໒. ພຬິສສຸຕ຺ຕໍ

໑໕໘. ສາວຕ຺ຖິຍໍ ວິຫຣຕິ…ເປ… ‘‘ທາຣຸໂຓ, ຠິກ຺ຂເວ, ລາຠສກ຺ກາຣສິໂລໂກ ກຏຸໂກ ຜຣຸໂສ ອນ຺ຕຣາຍິໂກ ອນຸຕ຺ຕຣສ຺ສ ໂຍຄກ຺ເຂມສ຺ສ ອຘິຄມາຍ. ເສຍ຺ຍຖາປິ, ຠິກ຺ຂເວ, ພາຬິສິໂກ ອາມິສຄຕໍ ພຬິສໍ ຄມ຺ຠີເຣ ອຸທກຣຫເທ ປກ຺ຂິເປຍ຺ຍ. ຕເມນໍ ອຎ຺ຎຕໂຣ ອາມິສຈກ຺ຂຸ ມຈ຺ໂຉ ຄິເລຍ຺ຍ. ເອວຎ຺ຫິ ໂສ, ຠິກ຺ຂເວ, ມຈ຺ໂຉ ຄິລພຬິໂສ ພາຬິສິກສ຺ສ ອນຍໍ ອາປນ຺ໂນ ພ຺ຍສນໍ ອາປນ຺ໂນ ຍຖາກາມກຣຓີໂຍ ພາຬິສິກສ຺ສ’’.

‘‘ພາຬິສິໂກຕິ ໂຂ, ຠິກ຺ຂເວ, ມາຣສ຺ເສຕໍ ປາປິມໂຕ ອຘິວຈນໍ. ພຬິສນ຺ຕິ ໂຂ, ຠິກ຺ຂເວ, ລາຠສກ຺ກາຣສິໂລກສ຺ເສຕໍ ອຘິວຈນໍ. ໂຍ ຫິ ໂກຈິ, ຠິກ຺ຂເວ, ຠິກ຺ຂຸ ອຸປ຺ປນ຺ນໍ ລາຠສກ຺ກາຣສິໂລກໍ ອສ຺ສາເທຕິ ນິກາເມຕິ, ອຍໍ ວຸຈ຺ຈຕິ, ຠິກ຺ຂເວ, ຠິກ຺ຂຸ ຄິລພຬິໂສ ມາຣສ຺ສ ອນຍໍ ອາປນ຺ໂນ ພ຺ຍສນໍ ອາປນ຺ໂນ ຍຖາກາມກຣຓີໂຍ ປາປິມໂຕ. ເອວໍ ທາຣຸໂຓ ໂຂ, ຠິກ຺ຂເວ, ລາຠສກ຺ກາຣສິໂລໂກ ກຏຸໂກ ຜຣຸໂສ ອນ຺ຕຣາຍິໂກ ອນຸຕ຺ຕຣສ຺ສ ໂຍຄກ຺ເຂມສ຺ສ ອຘິຄມາຍ. ຕສ຺ມາຕິຫ, ຠິກ຺ຂເວ, ເອວໍ ສິກ຺ຂິຕພ຺ພໍ – ‘ອຸປ຺ປນ຺ນໍ ລາຠສກ຺ກາຣສິໂລກໍ ປຊຫິສ຺ສາມ, ນ ຈ ໂນ ອຸປ຺ປນ຺ໂນ ລາຠສກ຺ກາຣສິໂລໂກ ຈິຕ຺ຕໍ ປຣິຍາທາຍ ຐສ຺ສຕີ’ຕິ. ເອວຎ຺ຫິ ໂວ, ຠິກ຺ຂເວ, ສິກ຺ຂິຕພ຺ພ’’ນ຺ຕິ. ທຸຕິຍໍ.