໑໐. ຕຕິຍເຈຕນາສຸຕ຺ຕໍ

໔໐. ສາວຕ຺ຖິຍໍ ວິຫຣຕິ…ເປ… ‘‘ຍຎ຺ຈ, ຠິກ຺ຂເວ, ເຈເຕຕິ ຍຎ຺ຈ ປກປ຺ເປຕິ ຍຎ຺ຈ ອນຸເສຕິ ອາຣມ຺ມຓເມຕໍ ໂຫຕິ ວິຎ຺ຎາຓສ຺ສ ຐິຕິຍາ. ອາຣມ຺ມເຓ ສຕິ ປຕິຏ຺ຐາ ວິຎ຺ຎາຓສ຺ສ ໂຫຕິ. ຕສ຺ມິໍ ປຕິຏ຺ຐິເຕ ວິຎ຺ຎາເຓ ວິຣູຬ຺ເຫ ນຕິ ໂຫຕິ. ນຕິຍາ ສຕິ ອາຄຕິຄຕິ ໂຫຕິ. ອາຄຕິຄຕິຍາ ສຕິ ຈຸຕູປປາໂຕ ໂຫຕິ. ຈຸຕູປປາເຕ ສຕິ ອາຍຕິໍ ຊາຕິຊຣາມຣຓໍ ໂສກປຣິເທວທຸກ຺ຂໂທມນສ຺ສຸປາຍາສາ ສມ຺ຠວນ຺ຕິ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ’’.

‘‘ໂນ ເຈ, ຠິກ຺ຂເວ, ເຈເຕຕິ ໂນ ເຈ ປກປ຺ເປຕິ ອຖ ເຈ ອນຸເສຕິ, ອາຣມ຺ມຓເມຕໍ ໂຫຕິ ວິຎ຺ຎາຓສ຺ສ ຐິຕິຍາ. ອາຣມ຺ມເຓ ສຕິ ປຕິຏ຺ຐາ ວິຎ຺ຎາຓສ຺ສ ໂຫຕິ. ຕສ຺ມິໍ ປຕິຏ຺ຐິເຕ ວິຎ຺ຎາເຓ ວິຣູຬ຺ເຫ ນຕິ ໂຫຕິ. ນຕິຍາ ສຕິ ອາຄຕິຄຕິ ໂຫຕິ. ອາຄຕິຄຕິຍາ ສຕິ ຈຸຕູປປາໂຕ ໂຫຕິ. ຈຸຕູປປາເຕ ສຕິ ອາຍຕິໍ ຊາຕິຊຣາມຣຓໍ ໂສກປຣິເທວທຸກ຺ຂໂທມນສ຺ສຸປາຍາສາ ສມ຺ຠວນ຺ຕິ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

‘‘ຍໂຕ ຈ ໂຂ, ຠິກ຺ຂເວ, ໂນ ເຈວ ເຈເຕຕິ ໂນ ຈ ປກປ຺ເປຕິ ໂນ ຈ ອນຸເສຕິ, ອາຣມ຺ມຓເມຕໍ ນ ໂຫຕິ ວິຎ຺ຎາຓສ຺ສ ຐິຕິຍາ. ອາຣມ຺ມເຓ ອສຕິ ປຕິຏ຺ຐາ ວິຎ຺ຎາຓສ຺ສ ນ ໂຫຕິ. ຕທປ຺ປຕິຏ຺ຐິເຕ ວິຎ຺ຎາເຓ ອວິຣູຬ຺ເຫ ນຕິ ນ ໂຫຕິ. ນຕິຍາ ອສຕິ ອາຄຕິຄຕິ ນ ໂຫຕິ. ອາຄຕິຄຕິຍາ ອສຕິ ຈຸຕູປປາໂຕ ນ ໂຫຕິ. ຈຸຕູປປາເຕ ອສຕິ ອາຍຕິໍ ຊາຕິ ຊຣາມຣຓໍ ໂສກປຣິເທວທຸກ຺ຂໂທມນສ຺ສຸປາຍາສາ ນິຣຸຊ຺ຌນ຺ຕິ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ນິໂຣໂຘ ໂຫຕີ’’ຕິ. ທສມໍ.

ກຬາຣຂຕ຺ຕິຍວຄ຺ໂຄ ຈຕຸຕ຺ໂຖ.

ຕສ຺ສຸທ຺ທານໍ –

ຠູຕມິທໍ ກຬາຣຎ຺ຈ, ທຸເວ ຈ ຎາຓວຕ຺ຖູນິ;

ອວິຊ຺ຊາປຈ຺ຈຍາ ຈ ທ຺ເວ, ນຕຸມ຺ຫາ ເຈຕນາ ຕໂຍຕິ.