໗. ທຸຕິຍໂອວາທສຸຕ຺ຕໍ

໑໕໐. ຣາຊຄເຫ ວິຫຣຕິ ເວຬຸວເນ [ສາວຕ຺ຖິ, ຕຕ຺ຣ-ເອຕທໂວຈ (ສີ.)]. ອຖ ໂຂ ອາຍສ຺ມາ ມຫາກສ຺ສໂປ ເຍນ ຠຄວາ ເຕນຸປສງ຺ກມິ…ເປ… ເອກມນ຺ຕໍ ນິສິນ຺ນໍ ໂຂ ອາຍສ຺ມນ຺ຕໍ ມຫາກສ຺ສປໍ ຠຄວາ ເອຕທໂວຈ – ‘‘ໂອວທ, ກສ຺ສປ, ຠິກ຺ຂູ; ກໂຣຫິ, ກສ຺ສປ, ຠິກ຺ຂູນໍ ຘມ຺ມິໍ ກຖໍ. ອຫໍ ວາ, ກສ຺ສປ, ຠິກ຺ຂູ ໂອວເທຍ຺ຍໍ ຕ຺ວໍ ວາ; ອຫໍ ວາ ຠິກ຺ຂູນໍ ຘມ຺ມິໍ ກຖໍ ກເຣຍ຺ຍໍ ຕ຺ວໍ ວາ’’ຕິ.

‘‘ທຸພ຺ພຈາ ໂຂ, ຠນ຺ເຕ, ເອຕຣຫິ ຠິກ຺ຂູ, ໂທວຈສ຺ສກຣເຓຫິ ຘມ຺ເມຫິ ສມນ຺ນາຄຕາ ອກ຺ຂມາ ອປ຺ປທກ຺ຂິຓຄ຺ຄາຫິໂນ ອນຸສາສນິໍ. ຍສ຺ສ ກສ຺ສຈິ, ຠນ຺ເຕ, ສທ຺ຘາ ນຕ຺ຖິ ກຸສເລສຸ ຘມ຺ເມສຸ, ຫິຣີ [ຫິຣິ (ສພ຺ພຕ຺ຖ)] ນຕ຺ຖິ ກຸສເລສຸ ຘມ຺ເມສຸ, ໂອຕ຺ຕປ຺ປໍ ນຕ຺ຖິ ກຸສເລສຸ ຘມ຺ເມສຸ, ວີຣິຍໍ ນຕ຺ຖິ ກຸສເລສຸ ຘມ຺ເມສຸ, ປຎ຺ຎາ ນຕ຺ຖິ ກຸສເລສຸ ຘມ຺ເມສຸ, ຕສ຺ສ ຍາ ຣຕ຺ຕິ ວາ ທິວໂສ ວາ ອາຄຈ຺ຉຕິ [ອາຄຈ຺ຉນ຺ຕິ (ສີ.)], ຫານິເຍວ ປາຏິກງ຺ຂາ ກຸສເລສຸ ຘມ຺ເມສຸ, ໂນ ວຸທ຺ຘິ.

‘‘ເສຍ຺ຍຖາປິ, ຠນ຺ເຕ, ກາຬປກ຺ເຂ ຈນ຺ທສ຺ສ ຍາ ຣຕ຺ຕິ ວາ ທິວໂສ ວາ ອາຄຈ຺ຉຕິ, ຫາຍເຕວ ວຓ຺ເຓນ, ຫາຍຕິ ມຓ຺ຑເລນ, ຫາຍຕິ ອາຠາຍ, ຫາຍຕິ ອາໂຣຫປຣິຓາເຫນ. ເອວເມວ ໂຂ, ຠນ຺ເຕ, ຍສ຺ສ ກສ຺ສຈິ ສທ຺ຘາ ນຕ຺ຖິ ກຸສເລສຸ ຘມ຺ເມສຸ…ເປ… ຫິຣີ ນຕ຺ຖິ… ໂອຕ຺ຕປ຺ປໍ ນຕ຺ຖິ … ວີຣິຍໍ ນຕ຺ຖິ… ປຎ຺ຎາ ນຕ຺ຖິ… ກຸສເລສຸ ຘມ຺ເມສຸ ຕສ຺ສ ຍາ ຣຕ຺ຕິ ວາ ທິວໂສ ວາ ອາຄຈ຺ຉຕິ, ຫານິເຍວ ປາຏິກງ຺ຂາ ກຸສເລສຸ ຘມ຺ເມສຸ, ໂນ ວຸທ຺ຘິ.

‘‘‘ອສ຺ສທ຺ໂຘ ປຸຣິສປຸຄ຺ຄໂລ’ຕິ, ຠນ຺ເຕ, ປຣິຫານເມຕໍ; ‘ອຫິຣິໂກ ປຸຣິສປຸຄ຺ຄໂລ’ຕິ, ຠນ຺ເຕ, ປຣິຫານເມຕໍ; ‘ອໂນຕ຺ຕປ຺ປີ ປຸຣິສປຸຄ຺ຄໂລ’ຕິ, ຠນ຺ເຕ, ປຣິຫານເມຕໍ; ‘ກຸສີໂຕ ປຸຣິສປຸຄ຺ຄໂລ’ຕິ, ຠນ຺ເຕ, ປຣິຫານເມຕໍ; ‘ທຸປ຺ປຎ຺ໂຎ ປຸຣິສປຸຄ຺ຄໂລ’ຕິ, ຠນ຺ເຕ, ປຣິຫານເມຕໍ; ‘ໂກຘໂນ ປຸຣິສປຸຄ຺ຄໂລ’ຕິ, ຠນ຺ເຕ, ປຣິຫານເມຕໍ; ‘ອຸປນາຫີ ປຸຣິສປຸຄ຺ຄໂລ’ຕິ, ຠນ຺ເຕ, ປຣິຫານເມຕໍ; ‘ນ ສນ຺ຕິ ຠິກ຺ຂູ ໂອວາທກາ’ຕິ, ຠນ຺ເຕ, ປຣິຫານເມຕໍ.

‘‘ຍສ຺ສ ກສ຺ສຈິ, ຠນ຺ເຕ, ສທ຺ຘາ ອຕ຺ຖິ ກຸສເລສຸ ຘມ຺ເມສຸ, ຫິຣີ ອຕ຺ຖິ ກຸສເລສຸ ຘມ຺ເມສຸ, ໂອຕ຺ຕປ຺ປໍ ອຕ຺ຖິ ກຸສເລສຸ ຘມ຺ເມສຸ, ວີຣິຍໍ ອຕ຺ຖິ ກຸສເລສຸ ຘມ຺ເມສຸ, ປຎ຺ຎາ ອຕ຺ຖິ ກຸສເລສຸ ຘມ຺ເມສຸ, ຕສ຺ສ ຍາ ຣຕ຺ຕິ ວາ ທິວໂສ ວາ ອາຄຈ຺ຉຕິ, ວຸທ຺ຘິເຍວ ປາຏິກງ຺ຂາ ກຸສເລສຸ ຘມ຺ເມສຸ, ໂນ ປຣິຫານິ.

‘‘ເສຍ຺ຍຖາປິ, ຠນ຺ເຕ, ຊຸຓ຺ຫປກ຺ເຂ ຈນ຺ທສ຺ສ ຍາ ຣຕ຺ຕິ ວາ ທິວໂສ ວາ ອາຄຈ຺ຉຕິ, ວຑ຺ຒເຕວ ວຓ຺ເຓນ, ວຑ຺ຒຕິ ມຓ຺ຑເລນ, ວຑ຺ຒຕິ ອາຠາຍ, ວຑ຺ຒຕິ ອາໂຣຫປຣິຓາເຫນ. ເອວເມວ ໂຂ, ຠນ຺ເຕ, ຍສ຺ສ ກສ຺ສຈິ ສທ຺ຘາ ອຕ຺ຖິ ກຸສເລສຸ ຘມ຺ເມສຸ… ຫິຣີ ອຕ຺ຖິ…ເປ… ໂອຕ຺ຕປ຺ປໍ ອຕ຺ຖິ… ວີຣິຍໍ ອຕ຺ຖິ… ປຎ຺ຎາ ອຕ຺ຖິ ກຸສເລສຸ ຘມ຺ເມສຸ ຕສ຺ສ ຍາ ຣຕ຺ຕິ ວາ ທິວໂສ ວາ ອາຄຈ຺ຉຕິ, ວຸທ຺ຘິເຍວ ປາຏິກງ຺ຂາ ກຸສເລສຸ ຘມ຺ເມສຸ, ໂນ ປຣິຫານິ.

‘‘‘ສທ຺ໂຘ ປຸຣິສປຸຄ຺ຄໂລ’ຕິ, ຠນ຺ເຕ, ອປຣິຫານເມຕໍ; ‘ຫິຣິມາ ປຸຣິສປຸຄ຺ຄໂລ’ຕິ, ຠນ຺ເຕ, ອປຣິຫານເມຕໍ; ‘ໂອຕ຺ຕປ຺ປີ ປຸຣິສປຸຄ຺ຄໂລ’ຕິ, ຠນ຺ເຕ, ອປຣິຫານເມຕໍ; ‘ອາຣທ຺ຘວີຣິໂຍ ປຸຣິສປຸຄ຺ຄໂລ’ຕິ, ຠນ຺ເຕ, ອປຣິຫານເມຕໍ; ‘ປຎ຺ຎວາ ປຸຣິສປຸຄ຺ຄໂລ’ຕິ, ຠນ຺ເຕ, ອປຣິຫານເມຕໍ; ‘ອກ຺ໂກຘໂນ ປຸຣິສປຸຄ຺ຄໂລ’ຕິ, ຠນ຺ເຕ, ອປຣິຫານເມຕໍ; ‘ອນຸປນາຫີ ປຸຣິສປຸຄ຺ຄໂລ’ຕິ, ຠນ຺ເຕ, ອປຣິຫານເມຕໍ; ‘ສນ຺ຕິ ຠິກ຺ຂູ ໂອວາທກາ’ຕິ, ຠນ຺ເຕ, ອປຣິຫານເມຕ’’ນ຺ຕິ.

‘‘ສາຘຸ ສາຘຸ, ກສ຺ສປ. ຍສ຺ສ ກສ຺ສຈິ, ກສ຺ສປ, ສທ຺ຘາ ນຕ຺ຖິ ກຸສເລສຸ ຘມ຺ເມສຸ…ເປ… ຫິຣີ ນຕ຺ຖິ… ໂອຕ຺ຕປ຺ປໍ ນຕ຺ຖິ… ວີຣິຍໍ ນຕ຺ຖິ… ປຎ຺ຎາ ນຕ຺ຖິ ກຸສເລສຸ ຘມ຺ເມສຸ ຕສ຺ສ ຍາ ຣຕ຺ຕິ ວາ ທິວໂສ ວາ ອາຄຈ຺ຉຕິ, ຫານິເຍວ ປາຏິກງ຺ຂາ ກຸສເລສຸ ຘມ຺ເມສຸ, ໂນ ວຸທ຺ຘິ.

‘‘ເສຍ຺ຍຖາປິ, ກສ຺ສປ, ກາຬປກ຺ເຂ ຈນ຺ທສ຺ສ ຍາ ຣຕ຺ຕິ ວາ ທິວໂສ ວາ ອາຄຈ຺ຉຕິ, ຫາຍເຕວ ວຓ຺ເຓນ…ເປ… ຫາຍຕິ ອາໂຣຫປຣິຓາເຫນ. ເອວເມວ ໂຂ, ກສ຺ສປ, ຍສ຺ສ ກສ຺ສຈິ ສທ຺ຘາ ນຕ຺ຖິ ກຸສເລສຸ ຘມ຺ເມສຸ…ເປ… ຫິຣີ ນຕ຺ຖິ… ໂອຕ຺ຕປ຺ປໍ ນຕ຺ຖິ… ວີຣິຍໍ ນຕ຺ຖິ… ປຎ຺ຎາ ນຕ຺ຖິ ກຸສເລສຸ ຘມ຺ເມສຸ ຕສ຺ສ ຍາ ຣຕ຺ຕິ ວາ ທິວໂສ ວາ ອາຄຈ຺ຉຕິ, ຫານິເຍວ ປາຏິກງ຺ຂາ ກຸສເລສຸ ຘມ຺ເມສຸ, ໂນ ວຸທ຺ຘິ. ‘ອສ຺ສທ຺ໂຘ ປຸຣິສປຸຄ຺ຄໂລ’ຕິ, ກສ຺ສປ, ປຣິຫານເມຕໍ; ອຫິຣິໂກ…ເປ… ອໂນຕ຺ຕປ຺ປີ… ກຸສີໂຕ… ທຸປ຺ປຎ຺ໂຎ… ໂກຘໂນ… ‘ອຸປນາຫີ ປຸຣິສປຸຄ຺ຄໂລ’ຕິ, ກສ຺ສປ, ປຣິຫານເມຕໍ; ‘ນ ສນ຺ຕິ ຠິກ຺ຂູ ໂອວາທກາ’ຕິ, ກສ຺ສປ, ປຣິຫານເມຕໍ.

‘‘ຍສ຺ສ ກສ຺ສຈິ, ກສ຺ສປ, ສທ຺ຘາ ອຕ຺ຖິ ກຸສເລສຸ ຘມ຺ເມສຸ…ເປ… ຫິຣີ ອຕ຺ຖິ… ໂອຕ຺ຕປ຺ປໍ ອຕ຺ຖິ… ວີຣິຍໍ ອຕ຺ຖິ… ປຎ຺ຎາ ອຕ຺ຖິ ກຸສເລສຸ ຘມ຺ເມສຸ ຕສ຺ສ ຍາ ຣຕ຺ຕິ ວາ ທິວໂສ ວາ ອາຄຈ຺ຉຕິ, ວຸທ຺ຘິເຍວ ປາຏິກງ຺ຂາ ກຸສເລສຸ ຘມ຺ເມສຸ, ໂນ ປຣິຫານິ.

‘‘ເສຍ຺ຍຖາປິ, ກສ຺ສປ, ຊຸຓ຺ຫປກ຺ເຂ ຈນ຺ທສ຺ສ ຍາ ຣຕ຺ຕິ ວາ ທິວໂສ ວາ ອາຄຈ຺ຉຕິ, ວຑ຺ຒເຕວ ວຓ຺ເຓນ, ວຑ຺ຒຕິ ມຓ຺ຑເລນ, ວຑ຺ຒຕິ ອາຠາຍ, ວຑ຺ຒຕິ ອາໂຣຫປຣິຓາເຫນ. ເອວເມວ ໂຂ, ກສ຺ສປ, ຍສ຺ສ ກສ຺ສຈິ ສທ຺ຘາ ອຕ຺ຖິ ກຸສເລສຸ ຘມ຺ເມສຸ ຫິຣີ ອຕ຺ຖິ… ໂອຕ຺ຕປ຺ປໍ ອຕ຺ຖິ… ວີຣິຍໍ ອຕ຺ຖິ… ປຎ຺ຎາ ອຕ຺ຖິ ກຸສເລສຸ ຘມ຺ເມສຸ ຕສ຺ສ ຍາ ຣຕ຺ຕິ ວາ ທິວໂສ ວາ ອາຄຈ຺ຉຕິ, ວຸທ຺ຘິເຍວ ປາຏິກງ຺ຂາ ກຸສເລສຸ ຘມ຺ເມສຸ, ໂນ ປຣິຫານິ.

‘‘‘ສທ຺ໂຘ ປຸຣິສປຸຄ຺ຄໂລ’ຕິ, ກສ຺ສປ, ອປຣິຫານເມຕໍ; ຫິຣິມາ…ເປ… ໂອຕ຺ຕປ຺ປີ… ອາຣທ຺ຘວີຣິໂຍ… ປຎ຺ຎວາ… ອກ຺ໂກຘໂນ… ‘ອນຸປນາຫີ ປຸຣິສປຸຄ຺ຄໂລ’ຕິ, ກສ຺ສປ, ອປຣິຫານເມຕໍ; ‘ສນ຺ຕິ ຠິກ຺ຂູ ໂອວາທກາ’ຕິ, ກສ຺ສປ, ອປຣິຫານເມຕ’’ນ຺ຕິ. ສຕ຺ຕມໍ.