໓. ກຸມ຺ມສຸຕ຺ຕໍ

໑໕໙. ສາວຕ຺ຖິຍໍ ວິຫຣຕິ…ເປ… ‘‘ທາຣຸໂຓ, ຠິກ຺ຂເວ, ລາຠສກ຺ກາຣສິໂລໂກ…ເປ… ອຘິຄມາຍ. ຠູຕປຸພ຺ພໍ, ຠິກ຺ຂເວ, ອຎ຺ຎຕຣສ຺ມິໍ ອຸທກຣຫເທ ມຫາກຸມ຺ມກຸລໍ ຈິຣນິວາສິ ອໂຫສິ. ອຖ ໂຂ, ຠິກ຺ຂເວ, ອຎ຺ຎຕໂຣ ກຸມ຺ໂມ ອຎ຺ຎຕຣໍ ກຸມ຺ມໍ ເອຕທໂວຈ – ‘ມາ ໂຂ ຕ຺ວໍ, ຕາຕ ກຸມ຺ມ, ເອຕໍ ປເທສໍ ອຄມາສີ’ຕິ. ອຄມາສິ ໂຂ, ຠິກ຺ຂເວ, ໂສ ກຸມ຺ໂມ ຕໍ ປເທສໍ. ຕເມນໍ ລຸທ຺ໂທ ປປຕາຍ ວິຊ຺ຌິ. ອຖ ໂຂ, ຠິກ຺ຂເວ, ໂສ ກຸມ຺ໂມ ເຍນ ໂສ ກຸມ຺ໂມ ເຕນຸປສງ຺ກມິ. ອທ຺ທສາ ໂຂ, ຠິກ຺ຂເວ, ໂສ ກຸມ຺ໂມ ຕໍ ກຸມ຺ມໍ ທູຣໂຕວ ອາຄຈ຺ຉນ຺ຕໍ. ທິສ຺ວານ ຕໍ ກຸມ຺ມໍ ເອຕທໂວຈ – ‘ກຈ຺ຈິ ຕ຺ວໍ, ຕາຕ ກຸມ຺ມ, ນ ຕໍ ປເທສໍ ອຄມາສີ’ຕິ? ‘ອຄມາສິໍ ຂ຺ວາຫໍ, ຕາຕ ກຸມ຺ມ, ຕໍ ປເທສ’ນ຺ຕິ. ‘ກຈ຺ຈິ ປນາສິ, ຕາຕ ກຸມ຺ມ, ອກ຺ຂໂຕ ອນຸປຫໂຕ’ຕິ? ‘ອກ຺ຂໂຕ ໂຂມ຺ຫິ, ຕາຕ ກຸມ຺ມ, ອນຸປຫໂຕ, ອຕ຺ຖິ ຈ ເມ ອິທໍ ສຸຕ຺ຕກໍ ປິຏ຺ຐິໂຕ ປິຏ຺ຐິໂຕ ອນຸພນ຺ຘ’ນ຺ຕິ. ‘ຕຄ຺ຆສິ, ຕາຕ ກຸມ຺ມ, ຂໂຕ, ຕຄ຺ຆ ອຸປຫໂຕ. ເອເຕນ ຫິ ເຕ, ຕາຕ ກຸມ຺ມ, ສຸຕ຺ຕເກນ ປິຕໂຣ ຈ ປິຕາມຫາ ຈ ອນຍໍ ອາປນ຺ນາ ພ຺ຍສນໍ ອາປນ຺ນາ. ຄຈ຺ຉ ທານິ ຕ຺ວໍ, ຕາຕ ກຸມ຺ມ, ນ ທານິ ຕ຺ວໍ ອມ຺ຫາກ’’’ນ຺ຕິ.

‘‘ລຸທ຺ໂທຕິ ໂຂ, ຠິກ຺ຂເວ, ມາຣສ຺ເສຕໍ ປາປິມໂຕ ອຘິວຈນໍ. ປປຕາຕິ ໂຂ, ຠິກ຺ຂເວ, ລາຠສກ຺ກາຣສິໂລກສ຺ເສຕໍ ອຘິວຈນໍ. ສຸຕ຺ຕກນ຺ຕິ ໂຂ, ຠິກ຺ຂເວ, ນນ຺ທິຣາຄສ຺ເສຕໍ ອຘິວຈນໍ. ໂຍ ຫິ ໂກຈິ, ຠິກ຺ຂເວ, ຠິກ຺ຂຸ ອຸປ຺ປນ຺ນໍ ລາຠສກ຺ກາຣສິໂລກໍ ອສ຺ສາເທຕິ ນິກາເມຕິ – ອຍໍ ວຸຈ຺ຈຕິ, ຠິກ຺ຂເວ, ຠິກ຺ຂຸ ຄິທ຺ໂຘ ປປຕາຍ [ຠິກ຺ຂຸ ປປຕາຍ (ສ຺ຍາ. ກໍ.), ຠິກ຺ຂຸ ວິທ຺ໂຘ ປປຕາຍ (?)] ອນຍໍ ອາປນ຺ໂນ ພ຺ຍສນໍ ອາປນ຺ໂນ ຍຖາກາມກຣຓີໂຍ ປາປິມໂຕ. ເອວໍ ທາຣຸໂຓ ໂຂ, ຠິກ຺ຂເວ, ລາຠສກ຺ກາຣສິໂລໂກ…ເປ… ເອວຎ຺ຫິ ໂວ, ຠິກ຺ຂເວ, ສິກ຺ຂິຕພ຺ພ’’ນ຺ຕິ. ຕຕິຍໍ.