໘. ທຸຕິຍອຸປາທາປຣິຕສ຺ສນາສຸຕ຺ຕໍ

໘. ສາວຕ຺ຖິນິທານໍ. ‘‘ອຸປາທາປຣິຕສ຺ສນຎ຺ຈ ໂວ, ຠິກ຺ຂເວ, ເທເສສ຺ສາມິ ອນຸປາທາອປຣິຕສ຺ສນຎ຺ຈ. ຕໍ ສຸຓາຖ…ເປ… ກຖຎ຺ຈ, ຠິກ຺ຂເວ, ອຸປາທາປຣິຕສ຺ສນາ ໂຫຕິ? ອິຘ, ຠິກ຺ຂເວ, ອສ຺ສຸຕວາ ປຸຖຸຊ຺ຊໂນ ຣູປໍ ‘ເອຕໍ ມມ, ເອໂສຫມສ຺ມິ, ເອໂສ ເມ ອຕ຺ຕາ’ຕິ ສມນຸປສ຺ສຕິ. ຕສ຺ສ ຕໍ ຣູປໍ ວິປຣິຓມຕິ ອຎ຺ຎຖາ ໂຫຕິ. ຕສ຺ສ ຣູປວິປຣິຓາມຎ຺ຎຖາຠາວາ ອຸປ຺ປຊ຺ຊນ຺ຕິ ໂສກປຣິເທວທຸກ຺ຂໂທມນສ຺ສຸປາຍາສາ. ເວທນໍ ເອຕໍ ມມ…ເປ… ສຎ຺ຎໍ ເອຕໍ ມມ… ສງ຺ຂາເຣ ເອຕໍ ມມ… ວິຎ຺ຎາຓໍ ‘ເອຕໍ ມມ, ເອໂສຫມສ຺ມິ, ເອໂສ ເມ ອຕ຺ຕາ’ຕິ ສມນຸປສ຺ສຕິ. ຕສ຺ສ ຕໍ ວິຎ຺ຎາຓໍ ວິປຣິຓມຕິ ອຎ຺ຎຖາ ໂຫຕິ. ຕສ຺ສ ວິຎ຺ຎາຓວິປຣິຓາມຎ຺ຎຖາຠາວາ ອຸປ຺ປຊ຺ຊນ຺ຕິ ໂສກປຣິເທວທຸກ຺ຂໂທມນສ຺ສຸປາຍາສາ. ເອວໍ ໂຂ, ຠິກ຺ຂເວ, ອຸປາທາປຣິຕສ຺ສນາ ໂຫຕິ.

‘‘ກຖຎ຺ຈ, ຠິກ຺ຂເວ, ອນຸປາທາອປຣິຕສ຺ສນາ ໂຫຕິ? ອິຘ, ຠິກ຺ຂເວ, ສຸຕວາ ອຣິຍສາວໂກ ຣູປໍ ‘ເນຕໍ ມມ, ເນໂສຫມສ຺ມິ, ນ ເມໂສ ອຕ຺ຕາ’ຕິ ສມນຸປສ຺ສຕິ. ຕສ຺ສ ຕໍ ຣູປໍ ວິປຣິຓມຕິ ອຎ຺ຎຖາ ໂຫຕິ. ຕສ຺ສ ຣູປວິປຣິຓາມຎ຺ຎຖາຠາວາ ນຸປ຺ປຊ຺ຊນ຺ຕິ ໂສກປຣິເທວທຸກ຺ຂໂທມນສ຺ສຸປາຍາສາ. ເວທນໍ ເນຕໍ ມມ… ສຎ຺ຎໍ ເນຕໍ ມມ… ສງ຺ຂາເຣ ເນຕໍ ມມ… ວິຎ຺ຎາຓໍ ‘ເນຕໍ ມມ, ເນໂສຫມສ຺ມິ, ນ ເມໂສ ອຕ຺ຕາ’ຕິ ສມນຸປສ຺ສຕິ. ຕສ຺ສ ຕໍ ວິຎ຺ຎາຓໍ ວິປຣິຓມຕິ ອຎ຺ຎຖາ ໂຫຕິ. ຕສ຺ສ ວິຎ຺ຎາຓວິປຣິຓາມຎ຺ຎຖາຠາວາ ນຸປ຺ປຊ຺ຊນ຺ຕິ ໂສກປຣິເທວທຸກ຺ຂໂທມນສ຺ສຸປາຍາສາ. ເອວໍ ໂຂ, ຠິກ຺ຂເວ, ອນຸປາທາອປຣິຕສ຺ສນາ ໂຫຕີ’’ຕິ. ອຏ຺ຐມໍ.