໖. ປາຍາສິວຄ຺ໂຄ

໑. ປຐມອຄາຣິຍວິມານວຕ຺ຖຸ

໑໐໔໘. ‘‘ຍຖາ ວນໍ ຈິຕ຺ຕລຕໍ ປຠາສຕິ [ປກາສຕິ (ກ.)], ອຸຍ຺ຍານເສຏ຺ຐໍ ຕິທສານມຸຕ຺ຕມໍ;

ຕຖູປມໍ ຕຸຍ຺ຫມິທໍ ວິມານໍ, ໂອຠາສຍໍ ຕິຏ຺ຐຕິ ອນ຺ຕລິກ຺ເຂ.

໑໐໔໙. ‘‘ເທວິທ຺ຘິປຕ຺ໂຕສິ ມຫານຸຠາໂວ, ມນຸສ຺ສຠູໂຕ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາໂວ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໑໐໕໐. ໂສ ເທວປຸຕ຺ໂຕ ອຕ຺ຕມໂນ, ໂມຄ຺ຄລ຺ລາເນນ ປຸຈ຺ຉິໂຕ;

ປຎ຺ຫໍ ປຸຏ຺ໂຐ ວິຍາກາສິ, ຍສ຺ສ ກມ຺ມສ຺ສິທໍ ຜລໍ.

໑໐໕໑. ‘‘ອຫຎ຺ຈ ຠຣິຍາ ຈ ມນຸສ຺ສໂລເກ, ໂອປານຠູຕາ ຆຣມາວສິມ຺ຫ;

ອນ຺ນຎ຺ຈ ປານຎ຺ຈ ປສນ຺ນຈິຕ຺ຕາ, ສກ຺ກຈ຺ຈ ທານໍ ວິປຸລໍ ອທມ຺ຫ.

໑໐໕໒. ‘‘ເຕນ ເມຕາທິໂສ ວຓ຺ໂຓ…ເປ…ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

ປຐມອຄາຣິຍວິມານໍ ປຐມໍ.

໒. ທຸຕິຍອຄາຣິຍວິມານວຕ຺ຖຸ

໑໐໕໔. ‘‘ຍຖາ ວນໍ ຈິຕ຺ຕລຕໍ ປຠາສຕິ, ອຸຍ຺ຍານເສຏ຺ຐໍ ຕິທສານມຸຕ຺ຕມໍ;

ຕຖູປມໍ ຕຸຍ຺ຫມິທໍ ວິມານໍ, ໂອຠາສຍໍ ຕິຏ຺ຐຕິ ອນ຺ຕລິກ຺ເຂ.

໑໐໕໕. ‘‘ເທວິທ຺ຘິປຕ຺ໂຕສິ ມຫານຸຠາໂວ, ມນຸສ຺ສຠູໂຕ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາໂວ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໑໐໕໖. ໂສ ເທວປຸຕ຺ໂຕ ອຕ຺ຕມໂນ…ເປ… ຍສ຺ສ ກມ຺ມສ຺ສິທໍ ຜລໍ.

໑໐໕໗. ‘‘ອຫຎ຺ຈ ຠຣິຍາ ຈ ມນຸສ຺ສໂລເກ, ໂອປານຠູຕາ ຆຣມາວສິມ຺ຫ;

ອນ຺ນຎ຺ຈ ປານຎ຺ຈ ປສນ຺ນຈິຕ຺ຕາ, ສກ຺ກຈ຺ຈ ທານໍ ວິປຸລໍ ອທມ຺ຫ.

໑໐໕໘. ‘‘ເຕນ ເມຕາທິໂສ ວຓ຺ໂຓ…ເປ… ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

ທຸຕິຍອຄາຣິຍວິມານໍ ທຸຕິຍໍ.

໓. ຜລທາຍກວິມານວຕ຺ຖຸ

໑໐໖໐. ‘‘ອຸຈ຺ຈມິທໍ ມຓິຖູຓໍ ວິມານໍ, ສມນ຺ຕໂຕ ໂສຬສ ໂຍຊນານິ;

ກູຏາຄາຣາ ສຕ຺ຕສຕາ ອຸຬາຣາ, ເວຬຸຣິຍຖມ຺ຠາ ຣຸຈກຕ຺ຖຕາ ສຸຠາ.

໑໐໖໑. ‘‘ຕຕ຺ຖຈ຺ຉສິ ປິວສິ ຂາທສິ ຈ, ທິພ຺ພາ ຈ ວີຓາ ປວທນ຺ຕິ ວຄ຺ຄຸໍ;

ອຏ຺ຐຏ຺ຐກາ ສິກ຺ຂິຕາ ສາຘຸຣູປາ, ທິພ຺ພາ ຈ ກຎ຺ຎາ ຕິທສຈຣາ ອຸຬາຣາ;

ນຈ຺ຈນ຺ຕິ ຄາຍນ຺ຕິ ປໂມທຍນ຺ຕິ.

໑໐໖໒. ‘‘ເທວິທ຺ຘິປຕ຺ໂຕສິ ມຫານຸຠາໂວ, ມນຸສ຺ສຠູໂຕ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາໂວ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໑໐໖໓. ໂສ ເທວປຸຕ຺ໂຕ ອຕ຺ຕມໂນ…ເປ… ຍສ຺ສ ກມ຺ມສ຺ສິທໍ ຜລໍ.

໑໐໖໔. ‘‘ຜລທາຍີ ຜລໍ ວິປຸລໍ ລຠຕິ, ທທມຸຊຸຄເຕສຸ ປສນ຺ນມານໂສ;

ໂສ ຫິ ປໂມທຕິ [ໂມທຕິ (ສີ. ສ຺ຍາ. ປີ.)] ສຄ຺ຄຄໂຕ ຕິທິເວ [ຕຕ຺ຖ (ກ.)], ອນຸໂຠຕິ ຈ ປຸຎ຺ຎຜລໍ ວິປຸລໍ.

໑໐໖໕. ‘‘ຕເວວາຫໍ [ຕເຖວາຫໍ (ສີ. ສ຺ຍາ. ປີ.)] ມຫາມຸນິ, ອທາສິໍ ຈຕຸໂຣ ຜເລ.

໑໐໖໖. ‘‘ຕສ຺ມາ ຫິ ຜລໍ ອລເມວ ທາຕຸໍ, ນິຈ຺ຈໍ ມນຸສ຺ເສນ ສຸຂຕ຺ຖິເກນ;

ທິພ຺ພານິ ວາ ປຕ຺ຖຍຕາ ສຸຂານິ, ມນຸສ຺ສໂສຠຄ຺ຄຕມິຈ຺ຉຕາ ວາ.

໑໐໖໗. ‘‘ເຕນ ເມຕາທິໂສ ວຓ຺ໂຓ…ເປ…

ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

ຜລທາຍກວິມານໍ ຕຕິຍໍ.

໔. ປຐມອຸປສ຺ສຍທາຍກວິມານວຕ຺ຖຸ

໑໐໖໙. ‘‘ຈນ຺ໂທ ຍຖາ ວິຄຕວລາຫເກ ນເຠ, ໂອຠາສຍໍ ຄຈ຺ຉຕິ ອນ຺ຕລິກ຺ເຂ;

ຕຖູປມໍ ຕຸຍ຺ຫມິທໍ ວິມານໍ, ໂອຠາສຍໍ ຕິຏ຺ຐຕິ ອນ຺ຕລິກ຺ເຂ.

໑໐໗໐. ‘‘ເທວິທ຺ຘິປຕ຺ໂຕສິ ມຫານຸຠາວາ, ມນຸສ຺ສຠູໂຕ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາໂວ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໑໐໗໑. ໂສ ເທວປຸຕ຺ໂຕ ອຕ຺ຕມໂນ…ເປ… ຍສ຺ສ ກມ຺ມສ຺ສິທໍ ຜລໍ.

໑໐໗໒. ‘‘ອຫຎ຺ຈ ຠຣິຍາ ຈ ມນຸສ຺ສໂລເກ, ອຸປສ຺ສຍໍ ອຣຫໂຕ ອທມ຺ຫ;

ອນ຺ນຎ຺ຈ ປານຎ຺ຈ ປສນ຺ນຈິຕ຺ຕາ, ສກ຺ກຈ຺ຈ ທານໍ ວິປຸລໍ ອທມ຺ຫ.

໑໐໗໓. ‘‘ເຕນ ເມຕາທິໂສ ວຓ຺ໂຓ…ເປ… ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

ປຐມອຸປສ຺ສຍທາຍກວິມານໍ ຈຕຸຕ຺ຖໍ.

໕. ທຸຕິຍອຸປສ຺ສຍທາຍກວິມານວຕ຺ຖຸ

໑໐໗໕. ສູຣິໂຍ ຍຖາ ວິຄຕວລາຫເກ ນເຠ…ເປ….

(ຍຖາ ປຸຣິມວິມານໍ ຕຖາ ວິຕ຺ຖາເຣຕພ຺ພໍ).

໑໐໗໙. ‘‘ເຕນ ເມຕາທິໂສ ວຓ຺ໂຓ…ເປ…ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

ທຸຕິຍອຸປສ຺ສຍທາຍກວິມານໍ ປຎ຺ຈມໍ.

໖. ຠິກ຺ຂາທາຍກວິມານວຕ຺ຖຸ

໑໐໘໑. ‘‘ອຸຈ຺ຈມິທໍ ມຓິຖູຓໍ ວິມານໍ, ສມນ຺ຕໂຕ ທ຺ວາທສ ໂຍຊນານິ;

ກູຏາຄາຣາ ສຕ຺ຕສຕາ ອຸຬາຣາ, ເວຬຸຣິຍຖມ຺ຠາ ຣຸຈກຕ຺ຖຕາ ສຸຠາ.

໑໐໘໒. ‘‘ເທວິທ຺ຘິປຕ຺ໂຕສິ ມຫານຸຠາໂວ, ມນຸສ຺ສຠູໂຕ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາໂວ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໑໐໘໓. ໂສ ເທວປຸຕ຺ໂຕ ອຕ຺ຕມໂນ…ເປ… ຍສ຺ສ ກມ຺ມສ຺ສິທໍ ຜລໍ.

໑໐໘໔. ‘‘ອຫໍ ມນຸສ຺ເສສຸ ມນຸສ຺ສຠູໂຕ, ທິສ຺ວານ ຠິກ຺ຂຸໍ ຕສິຕໍ ກິລນ຺ຕໍ;

ເອກາຫໍ ຠິກ຺ຂໍ ປຏິປາທຍິສ຺ສໍ, ສມງ຺ຄິ ຠຕ຺ເຕນ ຕທາ ອກາສິໍ.

໑໐໘໕. ‘‘ເຕນ ເມຕາທິໂສ ວຓ຺ໂຓ…ເປ… ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

ຠິກ຺ຂາທາຍກວິມານໍ ຉຏ຺ຐໍ.

໗. ຍວປາລກວິມານວຕ຺ຖຸ

໑໐໘໗. ‘‘ອຸຈ຺ຈມິທໍ ມຓິຖູຓໍ ວິມານໍ…ເປ… ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໑໐໘໙. ໂສ ເທວປຸຕ຺ໂຕ ອຕ຺ຕມໂນ…ເປ… ຍສ຺ສ ກມ຺ມສ຺ສິທໍ ຜລໍ.

໑໐໙໐. ‘‘ອຫໍ ມນຸສ຺ເສສຸ ມນຸສ຺ສຠູໂຕ, ອໂຫສິໍ ຍວປາລໂກ;

ອທ຺ທສໍ ວິຣຊໍ ຠິກ຺ຂຸໍ, ວິປ຺ປສນ຺ນມນາວິລໍ.

໑໐໙໑. ‘‘ຕສ຺ສ ອທາສຫໍ ຠາຄໍ, ປສນ຺ໂນ ເສຫິ ປາຓິຠິ;

ກຸມ຺ມາສປິຓ຺ຑໍ ທຕ຺ວານ, ໂມທາມິ ນນ຺ທເນ ວເນ.

໑໐໙໒. ‘‘ເຕນ ເມຕາທິໂສ ວຓ຺ໂຓ…ເປ… ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

ຍວປາລກວິມານໍ ສຕ຺ຕມໍ.

໘. ປຐມກຸຓ຺ຑລີວິມານວຕ຺ຖຸ

໑໐໙໔. ‘‘ອລງ຺ກໂຕ ມລ຺ຍຘໂຣ ສຸວຕ຺ໂຖ, ສຸກຸຓ຺ຑລີ ກປ຺ປິຕເກສມສ຺ສຸ;

ອາມຸຕ຺ຕຫຕ຺ຖາຠຣໂຓ ຍສສ຺ສີ, ທິພ຺ເພ ວິມານມ຺ຫິ ຍຖາປິ ຈນ຺ທິມາ.

໑໐໙໕. ‘‘ທິພ຺ພາ ຈ ວີຓາ ປວທນ຺ຕິ ວຄ຺ຄຸໍ, ອຏ຺ຐຏ຺ຐກາ ສິກ຺ຂິຕາ ສາຘຸຣູປາ;

ທິພ຺ພາ ຈ ກຎ຺ຎາ ຕິທສຈຣາ ອຸຬາຣາ, ນຈ຺ຈນ຺ຕິ ຄາຍນ຺ຕິ ປໂມທຍນ຺ຕິ.

໑໐໙໖. ‘‘ເທວິທ຺ຘິປຕ຺ໂຕສິ ມຫານຸຠາໂວ, ມນຸສ຺ສຠູໂຕ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາໂວ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໑໐໙໗. ໂສ ເທວປຸຕ຺ໂຕ ອຕ຺ຕມໂນ…ເປ… ຍສ຺ສ ກມ຺ມສ຺ສິທໍ ຜລໍ.

໑໐໙໘. ‘‘ອຫໍ ມນຸສ຺ເສສຸ ມນຸສ຺ສຠູໂຕ, ທິສ຺ວານ ສມເຓ ສີລວນ຺ເຕ;

ສມ຺ປນ຺ນວິຊ຺ຊາຈຣເຓ ຍສສ຺ສີ, ພຫຸສ຺ສຸເຕ ຕຓ຺ຫກ຺ຂຍູປປນ຺ເນ;

ອນ຺ນຎ຺ຈ ປານຎ຺ຈ ປສນ຺ນຈິຕ຺ໂຕ, ສກ຺ກຈ຺ຈ ທານໍ ວິປຸລໍ ອທາສິໍ.

໑໐໙໙. ‘‘ເຕນ ເມຕາທິໂສ ວຓ຺ໂຓ…ເປ…ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

ປຐມກຸຓ຺ຑລີວິມານໍ ອຏ຺ຐມໍ.

໙. ທຸຕິຍກຸຓ຺ຑລີວິມານວຕ຺ຖຸ

໑໑໐໑. ‘‘ອລງ຺ກໂຕ ມລ຺ຍຘໂຣ ສຸວຕ຺ໂຖ, ສຸກຸຓ຺ຑລີ ກປ຺ປິຕເກສມສ຺ສຸ;

ອາມຸຕ຺ຕຫຕ຺ຖາຠຣໂຓ ຍສສ຺ສີ, ທິພ຺ເພ ວິມານມ຺ຫິ ຍຖາປິ ຈນ຺ທິມາ.

໑໑໐໒. ‘‘ທິພ຺ພາ ຈ ວີຓາ ປວທນ຺ຕິ ວຄ຺ຄຸໍ, ອຏ຺ຐຏ຺ຐກາ ສິກ຺ຂິຕາ ສາຘຸຣູປາ;

ທິພ຺ພາ ຈ ກຎ຺ຎາ ຕິທສຈຣາ ອຸຬາຣາ, ນຈ຺ຈນ຺ຕິ ຄາຍນ຺ຕິ ປໂມທຍນ຺ຕິ.

໑໑໐໓. ‘‘ເທວິທ຺ຘິປຕ຺ໂຕສິ ມຫານຸຠາໂວ, ມນຸສ຺ສຠູໂຕ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາໂວ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໑໑໐໔. ໂສ ເທວປຸຕ຺ໂຕ ອຕ຺ຕມໂນ…ເປ… ຍສ຺ສ ກມ຺ມສ຺ສິທໍ ຜລໍ.

໑໑໐໕. ‘‘ອຫໍ ມນຸສ຺ເສສຸ ມນຸສ຺ສຠູໂຕ, ທິສ຺ວານ ສມເຓ ສາຘຸຣູເປ [ສີລວນ຺ເຕ (ກ.)];

ສມ຺ປນ຺ນວິຊ຺ຊາຈຣເຓ ຍສສ຺ສີ, ພຫຸສ຺ສຸເຕ ສີລວນ຺ເຕ ປສນ຺ເນ [ສີລວຕູປປນ຺ເນ (ກ. ສີ. ກ.)];

ອນ຺ນຎ຺ຈ ປານຎ຺ຈ ປສນ຺ນຈິຕ຺ໂຕ, ສກ຺ກຈ຺ຈ ທານໍ ວິປຸລໍ ອທາສິໍ.

໑໑໐໖. ‘‘ເຕນ ເມຕາທິໂສ ວຓ຺ໂຓ…ເປ…ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

ທຸຕິຍກຸຓ຺ຑລີວິມານໍ ນວມໍ.

໑໐. (ອຸຕ຺ຕຣ) ປາຍາສິວິມານວຕ຺ຖຸ

໑໑໐໘. ‘‘ຍາ ເທວຣາຊສ຺ສ ສຠາ ສຸຘມ຺ມາ, ຍຕ຺ຖຈ຺ຉຕິ ເທວສງ຺ໂຆ ສມຄ຺ໂຄ;

ຕຖູປມໍ ຕຸຍ຺ຫມິທໍ ວິມານໍ, ໂອຠາສຍໍ ຕິຏ຺ຐຕິ ອນ຺ຕລິກ຺ເຂ.

໑໑໐໙. ‘‘ເທວິທ຺ຘິປຕ຺ໂຕສິ ມຫານຸຠາໂວ, ມນຸສ຺ສຠູໂຕ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາໂວ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໑໑໑໐. ໂສ ເທວປຸຕ຺ໂຕ ອຕ຺ຕມໂນ…ເປ… ຍສ຺ສ ກມ຺ມສ຺ສິທໍ ຜລໍ.

໑໑໑໑. ‘‘ອຫໍ ມນຸສ຺ເສສຸ ມນຸສ຺ສຠູໂຕ, ຣຎ຺ໂຎ ປາຍາສິສ຺ສ ອໂຫສິໍ ມາຓໂວ;

ລທ຺ຘາ ຘນໍ ສໍວິຠາຄໍ ອກາສິໍ, ປິຍາ ຈ ເມ ສີລວນ຺ໂຕ ອເຫສຸໍ;

ອນ຺ນຎ຺ຈ ປານຎ຺ຈ ປສນ຺ນຈິຕ຺ໂຕ, ສກ຺ກຈ຺ຈ ທານໍ ວິປຸລໍ ອທາສິໍ.

໑໑໑໒. ‘‘ເຕນ ເມຕາທິໂສ ວຓ຺ໂຓ…ເປ. …ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

(ອຸຕ຺ຕຣ) ປາຍາສິວິມານໍ [ອຸຕ຺ຕຣວິມານໍ (ສີ. ສ຺ຍາ. ອຏ຺ຐ.)] ທສມໍ.

ປາຍາສິວຄ຺ໂຄ ຉຏ຺ໂຐ ນິຏ຺ຐິໂຕ.

ຕສ຺ສຸທ຺ທານໍ –

ທ຺ເວ ອຄາຣິໂນ ຜລທາຍີ, ທ຺ເວ ອຸປສ຺ສຍທາຍີ ຠິກ຺ຂາຍ ທາຍີ;

ຍວປາລໂກ ເຈວ ທ຺ເວ, ກຸຓ຺ຑລິໂນ ປາຍາສີຕິ [ປາຐເຠໂທ ນຕ຺ຖິ];

ປຸຣິສານໍ ທຸຕິໂຍ ວຄ຺ໂຄ ປວຸຈ຺ຈຕີຕິ.