໑. ສມຸທຍຘມ຺ມສຸຕ຺ຕໍ

໑໒໖. ສາວຕ຺ຖິນິທານໍ. ອຖ ໂຂ ອຎ຺ຎຕໂຣ ຠິກ຺ຂຸ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ…ເປ… ເອກມນ຺ຕໍ ນິສິນ຺ໂນ ໂຂ ໂສ ຠິກ຺ຂຸ ຠຄວນ຺ຕໍ ເອຕທໂວຈ – ‘‘‘ອວິຊ຺ຊາ ອວິຊ຺ຊາ’ຕິ, ຠນ຺ເຕ, ວຸຈ຺ຈຕິ. ກຕມາ ນຸ ໂຂ, ຠນ຺ເຕ, ອວິຊ຺ຊາ, ກິຕ຺ຕາວຕາ ຈ ອວິຊ຺ຊາຄໂຕ ໂຫຕີ’’ຕິ?

‘‘ອິຘ, ຠິກ຺ຂຸ, ອສ຺ສຸຕວາ ປຸຖຸຊ຺ຊໂນ ສມຸທຍຘມ຺ມໍ ຣູປໍ ‘ສມຸທຍຘມ຺ມໍ ຣູປ’ນ຺ຕິ ຍຖາຠູຕໍ ນປ຺ປຊານາຕິ; ວຍຘມ຺ມໍ ຣູປໍ ‘ວຍຘມ຺ມໍ ຣູປ’ນ຺ຕິ ຍຖາຠູຕໍ ນປ຺ປຊານາຕິ; ສມຸທຍວຍຘມ຺ມໍ ຣູປໍ ‘ສມຸທຍວຍຘມ຺ມໍ ຣູປ’ນ຺ຕິ ຍຖາຠູຕໍ ນປ຺ປຊານາຕິ. ສມຸທຍຘມ຺ມໍ ເວທນໍ ‘ສມຸທຍຘມ຺ມາ ເວທນາ’ຕິ ຍຖາຠູຕໍ ນປ຺ປຊານາຕິ; ວຍຘມ຺ມໍ ເວທນໍ ‘ວຍຘມ຺ມາ ເວທນາ’ຕິ ຍຖາຠູຕໍ ນປ຺ປຊານາຕິ; ສມຸທຍວຍຘມ຺ມໍ ເວທນໍ ‘ສມຸທຍວຍຘມ຺ມາ ເວທນາ’ຕິ ຍຖາຠູຕໍ ນປ຺ປຊານາຕິ. ສມຸທຍຘມ຺ມໍ ສຎ຺ຎໍ…ເປ… ສມຸທຍຘມ຺ເມ ສງ຺ຂາເຣ ‘ສມຸທຍຘມ຺ມາ ສງ຺ຂາຣາ’ຕິ ຍຖາຠູຕໍ ນປ຺ປຊານາຕິ; ວຍຘມ຺ເມ ສງ຺ຂາເຣ ‘ວຍຘມ຺ມາ ສງ຺ຂາຣາ’ຕິ ຍຖາຠູຕໍ ນປ຺ປຊານາຕິ; ສມຸທຍວຍຘມ຺ເມ ສງ຺ຂາເຣ ‘ສມຸທຍວຍຘມ຺ມາ ສງ຺ຂາຣາ’ຕິ ຍຖາຠູຕໍ ນປ຺ປຊານາຕິ. ສມຸທຍຘມ຺ມໍ ວິຎ຺ຎາຓໍ ‘ສມຸທຍຘມ຺ມໍ ວິຎ຺ຎາຓ’ນ຺ຕິ ຍຖາຠູຕໍ ນປ຺ປຊານາຕິ; ວຍຘມ຺ມໍ ວິຎ຺ຎາຓໍ ‘ວຍຘມ຺ມໍ ວິຎ຺ຎາຓ’ນ຺ຕິ ຍຖາຠູຕໍ ນປ຺ປຊານາຕິ; ສມຸທຍວຍຘມ຺ມໍ ວິຎ຺ຎາຓໍ ‘ສມຸທຍວຍຘມ຺ມໍ ວິຎ຺ຎາຓ’ນ຺ຕິ ຍຖາຠູຕໍ ນປ຺ປຊານາຕິ. ອຍໍ ວຸຈ຺ຈຕິ, ຠິກ຺ຂຸ, ອວິຊ຺ຊາ; ເອຕ຺ຕາວຕາ ຈ ອວິຊ຺ຊາຄໂຕ ໂຫຕີ’’ຕິ.

ເອວໍ ວຸຕ຺ເຕ, ໂສ ຠິກ຺ຂຸ ຠຄວນ຺ຕໍ ເອຕທໂວຈ – ‘‘‘ວິຊ຺ຊາ ວິຊ຺ຊາ’ຕິ, ຠນ຺ເຕ, ວຸຈ຺ຈຕິ. ກຕມາ ນຸ ໂຂ, ຠນ຺ເຕ, ວິຊ຺ຊາ, ກິຕ຺ຕາວຕາ ຈ ວິຊ຺ຊາຄໂຕ ໂຫຕີ’’ຕິ?

‘‘ອິຘ, ຠິກ຺ຂຸ, ສຸຕວາ ອຣິຍສາວໂກ ສມຸທຍຘມ຺ມໍ ຣູປໍ ‘ສມຸທຍຘມ຺ມໍ ຣູປ’ນ຺ຕິ ຍຖາຠູຕໍ ປຊານາຕິ; ວຍຘມ຺ມໍ ຣູປໍ ‘ວຍຘມ຺ມໍ ຣູປ’ນ຺ຕິ ຍຖາຠູຕໍ ປຊານາຕິ; ສມຸທຍວຍຘມ຺ມໍ ຣູປໍ ‘ສມຸທຍວຍຘມ຺ມໍ ຣູປ’ນ຺ຕິ ຍຖາຠູຕໍ ປຊານາຕິ. ສມຸທຍຘມ຺ມໍ ເວທນໍ ‘ສມຸທຍຘມ຺ມາ ເວທນາ’ຕິ ຍຖາຠູຕໍ ປຊານາຕິ; ວຍຘມ຺ມໍ ເວທນໍ ‘ວຍຘມ຺ມາ ເວທນາ’ຕິ ຍຖາຠູຕໍ ປຊານາຕິ; ສມຸທຍວຍຘມ຺ມໍ ເວທນໍ ‘ສມຸທຍວຍຘມ຺ມາ ເວທນາ’ຕິ ຍຖາຠູຕໍ ປຊານາຕິ. ສມຸທຍຘມ຺ມໍ ສຎ຺ຎໍ… ສມຸທຍຘມ຺ເມ ສງ຺ຂາເຣ ‘ສມຸທຍຘມ຺ມາ ສງ຺ຂາຣາ’ຕິ ຍຖາຠູຕໍ ປຊານາຕິ; ວຍຘມ຺ເມ ສງ຺ຂາເຣ ‘ວຍຘມ຺ມາ ສງ຺ຂາຣາ’ຕິ ຍຖາຠູຕໍ ປຊານາຕິ; ສມຸທຍວຍຘມ຺ເມ ສງ຺ຂາເຣ ‘ສມຸທຍວຍຘມ຺ມາ ສງ຺ຂາຣາ’ຕິ ຍຖາຠູຕໍ ປຊານາຕິ. ສມຸທຍຘມ຺ມໍ ວິຎ຺ຎາຓໍ ‘ສມຸທຍຘມ຺ມໍ ວິຎ຺ຎາຓ’ນ຺ຕິ ຍຖາຠູຕໍ ປຊານາຕິ; ວຍຘມ຺ມໍ ວິຎ຺ຎາຓໍ ‘ວຍຘມ຺ມໍ ວິຎ຺ຎາຓ’ນ຺ຕິ ຍຖາຠູຕໍ ປຊານາຕິ; ສມຸທຍວຍຘມ຺ມໍ ວິຎ຺ຎາຓໍ ‘ສມຸທຍວຍຘມ຺ມໍ ວິຎ຺ຎາຓ’ນ຺ຕິ ຍຖາຠູຕໍ ປຊານາຕິ. ອຍໍ ວຸຈ຺ຈຕິ, ຠິກ຺ຂຸ, ວິຊ຺ຊາ; ເອຕ຺ຕາວຕາ ຈ ວິຊ຺ຊາຄໂຕ ໂຫຕີ’’ຕິ. ປຐມໍ.