໑໐. ສມຸທ຺ທກສຸຕ຺ຕໍ

໒໕໖. ສາວຕ຺ຖິຍໍ. ‘‘ຠູຕປຸພ຺ພໍ, ຠິກ຺ຂເວ, ສມ຺ພຫຸລາ ອິສໂຍ ສີລວນ຺ໂຕ ກລ຺ຍາຓຘມ຺ມາ ສມຸທ຺ທຕີເຣ ປຓ຺ຓກຸຏີສຸ ສມ຺ມນ຺ຕິ. ເຕນ ໂຂ ປນ ສມເຍນ ເທວາສຸຣສງ຺ຄາໂມ ສມຸປພ຺ຍູຬ຺ໂຫ ອໂຫສິ. ອຖ ໂຂ, ຠິກ຺ຂເວ, ເຕສໍ ອິສີນໍ ສີລວນ຺ຕານໍ ກລ຺ຍາຓຘມ຺ມານໍ ເອຕທໂຫສິ – ‘ຘມ຺ມິກາ ໂຂ ເທວາ, ອຘມ຺ມິກາ ອສຸຣາ. ສິຍາປິ ໂນ ອສຸຣໂຕ ຠຍໍ. ຍໍນູນ ມຍໍ ສມ຺ພຣໍ ອສຸຣິນ຺ທໍ ອຸປສງ຺ກມິຕ຺ວາ ອຠຍທກ຺ຂິຓໍ ຍາເຈຍ຺ຍາມາ’’’ຕິ. ‘‘ອຖ ໂຂ, ຠິກ຺ຂເວ, ເຕ ອິສໂຍ ສີລວນ຺ໂຕ ກລ຺ຍາຓຘມ຺ມາ – ເສຍ຺ຍຖາປິ ນາມ ພລວາ ປຸຣິໂສ ສມິຎ຺ຊິຕໍ ວາ ພາຫໍ ປສາເຣຍ຺ຍ, ປສາຣິຕໍ ວາ ພາຫໍ ສມິຎ຺ເຊຍ຺ຍ ເອວເມວ – ສມຸທ຺ທຕີເຣ ປຓ຺ຓກຸຏີສຸ ອນ຺ຕຣຫິຕາ ສມ຺ພຣສ຺ສ ອສຸຣິນ຺ທສ຺ສ ສມ຺ມຸເຂ ປາຕຸຣເຫສຸໍ. ອຖ ໂຂ, ຠິກ຺ຂເວ, ເຕ ອິສໂຍ ສີລວນ຺ໂຕ ກລ຺ຍາຓຘມ຺ມາ ສມ຺ພຣໍ ອສຸຣິນ຺ທໍ ຄາຖາຍ ອຊ຺ຌຠາສິໍສຸ –

‘‘ອິສໂຍ ສມ຺ພຣໍ ປຕ຺ຕາ, ຍາຈນ຺ຕິ ອຠຍທກ຺ຂິຓໍ;

ກາມໍກໂຣ ຫິ ເຕ ທາຕຸໍ, ຠຍສ຺ສ ອຠຍສ຺ສ ວາ’’ຕິ.

‘‘ອິສີນໍ ອຠຍໍ ນຕ຺ຖິ, ທຸຏ຺ຐານໍ ສກ຺ກເສວິນໍ;

ອຠຍໍ ຍາຈມານານໍ, ຠຍເມວ ທທາມິ ໂວ’’ຕິ.

‘‘ອຠຍໍ ຍາຈມານານໍ, ຠຍເມວ ທທາສິ ໂນ;

ປຏິຄ຺ຄຓ຺ຫາມ ເຕ ເອຕໍ, ອກ຺ຂຍໍ ໂຫຕຸ ເຕ ຠຍໍ.

‘‘ຍາທິສໍ ວປເຕ ພີຊໍ, ຕາທິສໍ ຫຣເຕ ຜລໍ;

ກລ຺ຍາຓກາຣີ ກລ຺ຍາຓໍ, ປາປກາຣີ ຈ ປາປກໍ;

ປວຸຕ຺ຕໍ ຕາຕ ເຕ ພີຊໍ, ຜລໍ ປຈ຺ຈນຸໂຠສ຺ສສີ’’ຕິ.

‘‘ອຖ ໂຂ, ຠິກ຺ຂເວ, ເຕ ອິສໂຍ ສີລວນ຺ໂຕ ກລ຺ຍາຓຘມ຺ມາ ສມ຺ພຣໍ ອສຸຣິນ຺ທໍ ອຠິສປິຕ຺ວາ – ເສຍ຺ຍຖາປິ ນາມ ພລວາ ປຸຣິໂສ ສມິຎ຺ຊິຕໍ ວາ ພາຫໍ ປສາເຣຍ຺ຍ, ປສາຣິຕໍ ວາ ພາຫໍ ສມິຎ຺ເຊຍ຺ຍ ເອວເມວ – ສມ຺ພຣສ຺ສ ອສຸຣິນ຺ທສ຺ສ ສມ຺ມຸເຂ ອນ຺ຕຣຫິຕາ ສມຸທ຺ທຕີເຣ ປຓ຺ຓກຸຏີສຸ ປາຕຸຣເຫສຸໍ. ອຖ ໂຂ, ຠິກ຺ຂເວ, ສມ຺ພໂຣ ອສຸຣິນ຺ໂທ ເຕຫິ ອິສີຫິ ສີລວນ຺ເຕຫິ ກລ຺ຍາຓຘມ຺ເມຫິ ອຠິສປິໂຕ ຣຕ຺ຕິຍາ ສຸທໍ ຕິກ຺ຂຕ຺ຕຸໍ ອຸພ຺ພິຊ຺ຊີ’’ຕິ.

ປຐໂມ ວຄ຺ໂຄ.

ຕສ຺ສຸທ຺ທານໍ –

ສຸວີຣໍ ສຸສີມຎ຺ເຈວ, ຘຊຄ຺ຄໍ ເວປຈິຕ຺ຕິໂນ;

ສຸຠາສິຕໍ ຊຍຎ຺ເຈວ, ກຸລາວກໍ ນທຸພ຺ຠິຍໍ;

ເວໂຣຈນ ອສຸຣິນ຺ໂທ, ອິສໂຍ ອຣຎ຺ຎກຎ຺ເຈວ;

ອິສໂຍ ຈ ສມຸທ຺ທກາຕິ.