໑. ນກຸລປິຕຸສຸຕ຺ຕໍ

໑. ເອວໍ ເມ ສຸຕໍ – ເອກໍ ສມຍໍ ຠຄວາ ຠຄ຺ເຄສຸ ວິຫຣຕິ ສຸສຸມາຣຄິເຣ [ສຸໍສຸມາຣຄິເຣ (ສີ. ສ຺ຍາ. ກໍ. ປີ.)] ເຠສກຬາວເນ ມິຄທາເຍ. ອຖ ໂຂ ນກຸລປິຕາ ຄຫປຕິ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ນກຸລປິຕາ ຄຫປຕິ ຠຄວນ຺ຕໍ ເອຕທໂວຈ –

‘‘ອຫມສ຺ມິ, ຠນ຺ເຕ, ຊິຓ຺ໂຓ ວຸຑ຺ໂຒ ມຫລ຺ລໂກ ອທ຺ຘຄໂຕ ວໂຍອນຸປ຺ປຕ຺ໂຕ ອາຕຸຣກາໂຍ ອຠິກ຺ຂຓາຕງ຺ໂກ. ອນິຈ຺ຈທສ຺ສາວີ ໂຂ ປນາຫໍ, ຠນ຺ເຕ, ຠຄວໂຕ ມໂນຠາວນີຍານຎ຺ຈ ຠິກ຺ຂູນໍ. ໂອວທຕຸ ມໍ, ຠນ຺ເຕ, ຠຄວາ; ອນຸສາສຕຸ ມໍ, ຠນ຺ເຕ, ຠຄວາ; ຍໍ ມມສ຺ສ ທີຆຣຕ຺ຕໍ ຫິຕາຍ ສຸຂາຍາ’’ຕິ.

‘‘ເອວເມຕໍ, ຄຫປຕິ, ເອວເມຕໍ, ຄຫປຕິ! ອາຕຸໂຣ ຫາຍໍ, ຄຫປຕິ, ກາໂຍ ອຓ຺ຑຠູໂຕ ປຣິໂຍນທ຺ໂຘ. ໂຍ ຫິ, ຄຫປຕິ, ອິມໍ ກາຍໍ ປຣິຫຣນ຺ໂຕ ມຸຫຸຕ຺ຕມ຺ປິ ອາໂຣຄ຺ຍໍ ປຏິຊາເນຍ຺ຍ, ກິມຎ຺ຎຕ຺ຣ ພາລ຺ຍາ? ຕສ຺ມາຕິຫ ເຕ, ຄຫປຕິ, ເອວໍ ສິກ຺ຂິຕພ຺ພໍ – ‘ອາຕຸຣກາຍສ຺ສ ເມ ສໂຕ ຈິຕ຺ຕໍ ອນາຕຸຣໍ ຠວິສ຺ສຕີ’ຕິ. ເອວຎ຺ຫິ ເຕ, ຄຫປຕິ, ສິກ຺ຂິຕພ຺ພ’’ນ຺ຕິ.

ອຖ ໂຂ ນກຸລປິຕາ ຄຫປຕິ ຠຄວໂຕ ຠາສິຕໍ ອຠິນນ຺ທິຕ຺ວາ ອນຸໂມທິຕ຺ວາ ອຸຏ຺ຐາຍາສນາ ຠຄວນ຺ຕໍ ອຠິວາເທຕ຺ວາ ປທກ຺ຂິຓໍ ກຕ຺ວາ ເຍນາຍສ຺ມາ ສາຣິປຸຕ຺ໂຕ ເຕນຸປສງ຺ກມິ; ອຸປສງ຺ກມິຕ຺ວາ ອາຍສ຺ມນ຺ຕໍ ສາຣິປຸຕ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ນໍ ໂຂ ນກຸລປິຕຣໍ ຄຫປຕິໍ ອາຍສ຺ມາ ສາຣິປຸຕ຺ໂຕ ເອຕທໂວຈ – ‘‘ວິປ຺ປສນ຺ນານິ ໂຂ ເຕ, ຄຫປຕິ, ອິນ຺ທ຺ຣິຍານິ; ປຣິສຸທ຺ໂຘ ມຸຂວຓ຺ໂຓ ປຣິໂຍທາໂຕ. ອລຕ຺ຖ ໂນ ອຊ຺ຊ ຠຄວໂຕ ສມ຺ມຸຂາ ຘມ຺ມິໍ ກຖໍ ສວນາຍາ’’ຕິ?

‘‘ກຖຎ຺ຫິ ໂນ ສິຍາ, ຠນ຺ເຕ! ອິທານາຫໍ, ຠນ຺ເຕ, ຠຄວຕາ ຘມ຺ມິຍາ ກຖາຍ ອມເຕນ ອຠິສິຕ຺ໂຕ’’ຕິ. ‘‘ຍຖາ ກຖໍ ປນ ຕ຺ວໍ, ຄຫປຕິ, ຠຄວຕາ ຘມ຺ມິຍາ ກຖາຍ ອມເຕນ ອຠິສິຕ຺ໂຕ’’ຕິ? ‘‘ອິຘາຫໍ, ຠນ຺ເຕ, ເຍນ ຠຄວາ ເຕນຸປສງ຺ກມິໍ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິໍ. ເອກມນ຺ຕໍ ນິສິນ຺ໂນ ຂ຺ວາຫໍ, ຠນ຺ເຕ, ຠຄວນ຺ຕໍ ເອຕທໂວຈໍ – ‘ອຫມສ຺ມິ, ຠນ຺ເຕ, ຊິຓ຺ໂຓ ວຸຑ຺ໂຒ ມຫລ຺ລໂກ ອທ຺ຘຄໂຕ ວໂຍອນຸປ຺ປຕ຺ໂຕ ອາຕຸຣກາໂຍ ອຠິກ຺ຂຓາຕງ຺ໂກ. ອນິຈ຺ຈທສ຺ສາວີ ໂຂ ປນາຫໍ, ຠນ຺ເຕ, ຠຄວໂຕ ມໂນຠາວນີຍານຎ຺ຈ ຠິກ຺ຂູນໍ. ໂອວທຕຸ ມໍ, ຠນ຺ເຕ, ຠຄວາ; ອນຸສາສຕຸ ມໍ, ຠນ຺ເຕ, ຠຄວາ; ຍໍ ມມສ຺ສ ທີຆຣຕ຺ຕໍ ຫິຕາຍ ສຸຂາຍາ’’’ຕິ.

‘‘ເອວໍ ວຸຕ຺ເຕ, ມໍ, ຠນ຺ເຕ, ຠຄວາ ເອຕທໂວຈ – ‘ເອວເມຕໍ, ຄຫປຕິ, ເອວເມຕໍ, ຄຫປຕິ! ອາຕຸໂຣ ຫາຍໍ, ຄຫປຕິ, ກາໂຍ ອຓ຺ຑຠູໂຕ ປຣິໂຍນທ຺ໂຘ. ໂຍ ຫິ, ຄຫປຕິ, ອິມໍ ກາຍໍ ປຣິຫຣນ຺ໂຕ ມຸຫຸຕ຺ຕມ຺ປິ ອາໂຣຄ຺ຍໍ ປຏິຊາເນຍ຺ຍ, ກິມຎ຺ຎຕ຺ຣ ພາລ຺ຍາ? ຕສ຺ມາຕິຫ ເຕ ຄຫປຕິ, ເອວໍ ສິກ຺ຂິຕພ຺ພໍ – ອາຕຸຣກາຍສ຺ສ ເມ ສໂຕ ຈິຕ຺ຕໍ ອນາຕຸຣໍ ຠວິສ຺ສຕີຕິ. ເອວຎ຺ຫິ ເຕ, ຄຫປຕິ, ສິກ຺ຂິຕພ຺ພ’ນ຺ຕິ. ເອວໍ ຂ຺ວາຫໍ, ຠນ຺ເຕ, ຠຄວຕາ ຘມ຺ມິຍາ ກຖາຍ ອມເຕນ ອຠິສິຕ຺ໂຕ’’ຕິ.

‘‘ນ ຫິ ປນ ຕໍ, ຄຫປຕິ, ປຏິຠາສິ ຠຄວນ຺ຕໍ [ຕໍ ຠຄວນ຺ຕໍ (ສີ.)] ອຸຕ຺ຕຣິໍ ປຏິປຸຈ຺ຉິຕຸໍ – ‘ກິຕ຺ຕາວຕາ ນຸ ໂຂ, ຠນ຺ເຕ, ອາຕຸຣກາໂຍ ເຈວ ໂຫຕິ ອາຕຸຣຈິຕ຺ໂຕ ຈ, ກິຕ຺ຕາວຕາ ຈ ປນ ອາຕຸຣກາໂຍ ຫິ ໂຂ ໂຫຕິ ໂນ ຈ ອາຕຸຣຈິຕ຺ໂຕ’’’ຕິ? ‘‘ທູຣໂຕປິ ໂຂ ມຍໍ, ຠນ຺ເຕ, ອາຄຈ຺ເຉຍ຺ຍາມ ອາຍສ຺ມໂຕ ສາຣິປຸຕ຺ຕສ຺ສ ສນ຺ຕິເກ ເອຕສ຺ສ ຠາສິຕສ຺ສ ອຕ຺ຖມຎ຺ຎາຕຸໍ. ສາຘຸ ວຕາຍສ຺ມນ຺ຕໍເຍວ ສາຣິປຸຕ຺ຕໍ ປຏິຠາຕຸ ເອຕສ຺ສ ຠາສິຕສ຺ສ ອຕ຺ໂຖ’’ຕິ.

‘‘ເຕນ ຫິ, ຄຫປຕິ, ສຸຓາຫິ, ສາຘຸກໍ ມນສິ ກໂຣຫິ; ຠາສິສ຺ສາມີ’’ຕິ. ‘‘ເອວໍ, ຠນ຺ເຕ’’ຕິ ໂຂ ນກຸລປິຕາ ຄຫປຕິ ອາຍສ຺ມໂຕ ສາຣິປຸຕ຺ຕສ຺ສ ປຈ຺ຈສ຺ໂສສິ. ອາຍສ຺ມາ ສາຣິປຸຕ຺ໂຕ ເອຕທໂວຈ –

‘‘ກຖຎ຺ຈ, ຄຫປຕິ, ອາຕຸຣກາໂຍ ເຈວ ໂຫຕິ, ອາຕຸຣຈິຕ຺ໂຕ ຈ? ອິຘ, ຄຫປຕິ, ອສ຺ສຸຕວາ ປຸຖຸຊ຺ຊໂນ ອຣິຍານໍ ອທສ຺ສາວີ ອຣິຍຘມ຺ມສ຺ສ ອໂກວິໂທ ອຣິຍຘມ຺ເມ ອວິນີໂຕ ສປ຺ປຸຣິສານໍ ອທສ຺ສາວີ ສປ຺ປຸຣິສຘມ຺ມສ຺ສ ອໂກວິໂທ ສປ຺ປຸຣິສຘມ຺ເມ ອວິນີໂຕ ຣູປໍ ອຕ຺ຕໂຕ ສມນຸປສ຺ສຕິ, ຣູປວນ຺ຕໍ ວາ ອຕ຺ຕານໍ; ອຕ຺ຕນິ ວາ ຣູປໍ, ຣູປສ຺ມິໍ ວາ ອຕ຺ຕານໍ. ‘ອຫໍ ຣູປໍ, ມມ ຣູປ’ນ຺ຕິ ປຣິຍຸຏ຺ຐຏ຺ຐາຍີ ໂຫຕິ. ຕສ຺ສ ‘ອຫໍ ຣູປໍ, ມມ ຣູປ’ນ຺ຕິ ປຣິຍຸຏ຺ຐຏ຺ຐາຍິໂນ ຕໍ ຣູປໍ ວິປຣິຓມຕິ ອຎ຺ຎຖາ ໂຫຕິ. ຕສ຺ສ ຣູປວິປຣິຓາມຎ຺ຎຖາຠາວາ ອຸປ຺ປຊ຺ຊນ຺ຕິ ໂສກປຣິເທວທຸກ຺ຂໂທມນສ຺ສຸປາຍາສາ.

‘‘ເວທນໍ ອຕ຺ຕໂຕ ສມນຸປສ຺ສຕິ, ເວທນາວນ຺ຕໍ ວາ ອຕ຺ຕານໍ; ອຕ຺ຕນິ ວາ ເວທນໍ, ເວທນາຍ ວາ ອຕ຺ຕານໍ. ‘ອຫໍ ເວທນາ, ມມ ເວທນາ’ຕິ ປຣິຍຸຏ຺ຐຏ຺ຐາຍີ ໂຫຕິ. ຕສ຺ສ ‘ອຫໍ ເວທນາ, ມມ ເວທນາ’ຕິ ປຣິຍຸຏ຺ຐຏ຺ຐາຍິໂນ, ສາ ເວທນາ ວິປຣິຓມຕິ ອຎ຺ຎຖາ ໂຫຕິ. ຕສ຺ສ ເວທນາວິປຣິຓາມຎ຺ຎຖາຠາວາ ອຸປ຺ປຊ຺ຊນ຺ຕິ ໂສກປຣິເທວທຸກ຺ຂໂທມນສ຺ສຸປາຍາສາ.

‘‘ສຎ຺ຎໍ ອຕ຺ຕໂຕ ສມນຸປສ຺ສຕິ, ສຎ຺ຎາວນ຺ຕໍ ວາ ອຕ຺ຕານໍ; ອຕ຺ຕນິ ວາ ສຎ຺ຎໍ, ສຎ຺ຎາຍ ວາ ອຕ຺ຕານໍ. ‘ອຫໍ ສຎ຺ຎາ, ມມ ສຎ຺ຎາ’ຕິ ປຣິຍຸຏ຺ຐຏ຺ຐາຍີ ໂຫຕິ. ຕສ຺ສ ‘ອຫໍ ສຎ຺ຎາ, ມມ ສຎ຺ຎາ’ຕິ ປຣິຍຸຏ຺ຐຏ຺ຐາຍິໂນ, ສາ ສຎ຺ຎາ ວິປຣິຓມຕິ ອຎ຺ຎຖາ ໂຫຕິ. ຕສ຺ສ ສຎ຺ຎາວິປຣິຓາມຎ຺ຎຖາຠາວາ ອຸປ຺ປຊ຺ຊນ຺ຕິ ໂສກປຣິເທວທຸກ຺ຂໂທມນສ຺ສຸປາຍາສາ.

‘‘ສງ຺ຂາເຣ ອຕ຺ຕໂຕ ສມນຸປສ຺ສຕິ, ສງ຺ຂາຣວນ຺ຕໍ ວາ ອຕ຺ຕານໍ; ອຕ຺ຕນິ ວາ ສງ຺ຂາເຣ, ສງ຺ຂາເຣສຸ ວາ ອຕ຺ຕານໍ. ‘ອຫໍ ສງ຺ຂາຣາ, ມມ ສງ຺ຂາຣາ’ຕິ ປຣິຍຸຏ຺ຐຏ຺ຐາຍີ ໂຫຕິ. ຕສ຺ສ ‘ອຫໍ ສງ຺ຂາຣາ, ມມ ສງ຺ຂາຣາ’ຕິ ປຣິຍຸຏ຺ຐຏ຺ຐາຍິໂນ, ເຕ ສງ຺ຂາຣາ ວິປຣິຓມນ຺ຕິ ອຎ຺ຎຖາ ໂຫນ຺ຕິ. ຕສ຺ສ ສງ຺ຂາຣວິປຣິຓາມຎ຺ຎຖາຠາວາ ອຸປ຺ປຊ຺ຊນ຺ຕິ ໂສກປຣິເທວທຸກ຺ຂໂທມນສ຺ສຸປາຍາສາ.

‘‘ວິຎ຺ຎາຓໍ ອຕ຺ຕໂຕ ສມນຸປສ຺ສຕິ, ວິຎ຺ຎາຓວນ຺ຕໍ ວາ ອຕ຺ຕານໍ; ອຕ຺ຕນິ ວາ ວິຎ຺ຎາຓໍ, ວິຎ຺ຎາຓສ຺ມິໍ ວາ ອຕ຺ຕານໍ. ‘ອຫໍ ວິຎ຺ຎາຓໍ, ມມ ວິຎ຺ຎາຓ’ນ຺ຕິ ປຣິຍຸຏ຺ຐຏ຺ຐາຍີ ໂຫຕິ. ຕສ຺ສ ‘ອຫໍ ວິຎ຺ຎາຓໍ, ມມ ວິຎ຺ຎາຓ’ນ຺ຕິ ປຣິຍຸຏ຺ຐຏ຺ຐາຍິໂນ, ຕໍ ວິຎ຺ຎາຓໍ ວິປຣິຓມຕິ ອຎ຺ຎຖາ ໂຫຕິ. ຕສ຺ສ ວິຎ຺ຎາຓວິປຣິຓາມຎ຺ຎຖາຠາວາ ອຸປ຺ປຊ຺ຊນ຺ຕິ ໂສກປຣິເທວທຸກ຺ຂໂທມນສ຺ສຸປາຍາສາ. ເອວໍ ໂຂ, ຄຫປຕິ, ອາຕຸຣກາໂຍ ເຈວ ໂຫຕິ ອາຕຸຣຈິຕ຺ໂຕ ຈ.

‘‘ກຖຎ຺ຈ, ຄຫປຕິ, ອາຕຸຣກາໂຍ ຫິ ໂຂ ໂຫຕິ ໂນ ຈ ອາຕຸຣຈິຕ຺ໂຕ? ອິຘ, ຄຫປຕິ, ສຸຕວາ ອຣິຍສາວໂກ ອຣິຍານໍ ທສ຺ສາວີ ອຣິຍຘມ຺ມສ຺ສ ໂກວິໂທ ອຣິຍຘມ຺ເມ ສຸວິນີໂຕ ສປ຺ປຸຣິສານໍ ທສ຺ສາວີ ສປ຺ປຸຣິສຘມ຺ມສ຺ສ ໂກວິໂທ ສປ຺ປຸຣິສຘມ຺ເມ ສຸວິນີໂຕ ນ ຣູປໍ ອຕ຺ຕໂຕ ສມນຸປສ຺ສຕິ, ນ ຣູປວນ຺ຕໍ ວາ ອຕ຺ຕານໍ; ນ ອຕ຺ຕນິ ວາ ຣູປໍ, ນ ຣູປສ຺ມິໍ ວາ ອຕ຺ຕານໍ. ‘ອຫໍ ຣູປໍ, ມມ ຣູປ’ນ຺ຕິ ນ ປຣິຍຸຏ຺ຐຏ຺ຐາຍີ ໂຫຕິ. ຕສ຺ສ ‘ອຫໍ ຣູປໍ, ມມ ຣູປ’ນ຺ຕິ ອປຣິຍຸຏ຺ຐຏ຺ຐາຍິໂນ, ຕໍ ຣູປໍ ວິປຣິຓມຕິ ອຎ຺ຎຖາ ໂຫຕິ. ຕສ຺ສ ຣູປວິປຣິຓາມຎ຺ຎຖາຠາວາ ນຸປ຺ປຊ຺ຊນ຺ຕິ ໂສກປຣິເທວທຸກ຺ຂໂທມນສ຺ສຸປາຍາສາ.

‘‘ນ ເວທນໍ ອຕ຺ຕໂຕ ສມນຸປສ຺ສຕິ, ນ ເວທນາວນ຺ຕໍ ວາ ອຕ຺ຕານໍ; ນ ອຕ຺ຕນິ ວາ ເວທນໍ, ນ ເວທນາຍ ວາ ອຕ຺ຕານໍ. ‘ອຫໍ ເວທນາ, ມມ ເວທນາ’ຕິ ນ ປຣິຍຸຏ຺ຐຏ຺ຐາຍີ ໂຫຕິ. ຕສ຺ສ ‘ອຫໍ ເວທນາ, ມມ ເວທນາ’ຕິ ອປຣິຍຸຏ຺ຐຏ຺ຐາຍິໂນ, ສາ ເວທນາ ວິປຣິຓມຕິ ອຎ຺ຎຖາ ໂຫຕິ. ຕສ຺ສ ເວທນາວິປຣິຓາມຎ຺ຎຖາຠາວາ ນຸປ຺ປຊ຺ຊນ຺ຕິ ໂສກປຣິເທວທຸກ຺ຂໂທມນສ຺ສຸປາຍາສາ.

‘‘ນ ສຎ຺ຎໍ ອຕ຺ຕໂຕ ສມນຸປສ຺ສຕິ, ນ ສຎ຺ຎາວນ຺ຕໍ ວາ ອຕ຺ຕານໍ; ນ ອຕ຺ຕນິ ວາ ສຎ຺ຎໍ, ນ ສຎ຺ຎາຍ ວາ ອຕ຺ຕານໍ. ‘ອຫໍ ສຎ຺ຎາ, ມມ ສຎ຺ຎາ’ຕິ ນ ປຣິຍຸຏ຺ຐຏ຺ຐາຍີ ໂຫຕິ. ຕສ຺ສ ‘ອຫໍ ສຎ຺ຎາ, ມມ ສຎ຺ຎາ’ຕິ ອປຣິຍຸຏ຺ຐຏ຺ຐາຍິໂນ, ສາ ສຎ຺ຎາ ວິປຣິຓມຕິ ອຎ຺ຎຖາ ໂຫຕິ. ຕສ຺ສ ສຎ຺ຎາວິປຣິຓາມຎ຺ຎຖາຠາວາ ນຸປ຺ປຊ຺ຊນ຺ຕິ ໂສກປຣິເທວທຸກ຺ຂໂທມນສ຺ສຸປາຍາສາ.

``ນ ສງ຺ຂາເຣ ອຕ຺ຕໂຕ ສມນຸປສ຺ສຕິ, ນ ສງ຺ຂາຣວນ຺ຕໍ ວາ ອຕ຺ຕານໍ; ນ ອຕ຺ຕນິ ວາ ສງ຺ຂາເຣ, ນ ສງ຺ຂາເຣສຸ ວາ ອຕ຺ຕານໍ. ‘ອຫໍ ສງ຺ຂາຣາ, ມມ ສງ຺ຂາຣາ’ຕິ ນ ປຣິຍຸຏ຺ຐຏ຺ຐາຍີ ໂຫຕິ. ຕສ຺ສ ‘ອຫໍ ສງ຺ຂາຣາ, ມມ ສງ຺ຂາຣາ’ຕິ ອປຣິຍຸຏ຺ຐຏ຺ຐາຍິໂນ, ເຕ ສງ຺ຂາຣາ ວິປຣິຓມນ຺ຕິ ອຎ຺ຎຖາ ໂຫນ຺ຕິ. ຕສ຺ສ ສງ຺ຂາຣວິປຣິຓາມຎ຺ຎຖາຠາວາ ນຸປ຺ປຊ຺ຊນ຺ຕິ ໂສກປຣິເທວທຸກ຺ຂໂທມນສ຺ສຸປາຍາສາ.

‘‘ນ ວິຎ຺ຎາຓໍ ອຕ຺ຕໂຕ ສມນຸປສ຺ສຕິ, ນ ວິຎ຺ຎາຓວນ຺ຕໍ ວາ ອຕ຺ຕານໍ; ນ ອຕ຺ຕນິ ວາ ວິຎ຺ຎາຓໍ, ນ ວິຎ຺ຎາຓສ຺ມິໍ ວາ ອຕ຺ຕານໍ. ‘ອຫໍ ວິຎ຺ຎາຓໍ, ມມ ວິຎ຺ຎາຓ’ນ຺ຕິ ນ ປຣິຍຸຏ຺ຐຏ຺ຐາຍີ ໂຫຕິ. ຕສ຺ສ ‘ອຫໍ ວິຎ຺ຎາຓໍ, ມມ ວິຎ຺ຎາຓ’ນ຺ຕິ ອປຣິຍຸຏ຺ຐຏ຺ຐາຍິໂນ, ຕໍ ວິຎ຺ຎາຓໍ ວິປຣິຓມຕິ ອຎ຺ຎຖາ ໂຫຕິ. ຕສ຺ສ ວິຎ຺ຎາຓວິປຣິຓາມຎ຺ຎຖາຠາວາ ນຸປ຺ປຊ຺ຊນ຺ຕິ ໂສກປຣິເທວທຸກ຺ຂໂທມນສ຺ສຸປາຍາສາ. ເອວໍ ໂຂ, ຄຫປຕິ, ອາຕຸຣກາໂຍ ໂຫຕິ ໂນ ຈ ອາຕຸຣຈິຕ຺ໂຕ’’ຕິ.

ອິທມໂວຈ ອາຍສ຺ມາ ສາຣິປຸຕ຺ໂຕ. ອຕ຺ຕມໂນ ນກຸລປິຕາ ຄຫປຕິ ອາຍສ຺ມໂຕ ສາຣິປຸຕ຺ຕສ຺ສ ຠາສິຕໍ ອຠິນນ຺ທີຕິ. ປຐມໍ.