ເຘ ຈ. ຕໍ ສຸຓາຖ. ກຕເມ ຈ, ຠິກ຺ຂເວ, ປຎ຺ຈກ຺ຂນ຺ຘາ? ຍໍ ກິຎ຺ຈິ, ຠິກ຺ຂເວ, ຣູປໍ ອຕີຕານາຄຕປຈ຺ຈຸປ຺ປນ຺ນໍ ອຊ຺ຌຕ຺ຕໍ ວາ ພຫິທ຺ຘາ ວາ ໂອຬາຣິກໍ ວາ ສຸຂຸມໍ ວາ ຫີນໍ ວາ ປຓີຕໍ ວາ ຍໍ ທູເຣ ສນ຺ຕິເກ ວາ, ອຍໍ ວຸຈ຺ຈຕິ ຣູປກ຺ຂນ຺ໂຘ. ຍາ ກາຈິ ເວທນາ…ເປ… ຍາ ກາຈິ ສຎ຺ຎາ… ເຍ ເກຈິ ສງ຺ຂາຣາ ອຕີຕານາຄຕປຈ຺ຈຸປ຺ປນ຺ນາ ອຊ຺ຌຕ຺ຕໍ ວາ ພຫິທ຺ຘາ ວາ ໂອຬາຣິກາ ວາ ສຸຂຸມາ ວາ…ເປ… ອຍໍ ວຸຈ຺ຈຕິ ສງ຺ຂາຣກ຺ຂນ຺ໂຘ. ຍໍ ກິຎ຺ຈິ ວິຎ຺ຎາຓໍ ອຕີຕານາຄຕປຈ຺ຈຸປ຺ປນ຺ນໍ ອຊ຺ຌຕ຺ຕໍ ວາ ພຫິທ຺ຘາ ວາ ໂອຬາຣິກໍ ວາ ສຸຂຸມໍ ວາ ຫີນໍ ວາ ປຓີຕໍ ວາ ຍໍ ທູເຣ ສນ຺ຕິເກ ວາ, ອຍໍ ວຸຈ຺ຈຕິ ວິຎ຺ຎາຓກ຺ຂນ຺ໂຘ. ອິເມ ວຸຈ຺ຈນ຺ຕິ, ຠິກ຺ຂເວ, ປຎ຺ຈກ຺ຂນ຺ຘາ’’.

‘‘ກຕເມ ຈ, ຠິກ຺ຂເວ, ປຎ຺ຈຸປາທານກ຺ຂນ຺ຘາ? ຍໍ ກິຎ຺ຈິ, ຠິກ຺ຂເວ, ຣູປໍ ອຕີຕານາຄຕປຈ຺ຈຸປ຺ປນ຺ນໍ…ເປ… ຍໍ ທູເຣ ສນ຺ຕິເກ ວາ ສາສວໍ ອຸປາທານິຍໍ, ອຍໍ ວຸຈ຺ຈຕິ ຣູປຸປາທານກ຺ຂນ຺ໂຘ. ຍາ ກາຈິ ເວທນາ…ເປ… ຍາ ທູເຣ ສນ຺ຕິເກ ວາ ສາສວາ ອຸປາທານິຍາ, ອຍໍ ວຸຈ຺ຈຕິ ເວທນຸປາທານກ຺ຂນ຺ໂຘ. ຍາ ກາຈິ ສຎ຺ຎາ…ເປ… ຍາ ທູເຣ ສນ຺ຕິເກ ວາ ສາສວາ ອຸປາທານິຍາ, ອຍໍ ວຸຈ຺ຈຕິ ສຎ຺ຎຸປາທານກ຺ຂນ຺ໂຘ. ເຍ ເກຈິ ສງ຺ຂາຣາ…ເປ… ສາສວາ ອຸປາທານິຍາ, ອຍໍ ວຸຈ຺ຈຕິ ສງ຺ຂາຣຸປາທານກ຺ຂນ຺ໂຘ. ຍໍ ກິຎ຺ຈິ ວິຎ຺ຎາຓໍ ອຕີຕານາຄຕປຈ຺ຈຸປ຺ປນ຺ນໍ…ເປ… ຍໍ ທູເຣ ສນ຺ຕິເກ ວາ ສາສວໍ ອຸປາທານິຍໍ, ອຍໍ ວຸຈ຺ຈຕິ ວິຎ຺ຎາຓຸປາທານກ຺ຂນ຺ໂຘ. ອິເມ ວຸຈ຺ຈນ຺ຕິ, ຠິກ຺ຂເວ, ປຎ຺ຈຸປາທານກ຺ຂນ຺ຘາ’’ຕິ. ຉຏ຺ຐໍ.