໓. ຘມ຺ມກຖິກສຸຕ຺ຕໍ

໑໑໕. ສາວຕ຺ຖິນິທານໍ. ເອກມນ຺ຕໍ ນິສິນ຺ໂນ ໂຂ ໂສ ຠິກ຺ຂຸ ຠຄວນ຺ຕໍ ເອຕທໂວຈ – ‘‘‘ຘມ຺ມກຖິໂກ ຘມ຺ມກຖິໂກ’ຕິ, ຠນ຺ເຕ, ວຸຈ຺ຈຕິ. ກິຕ຺ຕາວຕາ ນຸ ໂຂ, ຠນ຺ເຕ, ຘມ຺ມກຖິໂກ ໂຫຕີ’’ຕິ? ‘‘ຣູປສ຺ສ ເຈ, ຠິກ຺ຂຸ, ນິພ຺ພິທາຍ ວິຣາຄາຍ ນິໂຣຘາຍ ຘມ຺ມໍ ເທເສຕິ ‘ຘມ຺ມກຖິໂກ ຠິກ຺ຂູ’ຕິ ອລໍ ວຈນາຍ. ຣູປສ຺ສ ເຈ, ຠິກ຺ຂຸ, ນິພ຺ພິທາຍ ວິຣາຄາຍ ນິໂຣຘາຍ ປຏິປນ຺ໂນ ໂຫຕິ, ‘ຘມ຺ມານຸຘມ຺ມປ຺ປຏິປນ຺ໂນ ຠິກ຺ຂູ’ຕິ ອລໍ ວຈນາຍ. ຣູປສ຺ສ ເຈ, ຠິກ຺ຂຸ, ນິພ຺ພິທາ ວິຣາຄາ ນິໂຣຘາ ອນຸປາທາວິມຸຕ຺ໂຕ ໂຫຕິ, ‘ທິຏ຺ຐຘມ຺ມນິພ຺ພານປ຺ປຕ຺ໂຕ ຠິກ຺ຂູ’ຕິ ອລໍ ວຈນາຍ. ເວທນາຍ ເຈ, ຠິກ຺ຂຸ…ເປ… ສຎ຺ຎາຍ ເຈ, ຠິກ຺ຂຸ… ສງ຺ຂາຣານໍ ເຈ, ຠິກ຺ຂຸ… ວິຎ຺ຎາຓສ຺ສ ເຈ, ຠິກ຺ຂຸ, ນິພ຺ພິທາຍ ວິຣາຄາຍ ນິໂຣຘາຍ ຘມ຺ມໍ ເທເສຕິ, ‘ຘມ຺ມກຖິໂກ ຠິກ຺ຂູ’ຕິ ອລໍ ວຈນາຍ. ວິຎ຺ຎາຓສ຺ສ ເຈ, ຠິກ຺ຂຸ, ນິພ຺ພິທາຍ ວິຣາຄາຍ ນິໂຣຘາຍ ປຏິປນ຺ໂນ ໂຫຕິ, ‘ຘມ຺ມານຸຘມ຺ມປ຺ປຏິປນ຺ໂນ ຠິກ຺ຂູ’ຕິ ອລໍ ວຈນາຍ. ວິຎ຺ຎາຓສ຺ສ ເຈ, ຠິກ຺ຂຸ, ນິພ຺ພິທາ ວິຣາຄາ ນິໂຣຘາ ອນຸປາທາວິມຸຕ຺ໂຕ ໂຫຕິ, ‘ທິຏ຺ຐຘມ຺ມນິພ຺ພານປ຺ປຕ຺ໂຕ ຠິກ຺ຂູ’ຕິ ອລໍ ວຈນາຍາ’’ຕິ. ຕຕິຍໍ.