໑໐. ທຸຕິຍອຣິຍສາວກສຸຕ຺ຕໍ

໕໐. ສາວຕ຺ຖິຍໍ ວິຫຣຕິ…ເປ… ‘‘ນ, ຠິກ຺ຂເວ, ສຸຕວໂຕ ອຣິຍສາວກສ຺ສ ເອວໍ ໂຫຕິ – ‘ກິໍ ນຸ ໂຂ ກິສ຺ມິໍ ສຕິ ກິໍ ໂຫຕິ, ກິສ຺ສຸປ຺ປາທາ ກິໍ ອຸປ຺ປຊ຺ຊຕິ? ກິສ຺ມິໍ ສຕິ ສງ຺ຂາຣາ ໂຫນ຺ຕິ, ກິສ຺ມິໍ ສຕິ ວິຎ຺ຎາຓໍ ໂຫຕິ, ກິສ຺ມິໍ ສຕິ ນາມຣູປໍ ໂຫຕິ, ກິສ຺ມິໍ ສຕິ ສຬາຍຕນໍ ໂຫຕິ, ກິສ຺ມິໍ ສຕິ ຜສ຺ໂສ ໂຫຕິ, ກິສ຺ມິໍ ສຕິ ເວທນາ ໂຫຕິ, ກິສ຺ມິໍ ສຕິ ຕຓ຺ຫາ ໂຫຕິ, ກິສ຺ມິໍ ສຕິ ອຸປາທານໍ ໂຫຕິ, ກິສ຺ມິໍ ສຕິ ຠໂວ ໂຫຕິ, ກິສ຺ມິໍ ສຕິ ຊາຕິ ໂຫຕິ, ກິສ຺ມິໍ ສຕິ ຊຣາມຣຓໍ ໂຫຕີ’’’ຕິ?

‘‘ອຖ ໂຂ, ຠິກ຺ຂເວ, ສຸຕວໂຕ ອຣິຍສາວກສ຺ສ ອປຣປ຺ປຈ຺ຈຍາ ຎາຓເມເວຕ຺ຖ ໂຫຕິ – ‘ອິມສ຺ມິໍ ສຕິ ອິທໍ ໂຫຕິ, ອິມສ຺ສຸປ຺ປາທາ ອິທໍ ອຸປ຺ປຊ຺ຊຕິ. ອວິຊ຺ຊາຍ ສຕິ ສງ຺ຂາຣາ ໂຫນ຺ຕິ; ສງ຺ຂາເຣສຸ ສຕິ ວິຎ຺ຎາຓໍ ໂຫຕິ; ວິຎ຺ຎາເຓ ສຕິ ນາມຣູປໍ ໂຫຕິ; ນາມຣູເປ ສຕິ ສຬາຍຕນໍ ໂຫຕິ; ສຬາຍຕເນ ສຕິ ຜສ຺ໂສ ໂຫຕິ; ຜສ຺ເສ ສຕິ ເວທນາ ໂຫຕິ; ເວທນາຍ ສຕິ ຕຓ຺ຫາ ໂຫຕິ; ຕຓ຺ຫາຍ ສຕິ ອຸປາທານໍ ໂຫຕິ; ອຸປາທາເນ ສຕິ ຠໂວ ໂຫຕິ; ຠເວ ສຕິ ຊາຕິ ໂຫຕິ; ຊາຕິຍາ ສຕິ ຊຣາມຣຓໍ ໂຫຕີ’ຕິ. ໂສ ເອວໍ ປຊານາຕິ – ‘ເອວມຍໍ ໂລໂກ ສມຸທຍຕີ’’’ຕິ.

‘‘ນ, ຠິກ຺ຂເວ, ສຸຕວໂຕ ອຣິຍສາວກສ຺ສ ເອວໍ ໂຫຕິ – ‘ກິໍ ນຸ ໂຂ ກິສ຺ມິໍ ອສຕິ ກິໍ ນ ໂຫຕິ, ກິສ຺ສ ນິໂຣຘາ ກິໍ ນິຣຸຊ຺ຌຕິ? ກິສ຺ມິໍ ອສຕິ ສງ຺ຂາຣາ ນ ໂຫນ຺ຕິ, ກິສ຺ມິໍ ອສຕິ ວິຎ຺ຎາຓໍ ນ ໂຫຕິ, ກິສ຺ມິໍ ອສຕິ ນາມຣູປໍ ນ ໂຫຕິ, ກິສ຺ມິໍ ອສຕິ ສຬາຍຕນໍ ນ ໂຫຕິ, ກິສ຺ມິໍ ອສຕິ ຜສ຺ໂສ ນ ໂຫຕິ, ກິສ຺ມິໍ ອສຕິ ເວທນາ ນ ໂຫຕິ, ກິສ຺ມິໍ ອສຕິ ຕຓ຺ຫາ ນ ໂຫຕິ…ເປ… ອຸປາທານໍ… ຠໂວ… ຊາຕິ… ກິສ຺ມິໍ ອສຕິ ຊຣາມຣຓໍ ນ ໂຫຕີ’’’ຕິ?

‘‘ອຖ ໂຂ, ຠິກ຺ຂເວ, ສຸຕວໂຕ ອຣິຍສາວກສ຺ສ ອປຣປ຺ປຈ຺ຈຍາ ຎາຓເມເວຕ຺ຖ ໂຫຕິ – ‘ອິມສ຺ມິໍ ອສຕິ ອິທໍ ນ ໂຫຕິ, ອິມສ຺ສ ນິໂຣຘາ ອິທໍ ນິຣຸຊ຺ຌຕິ. ອວິຊ຺ຊາຍ ອສຕິ ສງ຺ຂາຣາ ນ ໂຫນ຺ຕິ; ສງ຺ຂາເຣສຸ ອສຕິ ວິຎ຺ຎາຓໍ ນ ໂຫຕິ; ວິຎ຺ຎາເຓ ອສຕິ ນາມຣູປໍ ນ ໂຫຕິ; ນາມຣູເປ ອສຕິ ສຬາຍຕນໍ ນ ໂຫຕິ…ເປ… ຊາຕິຍາ ອສຕິ ຊຣາມຣຓໍ ນ ໂຫຕີ’ຕິ. ໂສ ເອວໍ ປຊານາຕິ – ‘ເອວມຍໍ ໂລໂກ ນິຣຸຊ຺ຌຕີ’’’ຕິ.

‘‘ຍໂຕ ໂຂ, ຠິກ຺ຂເວ, ອຣິຍສາວໂກ ເອວໍ ໂລກສ຺ສ ສມຸທຍຎ຺ຈ ອຕ຺ຖງ຺ຄມຎ຺ຈ ຍຖາຠູຕໍ ປຊານາຕິ, ອຍໍ ວຸຈ຺ຈຕິ, ຠິກ຺ຂເວ, ອຣິຍສາວໂກ ທິຏ຺ຐິສມ຺ປນ຺ໂນ ອິຕິປິ, ທສ຺ສນສມ຺ປນ຺ໂນ ອິຕິປິ, ອາຄໂຕ ອິມໍ ສທ຺ຘມ຺ມໍ ອິຕິປິ, ປສ຺ສຕິ ອິມໍ ສທ຺ຘມ຺ມໍ ອິຕິປິ, ເສກ຺ເຂນ ຎາເຓນ ສມນ຺ນາຄໂຕ ອິຕິປິ, ເສກ຺ຂາຍ ວິຊ຺ຊາຍ ສມນ຺ນາຄໂຕ ອິຕິປິ, ຘມ຺ມໂສຕໍ ສມາປນ຺ໂນ ອິຕິປິ, ອຣິໂຍ ນິພ຺ເພຘິກປຎ຺ໂຎ ອິຕິປິ, ອມຕທ຺ວາຣໍ ອາຫຈ຺ຈ ຕິຏ຺ຐຕິ ອິຕິປີ’’ຕິ. ທສມໍ.

ຄຫປຕິວຄ຺ໂຄ ປຎ຺ຈໂມ.

ຕສ຺ສຸທ຺ທານໍ –

ທ຺ເວ ປຎ຺ຈເວຣຠຍາ ວຸຕ຺ຕາ, ທຸກ຺ຂໍ ໂລໂກ ຈ ຎາຕິກໍ;

ອຎ຺ຎຕຣໍ ຊາຓຸສ຺ໂສຓິ ຈ, ໂລກາຍຕິເກນ ອຏ຺ຐມໍ;

ທ຺ເວ ອຣິຍສາວກາ ວຸຕ຺ຕາ, ວຄ຺ໂຄ ເຕນ ປວຸຈ຺ຈຕີຕິ.