໓. ຘຊຄ຺ຄສຸຕ຺ຕໍ

໒໔໙. ສາວຕ຺ຖິຍໍ. ຕຕ຺ຣ ໂຂ ຠຄວາ ຠິກ຺ຂູ ອາມນ຺ເຕສິ – ‘‘ຠິກ຺ຂໂວ’’ຕິ. ‘‘ຠທນ຺ເຕ’’ຕິ ເຕ ຠິກ຺ຂູ ຠຄວໂຕ ປຈ຺ຈສ຺ໂສສຸໍ. ຠຄວາ ເອຕທໂວຈ –

‘‘ຠູຕປຸພ຺ພໍ, ຠິກ຺ຂເວ, ເທວາສຸຣສງ຺ຄາໂມ ສມຸປພ຺ຍູຬ຺ໂຫ ອໂຫສິ. ອຖ ໂຂ, ຠິກ຺ຂເວ, ສກ຺ໂກ ເທວານມິນ຺ໂທ ເທເວ ຕາວຕິໍເສ ອາມນ຺ເຕສິ –

‘ສເຈ, ມາຣິສາ, ເທວານໍ ສງ຺ຄາມຄຕານໍ ອຸປ຺ປຊ຺ເຊຍ຺ຍ ຠຍໍ ວາ ຉມ຺ຠິຕຕ຺ຕໍ ວາ ໂລມຫໍໂສ ວາ, ມເມວ ຕສ຺ມິໍ ສມເຍ ຘຊຄ຺ຄໍ ອຸລ຺ໂລເກຍ຺ຍາຖ. ມມຎ຺ຫິ ໂວ ຘຊຄ຺ຄໍ ອຸລ຺ໂລກຍຕໍ ຍໍ ຠວິສ຺ສຕິ ຠຍໍ ວາ ຉມ຺ຠິຕຕ຺ຕໍ ວາ ໂລມຫໍໂສ ວາ, ໂສ ປຫີຍິສ຺ສຕິ’.

‘ໂນ ເຈ ເມ ຘຊຄ຺ຄໍ ອຸລ຺ໂລເກຍ຺ຍາຖ, ອຖ ປຊາປຕິສ຺ສ ເທວຣາຊສ຺ສ ຘຊຄ຺ຄໍ ອຸລ຺ໂລເກຍ຺ຍາຖ. ປຊາປຕິສ຺ສ ຫິ ໂວ ເທວຣາຊສ຺ສ ຘຊຄ຺ຄໍ ອຸລ຺ໂລກຍຕໍ ຍໍ ຠວິສ຺ສຕິ ຠຍໍ ວາ ຉມ຺ຠິຕຕ຺ຕໍ ວາ ໂລມຫໍໂສ ວາ, ໂສ ປຫີຍິສ຺ສຕິ’.

‘ໂນ ເຈ ປຊາປຕິສ຺ສ ເທວຣາຊສ຺ສ ຘຊຄ຺ຄໍ ອຸລ຺ໂລເກຍ຺ຍາຖ, ອຖ ວຣຸຓສ຺ສ ເທວຣາຊສ຺ສ ຘຊຄ຺ຄໍ ອຸລ຺ໂລເກຍ຺ຍາຖ. ວຣຸຓສ຺ສ ຫິ ໂວ ເທວຣາຊສ຺ສ ຘຊຄ຺ຄໍ ອຸລ຺ໂລກຍຕໍ ຍໍ ຠວິສ຺ສຕິ ຠຍໍ ວາ ຉມ຺ຠິຕຕ຺ຕໍ ວາ ໂລມຫໍໂສ ວາ, ໂສ ປຫີຍິສ຺ສຕິ’.

‘ໂນ ເຈ ວຣຸຓສ຺ສ ເທວຣາຊສ຺ສ ຘຊຄ຺ຄໍ ອຸລ຺ໂລເກຍ຺ຍາຖ, ອຖ ອີສານສ຺ສ ເທວຣາຊສ຺ສ ຘຊຄ຺ຄໍ ອຸລ຺ໂລເກຍ຺ຍາຖ. ອີສານສ຺ສ ຫິ ໂວ ເທວຣາຊສ຺ສ ຘຊຄ຺ຄໍ ອຸລ຺ໂລກຍຕໍ ຍໍ ຠວິສ຺ສຕິ ຠຍໍ ວາ ຉມ຺ຠິຕຕ຺ຕໍ ວາ ໂລມຫໍໂສ ວາ, ໂສ ປຫີຍິສ຺ສຕີ’’’ຕິ.

‘‘ຕໍ ໂຂ ປນ, ຠິກ຺ຂເວ, ສກ຺ກສ຺ສ ວາ ເທວານມິນ຺ທສ຺ສ ຘຊຄ຺ຄໍ ອຸລ຺ໂລກຍຕໍ, ປຊາປຕິສ຺ສ ວາ ເທວຣາຊສ຺ສ ຘຊຄ຺ຄໍ ອຸລ຺ໂລກຍຕໍ, ວຣຸຓສ຺ສ ວາ ເທວຣາຊສ຺ສ ຘຊຄ຺ຄໍ ອຸລ຺ໂລກຍຕໍ, ອີສານສ຺ສ ວາ ເທວຣາຊສ຺ສ ຘຊຄ຺ຄໍ ອຸລ຺ໂລກຍຕໍ ຍໍ ຠວິສ຺ສຕິ ຠຍໍ ວາ ຉມ຺ຠິຕຕ຺ຕໍ ວາ ໂລມຫໍໂສ ວາ, ໂສ ປຫີເຍຖາປິ ໂນປິ ປຫີເຍຖ [ໂນ ປຫີເຍຖ (ກ.)].

‘‘ຕໍ ກິສ຺ສ ເຫຕຸ? ສກ຺ໂກ ຫິ, ຠິກ຺ຂເວ, ເທວານມິນ຺ໂທ ອວີຕຣາໂຄ ອວີຕໂທໂສ ອວີຕໂມໂຫ ຠີຣຸ ຉມ຺ຠີ ອຸຕ຺ຣາສີ ປລາຍີຕິ.

‘‘ອຫຎ຺ຈ ໂຂ, ຠິກ຺ຂເວ, ເອວໍ ວທາມິ – ‘ສເຈ ຕຸມ຺ຫາກໍ, ຠິກ຺ຂເວ, ອຣຎ຺ຎຄຕານໍ ວາ ຣຸກ຺ຂມູລຄຕານໍ ວາ ສຸຎ຺ຎາຄາຣຄຕານໍ ວາ ອຸປ຺ປຊ຺ເຊຍ຺ຍ ຠຍໍ ວາ ຉມ຺ຠິຕຕ຺ຕໍ ວາ ໂລມຫໍໂສ ວາ, ມເມວ ຕສ຺ມິໍ ສມເຍ ອນຸສ຺ສເຣຍ຺ຍາຖ – ອິຕິປິ ໂສ ຠຄວາ ອຣຫໍ ສມ຺ມາສມ຺ພຸທ຺ໂຘ ວິຊ຺ຊາຈຣຓສມ຺ປນ຺ໂນ ສຸຄໂຕ ໂລກວິທູ ອນຸຕ຺ຕໂຣ ປຸຣິສທມ຺ມສາຣຖິ ສຕ຺ຖາ ເທວມນຸສ຺ສານໍ ພຸທ຺ໂຘ ຠຄວາ’ຕິ. ມມຎ຺ຫິ ໂວ, ຠິກ຺ຂເວ, ອນຸສ຺ສຣຕໍ ຍໍ ຠວິສ຺ສຕິ ຠຍໍ ວາ ຉມ຺ຠິຕຕ຺ຕໍ ວາ ໂລມຫໍໂສ ວາ, ໂສ ປຫີຍິສ຺ສຕິ.

‘‘ໂນ ເຈ ມໍ ອນຸສ຺ສເຣຍ຺ຍາຖ, ອຖ ຘມ຺ມໍ ອນຸສ຺ສເຣຍ຺ຍາຖ – ‘ສ຺ວາກ຺ຂາໂຕ ຠຄວຕາ ຘມ຺ໂມ ສນ຺ທິຏ຺ຐິໂກ ອກາລິໂກ ເອຫິປສ຺ສິໂກ ໂອປເນຍ຺ຍິໂກ ປຈ຺ຈຕ຺ຕໍ ເວທິຕພ຺ໂພ ວິຎ຺ຎູຫີ’ຕິ. ຘມ຺ມຎ຺ຫິ ໂວ, ຠິກ຺ຂເວ, ອນຸສ຺ສຣຕໍ ຍໍ ຠວິສ຺ສຕິ ຠຍໍ ວາ ຉມ຺ຠິຕຕ຺ຕໍ ວາ ໂລມຫໍໂສ ວາ, ໂສ ປຫີຍິສ຺ສຕິ.

‘‘ໂນ ເຈ ຘມ຺ມໍ ອນຸສ຺ສເຣຍ຺ຍາຖ, ອຖ ສງ຺ຆໍ ອນຸສ຺ສເຣຍ຺ຍາຖ – ‘ສຸປ຺ປຏິປນ຺ໂນ ຠຄວໂຕ ສາວກສງ຺ໂຆ ອຸຊຸປ຺ປຏິປນ຺ໂນ ຠຄວໂຕ ສາວກສງ຺ໂຆ ຎາຍປ຺ປຏິປນ຺ໂນ ຠຄວໂຕ ສາວກສງ຺ໂຆ ສາມີຈິປ຺ປຏິປນ຺ໂນ ຠຄວໂຕ ສາວກສງ຺ໂຆ, ຍທິທໍ ຈຕ຺ຕາຣິ ປຸຣິສຍຸຄານິ ອຏ຺ຐ ປຸຣິສປຸຄ຺ຄລາ ເອສ ຠຄວໂຕ ສາວກສງ຺ໂຆ, ອາຫຸເນຍ຺ໂຍ ປາຫຸເນຍ຺ໂຍ ທກ຺ຂິເຓຍ຺ໂຍ ອຎ຺ຊລິກຣຓີໂຍ ອນຸຕ຺ຕຣໍ ປຸຎ຺ຎກ຺ເຂຕ຺ຕໍ ໂລກສ຺ສາ’ຕິ. ສງ຺ຆຎ຺ຫິ ໂວ, ຠິກ຺ຂເວ, ອນຸສ຺ສຣຕໍ ຍໍ ຠວິສ຺ສຕິ ຠຍໍ ວາ ຉມ຺ຠິຕຕ຺ຕໍ ວາ ໂລມຫໍໂສ ວາ, ໂສ ປຫີຍິສ຺ສຕິ.

‘‘ຕໍ ກິສ຺ສ ເຫຕຸ? ຕຖາຄໂຕ ຫິ, ຠິກ຺ຂເວ, ອຣຫໍ ສມ຺ມາສມ຺ພຸທ຺ໂຘ ວີຕຣາໂຄ ວີຕໂທໂສ ວີຕໂມໂຫ ອຠີຣຸ ອຈ຺ຉມ຺ຠີ ອນຸຕ຺ຣາສີ ອປລາຍີ’’ຕິ. ອິທມໂວຈ ຠຄວາ. ອິທໍ ວຕ຺ວານ ສຸຄໂຕ ອຖາປຣໍ ເອຕທໂວຈ ສຕ຺ຖາ –

‘‘ອຣຎ຺ເຎ ຣຸກ຺ຂມູເລ ວາ, ສຸຎ຺ຎາຄາເຣວ ຠິກ຺ຂໂວ;

ອນຸສ຺ສເຣຖ [ອນຸສ຺ສເຣຍ຺ຍາຖ (ກ.) ປທສິທ຺ຘິ ປນ ຈິນ຺ເຕຕພ຺ພາ] ສມ຺ພຸທ຺ຘໍ, ຠຍໍ ຕຸມ຺ຫາກ ໂນ ສິຍາ.

‘‘ໂນ ເຈ ພຸທ຺ຘໍ ສເຣຍ຺ຍາຖ, ໂລກເຊຏ຺ຐໍ ນຣາສຠໍ;

ອຖ ຘມ຺ມໍ ສເຣຍ຺ຍາຖ, ນິຍ຺ຍານິກໍ ສຸເທສິຕໍ.

‘‘ໂນ ເຈ ຘມ຺ມໍ ສເຣຍ຺ຍາຖ, ນິຍ຺ຍານິກໍ ສຸເທສິຕໍ;

ອຖ ສງ຺ຆໍ ສເຣຍ຺ຍາຖ, ປຸຎ຺ຎກ຺ເຂຕ຺ຕໍ ອນຸຕ຺ຕຣໍ.

‘‘ເອວໍ ພຸທ຺ຘໍ ສຣນ຺ຕານໍ, ຘມ຺ມໍ ສງ຺ຆຎ຺ຈ ຠິກ຺ຂໂວ;

ຠຍໍ ວາ ຉມ຺ຠິຕຕ຺ຕໍ ວາ, ໂລມຫໍໂສ ນ ເຫສ຺ສຕີ’’ຕິ.