໙. ສຸສິມສຸຕ຺ຕໍ

໑໑໐. ສາວຕ຺ຖິນິທານໍ. ອຖ ໂຂ ອາຍສ຺ມາ ອານນ຺ໂທ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ນໍ ໂຂ ອາຍສ຺ມນ຺ຕໍ ອານນ຺ທໍ ຠຄວາ ເອຕທໂວຈ – ‘‘ຕຸຍ຺ຫມ຺ປິ ໂນ, ອານນ຺ທ, ສາຣິປຸຕ຺ໂຕ ຣຸຈ຺ຈຕີ’’ຕິ?

‘‘ກສ຺ສ ຫິ ນາມ, ຠນ຺ເຕ, ອພາລສ຺ສ ອທຸຏ຺ຐສ຺ສ ອມູຬ຺ຫສ຺ສ ອວິປລ຺ລຕ຺ຖຈິຕ຺ຕສ຺ສ ອາຍສ຺ມາ ສາຣິປຸຕ຺ໂຕ ນ ຣຸຈ຺ເຈຍ຺ຍ? ປຓ຺ຑິໂຕ, ຠນ຺ເຕ, ອາຍສ຺ມາ ສາຣິປຸຕ຺ໂຕ. ມຫາປຎ຺ໂຎ, ຠນ຺ເຕ, ອາຍສ຺ມາ ສາຣິປຸຕ຺ໂຕ. ປຸຖຸປຎ຺ໂຎ, ຠນ຺ເຕ, ອາຍສ຺ມາ ສາຣິປຸຕ຺ໂຕ. ຫາສປຎ຺ໂຎ [ຫາສຸປຎ຺ໂຎ (ສີ.)], ຠນ຺ເຕ, ອາຍສ຺ມາ ສາຣິປຸຕ຺ໂຕ. ຊວນປຎ຺ໂຎ, ຠນ຺ເຕ, ອາຍສ຺ມາ ສາຣິປຸຕ຺ໂຕ. ຕິກ຺ຂປຎ຺ໂຎ, ຠນ຺ເຕ, ອາຍສ຺ມາ ສາຣິປຸຕ຺ໂຕ. ນິພ຺ເພຘິກປຎ຺ໂຎ, ຠນ຺ເຕ, ອາຍສ຺ມາ ສາຣິປຸຕ຺ໂຕ. ອປ຺ປິຈ຺ໂຉ, ຠນ຺ເຕ, ອາຍສ຺ມາ ສາຣິປຸຕ຺ໂຕ. ສນ຺ຕຸຏ຺ໂຐ, ຠນ຺ເຕ, ອາຍສ຺ມາ ສາຣິປຸຕ຺ໂຕ. ປວິວິຕ຺ໂຕ, ຠນ຺ເຕ, ອາຍສ຺ມາ ສາຣິປຸຕ຺ໂຕ. ອສໍສຏ຺ໂຐ, ຠນ຺ເຕ, ອາຍສ຺ມາ ສາຣິປຸຕ຺ໂຕ. ອາຣທ຺ຘວີຣິໂຍ, ຠນ຺ເຕ, ອາຍສ຺ມາ ສາຣິປຸຕ຺ໂຕ. ວຕ຺ຕາ, ຠນ຺ເຕ, ອາຍສ຺ມາ ສາຣິປຸຕ຺ໂຕ. ວຈນກ຺ຂໂມ, ຠນ຺ເຕ, ອາຍສ຺ມາ ສາຣິປຸຕ຺ໂຕ. ໂຈທໂກ, ຠນ຺ເຕ, ອາຍສ຺ມາ ສາຣິປຸຕ຺ໂຕ. ປາປຄຣຫີ, ຠນ຺ເຕ, ອາຍສ຺ມາ ສາຣິປຸຕ຺ໂຕ. ກສ຺ສ ຫິ ນາມ, ຠນ຺ເຕ, ອພາລສ຺ສ ອທຸຏ຺ຐສ຺ສ ອມູຬ຺ຫສ຺ສ ອວິປລ຺ລຕ຺ຖຈິຕ຺ຕສ຺ສ ອາຍສ຺ມາ ສາຣິປຸຕ຺ໂຕ ນ ຣຸຈ຺ເຈຍ຺ຍາ’’ຕິ?

‘‘ເອວເມຕໍ, ອານນ຺ທ, ເອວເມຕໍ, ອານນ຺ທ! ກສ຺ສ ຫິ ນາມ, ອານນ຺ທ, ອພາລສ຺ສ ອທຸຏ຺ຐສ຺ສ ອມູຬ຺ຫສ຺ສ ອວິປລ຺ລຕ຺ຖຈິຕ຺ຕສ຺ສ ສາຣິປຸຕ຺ໂຕ ນ ຣຸຈ຺ເຈຍ຺ຍ? ປຓ຺ຑິໂຕ, ອານນ຺ທ, ສາຣິປຸຕ຺ໂຕ. ມຫາປຎ຺ໂຎ, ອານນ຺ທ, ສາຣິປຸຕ຺ໂຕ. ປຸຖຸປຎ຺ໂຎ, ອານນ຺ທ, ສາຣິປຸຕ຺ໂຕ. ຫາສປຎ຺ໂຎ, ອານນ຺ທ, ສາຣິປຸຕ຺ໂຕ. ຊວນປຎ຺ໂຎ, ອານນ຺ທ, ສາຣິປຸຕ຺ໂຕ. ຕິກ຺ຂປຎ຺ໂຎ, ອານນ຺ທ, ສາຣິປຸຕ຺ໂຕ. ນິພ຺ເພຘິກປຎ຺ໂຎ, ອານນ຺ທ, ສາຣິປຸຕ຺ໂຕ. ອປ຺ປິຈ຺ໂຉ, ອານນ຺ທ, ສາຣິປຸຕ຺ໂຕ. ສນ຺ຕຸຏ຺ໂຐ, ອານນ຺ທ, ສາຣິປຸຕ຺ໂຕ. ປວິວິຕ຺ໂຕ, ອານນ຺ທ, ສາຣິປຸຕ຺ໂຕ. ອສໍສຏ຺ໂຐ, ອານນ຺ທ, ສາຣິປຸຕ຺ໂຕ. ອາຣທ຺ຘວີຣິໂຍ, ອານນ຺ທ, ສາຣິປຸຕ຺ໂຕ. ວຕ຺ຕາ, ອານນ຺ທ, ສາຣິປຸຕ຺ໂຕ. ວຈນກ຺ຂໂມ, ອານນ຺ທ, ສາຣິປຸຕ຺ໂຕ. ໂຈທໂກ, ອານນ຺ທ, ສາຣິປຸຕ຺ໂຕ. ປາປຄຣຫີ, ອານນ຺ທ, ສາຣິປຸຕ຺ໂຕ. ກສ຺ສ ຫິ ນາມ, ອານນ຺ທ, ອພາລສ຺ສ ອທຸຏ຺ຐສ຺ສ ອມູຬ຺ຫສ຺ສ ອວິປລ຺ລຕ຺ຖຈິຕ຺ຕສ຺ສ ສາຣິປຸຕ຺ໂຕ ນ ຣຸຈ຺ເຈຍ຺ຍາ’’ຕິ?

ອຖ ໂຂ ສຸສິໂມ [ສຸສີໂມ (ສີ.)] ເທວປຸຕ຺ໂຕ ອາຍສ຺ມໂຕ ສາຣິປຸຕ຺ຕສ຺ສ ວຓ຺ເຓ ຠຎ຺ຎມາເນ ມຫຕິຍາ ເທວປຸຕ຺ຕປຣິສາຍ ປຣິວຸໂຕ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ອຏ຺ຐາສິ. ເອກມນ຺ຕໍ ຐິໂຕ ໂຂ ສຸສິໂມ ເທວປຸຕ຺ໂຕ ຠຄວນ຺ຕໍ ເອຕທໂວຈ –

‘‘ເອວເມຕໍ, ຠຄວາ, ເອວເມຕໍ, ສຸຄຕ. ກສ຺ສ ຫິ ນາມ, ຠນ຺ເຕ, ອພາລສ຺ສ ອທຸຏ຺ຐສ຺ສ ອມູຬ຺ຫສ຺ສ ອວິປລ຺ລຕ຺ຖຈິຕ຺ຕສ຺ສ ອາຍສ຺ມາ ສາຣິປຸຕ຺ໂຕ ນ ຣຸຈ຺ເຈຍ຺ຍ? ປຓ຺ຑິໂຕ, ຠນ຺ເຕ, ອາຍສ຺ມາ ສາຣິປຸຕ຺ໂຕ. ມຫາປຎ຺ໂຎ, ຠນ຺ເຕ, ປຸຖຸປຎ຺ໂຎ, ຠນ຺ເຕ, ຫາສປຎ຺ໂຎ, ຠນ຺ເຕ, ຊວນປຎ຺ໂຎ, ຠນ຺ເຕ, ຕິກ຺ຂປຎ຺ໂຎ, ຠນ຺ເຕ, ນິພ຺ເພຘິກປຎ຺ໂຎ, ຠນ຺ເຕ, ອປ຺ປິຈ຺ໂຉ, ຠນ຺ເຕ, ສນ຺ຕຸຏ຺ໂຐ, ຠນ຺ເຕ, ປວິວິຕ຺ໂຕ, ຠນ຺ເຕ, ອສໍສຏ຺ໂຐ, ຠນ຺ເຕ, ອາຣທ຺ຘວີຣິໂຍ, ຠນ຺ເຕ, ວຕ຺ຕາ, ຠນ຺ເຕ, ວຈນກ຺ຂໂມ, ຠນ຺ເຕ, ໂຈທໂກ, ຠນ຺ເຕ, ປາປຄຣຫີ, ຠນ຺ເຕ, ອາຍສ຺ມາ ສາຣິປຸຕ຺ໂຕ. ກສ຺ສ ຫິ ນາມ, ຠນ຺ເຕ, ອພາລສ຺ສ ອທຸຏ຺ຐສ຺ສ ອມູຬ຺ຫສ຺ສ ອວິປລ຺ລຕ຺ຖຈິຕ຺ຕສ຺ສ ອາຍສ຺ມາ ສາຣິປຸຕ຺ໂຕ ນ ຣຸຈ຺ເຈຍ຺ຍ?

‘‘ອຫມ຺ປິ ຫິ, ຠນ຺ເຕ, ຍຎ຺ຎເທວ ເທວປຸຕ຺ຕປຣິສໍ ອຸປສງ຺ກມິໍ, ເອຕເທວ ພຫຸລໍ ສທ຺ທໍ ສຸຓາມິ – ‘ປຓ຺ຑິໂຕ ອາຍສ຺ມາ ສາຣິປຸຕ຺ໂຕ; ມຫາປຎ຺ໂຎ ອາຍສ຺ມາ, ປຸຖຸປຎ຺ໂຎ ອາຍສ຺ມາ, ຫາສປຎ຺ໂຎ ອາຍສ຺ມາ, ຊວນປຎ຺ໂຎ ອາຍສ຺ມາ, ຕິກ຺ຂປຎ຺ໂຎ ອາຍສ຺ມາ, ນິພ຺ເພຘິກປຎ຺ໂຎ ອາຍສ຺ມາ, ອປ຺ປິຈ຺ໂຉ ອາຍສ຺ມາ, ສນ຺ຕຸຏ຺ໂຐ ອາຍສ຺ມາ, ປວິວິຕ຺ໂຕ ອາຍສ຺ມາ, ອສໍສຏ຺ໂຐ ອາຍສ຺ມາ, ອາຣທ຺ຘວີຣິໂຍ ອາຍສ຺ມາ, ວຕ຺ຕາ ອາຍສ຺ມາ, ວຈນກ຺ຂໂມ ອາຍສ຺ມາ, ໂຈທໂກ ອາຍສ຺ມາ, ປາປຄຣຫີ ອາຍສ຺ມາ ສາຣິປຸຕ຺ໂຕ’ຕິ. ກສ຺ສ ຫິ ນາມ, ຠນ຺ເຕ, ອພາລສ຺ສ ອທຸຏ຺ຐສ຺ສ ອມູຬ຺ຫສ຺ສ ອວິປລ຺ລຕ຺ຖຈິຕ຺ຕສ຺ສ ອາຍສ຺ມາ ສາຣິປຸຕ຺ໂຕ ນ ຣຸຈ຺ເຈຍ຺ຍາ’’ຕິ?

ອຖ ໂຂ ສຸສິມສ຺ສ ເທວປຸຕ຺ຕສ຺ສ ເທວປຸຕ຺ຕປຣິສາ ອາຍສ຺ມໂຕ ສາຣິປຸຕ຺ຕສ຺ສ ວຓ຺ເຓ ຠຎ຺ຎມາເນ ອຕ຺ຕມນາ ປມຸທິຕາ ປີຕິໂສມນສ຺ສຊາຕາ ອຸຈ຺ຈາວຈາ ວຓ຺ຓນິຠາ ອຸປທໍເສຕິ.

‘‘ເສຍ຺ຍຖາປິ ນາມ ມຓິ ເວຬຸຣິໂຍ ສຸໂຠ ຊາຕິມາ ອຏ຺ຐໍໂສ ສຸປຣິກມ຺ມກໂຕ ປຓ຺ຑຸກມ຺ພເລ ນິກ຺ຂິຕ຺ໂຕ ຠາສເຕ ຈ ຕປເຕ ຈ ວິໂຣຈຕິ ຈ; ເອວເມວໍ ສຸສິມສ຺ສ ເທວປຸຕ຺ຕສ຺ສ ເທວປຸຕ຺ຕປຣິສາ ອາຍສ຺ມໂຕ ສາຣິປຸຕ຺ຕສ຺ສ ວຓ຺ເຓ ຠຎ຺ຎມາເນ ອຕ຺ຕມນາ ປມຸທິຕາ ປີຕິໂສມນສ຺ສຊາຕາ ອຸຈ຺ຈາວຈາ ວຓ຺ຓນິຠາ ອຸປທໍເສຕິ.

‘‘ເສຍ຺ຍຖາປິ ນາມ ນິກ຺ຂໍ ຊມ຺ໂພນທໍ ທກ຺ຂກມ຺ມາຣປຸຕ຺ຕອຸກ຺ກາມຸຂສຸກຸສລສມ຺ປຫຏ຺ຐໍ ປຓ຺ຑຸກມ຺ພເລ ນິກ຺ຂິຕ຺ຕໍ ຠາສເຕ ຈ ຕປເຕ ຈ ວິໂຣຈຕິ ຈ; ເອວເມວໍ ສຸສິມສ຺ສ ເທວປຸຕ຺ຕສ຺ສ ເທວປຸຕ຺ຕປຣິສາ ອາຍສ຺ມໂຕ ສາຣິປຸຕ຺ຕສ຺ສ ວຓ຺ເຓ ຠຎ຺ຎມາເນ ອຕ຺ຕມນາ ປມຸທິຕາ ປີຕິໂສມນສ຺ສຊາຕາ ອຸຈ຺ຈາວຈາ ວຓ຺ຓນິຠາ ອຸປທໍເສຕິ.

‘‘ເສຍ຺ຍຖາປິ ນາມ ສຣທສມເຍ ວິທ຺ເຘ ວິຄຕວລາຫເກ ເທເວ ຣຕ຺ຕິຍາ ປຈ຺ຈູສສມຍໍ ໂອສຘິຕາຣກາ ຠາສເຕ ຈ ຕປເຕ ຈ ວິໂຣຈຕິ ຈ; ເອວເມວໍ ສຸສິມສ຺ສ ເທວປຸຕ຺ຕສ຺ສ ເທວປຸຕ຺ຕປຣິສາ ອາຍສ຺ມໂຕ ສາຣິປຸຕ຺ຕສ຺ສ ວຓ຺ເຓ ຠຎ຺ຎມາເນ ອຕ຺ຕມນາ ປມຸທິຕາ ປີຕິໂສມນສ຺ສຊາຕາ ອຸຈ຺ຈາວຈາ ວຓ຺ຓນິຠາ ອຸປທໍເສຕິ.

‘‘ເສຍ຺ຍຖາປິ ນາມ ສຣທສມເຍ ວິທ຺ເຘ ວິຄຕວລາຫເກ ເທເວ ອາທິຈ຺ໂຈ ນຠໍ ອພ຺ຠຸສ຺ສກ຺ກມາໂນ [ອພ຺ຠຸສ຺ສຸກ຺ກມາໂນ (ສີ. ສ຺ຍາ. ກໍ. ປີ.), ອພ຺ຠຸຄ຺ຄມມາໂນ (ທີ. ນິ. ໒.໒໕໘)] ສພ຺ພໍ ອາກາສຄຕໍ ຕມຄຕໍ ອຠິວິຫຈ຺ຈ ຠາສເຕ ຈ ຕປເຕ ຈ ວິໂຣຈຕິ ຈ; ເອວເມວໍ ສຸສິມສ຺ສ ເທວປຸຕ຺ຕສ຺ສ ເທວປຸຕ຺ຕປຣິສາ ອາຍສ຺ມໂຕ ສາຣິປຸຕ຺ຕສ຺ສ ວຓ຺ເຓ ຠຎ຺ຎມາເນ ອຕ຺ຕມນາ ປມຸທິຕາ ປີຕິໂສມນສ຺ສຊາຕາ ອຸຈ຺ຈາວຈາ ວຓ຺ຓນິຠາ ອຸປທໍເສຕິ.

ອຖ ໂຂ ສຸສິໂມ ເທວປຸຕ຺ໂຕ ອາຍສ຺ມນ຺ຕໍ ສາຣິປຸຕ຺ຕໍ ອາຣພ຺ຠ ຠຄວໂຕ ສນ຺ຕິເກ ອິມໍ ຄາຖໍ ອຠາສິ –

‘‘ປຓ຺ຑິໂຕຕິ ສມຎ຺ຎາໂຕ, ສາຣິປຸຕ຺ໂຕ ອໂກຘໂນ;

ອປ຺ປິຈ຺ໂຉ ໂສຣໂຕ ທນ຺ໂຕ, ສຕ຺ຖຸວຓ຺ຓາຠໂຕ ອິສີ’’ຕິ.

ອຖ ໂຂ ຠຄວາ ອາຍສ຺ມນ຺ຕໍ ສາຣິປຸຕ຺ຕໍ ອາຣພ຺ຠ ສຸສິມໍ ເທວປຸຕ຺ຕໍ ຄາຖາຍ ປຈ຺ຈຠາສິ –

‘‘ປຓ຺ຑິໂຕຕິ ສມຎ຺ຎາໂຕ, ສາຣິປຸຕ຺ໂຕ ອໂກຘໂນ;

ອປ຺ປິຈ຺ໂຉ ໂສຣໂຕ ທນ຺ໂຕ, ກາລໍ ກງ຺ຂຕິ ສຸທນ຺ໂຕ’’ [ກາລໍ ກງ຺ຂຕິ ຠຕໂກ ສຸທນ຺ໂຕ (ສີ.), ກາລໍ ກງ຺ຂຕິ ຠາວິໂຕ ສຸທນ຺ໂຕ (ສ຺ຍາ. ກໍ.), ກາລໍ ກງ຺ຂຕິ ຠຕິໂກ ສຸທນ຺ໂຕ (ປີ.)] ຕິ.