໗. ອຸປາທາປຣິຕສ຺ສນາສຸຕ຺ຕໍ

໗. ສາວຕ຺ຖິນິທານໍ. ‘‘ອຸປາທາປຣິຕສ຺ສນຎ຺ຈ ໂວ, ຠິກ຺ຂເວ, ເທເສສ຺ສາມິ ອນຸປາທາອປຣິຕສ຺ສນຎ຺ຈ. ຕໍ ສຸຓາຖ, ສາຘຸກໍ ມນສິ ກໂຣຖ; ຠາສິສ຺ສາມີ’’ຕິ. ‘‘ເອວໍ, ຠນ຺ເຕ’’ຕິ, ໂຂ ເຕ ຠິກ຺ຂູ ຠຄວໂຕ ປຈ຺ຈສ຺ໂສສຸໍ. ຠຄວາ ເອຕທໂວຈ –

‘‘ກຖຎ຺ຈ, ຠິກ຺ຂເວ, ອຸປາທາປຣິຕສ຺ສນາ ໂຫຕິ? ອິຘ, ຠິກ຺ຂເວ, ອສ຺ສຸຕວາ ປຸຖຸຊ຺ຊໂນ ອຣິຍານໍ ອທສ຺ສາວີ ອຣິຍຘມ຺ມສ຺ສ ອໂກວິໂທ ອຣິຍຘມ຺ເມ ອວິນີໂຕ, ສປ຺ປຸຣິສານໍ ອທສ຺ສາວີ ສປ຺ປຸຣິສຘມ຺ມສ຺ສ ອໂກວິໂທ ສປ຺ປຸຣິສຘມ຺ເມ ອວິນີໂຕ ຣູປໍ ອຕ຺ຕໂຕ ສມນຸປສ຺ສຕິ, ຣູປວນ຺ຕໍ ວາ ອຕ຺ຕານໍ; ອຕ຺ຕນິ ວາ ຣູປໍ, ຣູປສ຺ມິໍ ວາ ອຕ຺ຕານໍ. ຕສ຺ສ ຕໍ ຣູປໍ ວິປຣິຓມຕິ ອຎ຺ຎຖາ ໂຫຕິ. ຕສ຺ສ ຣູປວິປຣິຓາມຎ຺ຎຖາຠາວາ ຣູປວິປຣິຓາມານຸປຣິວຕ຺ຕິ ວິຎ຺ຎາຓໍ ໂຫຕິ. ຕສ຺ສ ຣູປວິປຣິຓາມານຸປຣິວຕ຺ຕິຊາ ປຣິຕສ຺ສນາ ຘມ຺ມສມຸປ຺ປາທາ ຈິຕ຺ຕໍ ປຣິຍາທາຍ ຕິຏ຺ຐນ຺ຕິ. ເຈຕໂສ ປຣິຍາທານາ ອຸຕ຺ຕາສວາ ຈ ໂຫຕິ ວິຆາຕວາ ຈ ອເປກ຺ຂວາ ຈ ອຸປາທາຍ ຈ ປຣິຕສ຺ສຕິ.

‘‘ເວທນໍ ອຕ຺ຕໂຕ ສມນຸປສ຺ສຕິ, ເວທນາວນ຺ຕໍ ວາ ອຕ຺ຕານໍ; ອຕ຺ຕນິ ວາ ເວທນໍ, ເວທນາຍ ວາ ອຕ຺ຕານໍ. ຕສ຺ສ ສາ ເວທນາ ວິປຣິຓມຕິ ອຎ຺ຎຖາ ໂຫຕິ. ຕສ຺ສ ເວທນາວິປຣິຓາມຎ຺ຎຖາຠາວາ ເວທນາວິປຣິຓາມານຸປຣິວຕ຺ຕິ ວິຎ຺ຎາຓໍ ໂຫຕິ. ຕສ຺ສ ເວທນາວິປຣິຓາມານຸປຣິວຕ຺ຕິຊາ ປຣິຕສ຺ສນາ ຘມ຺ມສມຸປ຺ປາທາ ຈິຕ຺ຕໍ ປຣິຍາທາຍ ຕິຏ຺ຐນ຺ຕິ. ເຈຕໂສ ປຣິຍາທານາ ອຸຕ຺ຕາສວາ ຈ ໂຫຕິ ວິຆາຕວາ ຈ ອເປກ຺ຂວາ ຈ ອຸປາທາຍ ຈ ປຣິຕສ຺ສຕິ.

‘‘ສຎ຺ຎໍ ອຕ຺ຕໂຕ ສມນຸປສ຺ສຕິ…ເປ… ສງ຺ຂາເຣ ອຕ຺ຕໂຕ ສມນຸປສ຺ສຕິ, ສງ຺ຂາຣວນ຺ຕໍ ວາ ອຕ຺ຕານໍ; ອຕ຺ຕນິ ວາ ສງ຺ຂາເຣ, ສງ຺ຂາເຣສຸ ວາ ອຕ຺ຕານໍ. ຕສ຺ສ ເຕ ສງ຺ຂາຣາ ວິປຣິຓມນ຺ຕິ ອຎ຺ຎຖາ ໂຫນ຺ຕິ. ຕສ຺ສ ສງ຺ຂາຣວິປຣິຓາມຎ຺ຎຖາຠາວາ ສງ຺ຂາຣວິປຣິຓາມານຸປຣິວຕ຺ຕິ ວິຎ຺ຎາຓໍ ໂຫຕິ. ຕສ຺ສ ສງ຺ຂາຣວິປຣິຓາມານຸປຣິວຕ຺ຕິຊາ ປຣິຕສ຺ສນາ ຘມ຺ມສມຸປ຺ປາທາ ຈິຕ຺ຕໍ ປຣິຍາທາຍ ຕິຏ຺ຐນ຺ຕິ. ເຈຕໂສ ປຣິຍາທານາ ອຸຕ຺ຕາສວາ ຈ ໂຫຕິ ວິຆາຕວາ ຈ ອເປກ຺ຂວາ ຈ ອຸປາທາຍ ຈ ປຣິຕສ຺ສຕິ.

‘‘ວິຎ຺ຎາຓໍ ອຕ຺ຕໂຕ ສມນຸປສ຺ສຕິ, ວິຎ຺ຎາຓວນ຺ຕໍ ວາ ອຕ຺ຕານໍ; ອຕ຺ຕນິ ວາ ວິຎ຺ຎາຓໍ, ວິຎ຺ຎາຓສ຺ມິໍ ວາ ອຕ຺ຕານໍ. ຕສ຺ສ ຕໍ ວິຎ຺ຎາຓໍ ວິປຣິຓມຕິ ອຎ຺ຎຖາ ໂຫຕິ. ຕສ຺ສ ວິຎ຺ຎາຓວິປຣິຓາມຎ຺ຎຖາຠາວາ ວິຎ຺ຎາຓວິປຣິຓາມານຸປຣິວຕ຺ຕິ ວິຎ຺ຎາຓໍ ໂຫຕິ. ຕສ຺ສ ວິຎ຺ຎາຓວິປຣິຓາມານຸປຣິວຕ຺ຕິຊາ ປຣິຕສ຺ສນາ ຘມ຺ມສມຸປ຺ປາທາ ຈິຕ຺ຕໍ ປຣິຍາທາຍ ຕິຏ຺ຐນ຺ຕິ. ເຈຕໂສ ປຣິຍາທານາ ອຸຕ຺ຕາສວາ ຈ ໂຫຕິ ວິຆາຕວາ ຈ ອເປກ຺ຂວາ ຈ ອຸປາທາຍ ຈ ປຣິຕສ຺ສຕິ. ເອວໍ ໂຂ, ຠິກ຺ຂເວ, ອຸປາທາປຣິຕສ຺ສນາ ໂຫຕິ.

‘‘ກຖຎ຺ຈ, ຠິກ຺ຂເວ, ອນຸປາທາອປຣິຕສ຺ສນາ ໂຫຕິ? ອິຘ, ຠິກ຺ຂເວ, ສຸຕວາ ອຣິຍສາວໂກ ອຣິຍານໍ ທສ຺ສາວີ ອຣິຍຘມ຺ມສ຺ສ ໂກວິໂທ ອຣິຍຘມ຺ເມ ສຸວິນີໂຕ, ສປ຺ປຸຣິສານໍ ທສ຺ສາວີ ສປ຺ປຸຣິສຘມ຺ມສ຺ສ ໂກວິໂທ ສປ຺ປຸຣິສຘມ຺ເມ ສຸວິນີໂຕ ນ ຣູປໍ ອຕ຺ຕໂຕ ສມນຸປສ຺ສຕິ, ນ ຣູປວນ຺ຕໍ ວາ ອຕ຺ຕານໍ; ນ ອຕ຺ຕນິ ວາ ຣູປໍ, ນ ຣູປສ຺ມິໍ ວາ ອຕ຺ຕານໍ. ຕສ຺ສ ຕໍ ຣູປໍ ວິປຣິຓມຕິ ອຎ຺ຎຖາ ໂຫຕິ. ຕສ຺ສ ຣູປວິປຣິຓາມຎ຺ຎຖາຠາວາ ນ ຣູປວິປຣິຓາມານຸປຣິວຕ຺ຕິ ວິຎ຺ຎາຓໍ ໂຫຕິ. ຕສ຺ສ ນ ຣູປວິປຣິຓາມານຸປຣິວຕ຺ຕິຊາ ປຣິຕສ຺ສນາ ຘມ຺ມສມຸປ຺ປາທາ ຈິຕ຺ຕໍ ປຣິຍາທາຍ ຕິຏ຺ຐນ຺ຕິ. ເຈຕໂສ ອປຣິຍາທານາ ນ ເຈວຸຕ຺ຕາສວາ [ນ ເຈວ ອຸຕ຺ຕາສວາ (ປີ. ກ.)] ໂຫຕິ ນ ຈ ວິຆາຕວາ ນ ຈ ອເປກ຺ຂວາ, ອນຸປາທາຍ ຈ ນ ປຣິຕສ຺ສຕິ.

‘‘ນ ເວທນໍ ອຕ຺ຕໂຕ ສມນຸປສ຺ສຕິ, ນ ເວທນາວນ຺ຕໍ ວາ ອຕ຺ຕານໍ; ນ ອຕ຺ຕນິ ວາ ເວທນໍ, ນ ເວທນາຍ ວາ ອຕ຺ຕານໍ. ຕສ຺ສ ສາ ເວທນາ ວິປຣິຓມຕິ ອຎ຺ຎຖາ ໂຫຕິ. ຕສ຺ສ ເວທນາວິປຣິຓາມຎ຺ຎຖາຠາວາ ນ ເວທນາວິປຣິຓາມານຸປຣິວຕ຺ຕິ ວິຎ຺ຎາຓໍ ໂຫຕິ. ຕສ຺ສ ນ ເວທນາວິປຣິຓາມານຸປຣິວຕ຺ຕິຊາ ປຣິຕສ຺ສນາ ຘມ຺ມສມຸປ຺ປາທາ ຈິຕ຺ຕໍ ປຣິຍາທາຍ ຕິຏ຺ຐນ຺ຕິ. ເຈຕໂສ ອປຣິຍາທານາ ນ ເຈວຸຕ຺ຕາສວາ ໂຫຕິ ນ ຈ ວິຆາຕວາ ນ ຈ ອເປກ຺ຂວາ, ອນຸປາທາຍ ຈ ນ ປຣິຕສ຺ສຕິ.

‘‘ນ ສຎ຺ຎໍ…ເປ… ນ ສງ຺ຂາເຣ ອຕ຺ຕໂຕ ສມນຸປສ຺ສຕິ, ນ ສງ຺ຂາຣວນ຺ຕໍ ວາ ອຕ຺ຕານໍ; ນ ອຕ຺ຕນິ ວາ ສງ຺ຂາເຣ, ນ ສງ຺ຂາເຣສຸ ວາ ອຕ຺ຕານໍ. ຕສ຺ສ ເຕ ສງ຺ຂາຣາ ວິປຣິຓມນ຺ຕິ ອຎ຺ຎຖາ ໂຫນ຺ຕິ. ຕສ຺ສ ສງ຺ຂາຣວິປຣິຓາມຎ຺ຎຖາຠາວາ ນ ສງ຺ຂາຣວິປຣິຓາມານຸປຣິວຕ຺ຕິ ວິຎ຺ຎາຓໍ ໂຫຕິ. ຕສ຺ສ ນ ສງ຺ຂາຣວິປຣິຓາມານຸປຣິວຕ຺ຕິຊາ ປຣິຕສ຺ສນາ ຘມ຺ມສມຸປ຺ປາທາ ຈິຕ຺ຕໍ ປຣິຍາທາຍ ຕິຏ຺ຐນ຺ຕິ. ເຈຕໂສ ອປຣິຍາທານາ ນ ເຈວຸຕ຺ຕາສວາ ໂຫຕິ ນ ຈ ວິຆາຕວາ ນ ຈ ອເປກ຺ຂວາ, ອນຸປາທາຍ ຈ ນ ປຣິຕສ຺ສຕິ.

‘‘ນ ວິຎ຺ຎາຓໍ ອຕ຺ຕໂຕ ສມນຸປສ຺ສຕິ, ນ ວິຎ຺ຎາຓວນ຺ຕໍ ວາ ອຕ຺ຕານໍ…ເປ… ຕສ຺ສ ຕໍ ວິຎ຺ຎາຓໍ ວິປຣິຓມຕິ ອຎ຺ຎຖາ ໂຫຕິ. ຕສ຺ສ ວິຎ຺ຎາຓວິປຣິຓາມຎ຺ຎຖາຠາວາ ນ ວິຎ຺ຎາຓວິປຣິຓາມານຸປຣິວຕ຺ຕິ ວິຎ຺ຎາຓໍ ໂຫຕິ. ຕສ຺ສ ນ ວິຎ຺ຎາຓວິປຣິຓາມານຸປຣິວຕ຺ຕິຊາ ປຣິຕສ຺ສນາ ຘມ຺ມສມຸປ຺ປາທາ ຈິຕ຺ຕໍ ປຣິຍາທາຍ ຕິຏ຺ຐນ຺ຕິ. ເຈຕໂສ ອປຣິຍາທານາ ນ ເຈວຸຕ຺ຕາສວາ ໂຫຕິ ນ ຈ ວິຆາຕວາ ນ ຈ ອເປກ຺ຂວາ, ອນຸປາທາຍ ຈ ນ ປຣິຕສ຺ສຕິ. ເອວໍ ໂຂ, ຠິກ຺ຂເວ, ອນຸປາທາ ອປຣິຕສ຺ສນໍ ໂຫຕີ’’ຕິ. ສຕ຺ຕມໍ.