໘. ທຸຕິຍຄທ຺ທຸລພທ຺ຘສຸຕ຺ຕໍ

໑໐໐. ສາວຕ຺ຖິນິທານໍ. ‘‘ອນມຕຄ຺ໂຄຍໍ, ຠິກ຺ຂເວ, ສໍສາໂຣ. ປຸພ຺ພາ ໂກຏິ ນ ປຎ຺ຎາຍຕິ ອວິຊ຺ຊານີວຣຓານໍ ສຕ຺ຕານໍ ຕຓ຺ຫາສໍໂຍຊນານໍ ສນ຺ຘາວຕໍ ສໍສຣຕໍ. ເສຍ຺ຍຖາປິ, ຠິກ຺ຂເວ, ສາ ຄທ຺ທຸລພທ຺ໂຘ ທຬ຺ເຫ ຂີເລ ວາ ຖມ຺ເຠ ວາ ອຸປນິພທ຺ໂຘ. ໂສ ຄຈ຺ຉຕິ ເຈປິ ຕເມວ ຂີລໍ ວາ ຖມ຺ຠໍ ວາ ອຸປຄຈ຺ຉຕິ; ຕິຏ຺ຐຕິ ເຈປິ ຕເມວ ຂີລໍ ວາ ຖມ຺ຠໍ ວາ ອຸປຕິຏ຺ຐຕິ; ນິສີທຕິ ເຈປິ ຕເມວ ຂີລໍ ວາ ຖມ຺ຠໍ ວາ ອຸປນິສີທຕິ; ນິປຊ຺ຊຕິ ເຈປິ ຕເມວ ຂີລໍ ວາ ຖມ຺ຠໍ ວາ ອຸປນິປຊ຺ຊຕິ. ເອວເມວ ໂຂ, ຠິກ຺ຂເວ, ອສ຺ສຸຕວາ ປຸຖຸຊ຺ຊໂນ ຣູປໍ ‘ເອຕໍ ມມ, ເອໂສຫມສ຺ມິ, ເອໂສ ເມ ອຕ຺ຕາ’ຕິ ສມນຸປສ຺ສຕິ. ເວທນໍ… ສຎ຺ຎໍ… ສງ຺ຂາເຣ… ວິຎ຺ຎາຓໍ ‘ເອຕໍ ມມ, ເອໂສຫມສ຺ມິ, ເອໂສ ເມ ອຕ຺ຕາ’ຕິ ສມນຸປສ຺ສຕິ. ໂສ ຄຈ຺ຉຕິ ເຈປິ ອິເມ ປຎ຺ຈຸປາທານກ຺ຂນ຺ເຘ ອຸປຄຈ຺ຉຕິ; ຕິຏ຺ຐຕິ ເຈປິ ອິເມ ປຎ຺ຈຸປາທານກ຺ຂນ຺ເຘ ອຸປຕິຏ຺ຐຕິ; ນິສີທຕິ ເຈປິ ອິເມ ປຎ຺ຈຸປາທານກ຺ຂນ຺ເຘ ອຸປນິສີທຕິ; ນິປຊ຺ຊຕິ ເຈປິ ອິເມ ປຎ຺ຈຸປາທານກ຺ຂນ຺ເຘ ອຸປນິປຊ຺ຊຕິ. ຕສ຺ມາຕິຫ, ຠິກ຺ຂເວ, ອຠິກ຺ຂຓໍ ສກໍ ຈິຕ຺ຕໍ ປຈ຺ຈເວກ຺ຂິຕພ຺ພໍ – ‘ທີຆຣຕ຺ຕມິທໍ ຈິຕ຺ຕໍ ສໍກິລິຏ຺ຐໍ ຣາເຄນ ໂທເສນ ໂມເຫນາ’ຕິ. ຈິຕ຺ຕສໍກິເລສາ, ຠິກ຺ຂເວ, ສຕ຺ຕາ ສໍກິລິສ຺ສນ຺ຕິ; ຈິຕ຺ຕໂວທານາ ສຕ຺ຕາ ວິສຸຊ຺ຌນ຺ຕິ.

‘‘ທິຏ຺ຐໍ ໂວ, ຠິກ຺ຂເວ, ຈຣຓໍ ນາມ ຈິຕ຺ຕ’’ນ຺ຕິ? ‘‘ເອວໍ, ຠນ຺ເຕ’’. ‘‘ຕມ຺ປິ ໂຂ, ຠິກ຺ຂເວ, ຈຣຓໍ ນາມ ຈິຕ຺ຕໍ ຈິຕ຺ເຕເນວ ຈິຕ຺ຕິຕໍ. ເຕນປິ ໂຂ, ຠິກ຺ຂເວ, ຈຣເຓນ ຈິຕ຺ເຕນ ຈິຕ຺ຕຎ຺ເຎວ ຈິຕ຺ຕຕຣໍ. ຕສ຺ມາຕິຫ, ຠິກ຺ຂເວ, ອຠິກ຺ຂຓໍ ສກໍ ຈິຕ຺ຕໍ ປຈ຺ຈເວກ຺ຂິຕພ຺ພໍ – ‘ທີຆຣຕ຺ຕມິທໍ ຈິຕ຺ຕໍ ສໍກິລິຏ຺ຐໍ ຣາເຄນ ໂທເສນ ໂມເຫນາ’ຕິ. ຈິຕ຺ຕສໍກິເລສາ, ຠິກ຺ຂເວ, ສຕ຺ຕາ ສໍກິລິສ຺ສນ຺ຕິ; ຈິຕ຺ຕໂວທານາ ສຕ຺ຕາ ວິສຸຊ຺ຌນ຺ຕິ.

‘‘ນາຫໍ, ຠິກ຺ຂເວ, ອຎ຺ຎໍ ເອກນິກາຍມ຺ປິ ສມນຸປສ຺ສາມິ ເອວໍ ຈິຕ຺ຕໍ. ຍຖຍິທໍ, ຠິກ຺ຂເວ, ຕິຣຈ຺ຉານຄຕາ ປາຓາ, ເຕປິ ໂຂ, ຠິກ຺ຂເວ, ຕິຣຈ຺ຉານຄຕາ ປາຓາ ຈິຕ຺ເຕເນວ ຈິຕ຺ຕິຕາ, ເຕຫິປິ ໂຂ, ຠິກ຺ຂເວ, ຕິຣຈ຺ຉານຄເຕຫິ ປາເຓຫິ ຈິຕ຺ຕຎ຺ເຎວ ຈິຕ຺ຕຕຣໍ. ຕສ຺ມາຕິຫ, ຠິກ຺ຂເວ, ອຠິກ຺ຂຓໍ ສກໍ ຈິຕ຺ຕໍ ປຈ຺ຈເວກ຺ຂິຕພ຺ພໍ – ‘ທີຆຣຕ຺ຕມິທໍ ຈິຕ຺ຕໍ ສໍກິລິຏ຺ຐໍ ຣາເຄນ ໂທເສນ ໂມເຫນາ’ຕິ. ຈິຕ຺ຕສໍກິເລສາ, ຠິກ຺ຂເວ, ສຕ຺ຕາ ສໍກິລິສ຺ສນ຺ຕິ; ຈິຕ຺ຕໂວທານາ ສຕ຺ຕາ ວິສຸຊ຺ຌນ຺ຕິ.

‘‘ເສຍ຺ຍຖາປິ, ຠິກ຺ຂເວ, ຣຊໂກ ວາ ຈິຕ຺ຕກາຣໂກ ວາ ຣຊນາຍ ວາ ລາຂາຍ ວາ ຫລິທ຺ທິຍາ ວາ ນີລິຍາ ວາ ມຎ຺ຊິຏ຺ຐາຍ [ມຎ຺ເຊຏ຺ຐາຍ (ສີ. ສ຺ຍາ. ກໍ.), ມຎ຺ເຊຏ຺ຐິຍາ (ປີ.)] ວາ ສຸປຣິມຏ຺ເຐ ຜລເກ ວາ ຠິຕ຺ຕິຍາ ວາ ທຸສ຺ສປຏ຺ເຏ ວາ ອິຕ຺ຖິຣູປໍ ວາ ປຸຣິສຣູປໍ ວາ ອຠິນິມ຺ມິເນຍ຺ຍ ສພ຺ພງ຺ຄປຈ຺ຈງ຺ຄິໍ; ເອວເມວ ໂຂ, ຠິກ຺ຂເວ, ອສ຺ສຸຕວາ ປຸຖຸຊ຺ຊໂນ ຣູປຎ຺ເຎວ ອຠິນິພ຺ພຕ຺ເຕນ຺ໂຕ ອຠິນິພ຺ພຕ຺ເຕຕິ, ເວທນຎ຺ເຎວ…ເປ… ສຎ຺ຎຎ຺ເຎວ… ສງ຺ຂາເຣ ເຍວ… ວິຎ຺ຎາຓຎ຺ເຎວ ອຠິນິພ຺ພຕ຺ເຕນ຺ໂຕ ອຠິນິພ຺ພຕ຺ເຕຕິ. ຕໍ ກິໍ ມຎ຺ຎຖ, ຠິກ຺ຂເວ, ຣູປໍ ນິຈ຺ຈໍ ວາ ອນິຈ຺ຈໍ ວາ’’ຕິ? ‘‘ອນິຈ຺ຈໍ, ຠນ຺ເຕ’’. ‘‘ເວທນາ… ສຎ຺ຎາ… ສງ຺ຂາຣາ… ວິຎ຺ຎາຓໍ…ເປ… ‘‘ຕສ຺ມາຕິຫ, ຠິກ຺ຂເວ, ເອວໍ ປສ຺ສໍ…ເປ… ນາປຣໍ ອິຕ຺ຖຕ຺ຕາຍາຕິ ປຊານາຕີ’’ຕິ. ອຏ຺ຐມໍ.