໙. ກສ຺ສກສຸຕ຺ຕໍ

໑໕໕. ສາວຕ຺ຖິນິທານໍ. ເຕນ ໂຂ ປນ ສມເຍນ ຠຄວາ ຠິກ຺ຂູນໍ ນິພ຺ພານປຏິສໍຍຸຕ຺ຕາຍ ຘມ຺ມິຍາ ກຖາຍ ສນ຺ທສ຺ເສຕິ ສມາທເປຕິ ສມຸຕ຺ເຕເຊຕິ ສມ຺ປຫໍເສຕິ. ເຕ ຈ ຠິກ຺ຂູ ອຏ຺ຐິໍ ກຕ຺ວາ ມນສິ ກຕ຺ວາ ສພ຺ພເຈຕສາ ສມນ຺ນາຫຣິຕ຺ວາ ໂອຫິຕໂສຕາ ຘມ຺ມໍ ສຸຓນ຺ຕິ.

ອຖ ໂຂ ມາຣສ຺ສ ປາປິມໂຕ ເອຕທໂຫສິ – ‘‘ອຍໍ ໂຂ ສມໂຓ ໂຄຕໂມ ຠິກ຺ຂູນໍ ນິພ຺ພານປຏິສໍຍຸຕ຺ຕາຍ ຘມ຺ມິຍາ ກຖາຍ…ເປ… ຍໍນູນາຫໍ ເຍນ ສມໂຓ ໂຄຕໂມ ເຕນຸປສງ຺ກເມຍ຺ຍໍ ວິຈກ຺ຂຸກມ຺ມາຍາ’’ຕິ. ອຖ ໂຂ ມາໂຣ ປາປິມາ ກສ຺ສກວຓ຺ຓໍ ອຠິນິມ຺ມິນິຕ຺ວາ ມຫນ຺ຕໍ ນງ຺ຄລໍ ຂນ຺ເຘ ກຣິຕ຺ວາ ທີຆປາຈນຍຏ຺ຐິໍ ຄເຫຕ຺ວາ ຫຏຫຏເກໂສ ສາຓສາຏິນິວຕ຺ໂຖ ກທ຺ທມມກ຺ຂິເຕຫິ ປາເທຫິ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ເອຕທໂວຈ – ‘‘ອປິ, ສມຓ, ພລີພທ຺ເທ ອທ຺ທສາ’’ຕິ? ‘‘ກິໍ ປນ, ປາປິມ, ເຕ ພລີພທ຺ເທຫີ’’ຕິ? ‘‘ມເມວ, ສມຓ, ຈກ຺ຂຸ, ມມ ຣູປາ, ມມ ຈກ຺ຂຸສມ຺ຜສ຺ສວິຎ຺ຎາຓາຍຕນໍ. ກຸຫິໍ ເມ, ສມຓ, ຄນ຺ຕ຺ວາ ໂມກ຺ຂສິ? ມເມວ, ສມຓ, ໂສຕໍ, ມມ ສທ຺ທາ…ເປ… ມເມວ, ສມຓ, ຆານໍ, ມມ ຄນ຺ຘາ; ມເມວ, ສມຓ, ຊິວ຺ຫາ, ມມ ຣສາ; ມເມວ, ສມຓ, ກາໂຍ, ມມ ໂຜຏ຺ຐພ຺ພາ; ມເມວ, ສມຓ, ມໂນ, ມມ ຘມ຺ມາ, ມມ ມໂນສມ຺ຜສ຺ສວິຎ຺ຎາຓາຍຕນໍ. ກຸຫິໍ ເມ, ສມຓ, ຄນ຺ຕ຺ວາ ໂມກ຺ຂສີ’’ຕິ?

‘‘ຕເວວ, ປາປິມ, ຈກ຺ຂຸ, ຕວ ຣູປາ, ຕວ ຈກ຺ຂຸສມ຺ຜສ຺ສວິຎ຺ຎາຓາຍຕນໍ. ຍຕ຺ຖ ຈ ໂຂ, ປາປິມ, ນຕ຺ຖິ ຈກ຺ຂຸ, ນຕ຺ຖິ ຣູປາ, ນຕ຺ຖິ ຈກ຺ຂຸສມ຺ຜສ຺ສວິຎ຺ຎາຓາຍຕນໍ, ອຄຕິ ຕວ ຕຕ຺ຖ, ປາປິມ. ຕເວວ, ປາປິມ, ໂສຕໍ, ຕວ ສທ຺ທາ, ຕວ ໂສຕສມ຺ຜສ຺ສວິຎ຺ຎາຓາຍຕນໍ. ຍຕ຺ຖ ຈ ໂຂ, ປາປິມ, ນຕ຺ຖິ ໂສຕໍ, ນຕ຺ຖິ ສທ຺ທາ, ນຕ຺ຖິ ໂສຕສມ຺ຜສ຺ສວິຎ຺ຎາຓາຍຕນໍ, ອຄຕິ ຕວ ຕຕ຺ຖ, ປາປິມ. ຕເວວ, ປາປິມ, ຆານໍ, ຕວ ຄນ຺ຘາ, ຕວ ຆານສມ຺ຜສ຺ສວິຎ຺ຎາຓາຍຕນໍ. ຍຕ຺ຖ ຈ ໂຂ, ປາປິມ, ນຕ຺ຖິ ຆານໍ, ນຕ຺ຖິ ຄນ຺ຘາ, ນຕ຺ຖິ ຆານສມ຺ຜສ຺ສວິຎ຺ຎາຓາຍຕນໍ, ອຄຕິ ຕວ ຕຕ຺ຖ, ປາປິມ. ຕເວວ, ປາປິມ, ຊິວ຺ຫາ, ຕວ ຣສາ, ຕວ ຊິວ຺ຫາສມ຺ຜສ຺ສວິຎ຺ຎາຓາຍຕນໍ…ເປ… ຕເວວ, ປາປິມ, ກາໂຍ, ຕວ ໂຜຏ຺ຐພ຺ພາ, ຕວ ກາຍສມ຺ຜສ຺ສວິຎ຺ຎາຓາຍຕນໍ…ເປ… ຕເວວ, ປາປິມ, ມໂນ, ຕວ ຘມ຺ມາ, ຕວ ມໂນສມ຺ຜສ຺ສວິຎ຺ຎາຓາຍຕນໍ. ຍຕ຺ຖ ຈ ໂຂ, ປາປິມ, ນຕ຺ຖິ ມໂນ, ນຕ຺ຖິ ຘມ຺ມາ, ນຕ຺ຖິ ມໂນສມ຺ຜສ຺ສວິຎ຺ຎາຓາຍຕນໍ, ອຄຕິ ຕວ ຕຕ຺ຖ, ປາປິມາ’’ຕິ.

‘‘ຍໍ ວທນ຺ຕິ ມມ ຍິທນ຺ຕິ, ເຍ ວທນ຺ຕິ ມມນ຺ຕິ ຈ;

ເອຕ຺ຖ ເຈ ເຕ ມໂນ ອຕ຺ຖິ, ນ ເມ ສມຓ ໂມກ຺ຂສີ’’ຕິ.

‘‘ຍໍ ວທນ຺ຕິ ນ ຕໍ ມຍ຺ຫໍ, ເຍ ວທນ຺ຕິ ນ ເຕ ອຫໍ;

ເອວໍ ປາປິມ ຊານາຫິ, ນ ເມ ມຄ຺ຄມ຺ປິ ທກ຺ຂສີ’’ຕິ.

ອຖ ໂຂ ມາໂຣ ປາປິມາ…ເປ… ຕຕ຺ເຖວນ຺ຕຣຘາຍີຕິ.