໕. ພນ຺ຘນສຸຕ຺ຕໍ

໑໑໗. ສາວຕ຺ຖິນິທານໍ. ‘‘ອິຘ ຠິກ຺ຂເວ ອສ຺ສຸຕວາ ປຸຖຸຊ຺ຊໂນ ອຣິຍານໍ ອທສ຺ສາວີ…ເປ… ສປ຺ປຸຣິສຘມ຺ເມ ອວິນີໂຕ ຣູປໍ ອຕ຺ຕໂຕ ສມນຸປສ຺ສຕິ, ຣູປວນ຺ຕໍ ວາ ອຕ຺ຕານໍ; ອຕ຺ຕນິ ວາ ຣູປໍ, ຣູປສ຺ມິໍ ວາ ອຕ຺ຕານໍ. ອຍໍ ວຸຈ຺ຈຕິ, ຠິກ຺ຂເວ, ອສ຺ສຸຕວາ ປຸຖຸຊ຺ຊໂນ ຣູປພນ຺ຘນພທ຺ໂຘ ສນ຺ຕຣພາຫິຣພນ຺ຘນພທ຺ໂຘ ອຕີຣທສ຺ສີ ອປາຣທສ຺ສີ, ພທ຺ໂຘ ຊີຍຕິ [ພທ຺ໂຘ ຊາຍຕິ (ສີ. ປີ.) ພທ຺ໂຘ ຊາຍຕິ ພທ຺ໂຘ ຊີຍຕິ (ສີ. ອຏ຺ຐ. ສ຺ຍາ. ອຏ຺ຐ.)] ພທ຺ໂຘ ມີຍຕິ ພທ຺ໂຘ ອສ຺ມາ ໂລກາ ປຣໍ ໂລກໍ ຄຈ຺ຉຕິ. ເວທນໍ ອຕ຺ຕໂຕ ສມນຸປສ຺ສຕິ…ເປ… ເວທນາຍ ວາ ອຕ຺ຕານໍ. ອຍໍ ວຸຈ຺ຈຕິ, ຠິກ຺ຂເວ, ອສ຺ສຸຕວາ ປຸຖຸຊ຺ຊໂນ ເວທນາພນ຺ຘນພທ຺ໂຘ ສນ຺ຕຣພາຫິຣພນ຺ຘນພທ຺ໂຘ ອຕີຣທສ຺ສີ ອປາຣທສ຺ສີ, ພທ຺ໂຘ ຊີຍຕິ ພທ຺ໂຘ ມີຍຕິ ພທ຺ໂຘ ອສ຺ມາ ໂລກາ ປຣໍ ໂລກໍ ຄຈ຺ຉຕິ. ສຎ຺ຎໍ… ສງ຺ຂາເຣ… ວິຎ຺ຎາຓໍ ອຕ຺ຕໂຕ ສມນຸປສ຺ສຕິ…ເປ… ອຍໍ ວຸຈ຺ຈຕິ, ຠິກ຺ຂເວ, ອສ຺ສຸຕວາ ປຸຖຸຊ຺ຊໂນ ວິຎ຺ຎາຓພນ຺ຘນພທ຺ໂຘ ສນ຺ຕຣພາຫິຣພນ຺ຘນພທ຺ໂຘ ອຕີຣທສ຺ສີ ອປາຣທສ຺ສີ, ພທ຺ໂຘ ຊີຍຕິ ພທ຺ໂຘ ມີຍຕິ ພທ຺ໂຘ ອສ຺ມາ ໂລກາ ປຣໍ ໂລກໍ ຄຈ຺ຉຕິ’’.

‘‘ສຸຕວາ ຈ ໂຂ, ຠິກ຺ຂເວ, ອຣິຍສາວໂກ ອຣິຍານໍ ທສ຺ສາວີ…ເປ… ສປ຺ປຸຣິສຘມ຺ເມ ສຸວິນີໂຕ ນ ຣູປໍ ອຕ຺ຕໂຕ ສມນຸປສ຺ສຕິ, ນ ຣູປວນ຺ຕໍ ວາ ອຕ຺ຕານໍ; ນ ອຕ຺ຕນິ ວາ ຣູປໍ, ນ ຣູປສ຺ມິໍ ວາ ອຕ຺ຕານໍ. ອຍໍ ວຸຈ຺ຈຕິ, ຠິກ຺ຂເວ, ສຸຕວາ ອຣິຍສາວໂກ ນ ຣູປພນ຺ຘນພທ຺ໂຘ, ນ ສນ຺ຕຣພາຫິຣພນ຺ຘນພທ຺ໂຘ, ຕີຣທສ຺ສີ, ປາຣທສ຺ສີ; ‘ປຣິມຸຕ຺ໂຕ ໂສ ທຸກ຺ຂສ຺ມາ’ຕິ ວທາມິ. ນ ເວທນໍ ອຕ຺ຕໂຕ…ເປ… ນ ສຎ຺ຎໍ ອຕ຺ຕໂຕ…ເປ… ນ ສງ຺ຂາເຣ ອຕ຺ຕໂຕ…ເປ… ນ ວິຎ຺ຎາຓໍ ອຕ຺ຕໂຕ ສມນຸປສ຺ສຕິ…ເປ… ອຍໍ ວຸຈ຺ຈຕິ, ຠິກ຺ຂເວ, ສຸຕວາ ອຣິຍສາວໂກ ນ ວິຎ຺ຎາຓພນ຺ຘນພທ຺ໂຘ, ນ ສນ຺ຕຣພາຫິຣພນ຺ຘນພທ຺ໂຘ, ຕີຣທສ຺ສີ, ປາຣທສ຺ສີ, ‘ປຣິມຸຕ຺ໂຕ ໂສ ທຸກ຺ຂສ຺ມາ’ຕິ ວທາມີ’’ຕິ. ປຎ຺ຈມໍ.