໗. ປຸນພ຺ພສຸສຸຕ຺ຕໍ

໒໔໑. ເອກໍ ສມຍໍ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຠຄວາ ຠິກ຺ຂູ ນິພ຺ພານປຏິສໍຍຸຕ຺ຕາຍ ຘມ຺ມິຍາ ກຖາຍ ສນ຺ທສ຺ເສຕິ ສມາທເປຕິ ສມຸຕ຺ເຕເຊຕິ ສມ຺ປຫໍເສຕິ. ເຕ ຈ ຠິກ຺ຂູ ອຏ຺ຐິໍ ກຕ຺ວາ ມນສິ ກຕ຺ວາ ສພ຺ພເຈຕສາ ສມນ຺ນາຫຣິຕ຺ວາ ໂອຫິຕໂສຕາ ຘມ຺ມໍ ສຸຓນ຺ຕິ. ອຖ ໂຂ ປຸນພ຺ພສຸມາຕາ ຍກ຺ຂິນີ ປຸຕ຺ຕເກ ເອວໍ ໂຕເສສິ –

‘‘ຕຸຓ຺ຫີ ອຸຕ຺ຕຣິເກ ໂຫຫິ, ຕຸຓ຺ຫີ ໂຫຫິ ປຸນພ຺ພສຸ;

ຍາວາຫໍ ພຸທ຺ຘເສຏ຺ຐສ຺ສ, ຘມ຺ມໍ ໂສສ຺ສາມິ ສຕ຺ຖຸໂນ.

‘‘ນິພ຺ພານໍ ຠຄວາ ອາຫ, ສພ຺ພຄນ຺ຖປ຺ປໂມຈນໍ;

ອຕິເວລາ ຈ ເມ ໂຫຕິ, ອສ຺ມິໍ ຘມ຺ເມ ປິຍາຍນາ.

‘‘ປິໂຍ ໂລເກ ສໂກ ປຸຕ຺ໂຕ, ປິໂຍ ໂລເກ ສໂກ ປຕິ;

ຕໂຕ ປິຍຕຣາ ມຍ຺ຫໍ, ອສ຺ສ ຘມ຺ມສ຺ສ ມຄ຺ຄນາ.

‘‘ນ ຫິ ປຸຕ຺ໂຕ ປຕິ ວາປິ, ປິໂຍ ທຸກ຺ຂາ ປໂມຈເຍ;

ຍຖາ ສທ຺ຘມ຺ມສ຺ສວນໍ, ທຸກ຺ຂາ ໂມເຈຕິ ປາຓິນໍ.

‘‘ໂລເກ ທຸກ຺ຂປເຣຕສ຺ມິໍ, ຊຣາມຣຓສໍຍຸເຕ;

ຊຣາມຣຓໂມກ຺ຂາຍ, ຍໍ ຘມ຺ມໍ ອຠິສມ຺ພຸຘໍ;

ຕໍ ຘມ຺ມໍ ໂສຕຸມິຈ຺ຉາມິ, ຕຸຓ຺ຫີ ໂຫຫິ ປຸນພ຺ພສູ’’ຕິ.

‘‘ອມ຺ມາ ນ ພ຺ຍາຫຣິສ຺ສາມິ, ຕຸຓ຺ຫີຠູຕາຍມຸຕ຺ຕຣາ;

ຘມ຺ມເມວ ນິສາເມຫິ, ສທ຺ຘມ຺ມສ຺ສວນໍ ສຸຂໍ;

ສທ຺ຘມ຺ມສ຺ສ ອນຎ຺ຎາຍ, ອມ຺ມາ ທຸກ຺ຂໍ ຈຣາມເສ.

‘‘ເອສ ເທວມນຸສ຺ສານໍ, ສມ຺ມູຬ຺ຫານໍ ປຠງ຺ກໂຣ;

ພຸທ຺ໂຘ ອນ຺ຕິມສາຣີໂຣ, ຘມ຺ມໍ ເທເສຕິ ຈກ຺ຂຸມາ’’ຕິ.

‘‘ສາຘຸ ໂຂ ປຓ຺ຑິໂຕ ນາມ, ປຸຕ຺ໂຕ ຊາໂຕ ອຸເຣສໂຍ;

ປຸຕ຺ໂຕ ເມ ພຸທ຺ຘເສຏ຺ຐສ຺ສ, ຘມ຺ມໍ ສຸທ຺ຘໍ ປິຍາຍຕິ.

‘‘ປຸນພ຺ພສຸ ສຸຂີ ໂຫຫິ, ອຊ຺ຊາຫມ຺ຫິ ສມຸຄ຺ຄຕາ;

ທິຏ຺ຐານິ ອຣິຍສຈ຺ຈານິ, ອຸຕ຺ຕຣາປິ ສຸຓາຕຸ ເມ’’ຕິ.