໙. ອຣິຍສາວກສຸຕ຺ຕໍ

໔໙. ສາວຕ຺ຖິຍໍ ວິຫຣຕິ…ເປ… ‘‘ນ, ຠິກ຺ຂເວ, ສຸຕວໂຕ ອຣິຍສາວກສ຺ສ ເອວໍ ໂຫຕິ – ‘ກິໍ ນຸ ໂຂ ກິສ຺ມິໍ ສຕິ ກິໍ ໂຫຕິ, ກິສ຺ສຸປ຺ປາທາ ກິໍ ອຸປ຺ປຊ຺ຊຕິ? (ກິສ຺ມິໍ ສຕິ ສງ຺ຂາຣາ ໂຫນ຺ຕິ, ກິສ຺ມິໍ ສຕິ ວິຎ຺ຎາຓໍ ໂຫຕິ,) [( ) ເອຕ຺ຖນ຺ຕເຣ ປາຐາ ເກສຸຈິ ໂປຕ຺ຖເກສຸ ນ ທິສ຺ສນ຺ຕີຕິ ສີ. ປີ. ໂປຕ຺ຖເກສຸ ທສ຺ສິຕາ. ຕຖາ ສຕິ ອນນ຺ຕຣສຸຕ຺ຕຏີກາຍ ສເມຕິ] ກິສ຺ມິໍ ສຕິ ນາມຣູປໍ ໂຫຕິ, ກິສ຺ມິໍ ສຕິ ສຬາຍຕນໍ ໂຫຕິ, ກິສ຺ມິໍ ສຕິ ຜສ຺ໂສ ໂຫຕິ, ກິສ຺ມິໍ ສຕິ ເວທນາ ໂຫຕິ, ກິສ຺ມິໍ ສຕິ ຕຓ຺ຫາ ໂຫຕິ, ກິສ຺ມິໍ ສຕິ ອຸປາທານໍ ໂຫຕິ, ກິສ຺ມິໍ ສຕິ ຠໂວ ໂຫຕິ, ກິສ຺ມິໍ ສຕິ ຊາຕິ ໂຫຕິ, ກິສ຺ມິໍ ສຕິ ຊຣາມຣຓໍ ໂຫຕີ’’’ຕິ?

‘‘ອຖ ໂຂ, ຠິກ຺ຂເວ, ສຸຕວໂຕ ອຣິຍສາວກສ຺ສ ອປຣປ຺ປຈ຺ຈຍາ ຎາຓເມເວຕ຺ຖ ໂຫຕິ – ‘ອິມສ຺ມິໍ ສຕິ ອິທໍ ໂຫຕິ, ອິມສ຺ສຸປ຺ປາທາ ອິທໍ ອຸປ຺ປຊ຺ຊຕິ. (ອວິຊ຺ຊາຍ ສຕິ ສງ຺ຂາຣາ ໂຫນ຺ຕິ; ສງ຺ຂາເຣສຸ ສຕິ ວິຎ຺ຎາຓໍ ໂຫຕິ;) [( ) ເອຕ຺ຖເກສຸ ປາຐາ ເກສຸຈິ ໂປຕ຺ຖເກສຸ ນ ທິສ຺ສນ຺ຕີຕິ ສີ. ປີ. ໂປຕ຺ຖເກສຸ ທສ຺ສິຕາ. ຕຖາ ສຕິ ອນນ຺ຕຣສຸຕ຺ຕຏີກາຍ ສເມຕິ] ວິຎ຺ຎາເຓ ສຕິ ນາມຣູປໍ ໂຫຕິ; ນາມຣູເປ ສຕິ ສຬາຍຕນໍ ໂຫຕິ; ສຬາຍຕເນ ສຕິ ຜສ຺ໂສ ໂຫຕິ; ຜສ຺ເສ ສຕິ ເວທນາ ໂຫຕິ; ເວທນາຍ ສຕິ ຕຓ຺ຫາ ໂຫຕິ; ຕຓ຺ຫາຍ ສຕິ ອຸປາທານໍ ໂຫຕິ; ອຸປາທາເນ ສຕິ ຠໂວ ໂຫຕິ; ຠເວ ສຕິ ຊາຕິ ໂຫຕິ; ຊາຕິຍາ ສຕິ ຊຣາມຣຓໍ ໂຫຕີ’ຕິ. ໂສ ເອວໍ ປຊານາຕິ – ‘ເອວມຍໍ ໂລໂກ ສມຸທຍຕີ’’’ຕິ.

‘‘ນ, ຠິກ຺ຂເວ, ສຸຕວໂຕ ອຣິຍສາວກສ຺ສ ເອວໍ ໂຫຕິ – ‘ກິໍ ນຸ ໂຂ ກິສ຺ມິໍ ອສຕິ ກິໍ ນ ໂຫຕິ, ກິສ຺ສ ນິໂຣຘາ ກິໍ ນິຣຸຊ຺ຌຕິ? (ກິສ຺ມິໍ ອສຕິ ສງ຺ຂາຣາ ນ ໂຫນ຺ຕິ, ກິສ຺ມິໍ ອສຕິ ວິຎ຺ຎາຓໍ ນ ໂຫຕິ,) [( ) ເອຕ຺ຖນ຺ຕເຣ ປາຐາປິ ຕຕ຺ຖ ຕເຖວ ທສ຺ສິຕາ] ກິສ຺ມິໍ ອສຕິ ນາມຣູປໍ ນ ໂຫຕິ, ກິສ຺ມິໍ ອສຕິ ສຬາຍຕນໍ ນ ໂຫຕິ, ກິສ຺ມິໍ ອສຕິ ຜສ຺ໂສ ນ ໂຫຕິ, ກິສ຺ມິໍ ອສຕິ ເວທນາ ນ ໂຫຕິ, ກິສ຺ມິໍ ອສຕິ ຕຓ຺ຫາ ນ ໂຫຕິ, ກິສ຺ມິໍ ອສຕິ ອຸປາທານໍ ນ ໂຫຕິ, ກິສ຺ມິໍ ອສຕິ ຠໂວ ນ ໂຫຕິ, ກິສ຺ມິໍ ອສຕິ ຊາຕິ ນ ໂຫຕິ, ກິສ຺ມິໍ ອສຕິ ຊຣາມຣຓໍ ນ ໂຫຕີ’’’ຕິ?

‘‘ອຖ ໂຂ, ຠິກ຺ຂເວ, ສຸຕວໂຕ ອຣິຍສາວກສ຺ສ ອປຣປ຺ປຈ຺ຈຍາ ຎາຓເມເວຕ຺ຖ ໂຫຕິ – ‘ອິມສ຺ມິໍ ອສຕິ ອິທໍ ນ ໂຫຕິ, ອິມສ຺ສ ນິໂຣຘາ ອິທໍ ນິຣຸຊ຺ຌຕິ. (ອວິຊ຺ຊາຍ ອສຕິ ສງ຺ຂາຣາ ນ ໂຫນ຺ຕິ; ສງ຺ຂາເຣສຸ ອສຕິ ວິຎ຺ຎາຓໍ ນ ໂຫຕິ;) [( ) ເອຕ຺ຖນ຺ຕເຣ ປາຐາປິ ຕຕ຺ຖ ຕເຖວ ທສ຺ສິຕາ] ວິຎ຺ຎາເຓ ອສຕິ ນາມຣູປໍ ນ ໂຫຕິ; ນາມຣູເປ ອສຕິ ສຬາຍຕນໍ ນ ໂຫຕິ…ເປ… ຠໂວ ນ ໂຫຕິ… ຊາຕິ ນ ໂຫຕິ… ຊາຕິຍາ ອສຕິ ຊຣາມຣຓໍ ນ ໂຫຕີ’ຕິ. ໂສ ເອວໍ ປຊານາຕິ – ‘ເອວມຍໍ ໂລໂກ ນິຣຸຊ຺ຌຕີ’’’ຕິ.

‘‘ຍໂຕ ໂຂ, ຠິກ຺ຂເວ, ອຣິຍສາວໂກ ເອວໍ ໂລກສ຺ສ ສມຸທຍຎ຺ຈ ອຕ຺ຖງ຺ຄມຎ຺ຈ ຍຖາຠູຕໍ ປຊານາຕິ, ອຍໍ ວຸຈ຺ຈຕິ, ຠິກ຺ຂເວ, ອຣິຍສາວໂກ ທິຏ຺ຐິສມ຺ປນ຺ໂນ ອິຕິປິ…ເປ… ອມຕທ຺ວາຣໍ ອາຫຈ຺ຈ ຕິຏ຺ຐຕິ ອິຕິປີ’’ຕິ. ນວມໍ.