໓. ອຈຣິໍສຸຕ຺ຕໍ

໑໑໖. ສາວຕ຺ຖິຍໍ ວິຫຣຕິ…ເປ… ‘‘ປຖວີຘາຕຸຍາຫໍ, ຠິກ຺ຂເວ, ອສ຺ສາທປຣິເຍສນໍ ອຈຣິໍ, ໂຍ ປຖວີຘາຕຸຍາ ອສ຺ສາໂທ ຕທຊ຺ຌຄມໍ, ຍາວຕາ ປຖວີຘາຕຸຍາ ອສ຺ສາໂທ ປຎ຺ຎາຍ ເມ ໂສ ສຸທິຏ຺ໂຐ. ປຖວີຘາຕຸຍາຫໍ, ຠິກ຺ຂເວ, ອາທີນວປຣິເຍສນໍ ອຈຣິໍ, ໂຍ ປຖວີຘາຕຸຍາ ອາທີນໂວ ຕທຊ຺ຌຄມໍ, ຍາວຕາ ປຖວີຘາຕຸຍາ ອາທີນໂວ ປຎ຺ຎາຍ ເມ ໂສ ສຸທິຏ຺ໂຐ. ປຖວີຘາຕຸຍາຫໍ, ຠິກ຺ຂເວ, ນິສ຺ສຣຓປຣິເຍສນໍ ອຈຣິໍ, ຍໍ ປຖວີຘາຕຸຍາ ນິສ຺ສຣຓໍ ຕທຊ຺ຌຄມໍ, ຍາວຕາ ປຖວີຘາຕຸຍາ ນິສ຺ສຣຓໍ ປຎ຺ຎາຍ ເມ ຕໍ ສຸທິຏ຺ຐໍ’’.

‘‘ອາໂປຘາຕຸຍາຫໍ, ຠິກ຺ຂເວ…ເປ… ເຕໂຊຘາຕຸຍາຫໍ, ຠິກ຺ຂເວ… ວາໂຍຘາຕຸຍາຫໍ, ຠິກ຺ຂເວ, ອສ຺ສາທປຣິເຍສນໍ ອຈຣິໍ, ໂຍ ວາໂຍຘາຕຸຍາ ອສ຺ສາໂທ ຕທຊ຺ຌຄມໍ, ຍາວຕາ ວາໂຍຘາຕຸຍາ ອສ຺ສາໂທ ປຎ຺ຎາຍ ເມ ໂສ ສຸທິຏ຺ໂຐ. ວາໂຍຘາຕຸຍາຫໍ, ຠິກ຺ຂເວ, ອາທີນວປຣິເຍສນໍ ອຈຣິໍ, ໂຍ ວາໂຍຘາຕຸຍາ ອາທີນໂວ ຕທຊ຺ຌຄມໍ, ຍາວຕາ ວາໂຍຘາຕຸຍາ ອາທີນໂວ ປຎ຺ຎາຍ ເມ ໂສ ສຸທິຏ຺ໂຐ. ວາໂຍຘາຕຸຍາຫໍ, ຠິກ຺ຂເວ, ນິສ຺ສຣຓປຣິເຍສນໍ ອຈຣິໍ, ຍໍ ວາໂຍຘາຕຸຍາ ນິສ຺ສຣຓໍ ຕທຊ຺ຌຄມໍ, ຍາວຕາ ວາໂຍຘາຕຸຍາ ນິສ຺ສຣຓໍ ປຎ຺ຎາຍ ເມ ຕໍ ສຸທິຏ຺ຐໍ.

‘‘ຍາວກີວຎ຺ຈາຫໍ, ຠິກ຺ຂເວ, ອິມາສໍ ຈຕຸນ຺ນໍ ຘາຕູນໍ ອສ຺ສາທຎ຺ຈ ອສ຺ສາທໂຕ ອາທີນວຎ຺ຈ ອາທີນວໂຕ ນິສ຺ສຣຓຎ຺ຈ ນິສ຺ສຣຓໂຕ ຍຖາຠູຕໍ ນ ອພ຺ຠຎ຺ຎາສິໍ, ເນວ ຕາວາຫໍ, ຠິກ຺ຂເວ, ສເທວເກ ໂລເກ ສມາຣເກ ສພ຺ຣຫ຺ມເກ ສສ຺ສມຓພ຺ຣາຫ຺ມຓິຍາ ປຊາຍ ສເທວມນຸສ຺ສາຍ ອນຸຕ຺ຕຣໍ ສມ຺ມາສມ຺ໂພຘິໍ ອຠິສມ຺ພຸທ຺ໂຘຕິ ປຈ຺ຈຎ຺ຎາສິໍ.

‘‘ຍໂຕ ຈ ຂ຺ວາຫໍ, ຠິກ຺ຂເວ, ອິມາສໍ ຈຕຸນ຺ນໍ ຘາຕູນໍ ອສ຺ສາທຎ຺ຈ ອສ຺ສາທໂຕ ອາທີນວຎ຺ຈ ອາທີນວໂຕ ນິສ຺ສຣຓຎ຺ຈ ນິສ຺ສຣຓໂຕ ຍຖາຠູຕໍ ອພ຺ຠຎ຺ຎາສິໍ, ອຖາຫໍ, ຠິກ຺ຂເວ, ສເທວເກ ໂລເກ ສມາຣເກ ສພ຺ຣຫ຺ມເກ ສສ຺ສມຓພ຺ຣາຫ຺ມຓິຍາ ປຊາຍ ສເທວມນຸສ຺ສາຍ ອນຸຕ຺ຕຣໍ ສມ຺ມາສມ຺ໂພຘິໍ ອຠິສມ຺ພຸທ຺ໂຘຕິ ປຈ຺ຈຎ຺ຎາສິໍ. ຎາຓຎ຺ຈ ປນ ເມ ທສ຺ສນໍ ອຸທປາທິ – ‘ອກຸປ຺ປາ ເມ ວິມຸຕ຺ຕິ, ອຍມນ຺ຕິມາ ຊາຕິ, ນຕ຺ຖິ ທານິ ປຸນພ຺ຠໂວ’’’ຕິ. ຕຕິຍໍ.