໑໐. ນານາຕິຕ຺ຖິຍສາວກສຸຕ຺ຕໍ

໑໑໑. ເອວໍ ເມ ສຸຕໍ – ເອກໍ ສມຍໍ ຠຄວາ ຣາຊຄເຫ ວິຫຣຕິ ເວຬຸວເນ ກລນ຺ທກນິວາເປ. ອຖ ໂຂ ສມ຺ພຫຸລາ ນານາຕິຕ຺ຖິຍສາວກາ ເທວປຸຕ຺ຕາ ອສໂມ ຈ ສຫລິ [ສຫລີ (ສີ. ສ຺ຍາ. ກໍ. ປີ.)] ຈ ນີໂກ [ນິງ຺ໂກ (ສີ. ປີ.), ນິໂກ (ສ຺ຍາ. ກໍ.)] ຈ ອາໂກຏໂກ ຈ ເວຄພ຺ຠຣິ ຈ [ເວຏມ຺ພຣີ ຈ (ສີ. ສ຺ຍາ. ກໍ. ປີ.)] ມາຓວຄາມິໂຍ ຈ ອຠິກ຺ກນ຺ຕາຍ ຣຕ຺ຕິຍາ ອຠິກ຺ກນ຺ຕວຓ຺ຓາ ເກວລກປ຺ປໍ ເວຬຸວນໍ ໂອຠາເສຕ຺ວາ ເຍນ ຠຄວາ ເຕນຸປສງ຺ກມິໍສຸ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ອຏ຺ຐໍສຸ. ເອກມນ຺ຕໍ ຐິໂຕ ໂຂ ອສໂມ ເທວປຸຕ຺ໂຕ ປູຣຓໍ ກສ຺ສປໍ ອາຣພ຺ຠ ຠຄວໂຕ ສນ຺ຕິເກ ອິມໍ ຄາຖໍ ອຠາສິ –

‘‘ອິຘ ຉິນ຺ທິຕມາຣິເຕ, ຫຕຊານີສຸ ກສ຺ສໂປ;

ນ ປາປໍ ສມນຸປສ຺ສຕິ, ປຸຎ຺ຎໍ ວາ ປນ ອຕ຺ຕໂນ;

ສ ເວ ວິສ຺ສາສມາຈິກ຺ຂິ, ສຕ຺ຖາ ອຣຫຕິ ມານນ’’ນ຺ຕິ.

ອຖ ໂຂ ສຫລິ ເທວປຸຕ຺ໂຕ ມກ຺ຂລິໍ ໂຄສາລໍ ອາຣພ຺ຠ ຠຄວໂຕ ສນ຺ຕິເກ ອິມໍ ຄາຖໍ ອຠາສິ –

‘‘ຕໂປຊິຄຸຈ຺ຉາຍ ສຸສໍວຸຕຕ຺ໂຕ,

ວາຈໍ ປຫາຍ ກລຫໍ ຊເນນ;

ສໂມສວຊ຺ຊາ ວິຣໂຕ ສຈ຺ຈວາທີ,

ນ ຫິ ນູນ ຕາທິສໍ ກໂຣຕິ [ນ ຫ ນຸນ ຕາທີ ປກໂຣຕິ (ສີ. ສ຺ຍາ. ກໍ.)] ປາປ’’ນ຺ຕິ.

ອຖ ໂຂ ນີໂກ ເທວປຸຕ຺ໂຕ ນິຄຓ຺ຐໍ ນາຏປຸຕ຺ຕໍ [ນາຖປຸຕ຺ຕໍ (ສີ.)] ອາຣພ຺ຠ ຠຄວໂຕ ສນ຺ຕິເກ ອິມໍ ຄາຖໍ ອຠາສິ –

‘‘ເຊຄຸຈ຺ຉີ ນິປໂກ ຠິກ຺ຂຸ, ຈາຕຸຍາມສຸສໍວຸໂຕ;

ທິຏ຺ຐໍ ສຸຕຎ຺ຈ ອາຈິກ຺ຂໍ, ນ ຫິ ນູນ ກິພ຺ພິສີ ສິຍາ’’ຕິ.

ອຖ ໂຂ ອາໂກຏໂກ ເທວປຸຕ຺ໂຕ ນານາຕິຕ຺ຖິເຍ ອາຣພ຺ຠ ຠຄວໂຕ ສນ຺ຕິເກ ອິມໍ ຄາຖໍ ອຠາສິ –

‘‘ປກຸຘໂກ ກາຕິຍາໂນ ນິຄຓ຺ໂຐ,

ເຍ ຈາປິເມ ມກ຺ຂລິປູຣຓາເສ;

ຄຓສ຺ສ ສຕ຺ຖາໂຣ ສາມຎ຺ຎປ຺ປຕ຺ຕາ,

ນ ຫິ ນູນ ເຕ ສປ຺ປຸຣິເສຫິ ທູເຣ’’ຕິ.

ອຖ ໂຂ ເວຄພ຺ຠຣິ ເທວປຸຕ຺ໂຕ ອາໂກຏກໍ ເທວປຸຕ຺ຕໍ ຄາຖາຍ ປຈ຺ຈຠາສິ –

‘‘ສຫາຈຣິເຕນ [ສຫາຣເວນາປິ (ກ. ສີ.), ສຄາຣເວນາປິ (ປີ.)] ຉໂວ ສິຄາໂລ [ສິງ຺ຄາໂລ (ກ.)],

ນ ໂກຕ຺ຖຸໂກ ສີຫສໂມ ກທາຈິ;

ນຄ຺ໂຄ ມຸສາວາທີ ຄຓສ຺ສ ສຕ຺ຖາ,

ສງ຺ກສ຺ສຣາຈາໂຣ ນ ສຕໍ ສຣິກ຺ໂຂ’’ຕິ.

ອຖ ໂຂ ມາໂຣ ປາປິມາ ເພຄພ຺ຠຣິໍ ເທວປຸຕ຺ຕໍ ອນ຺ວາວິສິຕ຺ວາ ຠຄວໂຕ ສນ຺ຕິເກ ອິມໍ ຄາຖໍ ອຠາສິ –

‘‘ຕໂປຊິຄຸຈ຺ຉາຍ ອາຍຸຕ຺ຕາ, ປາລຍໍ ປວິເວກິຍໍ;

ຣູເປ ຈ ເຍ ນິວິຏ຺ຐາເສ, ເທວໂລກາຠິນນ຺ທິໂນ;

ເຕ ເວ ສມ຺ມານຸສາສນ຺ຕິ, ປຣໂລກາຍ ມາຕິຍາ’’ຕິ.

ອຖ ໂຂ ຠຄວາ, ‘ມາໂຣ ອຍໍ ປາປິມາ’ ອິຕິ ວິທິຕ຺ວາ, ມາຣໍ ປາປິມນ຺ຕໍ ຄາຖາຍ ປຈ຺ຈຠາສິ –

‘‘ເຍ ເກຈິ ຣູປາ ອິຘ ວາ ຫຸຣໍ ວາ,

ເຍ ຈນ຺ຕລິກ຺ຂສ຺ມິໍ ປຠາສວຓ຺ຓາ;

ສພ຺ເພວ ເຕ ເຕ ນມຸຈິປ຺ປສຕ຺ຖາ,

ອາມິສໍວ ມຈ຺ຉານໍ ວຘາຍ ຂິຕ຺ຕາ’’ຕິ.

ອຖ ໂຂ ມາຓວຄາມິໂຍ ເທວປຸຕ຺ໂຕ ຠຄວນ຺ຕໍ ອາຣພ຺ຠ ຠຄວໂຕ ສນ຺ຕິເກ ອິມາ ຄາຖາໂຍ ອຠາສິ –

‘‘ວິປຸໂລ ຣາຊຄຫີຍານໍ, ຄິຣິເສຏ຺ໂຐ ປວຸຈ຺ຈຕິ;

ເສໂຕ ຫິມວຕໍ ເສຏ຺ໂຐ, ອາທິຈ຺ໂຈ ອຆຄາມິນໍ.

‘‘ສມຸທ຺ໂທ ອຸທຘິນໍ ເສຏ຺ໂຐ, ນກ຺ຂຕ຺ຕານຎ຺ຈ ຈນ຺ທິມາ [ນກ຺ຂຕ຺ຕານໍວ ຈນ຺ທິມາ (ກ.)];

ສເທວກສ຺ສ ໂລກສ຺ສ, ພຸທ຺ໂຘ ອຄ຺ໂຄ ປວຸຈ຺ຈຕີ’’ຕິ.

ນານາຕິຕ຺ຖິຍວຄ຺ໂຄ ຕຕິໂຍ.

ຕສ຺ສຸທ຺ທານໍ –

ສິໂວ ເຂໂມ ຈ ເສຣີ ຈ, ຆຏີ ຊນ຺ຕຸ ຈ ໂຣຫິໂຕ;

ນນ຺ໂທ ນນ຺ທິວິສາໂລ ຈ, ສຸສິໂມ ນານາຕິຕ຺ຖິເຍນ ເຕ ທສາຕິ.

ເທວປຸຕ຺ຕສໍຍຸຕ຺ຕໍ ສມຕ຺ຕໍ.