໑໑. ສຸນິກ຺ຂິຕ຺ຕວິມານວຕ຺ຖຸ

໑໒໘໒. ‘‘ອຸຈ຺ຈມິທໍ ມຓິຖູຓໍ ວິມານໍ, ສມນ຺ຕໂຕ ທ຺ວາທສ ໂຍຊນານິ;

ກູຏາຄາຣາ ສຕ຺ຕສຕາ ອຸຬາຣາ, ເວຬຸຣິຍຖມ຺ຠາ ຣຸຈກຕ຺ຖຕາ ສຸຠາ.

໑໒໘໓. ‘‘ຕຕ຺ຖຈ຺ຉສິ ປິວສິ ຂາທສິ ຈ, ທິພ຺ພາ ຈ ວີຓາ ປວທນ຺ຕິ ວຄ຺ຄຸໍ;

ທິພ຺ພາ ຣສາ ກາມຄຸເຓຕ຺ຖ ປຎ຺ຈ, ນາຣິໂຍ ຈ ນຈ຺ຈນ຺ຕິ ສຸວຓ຺ຓຉນ຺ນາ.

໑໒໘໔. ‘‘ເກນ ເຕຕາທິໂສ ວຓ຺ໂຓ, ເກນ ເຕ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເຕ ໂຠຄາ, ເຍ ເກຈິ ມນໂສ ປິຍາ.

໑໒໘໕. ‘‘ປຸຈ຺ຉາມິ ‘ຕໍ ເທວ ມຫານຸຠາວ, ມນຸສ຺ສຠູໂຕ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາໂວ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໑໒໘໖. ໂສ ເທວປຸຕ຺ໂຕ ອຕ຺ຕມໂນ, ໂມຄ຺ຄລ຺ລາເນນ ປຸຈ຺ຉິໂຕ;

ປຎ຺ຫໍ ປຸຏ຺ໂຐ ວິຍາກາສິ, ຍສ຺ສ ກມ຺ມສ຺ສິທໍ ຜລໍ.

໑໒໘໗. ‘‘ທຸນ຺ນິກ຺ຂິຕ຺ຕໍ ມາລໍ ສຸນິກ຺ຂິປິຕ຺ວາ, ປຕິຏ຺ຐເປຕ຺ວາ ສຸຄຕສ຺ສ ຖູເປ;

ມຫິທ຺ຘິໂກ ຈມ຺ຫິ ມຫານຸຠາໂວ, ທິພ຺ເພຫິ ກາເມຫິ ສມງ຺ຄິຠູໂຕ.

໑໒໘໘. ‘‘ເຕນ ເມຕາທິໂສ ວຓ຺ໂຓ,

ເຕນ ເມ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເມ ໂຠຄາ,

ເຍ ເກຈິ ມນໂສ ປິຍາ.

໑໒໘໙. ‘‘ອກ຺ຂາມິ ເຕ ຠິກ຺ຂຸ ມຫານຸຠາວ,

ມນຸສ຺ສຠູໂຕ ຍມຫໍ ອກາສິໍ;

ເຕນມ຺ຫິ ເອວໍ ຊລິຕານຸຠາໂວ,

ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

ສຸນິກ຺ຂິຕ຺ຕວິມານໍ ເອກາທສມໍ.

ສຸນິກ຺ຂິຕ຺ຕວຄ຺ໂຄ ສຕ຺ຕໂມ ນິຏ຺ຐິໂຕ.

ຕສ຺ສຸທ຺ທານໍ –

ທ຺ເວ ທລິທ຺ທາ ວນວິຫາຣາ, ຠຕໂກ ໂຄປາລກຓ຺ຑກາ;

ອເນກວຓ຺ຓມຏ຺ຐກຸຓ຺ຑລີ, ເສຣີສໂກ ສຸນິກ຺ຂິຕ຺ຕໍ;

ປຸຣິສານໍ ຕຕິໂຍ ວຄ຺ໂຄ ປວຸຈ຺ຈຕີຕິ.

ຠາຓວາຣໍ ຈຕຸຕ຺ຖໍ ນິຏ຺ຐິຕໍ.