໔. ໂນເຈທໍສຸຕ຺ຕໍ

໑໑໗. ສາວຕ຺ຖິຍໍ ວິຫຣຕິ…ເປ… ‘‘ໂນ ເຈທໍ, ຠິກ຺ຂເວ, ປຖວີຘາຕຸຍາ ອສ຺ສາໂທ ອຠວິສ຺ສ, ນຍິທໍ ສຕ຺ຕາ ປຖວີຘາຕຸຍາ ສາຣຊ຺ເຊຍ຺ຍຸໍ. ຍສ຺ມາ ຈ ໂຂ, ຠິກ຺ຂເວ, ອຕ຺ຖິ ປຖວີຘາຕຸຍາ ອສ຺ສາໂທ, ຕສ຺ມາ ສຕ຺ຕາ ປຖວີຘາຕຸຍາ ສາຣຊ຺ຊນ຺ຕິ. ໂນ ເຈທໍ, ຠິກ຺ຂເວ, ປຖວີຘາຕຸຍາ ອາທີນໂວ ອຠວິສ຺ສ, ນຍິທໍ ສຕ຺ຕາ ປຖວີຘາຕຸຍາ ນິພ຺ພິນ຺ເທຍ຺ຍຸໍ. ຍສ຺ມາ ຈ ໂຂ, ຠິກ຺ຂເວ, ອຕ຺ຖິ ປຖວີຘາຕຸຍາ ອາທີນໂວ, ຕສ຺ມາ ສຕ຺ຕາ ປຖວີຘາຕຸຍາ ນິພ຺ພິນ຺ທນ຺ຕິ. ໂນ ເຈທໍ, ຠິກ຺ຂເວ, ປຖວີຘາຕຸຍາ ນິສ຺ສຣຓໍ ອຠວິສ຺ສ, ນຍິທໍ ສຕ຺ຕາ ປຖວີຘາຕຸຍາ ນິສ຺ສເຣຍ຺ຍຸໍ. ຍສ຺ມາ ຈ ໂຂ, ຠິກ຺ຂເວ, ອຕ຺ຖິ ປຖວີຘາຕຸຍາ ນິສ຺ສຣຓໍ, ຕສ຺ມາ ສຕ຺ຕາ ປຖວີຘາຕຸຍາ ນິສ຺ສຣນ຺ຕິ’’.

‘‘ໂນ ເຈທໍ, ຠິກ຺ຂເວ, ອາໂປຘາຕຸຍາ ອສ຺ສາໂທ ອຠວິສ຺ສ…ເປ… ໂນ ເຈທໍ, ຠິກ຺ຂເວ, ເຕໂຊຘາຕຸຍາ…ເປ… ໂນ ເຈທໍ, ຠິກ຺ຂເວ, ວາໂຍຘາຕຸຍາ ອສ຺ສາໂທ ອຠວິສ຺ສ, ນຍິທໍ ສຕ຺ຕາ ວາໂຍຘາຕຸຍາ ສາຣຊ຺ເຊຍ຺ຍຸໍ. ຍສ຺ມາ ຈ ໂຂ, ຠິກ຺ຂເວ, ອຕ຺ຖິ ວາໂຍຘາຕຸຍາ ອສ຺ສາໂທ, ຕສ຺ມາ ສຕ຺ຕາ ວາໂຍຘາຕຸຍາ ສາຣຊ຺ຊນ຺ຕິ. ໂນ ເຈທໍ, ຠິກ຺ຂເວ, ວາໂຍຘາຕຸຍາ ອາທີນໂວ ອຠວິສ຺ສ, ນຍິທໍ ສຕ຺ຕາ ວາໂຍຘາຕຸຍາ ນິພ຺ພິນ຺ເທຍ຺ຍຸໍ. ຍສ຺ມາ ຈ ໂຂ, ຠິກ຺ຂເວ, ອຕ຺ຖິ ວາໂຍຘາຕຸຍາ ອາທີນໂວ, ຕສ຺ມາ ສຕ຺ຕາ ວາໂຍຘາຕຸຍາ ນິພ຺ພິນ຺ທນ຺ຕິ. ໂນ ເຈທໍ, ຠິກ຺ຂເວ, ວາໂຍຘາຕຸຍາ ນິສ຺ສຣຓໍ ອຠວິສ຺ສ, ນຍິທໍ ສຕ຺ຕາ ວາໂຍຘາຕຸຍາ ນິສ຺ສເຣຍ຺ຍຸໍ. ຍສ຺ມາ ຈ ໂຂ, ຠິກ຺ຂເວ, ອຕ຺ຖິ ວາໂຍຘາຕຸຍາ ນິສ຺ສຣຓໍ, ຕສ຺ມາ ສຕ຺ຕາ ວາໂຍຘາຕຸຍາ ນິສ຺ສຣນ຺ຕິ.

‘‘ຍາວກີວຎ຺ຈິເມ, ຠິກ຺ຂເວ, ສຕ຺ຕາ ອິມາສໍ ຈຕຸນ຺ນໍ ຘາຕູນໍ ອສ຺ສາທຎ຺ຈ ອສ຺ສາທໂຕ ອາທີນວຎ຺ຈ ອາທີນວໂຕ ນິສ຺ສຣຓຎ຺ຈ ນິສ຺ສຣຓໂຕ ຍຖາຠູຕໍ ນ ອພ຺ຠຎ຺ຎໍສຸ, ເນວ ຕາວິເມ ຠິກ຺ຂເວ, ສຕ຺ຕາ ສເທວກາ ໂລກາ ສມາຣກາ ສພ຺ຣຫ຺ມກາ ສສ຺ສມຓພ຺ຣາຫ຺ມຓິຍາ ປຊາຍ ສເທວມນຸສ຺ສາຍ ນິສ຺ສຏາ ວິສໍຍຸຕ຺ຕາ ວິປ຺ປມຸຕ຺ຕາ ວິມຣິຍາທິກເຕນ ເຈຕສາ ວິຫຣິໍສຸ.

‘‘ຍໂຕ ຈ ໂຂ, ຠິກ຺ຂເວ, ສຕ຺ຕາ ອິມາສໍ ຈຕຸນ຺ນໍ ຘາຕູນໍ ອສ຺ສາທຎ຺ຈ ອສ຺ສາທໂຕ ອາທີນວຎ຺ຈ ອາທີນວໂຕ ນິສ຺ສຣຓຎ຺ຈ ນິສ຺ສຣຓໂຕ ຍຖາຠູຕໍ ອພ຺ຠຎ຺ຎໍສຸ, ອຖ, ຠິກ຺ຂເວ, ສຕ຺ຕາ ສເທວກາ ໂລກາ ສມາຣກາ ສພ຺ຣຫ຺ມກາ ສສ຺ສມຓພ຺ຣາຫ຺ມຓິຍາ ປຊາຍ ສເທວມນຸສ຺ສາຍ ນິສ຺ສຏາ ວິສໍຍຸຕ຺ຕາ ວິປ຺ປມຸຕ຺ຕາ ວິມຣິຍາທິກເຕນ ເຈຕສາ ວິຫຣນ຺ຕີ’’ຕິ. ຈຕຸຕ຺ຖໍ.