໔. ເວປຈິຕ຺ຕິສຸຕ຺ຕໍ

໒໕໐. ສາວຕ຺ຖິນິທານໍ. ‘‘ຠູຕປຸພ຺ພໍ, ຠິກ຺ຂເວ, ເທວາສຸຣສງ຺ຄາໂມ ສມຸປພ຺ຍູຬ຺ໂຫ ອໂຫສິ. ອຖ ໂຂ, ຠິກ຺ຂເວ, ເວປຈິຕ຺ຕິ ອສຸຣິນ຺ໂທ ອສຸເຣ ອາມນ຺ເຕສິ – ‘ສເຈ, ມາຣິສາ, ເທວານໍ ອສຸຣສງ຺ຄາເມ ສມຸປພ຺ຍູຬ຺ເຫ ອສຸຣາ ຊິເນຍ຺ຍຸໍ ເທວາ ປຣາຊິເນຍ຺ຍຸໍ [ປຣາເຊຍ຺ຍຸໍ (ສີ. ປີ.)], ເຍນ ນໍ ສກ຺ກໍ ເທວານມິນ຺ທໍ ກຓ຺ຐປຎ຺ຈເມຫິ ພນ຺ຘເນຫິ ພນ຺ຘິຕ຺ວາ ມມ ສນ຺ຕິເກ ອາເນຍ຺ຍາຖ ອສຸຣປຸຣ’ນ຺ຕິ. ສກ຺ໂກປິ ໂຂ, ຠິກ຺ຂເວ, ເທວານມິນ຺ໂທ ເທເວ ຕາວຕິໍເສ ອາມນ຺ເຕສິ – ‘ສເຈ, ມາຣິສາ, ເທວານໍ ອສຸຣສງ຺ຄາເມ ສມຸປພ຺ຍູຬ຺ເຫ ເທວາ ຊິເນຍ຺ຍຸໍ ອສຸຣາ ປຣາຊິເນຍ຺ຍຸໍ, ເຍນ ນໍ ເວປຈິຕ຺ຕິໍ ອສຸຣິນ຺ທໍ ກຓ຺ຐປຎ຺ຈເມຫິ ພນ຺ຘເນຫິ ພນ຺ຘິຕ຺ວາ ມມ ສນ຺ຕິເກ ອາເນຍ຺ຍາຖ ສຸຘມ຺ມສຠ’’’ນ຺ຕິ. ຕສ຺ມິໍ ໂຂ ປນ, ຠິກ຺ຂເວ, ສງ຺ຄາເມ ເທວາ ຊິນິໍສຸ, ອສຸຣາ ປຣາຊິນິໍສຸ [ປຣາຊິໍສຸ (ສີ. ປີ.)]. ອຖ ໂຂ, ຠິກ຺ຂເວ, ເທວາ ຕາວຕິໍສາ ເວປຈິຕ຺ຕິໍ ອສຸຣິນ຺ທໍ ກຓ຺ຐປຎ຺ຈເມຫິ ພນ຺ຘເນຫິ ພນ຺ຘິຕ຺ວາ ສກ຺ກສ຺ສ ເທວານມິນ຺ທສ຺ສ ສນ຺ຕິເກ ອາເນສຸໍ ສຸຘມ຺ມສຠໍ. ຕຕ຺ຣ ສຸທໍ, ຠິກ຺ຂເວ, ເວປຈິຕ຺ຕິ ອສຸຣິນ຺ໂທ ກຓ຺ຐປຎ຺ຈເມຫິ ພນ຺ຘເນຫິ ພທ຺ໂຘ ສກ຺ກໍ ເທວານມິນ຺ທໍ ສຸຘມ຺ມສຠໍ ປວິສນ຺ຕຎ຺ຈ ນິກ຺ຂມນ຺ຕຎ຺ຈ ອສພ຺ຠາຫິ ຜຣຸສາຫິ ວາຈາຫິ ອກ຺ໂກສຕິ ປຣິຠາສຕິ. ອຖ ໂຂ, ຠິກ຺ຂເວ, ມາຕລິ ສງ຺ຄາຫໂກ ສກ຺ກໍ ເທວານມິນ຺ທໍ ຄາຖາຫິ ອຊ຺ຌຠາສິ –

‘‘ຠຍາ ນຸ ມຆວາ ສກ຺ກ, ທຸພ຺ພລ຺ຍາ ໂນ ຕິຕິກ຺ຂສິ;

ສຸຓນ຺ໂຕ ຜຣຸສໍ ວາຈໍ, ສມ຺ມຸຂາ ເວປຈິຕ຺ຕິໂນ’’ຕິ.

‘‘ນາຫໍ ຠຍາ ນ ທຸພ຺ພລ຺ຍາ, ຂມາມິ ເວປຈິຕ຺ຕິໂນ;

ກຖຎ຺ຫິ ມາທິໂສ ວິຎ຺ຎູ, ພາເລນ ປຏິສໍຍຸເຊ’’ຕິ.

‘‘ຠິຍ຺ໂຍ ພາລາ ປຠິຊ຺ເຊຍ຺ຍຸໍ, ໂນ ຈສ຺ສ ປຏິເສຘໂກ;

ຕສ຺ມາ ຠຸເສນ ທຓ຺ເຑນ, ຘີໂຣ ພາລໍ ນິເສຘເຍ’’ຕິ.

‘‘ເອຕເທວ ອຫໍ ມຎ຺ເຎ, ພາລສ຺ສ ປຏິເສຘນໍ;

ປຣໍ ສງ຺ກຸປິຕໍ ຎຕ຺ວາ, ໂຍ ສໂຕ ອຸປສມ຺ມຕີ’’ຕິ.

‘‘ເອຕເທວ ຕິຕິກ຺ຂາຍ, ວຊ຺ຊໍ ປສ຺ສາມິ ວາສວ;

ຍທາ ນໍ ມຎ຺ຎຕິ ພາໂລ, ຠຍາ ມ຺ຍາຍໍ ຕິຕິກ຺ຂຕິ;

ອຊ຺ຌາຣຸຫຕິ ທຸມ຺ເມໂຘ, ໂຄວ ຠິຍ຺ໂຍ ປລາຍິນ’’ນ຺ຕິ.

‘‘ກາມໍ ມຎ຺ຎຕຸ ວາ ມາ ວາ, ຠຍາ ມ຺ຍາຍໍ ຕິຕິກ຺ຂຕິ;

ສທຕ຺ຖປຣມາ ອຕ຺ຖາ, ຂນ຺ຕ຺ຍາ ຠິຍ຺ໂຍ ນ ວິຊ຺ຊຕິ.

‘‘ໂຍ ຫເວ ພລວາ ສນ຺ໂຕ, ທຸພ຺ພລສ຺ສ ຕິຕິກ຺ຂຕິ;

ຕມາຫຸ ປຣມໍ ຂນ຺ຕິໍ, ນິຈ຺ຈໍ ຂມຕິ ທຸພ຺ພໂລ.

‘‘ອພລໍ ຕໍ ພລໍ ອາຫຸ, ຍສ຺ສ ພາລພລໍ ພລໍ;

ພລສ຺ສ ຘມ຺ມຄຸຕ຺ຕສ຺ສ, ປຏິວຕ຺ຕາ ນ ວິຊ຺ຊຕິ.

‘‘ຕສ຺ເສວ ເຕນ ປາປິໂຍ, ໂຍ ກຸທ຺ຘໍ ປຏິກຸຊ຺ຌຕິ;

ກຸທ຺ຘໍ ອປ຺ປຏິກຸຊ຺ຌນ຺ໂຕ, ສງ຺ຄາມໍ ເຊຕິ ທຸຊ຺ຊຍໍ.

‘‘ອຸຠິນ຺ນມຕ຺ຖໍ ຈຣຕິ, ອຕ຺ຕໂນ ຈ ປຣສ຺ສ ຈ;

ປຣໍ ສງ຺ກຸປິຕໍ ຎຕ຺ວາ, ໂຍ ສໂຕ ອຸປສມ຺ມຕິ.

‘‘ອຸຠິນ຺ນໍ ຕິກິຈ຺ຉນ຺ຕານໍ, ອຕ຺ຕໂນ ຈ ປຣສ຺ສ ຈ;

ຊນາ ມຎ຺ຎນ຺ຕິ ພາໂລຕິ, ເຍ ຘມ຺ມສ຺ສ ອໂກວິທາ’’ຕິ.

‘‘ໂສ ຫິ ນາມ, ຠິກ຺ຂເວ, ສກ຺ໂກ ເທວານມິນ຺ໂທ ສກໍ ປຸຎ຺ຎຜລໍ ອຸປຊີວມາໂນ ເທວານໍ ຕາວຕິໍສານໍ ອິສ຺ສຣິຍາຘິປຈ຺ຈໍ ຣຊ຺ຊໍ ກາເຣນ຺ໂຕ ຂນ຺ຕິໂສຣຈ຺ຈສ຺ສ ວຓ຺ຓວາທີ ຠວິສ຺ສຕິ. ອິຘ ໂຂ ຕໍ, ຠິກ຺ຂເວ, ໂສເຠຖ ຍໍ ຕຸມ຺ເຫ ເອວໍ ສ຺ວາກ຺ຂາເຕ ຘມ຺ມວິນເຍ ປພ຺ພຊິຕາ ສມານາ ຂມາ ຈ ຠເວຍ຺ຍາຖ ໂສຣຕາ ຈາ’’ຕິ.