໑໓. ອວິຊ຺ຊາວຄ຺ໂຄ

໑. ສມຸທຍຘມ຺ມສຸຕ຺ຕໍ

໑໒໖. ສາວຕ຺ຖິນິທານໍ. ອຖ ໂຂ ອຎ຺ຎຕໂຣ ຠິກ຺ຂຸ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ…ເປ… ເອກມນ຺ຕໍ ນິສິນ຺ໂນ ໂຂ ໂສ ຠິກ຺ຂຸ ຠຄວນ຺ຕໍ ເອຕທໂວຈ – ‘‘‘ອວິຊ຺ຊາ ອວິຊ຺ຊາ’ຕິ, ຠນ຺ເຕ, ວຸຈ຺ຈຕິ. ກຕມາ ນຸ ໂຂ, ຠນ຺ເຕ, ອວິຊ຺ຊາ, ກິຕ຺ຕາວຕາ ຈ ອວິຊ຺ຊາຄໂຕ ໂຫຕີ’’ຕິ?

‘‘ອິຘ, ຠິກ຺ຂຸ, ອສ຺ສຸຕວາ ປຸຖຸຊ຺ຊໂນ ສມຸທຍຘມ຺ມໍ ຣູປໍ ‘ສມຸທຍຘມ຺ມໍ ຣູປ’ນ຺ຕິ ຍຖາຠູຕໍ ນປ຺ປຊານາຕິ; ວຍຘມ຺ມໍ ຣູປໍ ‘ວຍຘມ຺ມໍ ຣູປ’ນ຺ຕິ ຍຖາຠູຕໍ ນປ຺ປຊານາຕິ; ສມຸທຍວຍຘມ຺ມໍ ຣູປໍ ‘ສມຸທຍວຍຘມ຺ມໍ ຣູປ’ນ຺ຕິ ຍຖາຠູຕໍ ນປ຺ປຊານາຕິ. ສມຸທຍຘມ຺ມໍ ເວທນໍ ‘ສມຸທຍຘມ຺ມາ ເວທນາ’ຕິ ຍຖາຠູຕໍ ນປ຺ປຊານາຕິ; ວຍຘມ຺ມໍ ເວທນໍ ‘ວຍຘມ຺ມາ ເວທນາ’ຕິ ຍຖາຠູຕໍ ນປ຺ປຊານາຕິ; ສມຸທຍວຍຘມ຺ມໍ ເວທນໍ ‘ສມຸທຍວຍຘມ຺ມາ ເວທນາ’ຕິ ຍຖາຠູຕໍ ນປ຺ປຊານາຕິ. ສມຸທຍຘມ຺ມໍ ສຎ຺ຎໍ…ເປ… ສມຸທຍຘມ຺ເມ ສງ຺ຂາເຣ ‘ສມຸທຍຘມ຺ມາ ສງ຺ຂາຣາ’ຕິ ຍຖາຠູຕໍ ນປ຺ປຊານາຕິ; ວຍຘມ຺ເມ ສງ຺ຂາເຣ ‘ວຍຘມ຺ມາ ສງ຺ຂາຣາ’ຕິ ຍຖາຠູຕໍ ນປ຺ປຊານາຕິ; ສມຸທຍວຍຘມ຺ເມ ສງ຺ຂາເຣ ‘ສມຸທຍວຍຘມ຺ມາ ສງ຺ຂາຣາ’ຕິ ຍຖາຠູຕໍ ນປ຺ປຊານາຕິ. ສມຸທຍຘມ຺ມໍ ວິຎ຺ຎາຓໍ ‘ສມຸທຍຘມ຺ມໍ ວິຎ຺ຎາຓ’ນ຺ຕິ ຍຖາຠູຕໍ ນປ຺ປຊານາຕິ; ວຍຘມ຺ມໍ ວິຎ຺ຎາຓໍ ‘ວຍຘມ຺ມໍ ວິຎ຺ຎາຓ’ນ຺ຕິ ຍຖາຠູຕໍ ນປ຺ປຊານາຕິ; ສມຸທຍວຍຘມ຺ມໍ ວິຎ຺ຎາຓໍ ‘ສມຸທຍວຍຘມ຺ມໍ ວິຎ຺ຎາຓ’ນ຺ຕິ ຍຖາຠູຕໍ ນປ຺ປຊານາຕິ. ອຍໍ ວຸຈ຺ຈຕິ, ຠິກ຺ຂຸ, ອວິຊ຺ຊາ; ເອຕ຺ຕາວຕາ ຈ ອວິຊ຺ຊາຄໂຕ ໂຫຕີ’’ຕິ.

ເອວໍ ວຸຕ຺ເຕ, ໂສ ຠິກ຺ຂຸ ຠຄວນ຺ຕໍ ເອຕທໂວຈ – ‘‘‘ວິຊ຺ຊາ ວິຊ຺ຊາ’ຕິ, ຠນ຺ເຕ, ວຸຈ຺ຈຕິ. ກຕມາ ນຸ ໂຂ, ຠນ຺ເຕ, ວິຊ຺ຊາ, ກິຕ຺ຕາວຕາ ຈ ວິຊ຺ຊາຄໂຕ ໂຫຕີ’’ຕິ?

‘‘ອິຘ, ຠິກ຺ຂຸ, ສຸຕວາ ອຣິຍສາວໂກ ສມຸທຍຘມ຺ມໍ ຣູປໍ ‘ສມຸທຍຘມ຺ມໍ ຣູປ’ນ຺ຕິ ຍຖາຠູຕໍ ປຊານາຕິ; ວຍຘມ຺ມໍ ຣູປໍ ‘ວຍຘມ຺ມໍ ຣູປ’ນ຺ຕິ ຍຖາຠູຕໍ ປຊານາຕິ; ສມຸທຍວຍຘມ຺ມໍ ຣູປໍ ‘ສມຸທຍວຍຘມ຺ມໍ ຣູປ’ນ຺ຕິ ຍຖາຠູຕໍ ປຊານາຕິ. ສມຸທຍຘມ຺ມໍ ເວທນໍ ‘ສມຸທຍຘມ຺ມາ ເວທນາ’ຕິ ຍຖາຠູຕໍ ປຊານາຕິ; ວຍຘມ຺ມໍ ເວທນໍ ‘ວຍຘມ຺ມາ ເວທນາ’ຕິ ຍຖາຠູຕໍ ປຊານາຕິ; ສມຸທຍວຍຘມ຺ມໍ ເວທນໍ ‘ສມຸທຍວຍຘມ຺ມາ ເວທນາ’ຕິ ຍຖາຠູຕໍ ປຊານາຕິ. ສມຸທຍຘມ຺ມໍ ສຎ຺ຎໍ… ສມຸທຍຘມ຺ເມ ສງ຺ຂາເຣ ‘ສມຸທຍຘມ຺ມາ ສງ຺ຂາຣາ’ຕິ ຍຖາຠູຕໍ ປຊານາຕິ; ວຍຘມ຺ເມ ສງ຺ຂາເຣ ‘ວຍຘມ຺ມາ ສງ຺ຂາຣາ’ຕິ ຍຖາຠູຕໍ ປຊານາຕິ; ສມຸທຍວຍຘມ຺ເມ ສງ຺ຂາເຣ ‘ສມຸທຍວຍຘມ຺ມາ ສງ຺ຂາຣາ’ຕິ ຍຖາຠູຕໍ ປຊານາຕິ. ສມຸທຍຘມ຺ມໍ ວິຎ຺ຎາຓໍ ‘ສມຸທຍຘມ຺ມໍ ວິຎ຺ຎາຓ’ນ຺ຕິ ຍຖາຠູຕໍ ປຊານາຕິ; ວຍຘມ຺ມໍ ວິຎ຺ຎາຓໍ ‘ວຍຘມ຺ມໍ ວິຎ຺ຎາຓ’ນ຺ຕິ ຍຖາຠູຕໍ ປຊານາຕິ; ສມຸທຍວຍຘມ຺ມໍ ວິຎ຺ຎາຓໍ ‘ສມຸທຍວຍຘມ຺ມໍ ວິຎ຺ຎາຓ’ນ຺ຕິ ຍຖາຠູຕໍ ປຊານາຕິ. ອຍໍ ວຸຈ຺ຈຕິ, ຠິກ຺ຂຸ, ວິຊ຺ຊາ; ເອຕ຺ຕາວຕາ ຈ ວິຊ຺ຊາຄໂຕ ໂຫຕີ’’ຕິ. ປຐມໍ.

໒. ທຸຕິຍສມຸທຍຘມ຺ມສຸຕ຺ຕໍ

໑໒໗. ເອກໍ ສມຍໍ ອາຍສ຺ມາ ຈ ສາຣິປຸຕ຺ໂຕ ອາຍສ຺ມາ ຈ ມຫາໂກຏ຺ຐິໂກ ພາຣາຓສິຍໍ ວິຫຣນ຺ຕິ ອິສິປຕເນ ມິຄທາເຍ. ອຖ ໂຂ ອາຍສ຺ມາ ມຫາໂກຏ຺ຐິໂກ ສາຍນ຺ຫສມຍໍ ປຏິສລ຺ລານາ ວຸຏ຺ຐິໂຕ…ເປ… ເອກມນ຺ຕໍ ນິສິນ຺ໂນ ໂຂ ອາຍສ຺ມາ ມຫາໂກຏ຺ຐິໂກ ອາຍສ຺ມນ຺ຕໍ ສາຣິປຸຕ຺ຕໍ ເອຕທໂວຈ – ‘‘‘ອວິຊ຺ຊາ, ອວິຊ຺ຊາ’ຕິ, ອາວຸໂສ ສາຣິປຸຕ຺ຕ, ວຸຈ຺ຈຕິ. ກຕມາ ນຸ ໂຂ, ອາວຸໂສ, ອວິຊ຺ຊາ, ກິຕ຺ຕາວຕາ ຈ ອວິຊ຺ຊາຄໂຕ ໂຫຕີ’’ຕິ?

‘‘ອິຘາວຸໂສ ອສ຺ສຸຕວາ ປຸຖຸຊ຺ຊໂນ ສມຸທຍຘມ຺ມໍ ຣູປໍ ‘ສມຸທຍຘມ຺ມໍ ຣູປ’ນ຺ຕິ ຍຖາຠູຕໍ ນປ຺ປຊານາຕິ; ວຍຘມ຺ມໍ ຣູປໍ…ເປ… ‘ສມຸທຍວຍຘມ຺ມໍ ຣູປ’ນ຺ຕິ ຍຖາຠູຕໍ ນປ຺ປຊານາຕິ. ສມຸທຍຘມ຺ມໍ ເວທນໍ…ເປ… ວຍຘມ຺ມໍ ເວທນໍ…ເປ… ‘ສມຸທຍວຍຘມ຺ມາ ເວທນາ’ຕິ ຍຖາຠູຕໍ ນປ຺ປຊານາຕິ. ສມຸທຍຘມ຺ມໍ ສຎ຺ຎໍ…ເປ… ສມຸທຍຘມ຺ເມ ສງ຺ຂາເຣ…ເປ… ວຍຘມ຺ເມ ສງ຺ຂາເຣ…ເປ… ສມຸທຍວຍຘມ຺ເມ ສງ຺ຂາເຣ ‘ສມຸທຍວຍຘມ຺ມາ ສງ຺ຂາຣາ’ຕິ ຍຖາຠູຕໍ ນປ຺ປຊານາຕິ. ສມຸທຍຘມ຺ມໍ ວິຎ຺ຎາຓໍ…ເປ… ສມຸທຍວຍຘມ຺ມໍ ວິຎ຺ຎາຓໍ ‘ສມຸທຍວຍຘມ຺ມໍ ວິຎ຺ຎາຓ’ນ຺ຕິ ຍຖາຠູຕໍ ນປ຺ປຊານາຕິ. ອຍໍ ວຸຈ຺ຈຕິ, ອາວຸໂສ, ອວິຊ຺ຊາ; ເອຕ຺ຕາວຕາ ຈ ອວິຊ຺ຊາຄໂຕ ໂຫຕີ’’ຕິ. ທຸຕິຍໍ.

໓. ຕຕິຍສມຸທຍຘມ຺ມສຸຕ຺ຕໍ

໑໒໘. ເອກໍ ສມຍໍ ອາຍສ຺ມາ ຈ ສາຣິປຸຕ຺ໂຕ ອາຍສ຺ມາ ຈ ມຫາໂກຏ຺ຐິໂກ ພາຣາຓສິຍໍ ວິຫຣນ຺ຕິ ອິສິປຕເນ ມິຄທາເຍ…ເປ… ເອກມນ຺ຕໍ ນິສິນ຺ໂນ ໂຂ ອາຍສ຺ມາ ມຫາໂກຏ຺ຐິໂກ ອາຍສ຺ມນ຺ຕໍ ສາຣິປຸຕ຺ຕໍ ເອຕທໂວຈ – ‘‘‘ວິຊ຺ຊາ, ວິຊ຺ຊາ’ຕິ, ອາວຸໂສ ສາຣິປຸຕ຺ຕ, ວຸຈ຺ຈຕິ. ກຕມາ ນຸ ໂຂ, ອາວຸໂສ, ວິຊ຺ຊາ, ກິຕ຺ຕາວຕາ ຈ ວິຊ຺ຊາຄໂຕ ໂຫຕີ’’ຕິ?

‘‘ອິຘາວຸໂສ, ສຸຕວາ ອຣິຍສາວໂກ ສມຸທຍຘມ຺ມໍ ຣູປໍ ‘ສມຸທຍຘມ຺ມໍ ຣູປ’ນ຺ຕິ ຍຖາຠູຕໍ ປຊານາຕິ; ວຍຘມ຺ມໍ ຣູປໍ…ເປ… ສມຸທຍວຍຘມ຺ມໍ ຣູປໍ ‘ສມຸທຍວຍຘມ຺ມໍ ຣູປ’ນ຺ຕິ ຍຖາຠູຕໍ ປຊານາຕິ; ສມຸທຍຘມ຺ມໍ ເວທນໍ…ເປ… ສມຸທຍວຍຘມ຺ມາ ເວທນາ … ສມຸທຍຘມ຺ມໍ ສຎ຺ຎໍ…ເປ… ສມຸທຍຘມ຺ເມ ສງ຺ຂາເຣ… ວຍຘມ຺ເມ ສງ຺ຂາເຣ… ສມຸທຍວຍຘມ຺ເມ ສງ຺ຂາເຣ ‘ສມຸທຍວຍຘມ຺ມາ ສງ຺ຂາຣາ’ຕິ ຍຖາຠູຕໍ ປຊານາຕິ. ສມຸທຍຘມ຺ມໍ ວິຎ຺ຎາຓໍ… ວຍຘມ຺ມໍ ວິຎ຺ຎາຓໍ… ສມຸທຍວຍຘມ຺ມໍ ວິຎ຺ຎາຓໍ ‘ສມຸທຍວຍຘມ຺ມໍ ວິຎ຺ຎາຓ’ນ຺ຕິ ຍຖາຠູຕໍ ປຊານາຕິ. ອຍໍ ວຸຈ຺ຈຕາວຸໂສ, ວິຊ຺ຊາ; ເອຕ຺ຕາວຕາ ຈ ວິຊ຺ຊາຄໂຕ ໂຫຕີ’’ຕິ. ຕຕິຍໍ.

໔. ອສ຺ສາທສຸຕ຺ຕໍ

໑໒໙. ພາຣາຓສິຍໍ ວິຫຣນ຺ຕິ ອິສິປຕເນ ມິຄທາເຍ…ເປ… ເອກມນ຺ຕໍ ນິສິນ຺ໂນ ໂຂ ອາຍສ຺ມາ ມຫາໂກຏ຺ຐິໂກ ອາຍສ຺ມນ຺ຕໍ ສາຣິປຸຕ຺ຕໍ ເອຕທໂວຈ – ‘‘‘ອວິຊ຺ຊາ, ອວິຊ຺ຊາ’ຕິ, ອາວຸໂສ ສາຣິປຸຕ຺ຕ, ວຸຈ຺ຈຕິ. ກຕມາ ນຸ ໂຂ, ອາວຸໂສ, ອວິຊ຺ຊາ, ກິຕ຺ຕາວຕາ ຈ ອວິຊ຺ຊາຄໂຕ ໂຫຕີ’’ຕິ?

‘‘ອິຘາວຸໂສ ອສ຺ສຸຕວາ ປຸຖຸຊ຺ຊໂນ ຣູປສ຺ສ ອສ຺ສາທຎ຺ຈ ອາທີນວຎ຺ຈ ນິສ຺ສຣຓຎ຺ຈ ຍຖາຠູຕໍ ນປ຺ປຊານາຕິ. ເວທນາຍ…ເປ… ສຎ຺ຎາຍ… ສງ຺ຂາຣານໍ… ວິຎ຺ຎາຓສ຺ສ ອສ຺ສາທຎ຺ຈ ອາທີນວຎ຺ຈ ນິສ຺ສຣຓຎ຺ຈ ຍຖາຠູຕໍ ນປ຺ປຊານາຕິ. ອຍໍ ວຸຈ຺ຈຕາວຸໂສ, ອວິຊ຺ຊາ; ເອຕ຺ຕາວຕາ ຈ ອວິຊ຺ຊາຄໂຕ ໂຫຕີ’’ຕິ. ຈຕຸຕ຺ຖໍ.

໕. ທຸຕິຍອສ຺ສາທສຸຕ຺ຕໍ

໑໓໐. ພາຣາຓສິຍໍ ວິຫຣນ຺ຕິ ອິສິປຕເນ ມິຄທາເຍ…ເປ… ‘‘‘ວິຊ຺ຊາ, ວິຊ຺ຊາ’ຕິ, ອາວຸໂສ ສາຣິປຸຕ຺ຕ, ວຸຈ຺ຈຕິ. ກຕມາ ນຸ ໂຂ, ອາວຸໂສ, ວິຊ຺ຊາ, ກິຕ຺ຕາວຕາ ຈ ວິຊ຺ຊາຄໂຕ ໂຫຕີ’’ຕິ?

‘‘ອິຘາວຸໂສ, ສຸຕວາ ອຣິຍສາວໂກ ຣູປສ຺ສ ອສ຺ສາທຎ຺ຈ ອາທີນວຎ຺ຈ ນິສ຺ສຣຓຎ຺ຈ ຍຖາຠູຕໍ ປຊານາຕິ. ເວທນາຍ…ເປ… ສຎ຺ຎາຍ… ສງ຺ຂາຣານໍ… ວິຎ຺ຎາຓສ຺ສ ອສ຺ສາທຎ຺ຈ ອາທີນວຎ຺ຈ ນິສ຺ສຣຓຎ຺ຈ ຍຖາຠູຕໍ ປຊານາຕິ. ອຍໍ ວຸຈ຺ຈຕາວຸໂສ, ວິຊ຺ຊາ; ເອຕ຺ຕາວຕາ ຈ ວິຊ຺ຊາຄໂຕ ໂຫຕີ’’ຕິ. ປຎ຺ຈມໍ.

໖. ສມຸທຍສຸຕ຺ຕໍ

໑໓໑. ພາຣາຓສິຍໍ ວິຫຣນ຺ຕິ ອິສິປຕເນ ມິຄທາເຍ…ເປ… ‘‘‘ອວິຊ຺ຊາ, ອວິຊ຺ຊາ’ຕິ, ອາວຸໂສ ສາຣິປຸຕ຺ຕ, ວຸຈ຺ຈຕິ. ກຕມາ ນຸ ໂຂ, ອາວຸໂສ, ອວິຊ຺ຊາ, ກິຕ຺ຕາວຕາ ຈ ອວິຊ຺ຊາຄໂຕ ໂຫຕີ’’ຕິ?

‘‘ອິຘາວຸໂສ, ອສ຺ສຸຕວາ ປຸຖຸຊ຺ຊໂນ ຣູປສ຺ສ ສມຸທຍຎ຺ຈ ອຕ຺ຖງ຺ຄມຎ຺ຈ ອສ຺ສາທຎ຺ຈ ອາທີນວຎ຺ຈ ນິສ຺ສຣຓຎ຺ຈ ຍຖາຠູຕໍ ນປ຺ປຊານາຕິ. ເວທນາຍ…ເປ… ສຎ຺ຎາຍ… ສງ຺ຂາຣານໍ… ວິຎ຺ຎາຓສ຺ສ ສມຸທຍຎ຺ຈ ອຕ຺ຖງ຺ຄມຎ຺ຈ ອສ຺ສາທຎ຺ຈ ອາທີນວຎ຺ຈ ນິສ຺ສຣຓຎ຺ຈ ຍຖາຠູຕໍ ນປ຺ປຊານາຕິ. ອຍໍ ວຸຈ຺ຈຕາວຸໂສ, ອວິຊ຺ຊາ; ເອຕ຺ຕາວຕາ ຈ ອວິຊ຺ຊາຄໂຕ ໂຫຕີ’’ຕິ. ຉຏ຺ຐໍ.

໗. ທຸຕິຍສມຸທຍສຸຕ຺ຕໍ

໑໓໒. ພາຣາຓສິຍໍ ວິຫຣນ຺ຕິ ອິສິປຕເນ ມິຄທາເຍ…ເປ… ເອກມນ຺ຕໍ ນິສິນ຺ໂນ ໂຂ ອາຍສ຺ມາ ມຫາໂກຏ຺ຐິໂກ ອາຍສ຺ມນ຺ຕໍ ສາຣິປຸຕ຺ຕໍ ເອຕທໂວຈ – ‘‘‘ວິຊ຺ຊາ, ວິຊ຺ຊາ’ຕິ, ອາວຸໂສ ສາຣິປຸຕ຺ຕ, ວຸຈ຺ຈຕິ. ກຕມາ ນຸ ໂຂ, ອາວຸໂສ, ວິຊ຺ຊາ, ກິຕ຺ຕາວຕາ ຈ ວິຊ຺ຊາຄໂຕ ໂຫຕີ’’ຕິ?

‘‘ອິຘາວຸໂສ, ສຸຕວາ ອຣິຍສາວໂກ ຣູປສ຺ສ ສມຸທຍຎ຺ຈ ອຕ຺ຖງ຺ຄມຎ຺ຈ ອສ຺ສາທຎ຺ຈ ອາທີນວຎ຺ຈ ນິສ຺ສຣຓຎ຺ຈ ຍຖາຠູຕໍ ປຊານາຕິ. ເວທນາຍ…ເປ… ສຎ຺ຎາຍ… ສງ຺ຂາຣານໍ… ວິຎ຺ຎາຓສ຺ສ ສມຸທຍຎ຺ຈ ອຕ຺ຖງ຺ຄມຎ຺ຈ ອສ຺ສາທຎ຺ຈ ອາທີນວຎ຺ຈ ນິສ຺ສຣຓຎ຺ຈ ຍຖາຠູຕໍ ປຊານາຕິ. ອຍໍ ວຸຈ຺ຈຕາວຸໂສ, ວິຊ຺ຊາ; ເອຕ຺ຕາວຕາ ຈ ວິຊ຺ຊາຄໂຕ ໂຫຕີ’’ຕິ. ສຕ຺ຕມໍ.

໘. ໂກຏ຺ຐິກສຸຕ຺ຕໍ

໑໓໓. ພາຣາຓສິຍໍ ວິຫຣນ຺ຕິ ອິສິປຕເນ ມິຄທາເຍ. ອຖ ໂຂ ອາຍສ຺ມາ ສາຣິປຸຕ຺ໂຕ ສາຍນ຺ຫສມຍໍ…ເປ… ເອກມນ຺ຕໍ ນິສິນ຺ໂນ ໂຂ ອາຍສ຺ມາ ສາຣິປຸຕ຺ໂຕ ອາຍສ຺ມນ຺ຕໍ ມຫາໂກຏ຺ຐິກໍ ເອຕທໂວຈ – ‘‘‘ອວິຊ຺ຊາ, ອວິຊ຺ຊາ’ຕິ, ອາວຸໂສ ໂກຏ຺ຐິກ, ວຸຈ຺ຈຕິ. ກຕມາ ນຸ ໂຂ, ອາວຸໂສ, ອວິຊ຺ຊາ, ກິຕ຺ຕາວຕາ ຈ ອວິຊ຺ຊາຄໂຕ ໂຫຕີ’’ຕິ?

‘‘ອິຘາວຸໂສ, ອສ຺ສຸຕວາ ປຸຖຸຊ຺ຊໂນ ຣູປສ຺ສ ອສ຺ສາທຎ຺ຈ ອາທີນວຎ຺ຈ ນິສ຺ສຣຓຎ຺ຈ ຍຖາຠູຕໍ ນປ຺ປຊານາຕິ. ເວທນາຍ…ເປ… ສຎ຺ຎາຍ… ສງ຺ຂາຣານໍ… ວິຎ຺ຎາຓສ຺ສ ອສ຺ສາທຎ຺ຈ ອາທີນວຎ຺ຈ ນິສ຺ສຣຓຎ຺ຈ ຍຖາຠູຕໍ ນປ຺ປຊານາຕິ. ອຍໍ ວຸຈ຺ຈຕາວຸໂສ, ອວິຊ຺ຊາ; ເອຕ຺ຕາວຕາ ຈ ອວິຊ຺ຊາຄໂຕ ໂຫຕີ’’ຕິ.

‘‘ອິຘາວຸໂສ ສຸຕວາ ອຣິຍສາວໂກ ຣູປສ຺ສ ອສ຺ສາທຎ຺ຈ ອາທີນວຎ຺ຈ ນິສ຺ສຣຓຎ຺ຈ ຍຖາຠູຕໍ ປຊານາຕິ. ເວທນາຍ…ເປ… ສຎ຺ຎາຍ… ສງ຺ຂາຣານໍ… ວິຎ຺ຎາຓສ຺ສ ອສ຺ສາທຎ຺ຈ ອາທີນວຎ຺ຈ ນິສ຺ສຣຓຎ຺ຈ ຍຖາຠູຕໍ ປຊານາຕິ. ອຍໍ ວຸຈ຺ຈຕາວຸໂສ, ວິຊ຺ຊາ; ເອຕ຺ຕາວຕາ ຈ ວິຊ຺ຊາຄໂຕ ໂຫຕີ’’ຕິ. ອຏ຺ຐມໍ.

໙. ທຸຕິຍໂກຏ຺ຐິກສຸຕ຺ຕໍ

໑໓໔. ພາຣາຓສິຍໍ ວິຫຣນ຺ຕິ ອິສິປຕເນ ມິຄທາເຍ…ເປ… ‘‘‘ອວິຊ຺ຊາ, ອວິຊ຺ຊາ’ຕິ, ອາວຸໂສ ໂກຏ຺ຐິກ, ວຸຈ຺ຈຕິ. ກຕມາ ນຸ ໂຂ, ອາວຸໂສ, ອວິຊ຺ຊາ, ກິຕ຺ຕາວຕາ ຈ ອວິຊ຺ຊາຄໂຕ ໂຫຕີ’’ຕິ?

໑໐. ຕຕິຍໂກຏ຺ຐິກສຸຕ຺ຕໍ

໑໓໕. ຕຎ຺ເຎວ ນິທານໍ. ເອກມນ຺ຕໍ ນິສິນ຺ໂນ ໂຂ ອາຍສ຺ມາ ສາຣິປຸຕ຺ໂຕ ອາຍສ຺ມນ຺ຕໍ ມຫາໂກຏ຺ຐິກໍ ເອຕທໂວຈ – ‘‘‘ອວິຊ຺ຊາ, ອວິຊ຺ຊາ’ຕິ, ອາວຸໂສ ໂກຏ຺ຐິກ, ວຸຈ຺ຈຕິ. ກຕມາ ນຸ ໂຂ, ອາວຸໂສ, ອວິຊ຺ຊາ, ກິຕ຺ຕາວຕາ ຈ ອວິຊ຺ຊາຄໂຕ ໂຫຕີ’’ຕິ?

‘‘ອິຘາວຸໂສ, ອສ຺ສຸຕວາ ປຸຖຸຊ຺ຊໂນ ຣູປໍ ນປ຺ປຊານາຕິ, ຣູປສມຸທຍໍ ນປ຺ປຊານາຕິ, ຣູປນິໂຣຘໍ ນປ຺ປຊານາຕິ, ຣູປນິໂຣຘຄາມິນິໍ ປຏິປທໍ ນປ຺ປຊານາຕິ. ເວທນໍ ນປ຺ປຊານາຕິ…ເປ… ສຎ຺ຎໍ… ສງ຺ຂາເຣ… ວິຎ຺ຎາຓໍ ນປ຺ປຊານາຕິ, ວິຎ຺ຎາຓສມຸທຍໍ ນປ຺ປຊານາຕິ, ວິຎ຺ຎາຓນິໂຣຘໍ ນປ຺ປຊານາຕິ, ວິຎ຺ຎາຓນິໂຣຘຄາມິນິໍ ປຏິປທໍ ນປ຺ປຊານາຕິ. ອຍໍ ວຸຈ຺ຈຕາວຸໂສ, ອວິຊ຺ຊາ; ເອຕ຺ຕາວຕາ ຈ ອວິຊ຺ຊາຄໂຕ ໂຫຕີ’’ຕິ.

ເອວໍ ວຸຕ຺ເຕ, ອາຍສ຺ມາ ສາຣິປຸຕ຺ໂຕ ອາຍສ຺ມນ຺ຕໍ ມຫາໂກຏ຺ຐິກໍ ເອຕທໂວຈ – ‘‘‘ວິຊ຺ຊາ, ວິຊ຺ຊາ’ຕິ, ອາວຸໂສ ໂກຏ຺ຐິກ, ວຸຈ຺ຈຕິ. ກຕມາ ນຸ ໂຂ, ອາວຸໂສ, ວິຊ຺ຊາ, ກິຕ຺ຕາວຕາ ຈ ວິຊ຺ຊາຄໂຕ ໂຫຕີ’’ຕິ? ‘‘ອິຘາວຸໂສ, ສຸຕວາ ອຣິຍສາວໂກ ຣູປໍ ປຊານາຕິ, ຣູປສມຸທຍໍ ປຊານາຕິ, ຣູປນິໂຣຘໍ ປຊານາຕິ, ຣູປນິໂຣຘຄາມິນິໍ ປຏິປທໍ ປຊານາຕິ. ເວທນໍ… ສຎ຺ຎໍ… ສງ຺ຂາເຣ… ວິຎ຺ຎາຓໍ ປຊານາຕິ, ວິຎ຺ຎາຓສມຸທຍໍ ປຊານາຕິ, ວິຎ຺ຎາຓນິໂຣຘໍ ປຊານາຕິ, ວິຎ຺ຎາຓນິໂຣຘຄາມິນິໍ ປຏິປທໍ ປຊານາຕິ. ອຍໍ ວຸຈ຺ຈຕາວຸໂສ, ວິຊ຺ຊາ; ເອຕ຺ຕາວຕາ ຈ ວິຊ຺ຊາຄໂຕ ໂຫຕີ’’ຕິ. ທສມໍ.

ອວິຊ຺ຊາວຄ຺ໂຄ ເຕຣສໂມ.

ຕສ຺ສຸທ຺ທານໍ –

ສມຸທຍຘມ຺ເມ ຕີຓິ, ອສ຺ສາໂທ ອປເຣ ທຸເວ;

ສມຸທເຍ ຈ ທ຺ເວ ວຸຕ຺ຕາ, ໂກຏ຺ຐິເກ ອປເຣ ຕໂຍຕິ.