໓. ຘາຕຸສໍຍຸຕ຺ຕໍ

໑. ນານຕ຺ຕວຄ຺ໂຄ

໑. ຘາຕຸນານຕ຺ຕສຸຕ຺ຕໍ

໘໕. ສາວຕ຺ຖິຍໍ ວິຫຣຕິ…ເປ… ‘‘ຘາຕຸນານຕ຺ຕໍ ໂວ, ຠິກ຺ຂເວ, ເທເສສ຺ສາມິ. ຕໍ ສຸຓາຖ, ສາຘຸກໍ ມນສິ ກໂຣຖ; ຠາສິສ຺ສາມີ’’ຕິ. ‘‘ເອວໍ, ຠນ຺ເຕ’’ຕິ ໂຂ ເຕ ຠິກ຺ຂູ ຠຄວໂຕ ປຈ຺ຈສ຺ໂສສຸໍ. ຠຄວາ ເອຕທໂວຈ –

‘‘ກຕມຎ຺ຈ, ຠິກ຺ຂເວ, ຘາຕຸນານຕ຺ຕໍ? ຈກ຺ຂຸຘາຕຸ ຣູປຘາຕຸ ຈກ຺ຂຸວິຎ຺ຎາຓຘາຕຸ, ໂສຕຘາຕຸ ສທ຺ທຘາຕຸ ໂສຕວິຎ຺ຎາຓຘາຕຸ, ຆານຘາຕຸ ຄນ຺ຘຘາຕຸ ຆານວິຎ຺ຎາຓຘາຕຸ, ຊິວ຺ຫາຘາຕຸ ຣສຘາຕຸ ຊິວ຺ຫາວິຎ຺ຎາຓຘາຕຸ, ກາຍຘາຕຸ ໂຜຏ຺ຐພ຺ພຘາຕຸ ກາຍວິຎ຺ຎາຓຘາຕຸ, ມໂນຘາຕຸ ຘມ຺ມຘາຕຸ ມໂນວິຎ຺ຎາຓຘາຕຸ – ອິທໍ ວຸຈ຺ຈຕິ, ຠິກ຺ຂເວ, ຘາຕຸນານຕ຺ຕ’’ນ຺ຕິ. ປຐມໍ.

໒. ຜສ຺ສນານຕ຺ຕສຸຕ຺ຕໍ

໘໖. ສາວຕ຺ຖິຍໍ ວິຫຣຕິ…ເປ… ‘‘ຘາຕຸນານຕ຺ຕໍ, ຠິກ຺ຂເວ, ປຏິຈ຺ຈ ອຸປ຺ປຊ຺ຊຕິ ຜສ຺ສນານຕ຺ຕໍ. ກຕມຎ຺ຈ, ຠິກ຺ຂເວ, ຘາຕຸນານຕ຺ຕໍ? ຈກ຺ຂຸຘາຕຸ ໂສຕຘາຕຸ ຆານຘາຕຸ ຊິວ຺ຫາຘາຕຸ ກາຍຘາຕຸ ມໂນຘາຕຸ – ອິທໍ ວຸຈ຺ຈຕິ, ຠິກ຺ຂເວ, ຘາຕຸນານຕ຺ຕໍ’’.

‘‘ກຖຎ຺ຈ, ຠິກ຺ຂເວ, ຘາຕຸນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຜສ຺ສນານຕ຺ຕໍ? ຈກ຺ຂຸຘາຕຸໍ, ຠິກ຺ຂເວ, ປຏິຈ຺ຈ ອຸປ຺ປຊ຺ຊຕິ ຈກ຺ຂຸສມ຺ຜສ຺ໂສ. ໂສຕຘາຕຸໍ ປຏິຈ຺ຈ… ຆານຘາຕຸໍ ປຏິຈ຺ຈ … ຊິວ຺ຫາຘາຕຸໍ ປຏິຈ຺ຈ… ກາຍຘາຕຸໍ ປຏິຈ຺ຈ… ມໂນຘາຕຸໍ ປຏິຈ຺ຈ ອຸປ຺ປຊ຺ຊຕິ ມໂນສມ຺ຜສ຺ໂສ. ເອວໍ ໂຂ, ຠິກ຺ຂເວ, ຘາຕຸນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຜສ຺ສນານຕ຺ຕ’’ນ຺ຕິ. ທຸຕິຍໍ.

໓. ໂນຜສ຺ສນານຕ຺ຕສຸຕ຺ຕໍ

໘໗. ສາວຕ຺ຖິຍໍ ວິຫຣຕິ…ເປ… ‘‘ຘາຕຸນານຕ຺ຕໍ, ຠິກ຺ຂເວ, ປຏິຈ຺ຈ ອຸປ຺ປຊ຺ຊຕິ ຜສ຺ສນານຕ຺ຕໍ, ໂນ ຜສ຺ສນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຘາຕຸນານຕ຺ຕໍ. ກຕມຎ຺ຈ, ຠິກ຺ຂເວ, ຘາຕຸນານຕ຺ຕໍ? ຈກ຺ຂຸຘາຕຸ…ເປ… ມໂນຘາຕຸ – ອິທໍ ວຸຈ຺ຈຕິ, ຠິກ຺ຂເວ, ຘາຕຸນານຕ຺ຕໍ’’.

‘‘ກຖຎ຺ຈ, ຠິກ຺ຂເວ, ຘາຕຸນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຜສ຺ສນານຕ຺ຕໍ, ໂນ ຜສ຺ສນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຘາຕຸນານຕ຺ຕໍ? ຈກ຺ຂຸຘາຕຸໍ, ຠິກ຺ຂເວ, ປຏິຈ຺ຈ ອຸປ຺ປຊ຺ຊຕິ ຈກ຺ຂຸສມ຺ຜສ຺ໂສ, ໂນ ຈກ຺ຂຸສມ຺ຜສ຺ສໍ ປຏິຈ຺ຈ ອຸປ຺ປຊ຺ຊຕິ ຈກ຺ຂຸຘາຕຸ…ເປ… ມໂນຘາຕຸໍ ປຏິຈ຺ຈ ອຸປ຺ປຊ຺ຊຕິ ມໂນສມ຺ຜສ຺ໂສ, ໂນ ມໂນສມ຺ຜສ຺ສໍ ປຏິຈ຺ຈ ອຸປ຺ປຊ຺ຊຕິ ມໂນຘາຕຸ. ເອວໍ ໂຂ, ຠິກ຺ຂເວ, ຘາຕຸນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຜສ຺ສນານຕ຺ຕໍ, ໂນ ຜສ຺ສນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຘາຕຸນານຕ຺ຕ’’ນ຺ຕິ. ຕຕິຍໍ.

໔. ເວທນານານຕ຺ຕສຸຕ຺ຕໍ

໘໘. ສາວຕ຺ຖິຍໍ ວິຫຣຕິ…ເປ… ‘‘ຘາຕຸນານຕ຺ຕໍ, ຠິກ຺ຂເວ, ປຏິຈ຺ຈ ອຸປ຺ປຊ຺ຊຕິ ຜສ຺ສນານຕ຺ຕໍ, ຜສ຺ສນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ເວທນານານຕ຺ຕໍ. ກຕມຎ຺ຈ, ຠິກ຺ຂເວ, ຘາຕຸນານຕ຺ຕໍ? ຈກ຺ຂຸຘາຕຸ …ເປ… ມໂນຘາຕຸ – ອິທໍ ວຸຈ຺ຈຕິ, ຠິກ຺ຂເວ, ຘາຕຸນານຕ຺ຕໍ’’.

‘‘ກຖຎ຺ຈ, ຠິກ຺ຂເວ, ຘາຕຸນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຜສ຺ສນານຕ຺ຕໍ, ຜສ຺ສນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ເວທນານານຕ຺ຕໍ? ຈກ຺ຂຸຘາຕຸໍ, ຠິກ຺ຂເວ, ປຏິຈ຺ຈ ອຸປ຺ປຊ຺ຊຕິ ຈກ຺ຂຸສມ຺ຜສ຺ໂສ, ຈກ຺ຂຸສມ຺ຜສ຺ສໍ ປຏິຈ຺ຈ ອຸປ຺ປຊ຺ຊຕິ ຈກ຺ຂຸສມ຺ຜສ຺ສຊາ ເວທນາ…ເປ… ມໂນຘາຕຸໍ ປຏິຈ຺ຈ ອຸປ຺ປຊ຺ຊຕິ ມໂນສມ຺ຜສ຺ໂສ, ມໂນສມ຺ຜສ຺ສໍ ປຏິຈ຺ຈ ອຸປ຺ປຊ຺ຊຕິ ມໂນສມ຺ຜສ຺ສຊາ ເວທນາ. ເອວໍ ໂຂ, ຠິກ຺ຂເວ, ຘາຕຸນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຜສ຺ສນານຕ຺ຕໍ, ຜສ຺ສນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ເວທນານານຕ຺ຕ’’ນ຺ຕິ. ຈຕຸຕ຺ຖໍ.

໕. ທຸຕິຍເວທນານານຕ຺ຕສຸຕ຺ຕໍ

໘໙. ສາວຕ຺ຖິຍໍ ວິຫຣຕິ…ເປ… ‘‘ຘາຕຸນານຕ຺ຕໍ, ຠິກ຺ຂເວ, ປຏິຈ຺ຈ ອຸປ຺ປຊ຺ຊຕິ ຜສ຺ສນານຕ຺ຕໍ, ຜສ຺ສນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ເວທນານານຕ຺ຕໍ, ໂນ ເວທນານານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຜສ຺ສນານຕ຺ຕໍ, ໂນ ຜສ຺ສນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຘາຕຸນານຕ຺ຕໍ. ກຕມຎ຺ຈ, ຠິກ຺ຂເວ, ຘາຕຸນານຕ຺ຕໍ? ຈກ຺ຂຸຘາຕຸ…ເປ… ມໂນຘາຕຸ – ອິທໍ ວຸຈ຺ຈຕິ, ຠິກ຺ຂເວ, ຘາຕຸນານຕ຺ຕໍ’’.

‘‘ກຖຎ຺ຈ, ຠິກ຺ຂເວ, ຘາຕຸນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຜສ຺ສນານຕ຺ຕໍ, ຜສ຺ສນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ເວທນານານຕ຺ຕໍ, ໂນ ເວທນານານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຜສ຺ສນານຕ຺ຕໍ, ໂນ ຜສ຺ສນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຘາຕຸນານຕ຺ຕໍ? ຈກ຺ຂຸຘາຕຸໍ, ຠິກ຺ຂເວ, ປຏິຈ຺ຈ ອຸປ຺ປຊ຺ຊຕິ ຈກ຺ຂຸສມ຺ຜສ຺ໂສ, ຈກ຺ຂຸສມ຺ຜສ຺ສໍ ປຏິຈ຺ຈ ອຸປ຺ປຊ຺ຊຕິ ຈກ຺ຂຸສມ຺ຜສ຺ສຊາ ເວທນາ, ໂນ ຈກ຺ຂຸສມ຺ຜສ຺ສຊໍ ເວທນໍ ປຏິຈ຺ຈ ອຸປ຺ປຊ຺ຊຕິ ຈກ຺ຂຸສມ຺ຜສ຺ໂສ, ໂນ ຈກ຺ຂຸສມ຺ຜສ຺ສໍ ປຏິຈ຺ຈ ອຸປ຺ປຊ຺ຊຕິ ຈກ຺ຂຸຘາຕຸ…ເປ… ມໂນຘາຕຸໍ ປຏິຈ຺ຈ ອຸປ຺ປຊ຺ຊຕິ ມໂນສມ຺ຜສ຺ໂສ, ມໂນສມ຺ຜສ຺ສໍ ປຏິຈ຺ຈ ອຸປ຺ປຊ຺ຊຕິ ມໂນສມ຺ຜສ຺ສຊາ ເວທນາ, ໂນ ມໂນສມ຺ຜສ຺ສຊໍ ເວທນໍ ປຏິຈ຺ຈ ອຸປ຺ປຊ຺ຊຕິ ມໂນສມ຺ຜສ຺ໂສ, ໂນ ມໂນສມ຺ຜສ຺ສໍ ປຏິຈ຺ຈ ອຸປ຺ປຊ຺ຊຕິ ມໂນຘາຕຸ. ເອວໍ ໂຂ, ຠິກ຺ຂເວ, ຘາຕຸນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຜສ຺ສນານຕ຺ຕໍ, ຜສ຺ສນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ເວທນານານຕ຺ຕໍ, ໂນ ເວທນານານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຜສ຺ສນານຕ຺ຕໍ, ໂນ ຜສ຺ສນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຘາຕຸນານຕ຺ຕ’’ນ຺ຕິ. ປຎ຺ຈມໍ.

໖. ພາຫິຣຘາຕຸນານຕ຺ຕສຸຕ຺ຕໍ

໙໐. ສາວຕ຺ຖິຍໍ ວິຫຣຕິ…ເປ… ‘‘ຘາຕຸນານຕ຺ຕໍ ໂວ, ຠິກ຺ຂເວ, ເທເສສ຺ສາມິ. ຕໍ ສຸຓາຖ…ເປ… ກຕມຎ຺ຈ, ຠິກ຺ຂເວ, ຘາຕຸນານຕ຺ຕໍ? ຣູປຘາຕຸ ສທ຺ທຘາຕຸ ຄນ຺ຘຘາຕຸ ຣສຘາຕຸ ໂຜຏ຺ຐພ຺ພຘາຕຸ ຘມ຺ມຘາຕຸ – ອິທໍ ວຸຈ຺ຈຕິ, ຠິກ຺ຂເວ, ຘາຕຸນານຕ຺ຕ’’ນ຺ຕິ. ຉຏ຺ຐໍ.

໗. ສຎ຺ຎານານຕ຺ຕສຸຕ຺ຕໍ

໙໑. ສາວຕ຺ຖິຍໍ ວິຫຣຕິ…ເປ… ‘‘ຠທນ຺ເຕ’’ຕິ ເຕ ຠິກ຺ຂູ ຠຄວໂຕ ປຈ຺ຈສ຺ໂສສຸໍ. ຠຄວາ ເອຕທໂວຈ – ‘‘ຘາຕຸນານຕ຺ຕໍ, ຠິກ຺ຂເວ, ປຏິຈ຺ຈ ອຸປ຺ປຊ຺ຊຕິ ສຎ຺ຎານານຕ຺ຕໍ, ສຎ຺ຎານານຕ຺ຕໍ ປຏິຈ຺ຈ ອຸປ຺ປຊ຺ຊຕິ ສງ຺ກປ຺ປນານຕ຺ຕໍ, ສງ຺ກປ຺ປນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຉນ຺ທນານຕ຺ຕໍ, ຉນ຺ທນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ປຣິຬາຫນານຕ຺ຕໍ, ປຣິຬາຫນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ປຣິເຍສນານານຕ຺ຕໍ. ກຕມຎ຺ຈ, ຠິກ຺ຂເວ, ຘາຕຸນານຕ຺ຕໍ? ຣູປຘາຕຸ…ເປ… ຘມ຺ມຘາຕຸ – ອິທໍ ວຸຈ຺ຈຕິ, ຠິກ຺ຂເວ, ຘາຕຸນານຕ຺ຕໍ’’.

‘‘ກຖຎ຺ຈ, ຠິກ຺ຂເວ, ຘາຕຸນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ສຎ຺ຎານານຕ຺ຕໍ, ສຎ຺ຎານານຕ຺ຕໍ ປຏິຈ຺ຈ ອຸປ຺ປຊ຺ຊຕິ ສງ຺ກປ຺ປນານຕ຺ຕໍ, ສງ຺ກປ຺ປນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຉນ຺ທນານຕ຺ຕໍ, ຉນ຺ທນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ປຣິຬາຫນານຕ຺ຕໍ, ປຣິຬາຫນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ປຣິເຍສນານານຕ຺ຕໍ?

‘‘ຣູປຘາຕຸໍ, ຠິກ຺ຂເວ, ປຏິຈ຺ຈ ອຸປ຺ປຊ຺ຊຕິ ຣູປສຎ຺ຎາ, ຣູປສຎ຺ຎໍ ປຏິຈ຺ຈ ອຸປ຺ປຊ຺ຊຕິ ຣູປສງ຺ກປ຺ໂປ, ຣູປສງ຺ກປ຺ປໍ ປຏິຈ຺ຈ ອຸປ຺ປຊ຺ຊຕິ ຣູປຈ຺ຉນ຺ໂທ, ຣູປຈ຺ຉນ຺ທໍ ປຏິຈ຺ຈ ອຸປ຺ປຊ຺ຊຕິ ຣູປປຣິຬາໂຫ, ຣູປປຣິຬາຫໍ ປຏິຈ຺ຈ ອຸປ຺ປຊ຺ຊຕິ ຣູປປຣິເຍສນາ…ເປ… ຘມ຺ມຘາຕຸໍ ປຏິຈ຺ຈ ອຸປ຺ປຊ຺ຊຕິ ຘມ຺ມສຎ຺ຎາ, ຘມ຺ມສຎ຺ຎໍ ປຏິຈ຺ຈ ອຸປ຺ປຊ຺ຊຕິ ຘມ຺ມສງ຺ກປ຺ໂປ, ຘມ຺ມສງ຺ກປ຺ປໍ ປຏິຈ຺ຈ ອຸປ຺ປຊ຺ຊຕິ ຘມ຺ມຈ຺ຉນ຺ໂທ, ຘມ຺ມຈ຺ຉນ຺ທໍ ປຏິຈ຺ຈ ອຸປ຺ປຊ຺ຊຕິ ຘມ຺ມປຣິຬາໂຫ, ຘມ຺ມປຣິຬາຫໍ ປຏິຈ຺ຈ ອຸປ຺ປຊ຺ຊຕິ ຘມ຺ມປຣິເຍສນາ.

‘‘ເອວໍ, ໂຂ, ຠິກ຺ຂເວ, ຘາຕຸນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ສຎ຺ຎານານຕ຺ຕໍ, ສຎ຺ຎານານຕ຺ຕໍ ປຏິຈ຺ຈ ອຸປ຺ປຊ຺ຊຕິ ສງ຺ກປ຺ປນານຕ຺ຕໍ, ສງ຺ກປ຺ປນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຉນ຺ທນານຕ຺ຕໍ, ຉນ຺ທນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ປຣິຬາຫນານຕ຺ຕໍ, ປຣິຬາຫນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ປຣິເຍສນານານຕ຺ຕ’’ນ຺ຕິ. ສຕ຺ຕມໍ.

໘. ໂນປຣິເຍສນານານຕ຺ຕສຸຕ຺ຕໍ

໙໒. ສາວຕ຺ຖິຍໍ ວິຫຣຕິ…ເປ… ‘‘ຘາຕຸນານຕ຺ຕໍ, ຠິກ຺ຂເວ, ປຏິຈ຺ຈ ອຸປ຺ປຊ຺ຊຕິ ສຎ຺ຎານານຕ຺ຕໍ, ສຎ຺ຎານານຕ຺ຕໍ ປຏິຈ຺ຈ ອຸປ຺ປຊ຺ຊຕິ ສງ຺ກປ຺ປນານຕ຺ຕໍ, ສງ຺ກປ຺ປນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຉນ຺ທນານຕ຺ຕໍ, ຉນ຺ທນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ປຣິຬາຫນານຕ຺ຕໍ, ປຣິຬາຫນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ປຣິເຍສນານານຕ຺ຕໍ; ໂນ ປຣິເຍສນານານຕ຺ຕໍ ປຏິຈ຺ຈ ອຸປ຺ປຊ຺ຊຕິ ປຣິຬາຫນານຕ຺ຕໍ, ໂນ ປຣິຬາຫນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຉນ຺ທນານຕ຺ຕໍ, ໂນ ຉນ຺ທນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ສງ຺ກປ຺ປນານຕ຺ຕໍ, ໂນ ສງ຺ກປ຺ປນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ສຎ຺ຎານານຕ຺ຕໍ, ໂນ ສຎ຺ຎານານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຘາຕຸນານຕ຺ຕໍ. ກຕມຎ຺ຈ, ຠິກ຺ຂເວ, ຘາຕຸນານຕ຺ຕໍ? ຣູປຘາຕຸ…ເປ… ຘມ຺ມຘາຕຸ – ອິທໍ ວຸຈ຺ຈຕິ, ຠິກ຺ຂເວ, ຘາຕຸນານຕ຺ຕໍ’’.

‘‘ກຖຎ຺ຈ, ຠິກ຺ຂເວ, ຘາຕຸນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ສຎ຺ຎານານຕ຺ຕໍ, ສຎ຺ຎານານຕ຺ຕໍ ປຏິຈ຺ຈ ອຸປ຺ປຊ຺ຊຕິ…ເປ… ປຣິເຍສນານານຕ຺ຕໍ; ໂນ ປຣິເຍສນານານຕ຺ຕໍ ປຏິຈ຺ຈ ອຸປ຺ປຊ຺ຊຕິ ປຣິຬາຫນານຕ຺ຕໍ, ໂນ ປຣິຬາຫນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຉນ຺ທນານຕ຺ຕໍ, ໂນ ຉນ຺ທນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ສງ຺ກປ຺ປນານຕ຺ຕໍ, ໂນ ສງ຺ກປ຺ປນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ສຎ຺ຎານານຕ຺ຕໍ, ໂນ ສຎ຺ຎານານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຘາຕຸນານຕ຺ຕໍ?

‘‘ຣູປຘາຕຸໍ, ຠິກ຺ຂເວ, ປຏິຈ຺ຈ ອຸປ຺ປຊ຺ຊຕິ ຣູປສຎ຺ຎາ…ເປ… ຘມ຺ມຘາຕຸໍ ປຏິຈ຺ຈ ອຸປ຺ປຊ຺ຊຕິ ຘມ຺ມສຎ຺ຎາ, ຘມ຺ມສຎ຺ຎໍ ປຏິຈ຺ຈ ອຸປ຺ປຊ຺ຊຕິ…ເປ… ຘມ຺ມປຣິເຍສນາ; ໂນ ຘມ຺ມປຣິເຍສນໍ ປຏິຈ຺ຈ ອຸປ຺ປຊ຺ຊຕິ ຘມ຺ມປຣິຬາໂຫ, ໂນ ຘມ຺ມປຣິຬາຫໍ ປຏິຈ຺ຈ ອຸປ຺ປຊ຺ຊຕິ ຘມ຺ມຈ຺ຉນ຺ໂທ, ໂນ ຘມ຺ມຈ຺ຉນ຺ທໍ ປຏິຈ຺ຈ ອຸປ຺ປຊ຺ຊຕິ ຘມ຺ມສງ຺ກປ຺ໂປ, ໂນ ຘມ຺ມສງ຺ກປ຺ປໍ ປຏິຈ຺ຈ ອຸປ຺ປຊ຺ຊຕິ ຘມ຺ມສຎ຺ຎາ, ໂນ ຘມ຺ມສຎ຺ຎໍ ປຏິຈ຺ຈ ອຸປ຺ປຊ຺ຊຕິ ຘມ຺ມຘາຕຸ.

‘‘ເອວໍ ໂຂ, ຠິກ຺ຂເວ, ຘາຕຸນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ສຎ຺ຎານານຕ຺ຕໍ, ສຎ຺ຎານານຕ຺ຕໍ ປຏິຈ຺ຈ ອຸປ຺ປຊ຺ຊຕິ…ເປ… ປຣິເຍສນານານຕ຺ຕໍ; ໂນ ປຣິເຍສນານານຕ຺ຕໍ ປຏິຈ຺ຈ ອຸປ຺ປຊ຺ຊຕິ ປຣິຬາຫນານຕ຺ຕໍ, ໂນ ປຣິຬາຫນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຉນ຺ທນານຕ຺ຕໍ, ໂນ ຉນ຺ທນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ສງ຺ກປ຺ປນານຕ຺ຕໍ, ໂນ ສງ຺ກປ຺ປນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ສຎ຺ຎານານຕ຺ຕໍ, ໂນ ສຎ຺ຎານານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຘາຕຸນານຕ຺ຕ’’ນ຺ຕິ. ອຏ຺ຐມໍ.

໙. ພາຫິຣຜສ຺ສນານຕ຺ຕສຸຕ຺ຕໍ

໙໓. ສາວຕ຺ຖິຍໍ ວິຫຣຕິ…ເປ… ‘‘ຘາຕຸນານຕ຺ຕໍ, ຠິກ຺ຂເວ, ປຏິຈ຺ຈ ອຸປ຺ປຊ຺ຊຕິ ສຎ຺ຎານານຕ຺ຕໍ, ສຎ຺ຎານານຕ຺ຕໍ ປຏິຈ຺ຈ ອຸປ຺ປຊ຺ຊຕິ ສງ຺ກປ຺ປນານຕ຺ຕໍ, ສງ຺ກປ຺ປນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຜສ຺ສນານຕ຺ຕໍ, ຜສ຺ສນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ເວທນານານຕ຺ຕໍ, ເວທນານານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຉນ຺ທນານຕ຺ຕໍ, ຉນ຺ທນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ປຣິຬາຫນານຕ຺ຕໍ, ປຣິຬາຫນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ປຣິເຍສນານານຕ຺ຕໍ, ປຣິເຍສນານານຕ຺ຕໍ ປຏິຈ຺ຈ ອຸປ຺ປຊ຺ຊຕິ ລາຠນານຕ຺ຕໍ. ກຕມຎ຺ຈ, ຠິກ຺ຂເວ, ຘາຕຸນານຕ຺ຕໍ? ຣູປຘາຕຸ…ເປ… ຘມ຺ມຘາຕຸ – ອິທໍ ວຸຈ຺ຈຕິ, ຠິກ຺ຂເວ, ຘາຕຸນານຕ຺ຕໍ’’.

‘‘ກຖຎ຺ຈ, ຠິກ຺ຂເວ, ຘາຕຸນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ສຎ຺ຎານານຕ຺ຕໍ, ສຎ຺ຎານານຕ຺ຕໍ ປຏິຈ຺ຈ ອຸປ຺ປຊ຺ຊຕິ…ເປ… ລາຠນານຕ຺ຕໍ?

‘‘ຣູປຘາຕຸໍ, ຠິກ຺ຂເວ, ປຏິຈ຺ຈ ອຸປ຺ປຊ຺ຊຕິ ຣູປສຎ຺ຎາ, ຣູປສຎ຺ຎໍ ປຏິຈ຺ຈ ອຸປ຺ປຊ຺ຊຕິ ຣູປສງ຺ກປ຺ໂປ, ຣູປສງ຺ກປ຺ປໍ ປຏິຈ຺ຈ ອຸປ຺ປຊ຺ຊຕິ ຣູປສມ຺ຜສ຺ໂສ, ຣູປສມ຺ຜສ຺ສໍ ປຏິຈ຺ຈ ອຸປ຺ປຊ຺ຊຕິ ຣູປສມ຺ຜສ຺ສຊາ ເວທນາ, ຣູປສມ຺ຜສ຺ສຊໍ ເວທນໍ ປຏິຈ຺ຈ ອຸປ຺ປຊ຺ຊຕິ ຣູປຈ຺ຉນ຺ໂທ, ຣູປຈ຺ຉນ຺ທໍ ປຏິຈ຺ຈ ອຸປ຺ປຊ຺ຊຕິ ຣູປປຣິຬາໂຫ, ຣູປປຣິຬາຫໍ ປຏິຈ຺ຈ ອຸປ຺ປຊ຺ຊຕິ ຣູປປຣິເຍສນາ, ຣູປປຣິເຍສນໍ ປຏິຈ຺ຈ ອຸປ຺ປຊ຺ຊຕິ ຣູປລາໂຠ…ເປ… ຘມ຺ມຘາຕຸໍ ປຏິຈ຺ຈ ອຸປ຺ປຊ຺ຊຕິ ຘມ຺ມສຎ຺ຎາ, ຘມ຺ມສຎ຺ຎໍ ປຏິຈ຺ຈ ອຸປ຺ປຊ຺ຊຕິ ຘມ຺ມສງ຺ກປ຺ໂປ, ຘມ຺ມສງ຺ກປ຺ປໍ ປຏິຈ຺ຈ ອຸປ຺ປຊ຺ຊຕິ ຘມ຺ມສມ຺ຜສ຺ໂສ, ຘມ຺ມສມ຺ຜສ຺ສໍ ປຏິຈ຺ຈ ອຸປ຺ປຊ຺ຊຕິ ຘມ຺ມສມ຺ຜສ຺ສຊາ ເວທນາ, ຘມ຺ມສມ຺ຜສ຺ສຊໍ ເວທນໍ ປຏິຈ຺ຈ ອຸປ຺ປຊ຺ຊຕິ ຘມ຺ມຈ຺ຉນ຺ໂທ, ຘມ຺ມຈ຺ຉນ຺ທໍ ປຏິຈ຺ຈ ອຸປ຺ປຊ຺ຊຕິ ຘມ຺ມປຣິຬາໂຫ, ຘມ຺ມປຣິຬາຫໍ ປຏິຈ຺ຈ ອຸປ຺ປຊ຺ຊຕິ ຘມ຺ມປຣິເຍສນາ, ຘມ຺ມປຣິເຍສນໍ ປຏິຈ຺ຈ ອຸປ຺ປຊ຺ຊຕິ ຘມ຺ມລາໂຠ.

‘‘ເອວໍ ໂຂ, ຠິກ຺ຂເວ, ຘາຕຸນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ສຎ຺ຎານານຕ຺ຕໍ, ສຎ຺ຎານານຕ຺ຕໍ ປຏິຈ຺ຈ ອຸປ຺ປຊ຺ຊຕິ…ເປ… ປຣິເຍສນານານຕ຺ຕໍ, ປຣິເຍສນານານຕ຺ຕໍ ປຏິຈ຺ຈ ອຸປ຺ປຊ຺ຊຕິ ລາຠນານຕ຺ຕ’’ນ຺ຕິ. ນວມໍ.

໑໐. ທຸຕິຍພາຫິຣຜສ຺ສນານຕ຺ຕສຸຕ຺ຕໍ

໙໔. ສາວຕ຺ຖິຍໍ ວິຫຣຕິ…ເປ… ‘‘ຘາຕຸນານຕ຺ຕໍ, ຠິກ຺ຂເວ, ປຏິຈ຺ຈ ອຸປ຺ປຊ຺ຊຕິ ສຎ຺ຎານານຕ຺ຕໍ, ສຎ຺ຎານານຕ຺ຕໍ ປຏິຈ຺ຈ ອຸປ຺ປຊ຺ຊຕິ ສງ຺ກປ຺ປນານຕ຺ຕໍ, ຜສ຺ສ… ເວທນາ… ຉນ຺ທ… ປຣິຬາຫ… ປຣິເຍສນານານຕ຺ຕໍ ປຏິຈ຺ຈ ອຸປ຺ປຊ຺ຊຕິ ລາຠນານຕ຺ຕໍ; ໂນ ລາຠນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ປຣິເຍສນານານຕ຺ຕໍ, ໂນ ປຣິເຍສນານານຕ຺ຕໍ ປຏິຈ຺ຈ ອຸປ຺ປຊ຺ຊຕິ ປຣິຬາຫນານຕ຺ຕໍ, ໂນ ປຣິຬາຫນານຕ຺ຕໍ ປຏິຈ຺ຈ ອຸປ຺ປຊ຺ຊຕິ…ເປ… ຉນ຺ທ… ເວທນາ… ຜສ຺ສ… ສງ຺ກປ຺ປ… ສຎ຺ຎານານຕ຺ຕໍ, ໂນ ສຎ຺ຎານານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຘາຕຸນານຕ຺ຕໍ. ກຕມຎ຺ຈ, ຠິກ຺ຂເວ, ຘາຕຸນານຕ຺ຕໍ? ຣູປຘາຕຸ…ເປ… ຘມ຺ມຘາຕຸ – ອິທໍ ວຸຈ຺ຈຕິ, ຠິກ຺ຂເວ, ຘາຕຸນານຕ຺ຕໍ’’.

‘‘ກຖຎ຺ຈ, ຠິກ຺ຂເວ, ຘາຕຸນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ສຎ຺ຎານານຕ຺ຕໍ, ສຎ຺ຎານານຕ຺ຕໍ ປຏິຈ຺ຈ ອຸປ຺ປຊ຺ຊຕິ ສງ຺ກປ຺ປນານຕ຺ຕໍ? ຜສ຺ສ… ເວທນາ… ຉນ຺ທ… ປຣິຬາຫ… ປຣິເຍສນາ… ລາຠ… ໂນ ລາຠນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ປຣິເຍສນານານຕ຺ຕໍ, ໂນ ປຣິເຍສນານານຕ຺ຕໍ ປຏິຈ຺ຈ ອຸປ຺ປຊ຺ຊຕິ ປຣິຬາຫ… ຉນ຺ທ… ເວທນາ… ຜສ຺ສ… ໂນ ສງ຺ກປ຺ປນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ສຎ຺ຎານານຕ຺ຕໍ, ໂນ ສຎ຺ຎານານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຘາຕຸນານຕ຺ຕໍ?

‘‘ຣູປຘາຕຸໍ, ຠິກ຺ຂເວ, ປຏິຈ຺ຈ ອຸປ຺ປຊ຺ຊຕິ ຣູປສຎ຺ຎາ…ເປ… ຘມ຺ມຘາຕຸໍ ປຏິຈ຺ຈ ອຸປ຺ປຊ຺ຊຕິ ຘມ຺ມສຎ຺ຎາ, ຘມ຺ມສຎ຺ຎໍ ປຏິຈ຺ຈ ອຸປ຺ປຊ຺ຊຕິ…ເປ… ຘມ຺ມປຣິເຍສນາ, ຘມ຺ມປຣິເຍສນໍ ປຏິຈ຺ຈ ອຸປ຺ປຊ຺ຊຕິ ຘມ຺ມລາໂຠ; ໂນ ຘມ຺ມລາຠໍ ປຏິຈ຺ຈ ອຸປ຺ປຊ຺ຊຕິ ຘມ຺ມປຣິເຍສນາ, ໂນ ຘມ຺ມປຣິເຍສນໍ ປຏິຈ຺ຈ ອຸປ຺ປຊ຺ຊຕິ ຘມ຺ມປຣິຬາໂຫ, ໂນ ຘມ຺ມປຣິຬາຫໍ ປຏິຈ຺ຈ ອຸປ຺ປຊ຺ຊຕິ ຘມ຺ມຈ຺ຉນ຺ໂທ, ໂນ ຘມ຺ມຈ຺ຉນ຺ທໍ ປຏິຈ຺ຈ ອຸປ຺ປຊ຺ຊຕິ ຘມ຺ມສມ຺ຜສ຺ສຊາ ເວທນາ, ໂນ ຘມ຺ມສມ຺ຜສ຺ສຊໍ ເວທນໍ ປຏິຈ຺ຈ ອຸປ຺ປຊ຺ຊຕິ ຘມ຺ມສມ຺ຜສ຺ໂສ, ໂນ ຘມ຺ມສມ຺ຜສ຺ສໍ ປຏິຈ຺ຈ ອຸປ຺ປຊ຺ຊຕິ ຘມ຺ມສງ຺ກປ຺ໂປ, ໂນ ຘມ຺ມສງ຺ກປ຺ປໍ ປຏິຈ຺ຈ ອຸປ຺ປຊ຺ຊຕິ ຘມ຺ມສຎ຺ຎາ, ໂນ ຘມ຺ມສຎ຺ຎໍ ປຏິຈ຺ຈ ອຸປ຺ປຊ຺ຊຕິ ຘມ຺ມຘາຕຸ.

‘‘ເອວໍ ໂຂ, ຠິກ຺ຂເວ, ຘາຕຸນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ສຎ຺ຎານານຕ຺ຕໍ, ສຎ຺ຎານານຕ຺ຕໍ ປຏິຈ຺ຈ ອຸປ຺ປຊ຺ຊຕິ…ເປ… ສງ຺ກປ຺ປ… ຜສ຺ສ… ເວທນາ… ຉນ຺ທ… ປຣິຬາຫ… ປຣິເຍສນາ… ລາຠ… ໂນ ລາຠນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ປຣິເຍສນານານຕ຺ຕໍ, ໂນ ປຣິເຍສນານານຕ຺ຕໍ ປຏິຈ຺ຈ ອຸປ຺ປຊ຺ຊຕິ ປຣິຬາຫນານຕ຺ຕໍ, ໂນ ປຣິຬາຫນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຉນ຺ທນານຕ຺ຕໍ, ໂນ ຉນ຺ທນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ເວທນານານຕ຺ຕໍ, ໂນ ເວທນານານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຜສ຺ສນານຕ຺ຕໍ, ໂນ ຜສ຺ສນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ສງ຺ກປ຺ປນານຕ຺ຕໍ, ໂນ ສງ຺ກປ຺ປນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ສຎ຺ຎານານຕ຺ຕໍ, ໂນ ສຎ຺ຎານານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຘາຕຸນານຕ຺ຕ’’ນ຺ຕິ. ທສມໍ.

ນານຕ຺ຕວຄ຺ໂຄ ປຐໂມ.

ຕສ຺ສຸທ຺ທານໍ –

ຘາຕຸຜສ຺ສຎ຺ຈ ໂນ ເຈຕໍ, ເວທນາ ອປເຣ ທຸເວ;

ເອຕໍ ອຊ຺ຌຕ຺ຕປຎ຺ຈກໍ, ຘາຕຸສຎ຺ຎຎ຺ຈ ໂນ ເຈຕໍ;

ຜສ຺ສສ຺ສ ອປເຣ ທຸເວ, ເອຕໍ ພາຫິຣປຎ຺ຈກນ຺ຕິ.

໒. ທຸຕິຍວຄ຺ໂຄ

໑. ສຕ຺ຕຘາຕຸສຸຕ຺ຕໍ

໙໕. ສາວຕ຺ຖິຍໍ ວິຫຣຕິ…ເປ… ‘‘ສຕ຺ຕິມາ, ຠິກ຺ຂເວ, ຘາຕຸໂຍ. ກຕມາ ສຕ຺ຕ? ອາຠາຘາຕຸ, ສຸຠຘາຕຸ, ອາກາສານຎ຺ຈາຍຕນຘາຕຸ, ວິຎ຺ຎາຓຎ຺ຈາຍຕນຘາຕຸ, ອາກິຎ຺ຈຎ຺ຎາຍຕນຘາຕຸ, ເນວສຎ຺ຎານາສຎ຺ຎາຍຕນຘາຕຸ, ສຎ຺ຎາເວທຍິຕນິໂຣຘຘາຕຸ – ອິມາ ໂຂ, ຠິກ຺ຂເວ, ສຕ຺ຕ ຘາຕຸໂຍ’’ຕິ.

ເອວໍ ວຸຕ຺ເຕ, ອຎ຺ຎຕໂຣ ຠິກ຺ຂຸ ຠຄວນ຺ຕໍ ເອຕທໂວຈ – ‘‘ຍາ ຈາຍໍ, ຠນ຺ເຕ, ອາຠາຘາຕຸ ຍາ ຈ ສຸຠຘາຕຸ ຍາ ຈ ອາກາສານຎ຺ຈາຍຕນຘາຕຸ ຍາ ຈ ວິຎ຺ຎາຓຎ຺ຈາຍຕນຘາຕຸ ຍາ ຈ ອາກິຎ຺ຈຎ຺ຎາຍຕນຘາຕຸ ຍາ ຈ ເນວສຎ຺ຎານາສຎ຺ຎາຍຕນຘາຕຸ ຍາ ຈ ສຎ຺ຎາເວທຍິຕນິໂຣຘຘາຕຸ – ອິມາ ນຸ ໂຂ, ຠນ຺ເຕ, ຘາຕຸໂຍ ກິໍ ປຏິຈ຺ຈ ປຎ຺ຎາຍນ຺ຕີ’’ຕິ?

‘‘ຍາຍໍ, ຠິກ຺ຂຸ, ອາຠາຘາຕຸ – ອຍໍ ຘາຕຸ ອນ຺ຘກາຣໍ ປຏິຈ຺ຈ ປຎ຺ຎາຍຕິ. ຍາຍໍ, ຠິກ຺ຂຸ, ສຸຠຘາຕຸ – ອຍໍ ຘາຕຸ ອສຸຠໍ ປຏິຈ຺ຈ ປຎ຺ຎາຍຕິ. ຍາຍໍ, ຠິກ຺ຂຸ, ອາກາສານຎ຺ຈາຍຕນຘາຕຸ – ອຍໍ ຘາຕຸ ຣູປໍ ປຏິຈ຺ຈ ປຎ຺ຎາຍຕິ. ຍາຍໍ, ຠິກ຺ຂຸ, ວິຎ຺ຎາຓຎ຺ຈາຍຕນຘາຕຸ – ອຍໍ ຘາຕຸ ອາກາສານຎ຺ຈາຍຕນໍ ປຏິຈ຺ຈ ປຎ຺ຎາຍຕິ. ຍາຍໍ, ຠິກ຺ຂຸ, ອາກິຎ຺ຈຎ຺ຎາຍຕນຘາຕຸ – ອຍໍ ຘາຕຸ ວິຎ຺ຎາຓຎ຺ຈາຍຕນໍ ປຏິຈ຺ຈ ປຎ຺ຎາຍຕິ. ຍາຍໍ, ຠິກ຺ຂຸ, ເນວສຎ຺ຎານາສຎ຺ຎາຍຕນຘາຕຸ – ອຍໍ ຘາຕຸ ອາກິຎ຺ຈຎ຺ຎາຍຕນໍ ປຏິຈ຺ຈ ປຎ຺ຎາຍຕິ. ຍາຍໍ, ຠິກ຺ຂຸ, ສຎ຺ຎາເວທຍິຕນິໂຣຘຘາຕຸ – ອຍໍ ຘາຕຸ ນິໂຣຘໍ ປຏິຈ຺ຈ ປຎ຺ຎາຍຕີ’’ຕິ.

‘‘ຍາ ຈາຍໍ, ຠນ຺ເຕ, ອາຠາຘາຕຸ ຍາ ຈ ສຸຠຘາຕຸ ຍາ ຈ ອາກາສານຎ຺ຈາຍຕນຘາຕຸ ຍາ ຈ ວິຎ຺ຎາຓຎ຺ຈາຍຕນຘາຕຸ ຍາ ຈ ອາກິຎ຺ຈຎ຺ຎາຍຕນຘາຕຸ ຍາ ຈ ເນວສຎ຺ຎານາສຎ຺ຎາຍຕນຘາຕຸ ຍາ ຈ ສຎ຺ຎາເວທຍິຕນິໂຣຘຘາຕຸ – ອິມາ ນຸ ໂຂ, ຠນ຺ເຕ, ຘາຕຸໂຍ ກຖໍ ສມາປຕ຺ຕິ ປຕ຺ຕພ຺ພາ’’ຕິ?

‘‘ຍາ ຈາຍໍ, ຠິກ຺ຂຸ, ອາຠາຘາຕຸ ຍາ ຈ ສຸຠຘາຕຸ ຍາ ຈ ອາກາສານຎ຺ຈາຍຕນຘາຕຸ ຍາ ຈ ວິຎ຺ຎາຓຎ຺ຈາຍຕນຘາຕຸ ຍາ ຈ ອາກິຎ຺ຈຎ຺ຎາຍຕນຘາຕຸ – ອິມາ ຘາຕຸໂຍ ສຎ຺ຎາສມາປຕ຺ຕິ ປຕ຺ຕພ຺ພາ. ຍາຍໍ, ຠິກ຺ຂຸ, ເນວສຎ຺ຎານາສຎ຺ຎາຍຕນຘາຕຸ – ອຍໍ ຘາຕຸ ສງ຺ຂາຣາວເສສສມາປຕ຺ຕິ ປຕ຺ຕພ຺ພາ. ຍາຍໍ, ຠິກ຺ຂຸ, ສຎ຺ຎາເວທຍິຕນິໂຣຘຘາຕຸ – ອຍໍ ຘາຕຸ ນິໂຣຘສມາປຕ຺ຕິ ປຕ຺ຕພ຺ພາ’’ຕິ. ປຐມໍ.

໒. ສນິທານສຸຕ຺ຕໍ

໙໖. ສາວຕ຺ຖິຍໍ ວິຫຣຕິ…ເປ… ‘‘ສນິທານໍ, ຠິກ຺ຂເວ, ອຸປ຺ປຊ຺ຊຕິ ກາມວິຕກ຺ໂກ, ໂນ ອນິທານໍ; ສນິທານໍ ອຸປ຺ປຊ຺ຊຕິ ພ຺ຍາປາທວິຕກ຺ໂກ, ໂນ ອນິທານໍ; ສນິທານໍ ອຸປ຺ປຊ຺ຊຕິ ວິຫິໍສາວິຕກ຺ໂກ, ໂນ ອນິທານໍ’’.

‘‘ກຖຎ຺ຈ, ຠິກ຺ຂເວ, ສນິທານໍ ອຸປ຺ປຊ຺ຊຕິ ກາມວິຕກ຺ໂກ, ໂນ ອນິທານໍ; ສນິທານໍ ອຸປ຺ປຊ຺ຊຕິ ພ຺ຍາປາທວິຕກ຺ໂກ, ໂນ ອນິທານໍ; ສນິທານໍ ອຸປ຺ປຊ຺ຊຕິ ວິຫິໍສາວິຕກ຺ໂກ, ໂນ ອນິທານໍ? ກາມຘາຕຸໍ, ຠິກ຺ຂເວ, ປຏິຈ຺ຈ ອຸປ຺ປຊ຺ຊຕິ ກາມສຎ຺ຎາ, ກາມສຎ຺ຎໍ ປຏິຈ຺ຈ ອຸປ຺ປຊ຺ຊຕິ ກາມສງ຺ກປ຺ໂປ, ກາມສງ຺ກປ຺ປໍ ປຏິຈ຺ຈ ອຸປ຺ປຊ຺ຊຕິ ກາມຈ຺ຉນ຺ໂທ, ກາມຈ຺ຉນ຺ທໍ ປຏິຈ຺ຈ ອຸປ຺ປຊ຺ຊຕິ ກາມປຣິຬາໂຫ, ກາມປຣິຬາຫໍ ປຏິຈ຺ຈ ອຸປ຺ປຊ຺ຊຕິ ກາມປຣິເຍສນາ. ກາມປຣິເຍສນໍ, ຠິກ຺ຂເວ, ປຣິເຍສມາໂນ ອສ຺ສຸຕວາ ປຸຖຸຊ຺ຊໂນ ຕີຫິ ຐາເນຫິ ມິຈ຺ຉາ ປຏິປຊ຺ຊຕິ – ກາເຍນ, ວາຈາຍ, ມນສາ.

‘‘ພ຺ຍາປາທຘາຕຸໍ, ຠິກ຺ຂເວ, ປຏິຈ຺ຈ ອຸປ຺ປຊ຺ຊຕິ ພ຺ຍາປາທສຎ຺ຎາ, ພ຺ຍາປາທສຎ຺ຎໍ ປຏິຈ຺ຈ ອຸປ຺ປຊ຺ຊຕິ ພ຺ຍາປາທສງ຺ກປ຺ໂປ…ເປ… ພ຺ຍາປາທຈ຺ຉນ຺ໂທ… ພ຺ຍາປາທປຣິຬາໂຫ… ພ຺ຍາປາທປຣິເຍສນາ… ພ຺ຍາປາທປຣິເຍສນໍ, ຠິກ຺ຂເວ, ປຣິເຍສມາໂນ ອສ຺ສຸຕວາ ປຸຖຸຊ຺ຊໂນ ຕີຫິ ຐາເນຫິ ມິຈ຺ຉາ ປຏິປຊ຺ຊຕິ – ກາເຍນ, ວາຈາຍ, ມນສາ.

‘‘ວິຫິໍສາຘາຕຸໍ, ຠິກ຺ຂເວ, ປຏິຈ຺ຈ ອຸປ຺ປຊ຺ຊຕິ ວິຫິໍສາສຎ຺ຎາ; ວິຫິໍສາສຎ຺ຎໍ ປຏິຈ຺ຈ ອຸປ຺ປຊ຺ຊຕິ ວິຫິໍສາສງ຺ກປ຺ໂປ…ເປ… ວິຫິໍສາຉນ຺ໂທ… ວິຫິໍສາປຣິຬາໂຫ… ວິຫິໍສາປຣິເຍສນາ… ວິຫິໍສາປຣິເຍສນໍ, ຠິກ຺ຂເວ, ປຣິເຍສມາໂນ ອສ຺ສຸຕວາ ປຸຖຸຊ຺ຊໂນ ຕີຫິ ຐາເນຫິ ມິຈ຺ຉາ ປຏິປຊ຺ຊຕິ – ກາເຍນ, ວາຈາຍ, ມນສາ.

‘‘ເສຍ຺ຍຖາປິ, ຠິກ຺ຂເວ, ປຸຣິໂສ ອາທິຕ຺ຕໍ ຕິຓຸກ຺ກໍ ສຸກ຺ເຂ ຕິຓທາເຍ ນິກ຺ຂິເປຍ຺ຍ; ໂນ ເຈ ຫຕ຺ເຖຫິ ຈ ປາເທຫິ ຈ ຂິປ຺ປເມວ ນິພ຺ພາເປຍ຺ຍ. ເອວຎ຺ຫິ, ຠິກ຺ຂເວ, ເຍ ຕິຓກຏ຺ຐນິສ຺ສິຕາ ປາຓາ ເຕ ອນຍພ຺ຍສນໍ ອາປຊ຺ເຊຍ຺ຍຸໍ. ເອວເມວ ໂຂ, ຠິກ຺ຂເວ, ໂຍ ຫິ ໂກຈິ ສມໂຓ ວາ ພ຺ຣາຫ຺ມໂຓ ວາ ອຸປ຺ປນ຺ນໍ ວິສມຄຕໍ ສຎ຺ຎໍ ນ ຂິປ຺ປເມວ ປຊຫຕິ ວິໂນເທຕິ ພ຺ຍນ຺ຕີກໂຣຕິ ອນຠາວໍ ຄເມຕິ, ໂສ ທິຏ຺ເຐ ເຈວ ຘມ຺ເມ ທຸກ຺ຂໍ ວິຫຣຕິ ສວິຆາຕໍ ສອຸປາຍາສໍ ສປຣິຬາຫໍ; ກາຍສ຺ສ ຈ ເຠທາ ປຣໍ ມຣຓາ ທຸຄ຺ຄຕິ ປາຏິກງ຺ຂາ.

‘‘ສນິທານໍ, ຠິກ຺ຂເວ, ອຸປ຺ປຊ຺ຊຕິ ເນກ຺ຂມ຺ມວິຕກ຺ໂກ, ໂນ ອນິທານໍ; ສນິທານໍ ອຸປ຺ປຊ຺ຊຕິ ອພ຺ຍາປາທວິຕກ຺ໂກ, ໂນ ອນິທານໍ; ສນິທານໍ ອຸປ຺ປຊ຺ຊຕິ ອວິຫິໍສາວິຕກ຺ໂກ, ໂນ ອນິທານໍ.

‘‘ກຖຎ຺ຈ, ຠິກ຺ຂເວ, ສນິທານໍ ອຸປ຺ປຊ຺ຊຕິ ເນກ຺ຂມ຺ມວິຕກ຺ໂກ, ໂນ ອນິທານໍ; ສນິທານໍ ອຸປ຺ປຊ຺ຊຕິ ອພ຺ຍາປາທວິຕກ຺ໂກ, ໂນ ອນິທານໍ; ສນິທານໍ ອຸປ຺ປຊ຺ຊຕິ ອວິຫິໍສາວິຕກ຺ໂກ, ໂນ ອນິທານໍ? ເນກ຺ຂມ຺ມຘາຕຸໍ, ຠິກ຺ຂເວ, ປຏິຈ຺ຈ ອຸປ຺ປຊ຺ຊຕິ ເນກ຺ຂມ຺ມສຎ຺ຎາ, ເນກ຺ຂມ຺ມສຎ຺ຎໍ ປຏິຈ຺ຈ ອຸປ຺ປຊ຺ຊຕິ ເນກ຺ຂມ຺ມສງ຺ກປ຺ໂປ, ເນກ຺ຂມ຺ມສງ຺ກປ຺ປໍ ປຏິຈ຺ຈ ອຸປ຺ປຊ຺ຊຕິ ເນກ຺ຂມ຺ມຈ຺ຉນ຺ໂທ, ເນກ຺ຂມ຺ມຈ຺ຉນ຺ທໍ ປຏິຈ຺ຈ ອຸປ຺ປຊ຺ຊຕິ ເນກ຺ຂມ຺ມປຣິຬາໂຫ, ເນກ຺ຂມ຺ມປຣິຬາຫໍ ປຏິຈ຺ຈ ອຸປ຺ປຊ຺ຊຕິ ເນກ຺ຂມ຺ມປຣິເຍສນາ; ເນກ຺ຂມ຺ມປຣິເຍສນໍ, ຠິກ຺ຂເວ, ປຣິເຍສມາໂນ ສຸຕວາ ອຣິຍສາວໂກ ຕີຫິ ຐາເນຫິ ສມ຺ມາ ປຏິປຊ຺ຊຕິ – ກາເຍນ, ວາຈາຍ, ມນສາ.

‘‘ອພ຺ຍາປາທຘາຕຸໍ, ຠິກ຺ຂເວ, ປຏິຈ຺ຈ ອຸປ຺ປຊ຺ຊຕິ ອພ຺ຍາປາທສຎ຺ຎາ, ອພ຺ຍາປາທສຎ຺ຎໍ ປຏິຈ຺ຈ ອຸປ຺ປຊ຺ຊຕິ ອພ຺ຍາປາທສງ຺ກປ຺ໂປ…ເປ… ອພ຺ຍາປາທຈ຺ຉນ຺ໂທ… ອພ຺ຍາປາທປຣິຬາໂຫ… ອພ຺ຍາປາທປຣິເຍສນາ, ອພ຺ຍາປາທປຣິເຍສນໍ, ຠິກ຺ຂເວ, ປຣິເຍສມາໂນ ສຸຕວາ ອຣິຍສາວໂກ ຕີຫິ ຐາເນຫິ ສມ຺ມາ ປຏິປຊ຺ຊຕິ – ກາເຍນ, ວາຈາຍ, ມນສາ.

‘‘ອວິຫິໍສາຘາຕຸໍ, ຠິກ຺ຂເວ, ປຏິຈ຺ຈ ອຸປ຺ປຊ຺ຊຕິ ອວິຫິໍສາສຎ຺ຎາ, ອວິຫິໍສາສຎ຺ຎໍ ປຏິຈ຺ຈ ອຸປ຺ປຊ຺ຊຕິ ອວິຫິໍສາສງ຺ກປ຺ໂປ, ອວິຫິໍສາສງ຺ກປ຺ປໍ ປຏິຈ຺ຈ ອຸປ຺ປຊ຺ຊຕິ ອວິຫິໍສາຉນ຺ໂທ, ອວິຫິໍສາຉນ຺ທໍ ປຏິຈ຺ຈ ອຸປ຺ປຊ຺ຊຕິ ອວິຫິໍສາປຣິຬາໂຫ, ອວິຫິໍສາປຣິຬາຫໍ ປຏິຈ຺ຈ ອຸປ຺ປຊ຺ຊຕິ ອວິຫິໍສາປຣິເຍສນາ; ອວິຫິໍສາປຣິເຍສນໍ, ຠິກ຺ຂເວ, ປຣິເຍສມາໂນ ສຸຕວາ ອຣິຍສາວໂກ ຕີຫິ ຐາເນຫິ ສມ຺ມາ ປຏິປຊ຺ຊຕິ – ກາເຍນ, ວາຈາຍ, ມນສາ.

‘‘ເສຍ຺ຍຖາປິ, ຠິກ຺ຂເວ, ປຸຣິໂສ ອາທິຕ຺ຕໍ ຕິຓຸກ຺ກໍ ສຸກ຺ເຂ ຕິຓທາເຍ ນິກ຺ຂິເປຍ຺ຍ; ຕເມນໍ ຫຕ຺ເຖຫິ ຈ ປາເທຫິ ຈ ຂິປ຺ປເມວ ນິພ຺ພາເປຍ຺ຍ. ເອວຎ຺ຫິ, ຠິກ຺ຂເວ, ເຍ ຕິຓກຏ຺ຐນິສ຺ສິຕາ ປາຓາ ເຕ ນ ອນຍພ຺ຍສນໍ ອາປຊ຺ເຊຍ຺ຍຸໍ. ເອວເມວ ໂຂ, ຠິກ຺ຂເວ, ໂຍ ຫິ ໂກຈິ ສມໂຓ ວາ ພ຺ຣາຫ຺ມໂຓ ວາ ອຸປ຺ປນ຺ນໍ ວິສມຄຕໍ ສຎ຺ຎໍ ຂິປ຺ປເມວ ປຊຫຕິ ວິໂນເທຕິ ພ຺ຍນ຺ຕີກໂຣຕິ ອນຠາວໍ ຄເມຕິ, ໂສ ທິຏ຺ເຐ ເຈວ ຘມ຺ເມ ສຸຂໍ ວິຫຣຕິ ອວິຆາຕໍ ອນຸປາຍາສໍ ອປຣິຬາຫໍ; ກາຍສ຺ສ ຈ ເຠທາ ປຣໍ ມຣຓາ ສຸຄຕິ ປາຏິກງ຺ຂາ’’ຕິ. ທຸຕິຍໍ.

໓. ຄິຎ຺ຊກາວສຖສຸຕ຺ຕໍ

໙໗. ເອກໍ ສມຍໍ ຠຄວາ ຎາຕິເກ ວິຫຣຕິ ຄິຎ຺ຊກາວສເຖ. ຕຕ຺ຣ ໂຂ ຠຄວາ ຠິກ຺ຂູ ອາມນ຺ເຕສິ – ‘‘ຠິກ຺ຂໂວ’’ຕິ. ‘‘ຠທນ຺ເຕ’’ຕິ ເຕ ຠິກ຺ຂູ ຠຄວໂຕ ປຈ຺ຈສ຺ໂສສຸໍ. ຠຄວາ ເອຕທໂວຈ –

‘‘ຘາຕຸໍ, ຠິກ຺ຂເວ, ປຏິຈ຺ຈ ອຸປ຺ປຊ຺ຊຕິ ສຎ຺ຎາ, ອຸປ຺ປຊ຺ຊຕິ ທິຏ຺ຐິ, ອຸປ຺ປຊ຺ຊຕິ ວິຕກ຺ໂກ’’ຕິ. ເອວໍ ວຸຕ຺ເຕ, ອາຍສ຺ມາ ກຈ຺ຈາໂນ [ສທ຺ໂຘ ກຈ຺ຈາໂນ (ກ.)] ຠຄວນ຺ຕໍ ເອຕທໂວຈ – ‘‘ຍາຍໍ, ຠນ຺ເຕ, ທິຏ຺ຐິ – ‘ອສມ຺ມາສມ຺ພຸທ຺ເຘສຸ ສມ຺ມາສມ຺ພຸທ຺ຘາ’ຕິ, ອຍໍ ນຸ ໂຂ, ຠນ຺ເຕ, ທິຏ຺ຐິ ກິໍ ປຏິຈ຺ຈ ປຎ຺ຎາຍຕີ’’ຕິ?

‘‘ມຫຕິ ໂຂ ເອສາ, ກຈ຺ຈານ, ຘາຕຸ ຍທິທໍ ອວິຊ຺ຊາຘາຕຸ. ຫີນໍ, ກຈ຺ຈານ, ຘາຕຸໍ ປຏິຈ຺ຈ ອຸປ຺ປຊ຺ຊຕິ ຫີນາ ສຎ຺ຎາ, ຫີນາ ທິຏ຺ຐິ, ຫີໂນ ວິຕກ຺ໂກ, ຫີນາ ເຈຕນາ, ຫີນາ ປຕ຺ຖນາ, ຫີໂນ ປຓິຘິ, ຫີໂນ ປຸຄ຺ຄໂລ, ຫີນາ ວາຈາ; ຫີນໍ ອາຈິກ຺ຂຕິ ເທເສຕິ ປຎ຺ຎເປຕິ ປຏ຺ຐເປຕິ ວິວຣຕິ ວິຠຊຕິ ອຸຕ຺ຕານີກໂຣຕິ; ຫີນາ ຕສ຺ສ ອຸປປຕ຺ຕີຕິ ວທາມິ.

‘‘ມຊ຺ຌິມໍ, ກຈ຺ຈານ, ຘາຕຸໍ ປຏິຈ຺ຈ ອຸປ຺ປຊ຺ຊຕິ ມຊ຺ຌິມາ ສຎ຺ຎາ, ມຊ຺ຌິມາ ທິຏ຺ຐິ, ມຊ຺ຌິໂມ ວິຕກ຺ໂກ, ມຊ຺ຌິມາ ເຈຕນາ, ມຊ຺ຌິມາ ປຕ຺ຖນາ, ມຊ຺ຌິໂມ ປຓິຘິ, ມຊ຺ຌິໂມ ປຸຄ຺ຄໂລ, ມຊ຺ຌິມາ ວາຈາ; ມຊ຺ຌິມໍ ອາຈິກ຺ຂຕິ ເທເສຕິ ປຎ຺ຎເປຕິ ປຏ຺ຐເປຕິ ວິວຣຕິ ວິຠຊຕິ ອຸຕ຺ຕານີກໂຣຕິ; ມຊ຺ຌິມາ ຕສ຺ສ ອຸປປຕ຺ຕີຕິ ວທາມິ.

‘‘ປຓີຕໍ, ກຈ຺ຈານ, ຘາຕຸໍ ປຏິຈ຺ຈ ອຸປ຺ປຊ຺ຊຕິ ປຓີຕາ ສຎ຺ຎາ, ປຓີຕາ ທິຏ຺ຐິ, ປຓີໂຕ ວິຕກ຺ໂກ, ປຓີຕາ ເຈຕນາ, ປຓີຕາ ປຕ຺ຖນາ, ປຓີໂຕ ປຓິຘິ, ປຓີໂຕ ປຸຄ຺ຄໂລ, ປຓີຕາ ວາຈາ; ປຓີຕໍ ອາຈິກ຺ຂຕິ ເທເສຕິ ປຎ຺ຎເປຕິ ປຏ຺ຐເປຕິ ວິວຣຕິ ວິຠຊຕິ ອຸຕ຺ຕານີກໂຣຕິ; ປຓີຕາ ຕສ຺ສ ອຸປປຕ຺ຕີຕິ ວທາມີ’’ຕິ. ຕຕິຍໍ.

໔. ຫີນາຘິມຸຕ຺ຕິກສຸຕ຺ຕໍ

໙໘. ສາວຕ຺ຖິຍໍ ວິຫຣຕິ…ເປ… ‘‘ຘາຕຸໂສວ [ຘາຕຸໂສ (ສີ. ປີ.) ອຍຎ຺ຈ ປຐມາຣມ຺ຠວາກ຺ເຍເຍວ, ນ ສພ຺ພຕ຺ຖ. ຕີສຸ ປນ ອທ຺ຘາສຸ ຈ ອຸປມາສໍສນ຺ທນນິຄມນຏ຺ຐາເນ ຈ ອິທໍ ປາຐນານຕ຺ຕໍ ນຕ຺ຖິ], ຠິກ຺ຂເວ, ສຕ຺ຕາ ສໍສນ຺ທນ຺ຕິ ສເມນ຺ຕິ. ຫີນາຘິມຸຕ຺ຕິກາ ຫີນາຘິມຸຕ຺ຕິເກຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ກລ຺ຍາຓາຘິມຸຕ຺ຕິກາ ກລ຺ຍາຓາຘິມຸຕ຺ຕິເກຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ’’.

‘‘ອຕີຕມ຺ປິ ໂຂ [ໂຂສທ຺ໂທ ສີ. ສ຺ຍາ. ກໍ. ປີ. ໂປຕ຺ຖເກສຸ ນຕ຺ຖິ], ຠິກ຺ຂເວ, ອທ຺ຘານໍ ຘາຕຸໂສວ [ອີທິເສສຸ ຐາເນສຸ ປາຐນານຕ຺ຕໍ ນຕ຺ຖິ] ສຕ຺ຕາ ສໍສນ຺ທິໍສຸ ສມິໍສຸ. ຫີນາຘິມຸຕ຺ຕິກາ ຫີນາຘິມຸຕ຺ຕິເກຫິ ສທ຺ຘິໍ ສໍສນ຺ທິໍສຸ ສມິໍສຸ; ກລ຺ຍາຓາຘິມຸຕ຺ຕິກາ ກລ຺ຍາຓາຘິມຸຕ຺ຕິເກຫິ ສທ຺ຘິໍ ສໍສນ຺ທິໍສຸ ສມິໍສຸ.

‘‘ອນາຄຕມ຺ປິ ໂຂ [ໂຂສທ຺ໂທ ສີ. ສ຺ຍາ. ກໍ. ປີ. ໂປຕ຺ຖເກສຸ ນຕ຺ຖິ], ຠິກ຺ຂເວ, ອທ຺ຘານໍ ຘາຕຸໂສວ [ອີທິເສສຸ ຐາເນສຸ ປາຐນານຕ຺ຕໍ ນຕ຺ຖິ] ສຕ຺ຕາ ສໍສນ຺ທິສ຺ສນ຺ຕິ ສເມສ຺ສນ຺ຕິ. ຫີນາຘິມຸຕ຺ຕິກາ ຫີນາຘິມຸຕ຺ຕິເກຫິ ສທ຺ຘິໍ ສໍສນ຺ທິສ຺ສນ຺ຕິ ສເມສ຺ສນ຺ຕິ; ກລ຺ຍາຓາຘິມຸຕ຺ຕິກາ ກລ຺ຍາຓາຘິມຸຕ຺ຕິເກຫິ ສທ຺ຘິໍ ສໍສນ຺ທິສ຺ສນ຺ຕິ ສເມສ຺ສນ຺ຕິ.

‘‘ເອຕຣຫິປິ ໂຂ [ໂຂສທ຺ໂທ ສີ. ສ຺ຍາ. ກໍ. ປີ. ໂປຕ຺ຖເກສຸ ນຕ຺ຖິ], ຠິກ຺ຂເວ, ປຈ຺ຈຸປ຺ປນ຺ນໍ ອທ຺ຘານໍ ຘາຕຸໂສວ [ອີທິເສສຸ ຐາເນສຸ ປາຐນານຕ຺ຕໍ ນຕ຺ຖິ] ສຕ຺ຕາ ສໍສນ຺ທນ຺ຕິ ສເມນ຺ຕິ. ຫີນາຘິມຸຕ຺ຕິກາ ຫີນາຘິມຸຕ຺ຕິເກຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ກລ຺ຍາຓາຘິມຸຕ຺ຕິກາ ກລ຺ຍາຓາຘິມຸຕ຺ຕິເກຫິ ສທ຺ຘິໍ ສໍສນ຺ທນ຺ຕິ ສເມນ຺ຕີ’’ຕິ. ຈຕຸຕ຺ຖໍ.

໕. ຈງ຺ກມສຸຕ຺ຕໍ

໙໙. ເອກໍ ສມຍໍ ຠຄວາ ຣາຊຄເຫ ວິຫຣຕິ ຄິຊ຺ຌກູເຏ ປພ຺ພເຕ. ເຕນ ໂຂ ປນ ສມເຍນ ອາຍສ຺ມາ ສາຣິປຸຕ຺ໂຕ ສມ຺ພຫຸເລຫິ ຠິກ຺ຂູຫິ ສທ຺ຘິໍ ຠຄວໂຕ ອວິທູເຣ ຈງ຺ກມຕິ; ອາຍສ຺ມາປິ ໂຂ ມຫາໂມຄ຺ຄລ຺ລາໂນ ສມ຺ພຫຸເລຫິ ຠິກ຺ຂູຫິ ສທ຺ຘິໍ ຠຄວໂຕ ອວິທູເຣ ຈງ຺ກມຕິ; ອາຍສ຺ມາປິ ໂຂ ມຫາກສ຺ສໂປ ສມ຺ພຫຸເລຫິ ຠິກ຺ຂູຫິ ສທ຺ຘິໍ ຠຄວໂຕ ອວິທູເຣ ຈງ຺ກມຕິ; ອາຍສ຺ມາປິ ໂຂ ອນຸຣຸທ຺ໂຘ ສມ຺ພຫຸເລຫິ ຠິກ຺ຂູຫິ ສທ຺ຘິໍ ຠຄວໂຕ ອວິທູເຣ ຈງ຺ກມຕິ; ອາຍສ຺ມາປິ ໂຂ ປຸຓ຺ໂຓ ມນ຺ຕານິປຸຕ຺ໂຕ ສມ຺ພຫຸເລຫິ ຠິກ຺ຂູຫິ ສທ຺ຘິໍ ຠຄວໂຕ ອວິທູເຣ ຈງ຺ກມຕິ; ອາຍສ຺ມາປິ ໂຂ ອຸປາລິ ສມ຺ພຫຸເລຫິ ຠິກ຺ຂູຫິ ສທ຺ຘິໍ ຠຄວໂຕ ອວິທູເຣ ຈງ຺ກມຕິ; ອາຍສ຺ມາປິ ໂຂ ອານນ຺ໂທ ສມ຺ພຫຸເລຫິ ຠິກ຺ຂູຫິ ສທ຺ຘິໍ ຠຄວໂຕ ອວິທູເຣ ຈງ຺ກມຕິ; ເທວທຕ຺ໂຕປິ ໂຂ ສມ຺ພຫຸເລຫິ ຠິກ຺ຂູຫິ ສທ຺ຘິໍ ຠຄວໂຕ ອວິທູເຣ ຈງ຺ກມຕິ.

ອຖ ໂຂ ຠຄວາ ຠິກ຺ຂູ ອາມນ຺ເຕສິ – ‘‘ປສ຺ສຖ ໂນ ຕຸມ຺ເຫ, ຠິກ຺ຂເວ, ສາຣິປຸຕ຺ຕໍ ສມ຺ພຫຸເລຫິ ຠິກ຺ຂູຫິ ສທ຺ຘິໍ ຈງ຺ກມນ຺ຕ’’ນ຺ຕິ? ‘‘ເອວໍ, ຠນ຺ເຕ’’. ‘‘ສພ຺ເພ ໂຂ ເອເຕ, ຠິກ຺ຂເວ, ຠິກ຺ຂູ ມຫາປຎ຺ຎາ. ປສ຺ສຖ ໂນ ຕຸມ຺ເຫ, ຠິກ຺ຂເວ, ໂມຄ຺ຄລ຺ລານໍ ສມ຺ພຫຸເລຫິ ຠິກ຺ຂູຫິ ສທ຺ຘິໍ ຈງ຺ກມນ຺ຕ’’ນ຺ຕິ? ‘‘ເອວໍ, ຠນ຺ເຕ’’. ‘‘ສພ຺ເພ ໂຂ ເອເຕ, ຠິກ຺ຂເວ, ຠິກ຺ຂູ ມຫິທ຺ຘິກາ. ປສ຺ສຖ ໂນ ຕຸມ຺ເຫ, ຠິກ຺ຂເວ, ກສ຺ສປໍ ສມ຺ພຫຸເລຫິ ຠິກ຺ຂູຫິ ສທ຺ຘິໍ ຈງ຺ກມນ຺ຕ’’ນ຺ຕິ? ‘‘ເອວໍ, ຠນ຺ເຕ’’. ‘‘ສພ຺ເພ ໂຂ ເອເຕ, ຠິກ຺ຂເວ, ຠິກ຺ຂູ ຘຸຕວາທາ. ປສ຺ສຖ ໂນ ຕຸມ຺ເຫ, ຠິກ຺ຂເວ, ອນຸຣຸທ຺ຘໍ ສມ຺ພຫຸເລຫິ ຠິກ຺ຂູຫິ ສທ຺ຘິໍ ຈງ຺ກມນ຺ຕ’’ນ຺ຕິ? ‘‘ເອວໍ, ຠນ຺ເຕ’’. ‘‘ສພ຺ເພ ໂຂ ເອເຕ, ຠິກ຺ຂເວ, ຠິກ຺ຂູ ທິພ຺ພຈກ຺ຂຸກາ. ປສ຺ສຖ ໂນ ຕຸມ຺ເຫ, ຠິກ຺ຂເວ, ປຸຓ຺ຓໍ ມນ຺ຕານິປຸຕ຺ຕໍ ສມ຺ພຫຸເລຫິ ຠິກ຺ຂູຫິ ສທ຺ຘິໍ ຈງ຺ກມນ຺ຕ’’ນ຺ຕິ? ‘‘ເອວໍ, ຠນ຺ເຕ’’. ‘‘ສພ຺ເພ ໂຂ ເອເຕ, ຠິກ຺ຂເວ, ຠິກ຺ຂູ ຘມ຺ມກຖິກາ. ປສ຺ສຖ ໂນ ຕຸມ຺ເຫ, ຠິກ຺ຂເວ, ອຸປາລິໍ ສມ຺ພຫຸເລຫິ ຠິກ຺ຂູຫິ ສທ຺ຘິໍ ຈງ຺ກມນ຺ຕ’’ນ຺ຕິ? ‘‘ເອວໍ, ຠນ຺ເຕ’’. ‘‘ສພ຺ເພ ໂຂ ເອເຕ, ຠິກ຺ຂເວ, ຠິກ຺ຂູ ວິນຍຘຣາ. ປສ຺ສຖ ໂນ ຕຸມ຺ເຫ, ຠິກ຺ຂເວ, ອານນ຺ທໍ ສມ຺ພຫຸເລຫິ ຠິກ຺ຂູຫິ ສທ຺ຘິໍ ຈງ຺ກມນ຺ຕ’’ນ຺ຕິ? ‘‘ເອວໍ, ຠນ຺ເຕ’’. ‘‘ສພ຺ເພ ໂຂ ເອເຕ, ຠິກ຺ຂເວ, ຠິກ຺ຂູ ພຫຸສ຺ສຸຕາ. ປສ຺ສຖ ໂນ ຕຸມ຺ເຫ, ຠິກ຺ຂເວ, ເທວທຕ຺ຕໍ ສມ຺ພຫຸເລຫິ ຠິກ຺ຂູຫິ ສທ຺ຘິໍ ຈງ຺ກມນ຺ຕ’’ນ຺ຕິ? ‘‘ເອວໍ, ຠນ຺ເຕ’’. ‘‘ສພ຺ເພ ໂຂ ເອເຕ, ຠິກ຺ຂເວ, ຠິກ຺ຂູ ປາປິຈ຺ຉາ’’.

‘‘ຘາຕຸໂສວ, ຠິກ຺ຂເວ, ສຕ຺ຕາ ສໍສນ຺ທນ຺ຕິ ສເມນ຺ຕິ. ຫີນາຘິມຸຕ຺ຕິກາ ຫີນາຘິມຸຕ຺ຕິເກຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ກລ຺ຍາຓາຘິມຸຕ຺ຕິກາ ກລ຺ຍາຓາຘິມຸຕ຺ຕິເກຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ. ອຕີຕມ຺ປິ ໂຂ, ຠິກ຺ຂເວ, ອທ຺ຘານໍ ຘາຕຸໂສວ ສຕ຺ຕາ ສໍສນ຺ທິໍສຸ ສມິໍສຸ. ຫີນາຘິມຸຕ຺ຕິກາ ຫີນາຘິມຸຕ຺ຕິເກຫິ ສທ຺ຘິໍ ສໍສນ຺ທິໍສຸ ສມິໍສຸ; ກລ຺ຍາຓາຘິມຸຕ຺ຕິກາ ກລ຺ຍາຓາຘິມຸຕ຺ຕິເກຫິ ສທ຺ຘິໍ ສໍສນ຺ທິໍສຸ ສມິໍສຸ.

‘‘ອນາຄຕມ຺ປິ ໂຂ, ຠິກ຺ຂເວ, ອທ຺ຘານໍ ຘາຕຸໂສວ ສຕ຺ຕາ ສໍສນ຺ທິສ຺ສນ຺ຕິ ສເມສ຺ສນ຺ຕິ. ຫີນາຘິມຸຕ຺ຕິກາ ຫີນາຘິມຸຕ຺ຕິເກຫິ ສທ຺ຘິໍ ສໍສນ຺ທິສ຺ສນ຺ຕິ ສເມສ຺ສນ຺ຕິ; ກລ຺ຍາຓາຘິມຸຕ຺ຕິກາ ກລ຺ຍາຓາຘິມຸຕ຺ຕິເກຫິ ສທ຺ຘິໍ ສໍສນ຺ທິສ຺ສນ຺ຕິ ສເມສ຺ສນ຺ຕິ.

‘‘ເອຕຣຫິປິ ໂຂ, ຠິກ຺ຂເວ, ປຈ຺ຈຸປ຺ປນ຺ນໍ ອທ຺ຘານໍ ຘາຕຸໂສວ ສຕ຺ຕາ ສໍສນ຺ທນ຺ຕິ ສເມນ຺ຕິ. ຫີນາຘິມຸຕ຺ຕິກາ ຫີນາຘິມຸຕ຺ຕິເກຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ກລ຺ຍາຓາຘິມຸຕ຺ຕິກາ ກລ຺ຍາຓາຘິມຸຕ຺ຕິເກຫິ ສທ຺ຘິໍ ສໍສນ຺ທນ຺ຕິ ສເມນ຺ຕີ’’ຕິ. ປຎ຺ຈມໍ.

໖. ສຄາຖາສຸຕ຺ຕໍ

໑໐໐. ສາວຕ຺ຖິຍໍ ວິຫຣຕິ…ເປ… ‘‘ຘາຕຸໂສວ, ຠິກ຺ຂເວ, ສຕ຺ຕາ ສໍສນ຺ທນ຺ຕິ ສເມນ຺ຕິ. ຫີນາຘິມຸຕ຺ຕິກາ ຫີນາຘິມຸຕ຺ຕິເກຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ. ອຕີຕມ຺ປິ ໂຂ, ຠິກ຺ຂເວ, ອທ຺ຘານໍ ຘາຕຸໂສວ ສຕ຺ຕາ ສໍສນ຺ທິໍສຸ ສມິໍສຸ. ຫີນາຘິມຸຕ຺ຕິກາ ຫີນາຘິມຸຕ຺ຕິເກຫິ ສທ຺ຘິໍ ສໍສນ຺ທິໍສຸ ສມິໍສຸ’’.

‘‘ອນາຄຕມ຺ປິ ໂຂ, ຠິກ຺ຂເວ, ອທ຺ຘານໍ ຘາຕຸໂສວ ສຕ຺ຕາ ສໍສນ຺ທິສ຺ສນ຺ຕິ ສເມສ຺ສນ຺ຕິ. ຫີນາຘິມຸຕ຺ຕິກາ ຫີນາຘິມຸຕ຺ຕິເກຫິ ສທ຺ຘິໍ ສໍສນ຺ທິສ຺ສນ຺ຕິ ສເມສ຺ສນ຺ຕິ.

‘‘ເອຕຣຫິປິ ໂຂ, ຠິກ຺ຂເວ, ປຈ຺ຈຸປ຺ປນ຺ນໍ ອທ຺ຘານໍ ຘາຕຸໂສວ ສຕ຺ຕາ ສໍສນ຺ທນ຺ຕິ ສເມນ຺ຕິ. ຫີນາຘິມຸຕ຺ຕິກາ ຫີນາຘິມຸຕ຺ຕິເກຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ.

‘‘ເສຍ຺ຍຖາປິ, ຠິກ຺ຂເວ, ຄູໂຖ ຄູເຖນ ສໍສນ຺ທຕິ ສເມຕິ; ມຸຕ຺ຕໍ ມຸຕ຺ເຕນ ສໍສນ຺ທຕິ ສເມຕິ; ເຂໂຬ ເຂເຬນ ສໍສນ຺ທຕິ ສເມຕິ; ປຸພ຺ໂພ ປຸພ຺ເພນ ສໍສນ຺ທຕິ ສເມຕິ; ໂລຫິຕໍ ໂລຫິເຕນ ສໍສນ຺ທຕິ ສເມຕິ; ເອວເມວ ໂຂ, ຠິກ຺ຂເວ, ຘາຕຸໂສວ [ສພ຺ພຕ຺ຖປິ ເອວເມວ ທິສ຺ສຕິ] ສຕ຺ຕາ ສໍສນ຺ທນ຺ຕິ ສເມນ຺ຕິ. ຫີນາຘິມຸຕ຺ຕິກາ ຫີນາຘິມຸຕ຺ຕິເກຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ. ອຕີຕມ຺ປິ ໂຂ ອທ຺ຘານໍ…ເປ… ອນາຄຕມ຺ປິ ໂຂ ອທ຺ຘານໍ…ເປ… ເອຕຣຫິປິ ໂຂ ປຈ຺ຈຸປ຺ປນ຺ນໍ ອທ຺ຘານໍ ຘາຕຸໂສວ ສຕ຺ຕາ ສໍສນ຺ທນ຺ຕິ ສເມນ຺ຕິ. ຫີນາຘິມຸຕ຺ຕິກາ ຫີນາຘິມຸຕ຺ຕິເກຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ.

‘‘ຘາຕຸໂສວ ຠິກ຺ຂເວ, ສຕ຺ຕາ ສໍສນ຺ທນ຺ຕິ ສເມນ຺ຕິ. ກລ຺ຍາຓາຘິມຸຕ຺ຕິກາ ກລ຺ຍາຓາຘິມຸຕ຺ຕິເກຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ. ອຕີຕມ຺ປິ ໂຂ, ຠິກ຺ຂເວ, ອທ຺ຘານໍ ຘາຕຸໂສວ ສຕ຺ຕາ ສໍສນ຺ທິໍສຸ ສມິໍສຸ. ກລ຺ຍາຓາຘິມຸຕ຺ຕິກາ ກລ຺ຍາຓາຘິມຸຕ຺ຕິເກຫິ ສທ຺ຘິໍ ສໍສນ຺ທິໍສຸ ສມິໍສຸ.

‘‘ອນາຄຕມ຺ປິ ໂຂ, ຠິກ຺ຂເວ, ອທ຺ຘານໍ…ເປ… ເອຕຣຫິປິ ໂຂ, ຠິກ຺ຂເວ, ປຈ຺ຈຸປ຺ປນ຺ນໍ ອທ຺ຘານໍ ຘາຕຸໂສວ ສຕ຺ຕາ ສໍສນ຺ທນ຺ຕິ ສເມນ຺ຕິ. ກລ຺ຍາຓາຘິມຸຕ຺ຕິກາ ກລ຺ຍາຓາຘິມຸຕ຺ຕິເກຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ.

‘‘ເສຍ຺ຍຖາປິ, ຠິກ຺ຂເວ, ຂີຣໍ ຂີເຣນ ສໍສນ຺ທຕິ ສເມຕິ; ເຕລໍ ເຕເລນ ສໍສນ຺ທຕິ ສເມຕິ; ສປ຺ປິ ສປ຺ປິນາ ສໍສນ຺ທຕິ ສເມຕິ; ມຘຸ ມຘຸນາ ສໍສນ຺ທຕິ ສເມຕິ; ຜາຓິຕໍ ຜາຓິເຕນ ສໍສນ຺ທຕິ ສເມຕິ; ເອວເມວ ໂຂ, ຠິກ຺ຂເວ, ຘາຕຸໂສວ ສຕ຺ຕາ ສໍສນ຺ທນ຺ຕິ ສເມນ຺ຕິ. ກລ຺ຍາຓາຘິມຸຕ຺ຕິກາ ກລ຺ຍາຓາຘິມຸຕ຺ຕິເກຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ. ອຕີຕມ຺ປິ ໂຂ ອທ຺ຘານໍ… ອນາຄຕມ຺ປິ ໂຂ ອທ຺ຘານໍ… ເອຕຣຫິປິ ໂຂ ປຈ຺ຈຸປ຺ປນ຺ນໍ ອທ຺ຘານໍ ຘາຕຸໂສວ ສຕ຺ຕາ ສໍສນ຺ທນ຺ຕິ ສເມນ຺ຕິ. ກລ຺ຍາຓາຘິມຸຕ຺ຕິກາ ກລ຺ຍາຓາຘິມຸຕ຺ຕິເກຫິ ສທ຺ຘິໍ ສໍສນ຺ທນ຺ຕິ ສເມນ຺ຕີ’’ຕິ.

ອິທມໂວຈ ຠຄວາ. ອິທໍ ວຕ຺ວານ ສຸຄໂຕ ອຖາປຣໍ ເອຕທໂວຈ ສຕ຺ຖາ –

‘‘ສໍສຄ຺ຄາ ວນໂຖ ຊາໂຕ, ອສໍສຄ຺ເຄນ ຉິຊ຺ຊຕິ;

ປຣິຕ຺ຕໍ ທາຣຸມາຣຸຍ຺ຫ, ຍຖາ ສີເທ ມຫຓ຺ຓເວ.

‘‘ເອວໍ ກຸສີຕມາຄມ຺ມ, ສາຘຸຊີວິປິ ສີທຕິ;

ຕສ຺ມາ ຕໍ ປຣິວຊ຺ເຊຍ຺ຍ, ກຸສີຕໍ ຫີນວີຣິຍໍ.

‘‘ປວິວິຕ຺ເຕຫິ ອຣິເຍຫິ, ປຫິຕຕ຺ເຕຫິ ຌາຍີຫິ [ຌາຍິຫິ (ສີ.), ຌາຍິຠິ (ສ຺ຍາ. ກໍ.)];

ນິຈ຺ຈໍ ອາຣທ຺ຘວີຣິເຍຫິ, ປຓ຺ຑິເຕຫິ ສຫາວເສ’’ຕິ.

໗. ອສ຺ສທ຺ຘສໍສນ຺ທນສຸຕ຺ຕໍ

໑໐໑. ສາວຕ຺ຖິຍໍ ວິຫຣຕິ…ເປ… ‘‘ຘາຕຸໂສວ, ຠິກ຺ຂເວ, ສຕ຺ຕາ ສໍສນ຺ທນ຺ຕິ ສເມນ຺ຕິ. ອສ຺ສທ຺ຘາ ອສ຺ສທ຺ເຘຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ອຫິຣິກາ ອຫິຣິເກຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ອໂນຕ຺ຕປ຺ປິໂນ ອໂນຕ຺ຕປ຺ປີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ອປ຺ປສ຺ສຸຕາ ອປ຺ປສ຺ສຸເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ກຸສີຕາ ກຸສີເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ມຸຏ຺ຐສ຺ສຕິໂນ ມຸຏ຺ຐສ຺ສຕີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ທຸປ຺ປຎ຺ຎາ ທຸປ຺ປຎ຺ເຎຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ’’.

‘‘ອຕີຕມ຺ປິ ໂຂ, ຠິກ຺ຂເວ, ອທ຺ຘານໍ ຘາຕຸໂສວ ສຕ຺ຕາ ສໍສນ຺ທິໍສຸ ສມິໍສຸ. ອສ຺ສທ຺ຘາ ອສ຺ສທ຺ເຘຫິ ສທ຺ຘິໍ ສໍສນ຺ທິໍສຸ ສມິໍສຸ; ອຫິຣິກາ ອຫິຣິເກຫິ ສທ຺ຘິໍ ສໍສນ຺ທິໍສຸ ສມິໍສຸ; ອໂນຕ຺ຕປ຺ປິໂນ ອໂນຕ຺ຕປ຺ປີຫິ ສທ຺ຘິໍ ສໍສນ຺ທິໍສຸ ສມິໍສຸ; ອປ຺ປສ຺ສຸຕາ ອປ຺ປສ຺ສຸເຕຫິ ສທ຺ຘິໍ ສໍສນ຺ທິໍສຸ ສມິໍສຸ; ກຸສີຕາ ກຸສີເຕຫິ ສທ຺ຘິໍ ສໍສນ຺ທິໍສຸ ສມິໍສຸ; ມຸຏ຺ຐສ຺ສຕິໂນ ມຸຏ຺ຐສ຺ສຕີຫິ ສທ຺ຘິໍ ສໍສນ຺ທິໍສຸ ສມິໍສຸ; ທຸປ຺ປຎ຺ຎາ ທຸປ຺ປຎ຺ເຎຫິ ສທ຺ຘິໍ ສໍສນ຺ທິໍສຸ ສມິໍສຸ.

‘‘ອນາຄຕມ຺ປິ ໂຂ, ຠິກ຺ຂເວ, ອທ຺ຘານໍ ຘາຕຸໂສວ ສຕ຺ຕາ ສໍສນ຺ທິສ຺ສນ຺ຕິ ສເມສ຺ສນ຺ຕິ. ອສ຺ສທ຺ຘາ ອສ຺ສທ຺ເຘຫິ ສທ຺ຘິໍ ສໍສນ຺ທິສ຺ສນ຺ຕິ ສເມສ຺ສນ຺ຕິ; ອຫິຣິກາ ອຫິຣິເກຫິ ສທ຺ຘິໍ ສໍສນ຺ທິສ຺ສນ຺ຕິ ສເມສ຺ສນ຺ຕິ; ອໂນຕ຺ຕປ຺ປິໂນ ອໂນຕ຺ຕປ຺ປີຫິ ສທ຺ຘິໍ…ເປ… ອປ຺ປສ຺ສຸຕາ ອປ຺ປສ຺ສຸເຕຫິ ສທ຺ຘິໍ…ເປ… ກຸສີຕາ ກຸສີເຕຫິ ສທ຺ຘິໍ…ເປ… ມຸຏ຺ຐສ຺ສຕິໂນ ມຸຏ຺ຐສ຺ສຕີຫິ ສທ຺ຘິໍ…ເປ… ທຸປ຺ປຎ຺ຎາ ທຸປ຺ປຎ຺ເຎຫິ ສທ຺ຘິໍ ສໍສນ຺ທິສ຺ສນ຺ຕິ ສເມສ຺ສນ຺ຕິ.

‘‘ເອຕຣຫິປິ ໂຂ, ຠິກ຺ຂເວ, ປຈ຺ຈຸປ຺ປນ຺ນໍ ອທ຺ຘານໍ ຘາຕຸໂສວ ສຕ຺ຕາ ສໍສນ຺ທນ຺ຕິ ສເມນ຺ຕິ. ອສ຺ສທ຺ຘາ ອສ຺ສທ຺ເຘຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ອຫິຣິກາ ອຫິຣິເກຫິ ສທ຺ຘິໍ…ເປ… ອໂນຕ຺ຕປ຺ປິໂນ ອໂນຕ຺ຕປ຺ປີຫິ ສທ຺ຘິໍ…ເປ… ອປ຺ປສ຺ສຸຕາ ອປ຺ປສ຺ສຸເຕຫິ ສທ຺ຘິໍ…ເປ… ກຸສີຕາ ກຸສີເຕຫິ ສທ຺ຘິໍ…ເປ… ມຸຏ຺ຐສ຺ສຕິໂນ ມຸຏ຺ຐສ຺ສຕີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ທຸປ຺ປຎ຺ຎາ ທຸປ຺ປຎ຺ເຎຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ.

‘‘ຘາຕຸໂສວ, ຠິກ຺ຂເວ, ສຕ຺ຕາ ສໍສນ຺ທນ຺ຕິ ສເມນ຺ຕິ. ສທ຺ຘາ ສທ຺ເຘຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ຫິຣິມນາ ຫິຣິມເນຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ໂອຕ຺ຕປ຺ປິໂນ ໂອຕ຺ຕປ຺ປີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ພຫຸສ຺ສຸຕາ ພຫຸສ຺ສຸເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ອາຣທ຺ຘວີຣິຍາ ອາຣທ຺ຘວີຣິເຍຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ອຸປຏ຺ຐິຕສ຺ສຕິໂນ ອຸປຏ຺ຐິຕສ຺ສຕີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ປຎ຺ຎວນ຺ໂຕ ປຎ຺ຎວນ຺ເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ. ອຕີຕມ຺ປິ ໂຂ, ຠິກ຺ຂເວ, ອທ຺ຘານໍ…ເປ… ອນາຄຕມ຺ປິ ໂຂ, ຠິກ຺ຂເວ…ເປ… ເອຕຣຫິປິ ໂຂ, ຠິກ຺ຂເວ, ປຈ຺ຈຸປ຺ປນ຺ນໍ ອທ຺ຘານໍ ຘາຕຸໂສວ ສຕ຺ຕາ ສໍສນ຺ທນ຺ຕິ ສເມນ຺ຕິ. ສທ຺ຘາ ສທ຺ເຘຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ປຎ຺ຎວນ຺ໂຕ ປຎ຺ຎວນ຺ເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕີ’’ຕິ. ສຕ຺ຕມໍ.

໘. ອສ຺ສທ຺ຘມູລກສຸຕ຺ຕໍ

໑໐໒. ສາວຕ຺ຖິຍໍ ວິຫຣຕິ…ເປ… ‘‘ຘາຕຸໂສວ, ຠິກ຺ຂເວ, ສຕ຺ຕາ ສໍສນ຺ທນ຺ຕິ ສເມນ຺ຕິ. ອສ຺ສທ຺ຘາ ອສ຺ສທ຺ເຘຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ອຫິຣິກາ ອຫິຣິເກຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ທຸປ຺ປຎ຺ຎາ ທຸປ຺ປຎ຺ເຎຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ສທ຺ຘາ ສທ຺ເຘຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ຫິຣິມນາ ຫິຣິມເນຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ປຎ຺ຎວນ຺ໂຕ ປຎ຺ຎວນ຺ເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ. ອຕີຕມ຺ປິ ໂຂ, ຠິກ຺ຂເວ, ອທ຺ຘານໍ ຘາຕຸໂສວ ສຕ຺ຕາ ສໍສນ຺ທິໍສຸ ສມິໍສຸ…ເປ… ອນາຄຕມ຺ປິ ໂຂ, ຠິກ຺ຂເວ, ອທ຺ຘານໍ ຘາຕຸໂສວ ສຕ຺ຕາ ສໍສນ຺ທິສ຺ສນ຺ຕິ ສເມສ຺ສນ຺ຕິ…ເປ….

‘‘ເອຕຣຫິປິ ໂຂ, ຠິກ຺ຂເວ, ປຈ຺ຈຸປ຺ປນ຺ນໍ ອທ຺ຘານໍ ຘາຕຸໂສວ ສຕ຺ຕາ ສໍສນ຺ທນ຺ຕິ ສເມນ຺ຕິ. ອສ຺ສທ຺ຘາ ອສ຺ສທ຺ເຘຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ອຫິຣິກາ ອຫິຣິເກຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ, ທຸປ຺ປຎ຺ຎາ ທຸປ຺ປຎ຺ເຎຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ສທ຺ຘາ ສທ຺ເຘຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ຫິຣິມນາ ຫິຣິມເນຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ປຎ຺ຎວນ຺ໂຕ ປຎ຺ຎວນ຺ເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕີຕິ. (໑)

‘‘ຘາຕຸໂສວ, ຠິກ຺ຂເວ, ສຕ຺ຕາ ສໍສນ຺ທນ຺ຕິ ສເມນ຺ຕິ. ອສ຺ສທ຺ຘາ ອສ຺ສທ຺ເຘຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ອໂນຕ຺ຕປ຺ປິໂນ ອໂນຕ຺ຕປ຺ປີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ທຸປ຺ປຎ຺ຎາ ທຸປ຺ປຎ຺ເຎຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ສທ຺ຘາ ສທ຺ເຘຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ໂອຕ຺ຕປ຺ປິໂນ ໂອຕ຺ຕປ຺ປີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ປຎ຺ຎວນ຺ໂຕ ປຎ຺ຎວນ຺ເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ…ເປ… ປຐມວາໂຣ ວິຍ ວິຕ຺ຖາເຣຕພ຺ໂພ. (໒)

‘‘ຘາຕຸໂສວ, ຠິກ຺ຂເວ…ເປ… ອສ຺ສທ຺ຘາ ອສ຺ສທ຺ເຘຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ອປ຺ປສ຺ສຸຕາ ອປ຺ປສ຺ສຸເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ທຸປ຺ປຎ຺ຎາ ທຸປ຺ປຎ຺ເຎຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ສທ຺ຘາ ສທ຺ເຘຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ພຫຸສ຺ສຸຕາ ພຫຸສ຺ສຸເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ, ປຎ຺ຎວນ຺ໂຕ ປຎ຺ຎວນ຺ເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ…ເປ…. (໓)

‘‘ຘາຕຸໂສວ, ຠິກ຺ຂເວ…ເປ… ອສ຺ສທ຺ຘາ ອສ຺ສທ຺ເຘຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ກຸສີຕາ ກຸສີເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ທຸປ຺ປຎ຺ຎາ ທຸປ຺ປຎ຺ເຎຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ສທ຺ຘາ ສທ຺ເຘຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ອາຣທ຺ຘວີຣິຍາ ອາຣທ຺ຘວີຣິເຍຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ປຎ຺ຎວນ຺ໂຕ ປຎ຺ຎວນ຺ເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ…ເປ…. (໔)

‘‘ຘາຕຸໂສວ, ຠິກ຺ຂເວ…ເປ… ອສ຺ສທ຺ຘາ ອສ຺ສທ຺ເຘຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ມຸຏ຺ຐສ຺ສຕິໂນ ມຸຏ຺ຐສ຺ສຕີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ທຸປ຺ປຎ຺ຎາ ທຸປ຺ປຎ຺ເຎຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ສທ຺ຘາ ສທ຺ເຘຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ອຸປຏ຺ຐິຕສ຺ສຕິໂນ ອຸປຏ຺ຐິຕສ຺ສຕີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ປຎ຺ຎວນ຺ໂຕ ປຎ຺ຎວນ຺ເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕີຕິ…ເປ…. ອຏ຺ຐມໍ. (໕)

໙. ອຫິຣິກມູລກສຸຕ຺ຕໍ

໑໐໓. ສາວຕ຺ຖິຍໍ ວິຫຣຕິ…ເປ… ‘‘ຘາຕຸໂສວ…ເປ… ອຫິຣິກາ ອຫິຣິເກຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ, ອໂນຕ຺ຕປ຺ປິໂນ ອໂນຕ຺ຕປ຺ປີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ, ທຸປ຺ປຎ຺ຎາ ທຸປ຺ປຎ຺ເຎຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ຫິຣິມນາ ຫິຣິມເນຫິ ສທ຺ຘິໍ ສສນ຺ທນ຺ຕິ ສເມນ຺ຕິ, ໂອຕ຺ຕປ຺ປິໂນ ໂອຕ຺ຕປ຺ປີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ, ປຎ຺ຎວນ຺ໂຕ ປຎ຺ຎວນ຺ເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ…ເປ…. (໑)

‘‘ອຫິຣິກາ ອຫິຣິເກຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ, ອປ຺ປສ຺ສຸຕາ ອປ຺ປສ຺ສຸເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ, ທຸປ຺ປຎ຺ຎາ ທຸປ຺ປຎ຺ເຎຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ຫິຣິມນາ ຫິຣິມເນຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ, ພຫຸສ຺ສຸຕາ ພຫຸສ຺ສຸເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ, ປຎ຺ຎວນ຺ໂຕ ປຎ຺ຎວນ຺ເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ…ເປ…. (໒)

‘‘ອຫິຣິກາ ອຫິຣິເກຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ, ກຸສີຕາ ກຸສີເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ, ທຸປ຺ປຎ຺ຎາ ທຸປ຺ປຎ຺ເຎຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ຫິຣິມນາ ຫິຣິມເນຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ, ອາຣທ຺ຘວີຣິຍາ ອາຣທ຺ຘວີຣິເຍຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ, ປຎ຺ຎວນ຺ໂຕ ປຎ຺ຎວນ຺ເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ…ເປ…. (໓)

‘‘ອຫິຣິກາ ອຫິຣິເກຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ, ມຸຏ຺ຐສ຺ສຕິໂນ ມຸຏ຺ຐສ຺ສຕີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ, ທຸປ຺ປຎ຺ຎາ ທຸປ຺ປຎ຺ເຎຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ຫິຣິມນາ ຫິຣິມເນຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ, ອຸປຏ຺ຐິຕສ຺ສຕິໂນ ອຸປຏ຺ຐິຕສ຺ສຕີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ, ປຎ຺ຎວນ຺ໂຕ ປຎ຺ຎວນ຺ເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕີຕິ…ເປ…. ນວມໍ. (໔)

໑໐. ອໂນຕ຺ຕປ຺ປມູລກສຸຕ຺ຕໍ

໑໐໔. ສາວຕ຺ຖິຍໍ ວິຫຣຕິ…ເປ… ‘‘ຘາຕຸໂສວ, ຠິກ຺ຂເວ, ສຕ຺ຕາ ສໍສນ຺ທນ຺ຕິ ສເມນ຺ຕິ. ອໂນຕ຺ຕປ຺ປິໂນ ອໂນຕ຺ຕປ຺ປີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ອປ຺ປສ຺ສຸຕາ ອປ຺ປສ຺ສຸເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ທຸປ຺ປຎ຺ຎາ ທຸປ຺ປຎ຺ເຎຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ໂອຕ຺ຕປ຺ປິໂນ ໂອຕ຺ຕປ຺ປີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ພຫຸສ຺ສຸຕາ ພຫຸສ຺ສຸເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ປຎ຺ຎວນ຺ໂຕ ປຎ຺ຎວນ຺ເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ…ເປ…. (໑)

‘‘ອໂນຕ຺ຕປ຺ປິໂນ ອໂນຕ຺ຕປ຺ປີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ກຸສີຕາ ກຸສີເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ທຸປ຺ປຎ຺ຎາ ທຸປ຺ປຎ຺ເຎຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ໂອຕ຺ຕປ຺ປິໂນ ໂອຕ຺ຕປ຺ປີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ອາຣທ຺ຘວີຣິຍາ ອາຣທ຺ຘວີຣິເຍຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ປຎ຺ຎວນ຺ໂຕ ປຎ຺ຎວນ຺ເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ…ເປ…. (໒)

‘‘ອໂນຕ຺ຕປ຺ປິໂນ ອໂນຕ຺ຕປ຺ປີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ມຸຏ຺ຐສ຺ສຕິໂນ ມຸຏ຺ຐສ຺ສຕີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ທຸປ຺ປຎ຺ຎາ ທຸປ຺ປຎ຺ເຎຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ໂອຕ຺ຕປ຺ປິໂນ ໂອຕ຺ຕປ຺ປີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ອຸປຏ຺ຐິຕສ຺ສຕິໂນ ອຸປຏ຺ຐິຕສ຺ສຕີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ປຎ຺ຎວນ຺ໂຕ ປຎ຺ຎວນ຺ເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕີຕິ…ເປ…. ທສມໍ. (໓)

໑໑. ອປ຺ປສ຺ສຸຕມູລກສຸຕ຺ຕໍ

໑໐໕. ສາວຕ຺ຖິຍໍ ວິຫຣຕິ…ເປ… ‘‘ຘາຕຸໂສວ, ຠິກ຺ຂເວ, ສຕ຺ຕາ ສໍສນ຺ທນ຺ຕິ ສເມນ຺ຕິ. ອປ຺ປສ຺ສຸຕາ ອປ຺ປສ຺ສຸເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ກຸສີຕາ ກຸສີເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ທຸປ຺ປຎ຺ຎາ ທຸປ຺ປຎ຺ເຎຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ພຫຸສ຺ສຸຕາ ພຫຸສ຺ສຸເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ອາຣທ຺ຘວີຣິຍາ ອາຣທ຺ຘວີຣິເຍຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ປຎ຺ຎວນ຺ໂຕ ປຎ຺ຎວນ຺ເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ…ເປ…. (໑)

‘‘ອປ຺ປສ຺ສຸຕາ ອປ຺ປສ຺ສຸເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ມຸຏ຺ຐສ຺ສຕິໂນ ມຸຏ຺ຐສ຺ສຕີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ທຸປ຺ປຎ຺ຎາ ທຸປ຺ປຎ຺ເຎຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ພຫຸສ຺ສຸຕາ ພຫຸສ຺ສຸເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ອຸປຏ຺ຐິຕສ຺ສຕິໂນ ອຸປຏ຺ຐິຕສ຺ສຕີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ປຎ຺ຎວນ຺ໂຕ ປຎ຺ຎວນ຺ເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕີຕິ…ເປ…. ເອກາທສມໍ. (໒)

໑໒. ກຸສີຕມູລກສຸຕ຺ຕໍ

໑໐໖. ສາວຕ຺ຖິຍໍ ວິຫຣຕິ…ເປ… ‘‘ຘາຕຸໂສວ, ຠິກ຺ຂເວ, ສຕ຺ຕາ ສໍສນ຺ທນ຺ຕິ ສເມນ຺ຕິ. ກຸສີຕາ ກຸສີເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ມຸຏ຺ຐສ຺ສຕິໂນ ມຸຏ຺ຐສ຺ສຕີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ທຸປ຺ປຎ຺ຎາ ທຸປ຺ປຎ຺ເຎຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ອາຣທ຺ຘວີຣິຍາ ອາຣທ຺ຘວີຣິເຍຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ອຸປຏ຺ຐິຕສ຺ສຕິໂນ ອຸປຏ຺ຐິຕສ຺ສຕີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ປຎ຺ຎວນ຺ໂຕ ປຎ຺ຎວນ຺ເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕີຕິ…ເປ…. ທ຺ວາທສມໍ.

ທຸຕິໂຍ ວຄ຺ໂຄ.

ຕສ຺ສຸທ຺ທານໍ –

ສຕ຺ຕິມາ ສນິທານຎ຺ຈ, ຄິຎ຺ຊກາວສເຖນ ຈ;

ຫີນາຘິມຸຕ຺ຕິ ຈງ຺ກມໍ, ສຄາຖາ ອສ຺ສທ຺ຘສຕ຺ຕມໍ.

ອສ຺ສທ຺ຘມູລກາ ປຎ຺ຈ, ຈຕ຺ຕາໂຣ ອຫິຣິກມູລກາ;

ອໂນຕ຺ຕປ຺ປມູລກາ ຕີຓິ, ທຸເວ ອປ຺ປສ຺ສຸເຕນ ຈ.

ກຸສີຕໍ ເອກກໍ ວຸຕ຺ຕໍ, ສຸຕ຺ຕນ຺ຕາ ຕີຓິ ປຎ຺ຈກາ;

ພາວີສຕິ ວຸຕ຺ຕາ ສຸຕ຺ຕາ, ທຸຕິໂຍ ວຄ຺ໂຄ ປວຸຈ຺ຈຕີຕິ.

໓. ກມ຺ມປຖວຄ຺ໂຄ

໑. ອສມາຫິຕສຸຕ຺ຕໍ

໑໐໗. ສາວຕ຺ຖິຍໍ ວິຫຣຕິ…ເປ… ‘‘ຘາຕຸໂສວ, ຠິກ຺ຂເວ, ສຕ຺ຕາ ສໍສນ຺ທນ຺ຕິ ສເມນ຺ຕິ. ອສ຺ສທ຺ຘາ ອສ຺ສທ຺ເຘຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ອຫິຣິກາ ອຫິຣິເກຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ອໂນຕ຺ຕປ຺ປິໂນ ອໂນຕ຺ຕປ຺ປີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ອສມາຫິຕາ ອສມາຫິເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ທຸປ຺ປຎ຺ຎາ ທຸປ຺ປຎ຺ເຎຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ’’.

‘‘ສທ຺ຘາ ສທ຺ເຘຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ຫິຣິມນາ ຫິຣິມເນຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ໂອຕ຺ຕປ຺ປິໂນ ໂອຕ຺ຕປ຺ປີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ສມາຫິຕາ ສມາຫິເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ປຎ຺ຎວນ຺ໂຕ ປຎ຺ຎວນ຺ເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕີ’’ຕິ. ປຐມໍ.

໒. ທຸສ຺ສີລສຸຕ຺ຕໍ

໑໐໘. ສາວຕ຺ຖິຍໍ ວິຫຣຕິ…ເປ… ‘‘ຘາຕຸໂສວ, ຠິກ຺ຂເວ, ສຕ຺ຕາ ສໍສນ຺ທນ຺ຕິ ສເມນ຺ຕິ. ອສ຺ສທ຺ຘາ ອສ຺ສທ຺ເຘຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ອຫິຣິກາ ອຫິຣິເກຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ອໂນຕ຺ຕປ຺ປິໂນ ອໂນຕ຺ຕປ຺ປີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ທຸສ຺ສີລາ ທຸສ຺ສີເລຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ທຸປ຺ປຎ຺ຎາ ທຸປ຺ປຎ຺ເຎຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ’’.

‘‘ສທ຺ຘາ ສທ຺ເຘຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ຫິຣິມນາ ຫິຣິມເນຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ໂອຕ຺ຕປ຺ປິໂນ ໂອຕ຺ຕປ຺ປີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ສີລວນ຺ໂຕ ສີລວນ຺ເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ປຎ຺ຎວນ຺ໂຕ ປຎ຺ຎວນ຺ເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕີ’’ຕິ. ທຸຕິຍໍ.

໓. ປຎ຺ຈສິກ຺ຂາປທສຸຕ຺ຕໍ

໑໐໙. ສາວຕ຺ຖິຍໍ ວິຫຣຕິ…ເປ… ‘‘ຘາຕຸໂສວ, ຠິກ຺ຂເວ, ສຕ຺ຕາ ສໍສນ຺ທນ຺ຕິ ສເມນ຺ຕິ. ປາຓາຕິປາຕິໂນ ປາຓາຕິປາຕີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ອທິນ຺ນາທາຍິໂນ ອທິນ຺ນາທາຍີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ກາເມສຸມິຈ຺ຉາຈາຣິໂນ ກາເມສຸມິຈ຺ຉາຈາຣີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ມຸສາວາທິໂນ ມຸສາວາທີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ສຸຣາເມຣຍມຊ຺ຊປ຺ປມາທຏ຺ຐາຍິໂນ ສຸຣາເມຣຍມຊ຺ຊປ຺ປມາທຏ຺ຐາຍີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ’’.

‘‘ປາຓາຕິປາຕາ ປຏິວິຣຕາ ປາຓາຕິປາຕາ ປຏິວິຣເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ອທິນ຺ນາທານາ ປຏິວິຣຕາ ອທິນ຺ນາທານາ ປຏິວິຣເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ກາເມສຸມິຈ຺ຉາຈາຣາ ປຏິວິຣຕາ ກາເມສຸມິຈ຺ຉາຈາຣາ ປຏິວິຣເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ມຸສາວາທາ ປຏິວິຣຕາ ມຸສາວາທາ ປຏິວິຣເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ສຸຣາເມຣຍມຊ຺ຊປ຺ປມາທຏ຺ຐານາ ປຏິວິຣຕາ ສຸຣາເມຣຍມຊ຺ຊປ຺ປມາທຏ຺ຐານາ ປຏິວິຣເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕີ’’ຕິ. ຕຕິຍໍ.

໔. ສຕ຺ຕກມ຺ມປຖສຸຕ຺ຕໍ

໑໑໐. ສາວຕ຺ຖິຍໍ ວິຫຣຕິ…ເປ… ‘‘ຘາຕຸໂສວ, ຠິກ຺ຂເວ, ສຕ຺ຕາ ສໍສນ຺ທນ຺ຕິ ສເມນ຺ຕິ. ປາຓາຕິປາຕິໂນ ປາຓາຕິປາຕີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ອທິນ຺ນາທາຍິໂນ ອທິນ຺ນາທາຍີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ກາເມສຸມິຈ຺ຉາຈາຣິໂນ ກາເມສຸມິຈ຺ຉາຈາຣີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ມຸສາວາທິໂນ ມຸສາວາທີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ປິສຸຓວາຈາ ປິສຸຓວາເຈຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ຜຣຸສວາຈາ ຜຣຸສວາເຈຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ສມ຺ຜປ຺ປລາປິໂນ ສມ຺ຜປ຺ປລາປີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ’’.

‘‘ປາຓາຕິປາຕາ ປຏິວິຣຕາ…ເປ… ອທິນ຺ນາທານາ ປຏິວິຣຕາ… ກາເມສຸມິຈ຺ຉາຈາຣາ ປຏິວິຣຕາ… ມຸສາວາທາ ປຏິວິຣຕາ… ປິສຸຓາຍ ວາຈາຍ ປຏິວິຣຕາ ປິສຸຓາຍ ວາຈາຍ ປຏິວິຣເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ຜຣຸສາຍ ວາຈາຍ ປຏິວິຣຕາ ຜຣຸສາຍ ວາຈາຍ ປຏິວິຣເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ສມ຺ຜປ຺ປລາປາ ປຏິວິຣຕາ ສມ຺ຜປ຺ປລາປາ ປຏິວິຣເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕີ’’ຕິ. ຈຕຸຕ຺ຖໍ.

໕. ທສກມ຺ມປຖສຸຕ຺ຕໍ

໑໑໑. ສາວຕ຺ຖິຍໍ ວິຫຣຕິ…ເປ… ‘‘ຘາຕຸໂສວ, ຠິກ຺ຂເວ, ສຕ຺ຕາ ສໍສນ຺ທນ຺ຕິ ສເມນ຺ຕິ. ປາຓາຕິປາຕິໂນ ປາຓາຕິປາຕີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ອທິນ຺ນາທາຍິໂນ…ເປ… ກາເມສຸມິຈ຺ຉາຈາຣິໂນ… ມຸສາວາທິໂນ… ປິສຸຓວາຈາ… ຜຣຸສວາຈາ… ສມ຺ຜປ຺ປລາປິໂນ ສມ຺ຜປ຺ປລາປີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ອຠິຊ຺ຌາລຸໂນ ອຠິຊ຺ຌາລູຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ພ຺ຍາປນ຺ນຈິຕ຺ຕາ ພ຺ຍາປນ຺ນຈິຕ຺ເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ມິຈ຺ຉາທິຏ຺ຐິກາ ມິຈ຺ຉາທິຏ຺ຐິເກຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ’’.

‘‘ປາຓາຕິປາຕາ ປຏິວິຣຕາ ປາຓາຕິປາຕາ ປຏິວິຣເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ອທິນ຺ນາທານາ ປຏິວິຣຕາ…ເປ… ກາເມສຸມິຈ຺ຉາຈາຣາ ປຏິວິຣຕາ… ມຸສາວາທາ ປຏິວິຣຕາ… ປິສຸຓາຍ ວາຈາຍ… ຜຣຸສາຍ ວາຈາຍ… ສມ຺ຜປ຺ປລາປາ ປຏິວິຣຕາ ສມ຺ຜປ຺ປລາປາ ປຏິວິຣເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ອນຠິຊ຺ຌາລຸໂນ ອນຠິຊ຺ຌາລູຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ອພ຺ຍາປນ຺ນຈິຕ຺ຕາ ອພ຺ຍາປນ຺ນຈິຕ຺ເຕຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ສມ຺ມາທິຏ຺ຐິກາ ສມ຺ມາທິຏ຺ຐິເກຫິ ສທ຺ຘິໍ ສໍສນ຺ທນ຺ຕິ ສເມນ຺ຕີ’’ຕິ. ປຎ຺ຈມໍ.

໖. ອຏ຺ຐງ຺ຄິກສຸຕ຺ຕໍ

໑໑໒. ສາວຕ຺ຖິຍໍ ວິຫຣຕິ…ເປ… ‘‘ຘາຕຸໂສວ, ຠິກ຺ຂເວ, ສຕ຺ຕາ ສໍສນ຺ທນ຺ຕິ ສເມນ຺ຕິ. ມິຈ຺ຉາທິຏ຺ຐິກາ ມິຈ຺ຉາທິຏ຺ຐິເກຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ມິຈ຺ຉາສງ຺ກປ຺ປາ…ເປ… ມິຈ຺ຉາວາຈາ… ມິຈ຺ຉາກມ຺ມນ຺ຕາ… ມິຈ຺ຉາອາຊີວາ… ມິຈ຺ຉາວາຍາມາ… ມິຈ຺ຉາສຕິໂນ … ມິຈ຺ຉາສມາຘິໂນ ມິຈ຺ຉາສມາຘີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ. ສມ຺ມາທິຏ຺ຐິກາ ສມ຺ມາທິຏ຺ຐິເກຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ສມ຺ມາສງ຺ກປ຺ປາ…ເປ… ສມ຺ມາວາຈາ… ສມ຺ມາກມ຺ມນ຺ຕາ… ສມ຺ມາອາຊີວາ… ສມ຺ມາວາຍາມາ… ສມ຺ມາສຕິໂນ… ສມ຺ມາສມາຘິໂນ ສມ຺ມາສມາຘີຫິ ສທ຺ຘິໍ ສໍສນ຺ທນ຺ຕິ ສເມນ຺ຕີ’’ຕິ. ຉຏ຺ຐໍ.

໗. ທສງ຺ຄສຸຕ຺ຕໍ

໑໑໓. ສາວຕ຺ຖິຍໍ ວິຫຣຕິ…ເປ… ‘‘ຘາຕຸໂສວ, ຠິກ຺ຂເວ, ສຕ຺ຕາ ສໍສນ຺ທນ຺ຕິ ສເມນ຺ຕິ. ມິຈ຺ຉາທິຏ຺ຐິກາ ມິຈ຺ຉາທິຏ຺ຐິເກຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ມິຈ຺ຉາສງ຺ກປ຺ປາ…ເປ… ມິຈ຺ຉາວາຈາ… ມິຈ຺ຉາກມ຺ມນ຺ຕາ… ມິຈ຺ຉາອາຊີວາ… ມິຈ຺ຉາວາຍາມາ… ມິຈ຺ຉາສຕິໂນ … ມິຈ຺ຉາສມາຘິໂນ ມິຈ຺ຉາສມາຘີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ມິຈ຺ຉາຎາຓິໂນ ມິຈ຺ຉາຎາຓີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ມິຈ຺ຉາວິມຸຕ຺ຕິໂນ ມິຈ຺ຉາວິມຸຕ຺ຕີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ’’.

‘‘ສມ຺ມາທິຏ຺ຐິກາ ສມ຺ມາທິຏ຺ຐິເກຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ສມ຺ມາສງ຺ກປ຺ປາ…ເປ… ສມ຺ມາວາຈາ… ສມ຺ມາກມ຺ມນ຺ຕາ… ສມ຺ມາອາຊີວາ… ສມ຺ມາວາຍາມາ… ສມ຺ມາສຕິໂນ… ສມ຺ມາສມາຘິໂນ… ສມ຺ມາຎາຓິໂນ ສມ຺ມາຎາຓີຫິ ສທ຺ຘິໍ ສໍສນ຺ທນ຺ຕິ ສເມນ຺ຕິ; ສມ຺ມາວິມຸຕ຺ຕິໂນ ສມ຺ມາວິມຸຕ຺ຕີຫິ ສທ຺ຘິໍ ສໍສນ຺ທນ຺ຕິ ສເມນ຺ຕີ’’ຕິ. ສຕ຺ຕມໍ.