໗. ຉຜສ຺ສາຍຕນສຸຕ຺ຕໍ

໑໕໓. ເອກໍ ສມຍໍ ຠຄວາ ເວສາລິຍໍ ວິຫຣຕິ ມຫາວເນ ກູຏາຄາຣສາລາຍໍ. ເຕນ ໂຂ ປນ ສມເຍນ ຠຄວາ ຉນ຺ນໍ ຜສ຺ສາຍຕນານໍ ອຸປາທາຍ ຠິກ຺ຂູນໍ ຘມ຺ມິຍາ ກຖາຍ ສນ຺ທສ຺ເສຕິ ສມາທເປຕິ ສມຸຕ຺ເຕເຊຕິ ສມ຺ປຫໍເສຕິ. ເຕ ຈ ຠິກ຺ຂູ ອຏ຺ຐິໍ ກຕ຺ວາ ມນສິ ກຕ຺ວາ ສພ຺ພເຈຕສາ ສມນ຺ນາຫຣິຕ຺ວາ ໂອຫິຕໂສຕາ ຘມ຺ມໍ ສຸຓນ຺ຕິ.

ອຖ ໂຂ ມາຣສ຺ສ ປາປິມໂຕ ເອຕທໂຫສິ – ‘‘ອຍໍ ໂຂ ສມໂຓ ໂຄຕໂມ ຉນ຺ນໍ ຜສ຺ສາຍຕນານໍ ອຸປາທາຍ ຠິກ຺ຂູນໍ ຘມ຺ມິຍາ ກຖາຍ ສນ຺ທສ຺ເສຕິ ສມາທເປຕິ ສມຸຕ຺ເຕເຊຕິ ສປ຺ປຫໍເສຕິ. ເຕ ຈ ຠິກ຺ຂູ ອຏ຺ຐິໍ ກຕ຺ວາ ມນສິ ກຕ຺ວາ ສພ຺ພເຈຕສາ ສມນ຺ນາຫຣິຕ຺ວາ ໂອຫິຕໂສຕາ ຘມ຺ມໍ ສຸຓນ຺ຕິ. ຍໍນູນາຫໍ ເຍນ ສມໂຓ ໂຄຕໂມ ເຕນຸປສງ຺ກເມຍ຺ຍໍ ວິຈກ຺ຂຸກມ຺ມາຍາ’’ຕິ. ອຖ ໂຂ ມາໂຣ ປາປິມາ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວໂຕ ອວິທູເຣ ມຫນ຺ຕໍ ຠຍເຠຣວໍ ສທ຺ທມກາສິ, ອປິສ຺ສຸທໍ ປຖວີ ມຎ຺ເຎ ອຸນ຺ທ຺ຣີຍຕິ [ອຸທ຺ຣີຍຕິ (ສີ. ສ຺ຍາ. ກໍ. ປີ) ອຸ + ທຣ + ຍ + ຕິ = ອຸທ຺ຣີຍຕິ]. ອຖ ໂຂ ອຎ຺ຎຕໂຣ ຠິກ຺ຂຸ ອຎ຺ຎຕຣໍ ຠິກ຺ຂຸໍ ເອຕທໂວຈ – ‘‘ຠິກ຺ຂຸ, ຠິກ຺ຂຸ, ເອສາ ປຖວີ ມຎ຺ເຎ ອຸນ຺ທ຺ຣີຍຕີ’’ຕິ. ເອວໍ ວຸຕ຺ເຕ, ຠຄວາ ຕໍ ຠິກ຺ຂຸໍ ເອຕທໂວຈ – ‘‘ເນສາ ຠິກ຺ຂຸ ປຖວີ ອຸນ຺ທ຺ຣີຍຕິ. ມາໂຣ ເອໂສ ປາປິມາ ຕຸມ຺ຫາກໍ ວິຈກ຺ຂຸກມ຺ມາຍ ອາຄໂຕ’’ຕິ. ອຖ ໂຂ ຠຄວາ ‘‘ມາໂຣ ອຍໍ ປາປິມາ’’ ອິຕິ ວິທິຕ຺ວາ ມາຣໍ ປາປິມນ຺ຕໍ ຄາຖາຍ ອຊ຺ຌຠາສິ –

‘‘ຣູປາ ສທ຺ທາ ຣສາ ຄນ຺ຘາ, ຜສ຺ສາ ຘມ຺ມາ ຈ ເກວລາ;

ເອຕໍ ໂລກາມິສໍ ໂຆຣໍ, ເອຕ຺ຖ ໂລໂກ ວິມຸຈ຺ຉິໂຕ.

‘‘ເອຕຎ຺ຈ ສມຕິກ຺ກມ຺ມ, ສໂຕ ພຸທ຺ຘສ຺ສ ສາວໂກ;

ມາຣເຘຍ຺ຍໍ ອຕິກ຺ກມ຺ມ, ອາທິຈ຺ໂຈວ ວິໂຣຈຕີ’’ຕິ.

ອຖ ໂຂ ມາໂຣ ປາປິມາ…ເປ… ຕຕ຺ເຖວນ຺ຕຣຘາຍີຕິ.