໑໔. ມຫາຣຖວິມານວຕ຺ຖຸ

໑໐໑໕. ‘‘ສຫສ຺ສຍຸຕ຺ຕໍ ຫຍວາຫນໍ ສຸຠໍ, ອາຣຸຍ຺ຫິມໍ ສນ຺ທນໍ ເນກຈິຕ຺ຕໍ;

ອຸຍ຺ຍານຠູມິໍ ອຠິໂຕ ອນຸກ຺ກມໍ, ປຸຣິນ຺ທໂທ ຠູຕປຕີວ ວາສໂວ.

໑໐໑໖. ‘‘ໂສວຓ຺ຓມຍາ ເຕ ຣຖກຸພ຺ພຣາ ອຸໂຠ, ຜເລຫິ [ຖເລຫິ (ສີ.)] ອໍເສຫິ ອຕີວ ສງ຺ຄຕາ;

ສຸຊາຕຄຸມ຺ພາ ນຣວີຣນິຏ຺ຐິຕາ, ວິໂຣຈຕີ ປນ຺ນຣເສວ ຈນ຺ໂທ.

໑໐໑໗. ‘‘ສຸວຓ຺ຓຊາລາວຕໂຕ ຣໂຖ ອຍໍ, ພຫູຫິ ນານາຣຕເນຫິ ຈິຕ຺ຕິໂຕ;

ສຸນນ຺ທິໂຆໂສ ຈ ສຸຠສ຺ສໂຣ ຈ, ວິໂຣຈຕີ ຈາມຣຫຕ຺ຖພາຫຸຠິ.

໑໐໑໘. ‘‘ອິມາ ຈ ນາຠ຺ໂຍ ມນສາຠິນິມ຺ມິຕາ, ຣຖສ຺ສ ປາທນ຺ຕຣມຊ຺ຌຠູສິຕາ;

ອິມາ ຈ ນາຠ຺ໂຍ ສຕຣາຊິຈິຕ຺ຕິຕາ, ສເຕຣຕາ ວິຊ຺ຊຸຣິວປ຺ປຠາສເຣ.

໑໐໑໙. ‘‘ອເນກຈິຕ຺ຕາວຕໂຕ ຣໂຖ ອຍໍ, ປຸຖູ ຈ ເນມີ ຈ ສຫສ຺ສຣໍສິໂກ;

ເຕສໍ ສໂຣ ສຸຍ຺ຍຕິ [ສູຍຕິ (ສີ.)] ວຄ຺ຄຸຣູໂປ, ປຎ຺ຈງ຺ຄິກໍ ຕຸຣິຍມິວປ຺ປວາທິຕໍ.

໑໐໒໐. ‘‘ສິຣສ຺ມິໍ ຈິຕ຺ຕໍ ມຓິຈນ຺ທກປ຺ປິຕໍ, ສທາ ວິສຸທ຺ຘໍ ຣຸຈິຣໍ ປຠສ຺ສຣໍ;

ສຸວຓ຺ຓຣາຊີຫິ ອຕີວ ສງ຺ຄຕໍ, ເວຬຸຣິຍຣາຊີວ ອຕີວ ໂສຠຕິ.

໑໐໒໑. ‘‘ອິເມ ຈ ວາຬີ ມຓິຈນ຺ທກປ຺ປິຕາ, ອາໂຣຫກມ຺ພູ ສຸຊວາ ພ຺ຣຫູປມາ.

ພ຺ຣຫາ ມຫນ຺ຕາ ພລິໂນ ມຫາຊວາ, ມໂນ ຕວຎ຺ຎາຍ ຕເຖວ ສິໍສເຣ [ສພ຺ພເຣ (ກ.), ສປ຺ປເຣ (?)].

໑໐໒໒. ‘‘ອິເມ ຈ ສພ຺ເພ ສຫິຕາ ຈຕຸກ຺ກມາ, ມໂນ ຕວຎ຺ຎາຍ ຕເຖວ ສິໍສເຣ;

ສມໍ ວຫນ຺ຕາ ມຸທຸກາ ອນຸທ຺ຘຕາ, ອາໂມທມານາ ຕຸຣຄານ [ຕຸຣງ຺ຄານ (ກ.)] ມຸຕ຺ຕມາ.

໑໐໒໓. ‘‘ຘຸນນ຺ຕິ ວຄ຺ຄນ຺ຕິ ປຕນ຺ຕິ [ປວຕ຺ຕນ຺ຕິ (ປີ. ກ.)] ຈມ຺ພເຣ, ອພ຺ຠຸທ຺ຘຸນນ຺ຕາ ສຸກເຕ ປິຬນ຺ຘເນ;

ເຕສໍ ສໂຣ ສຸຍ຺ຍຕິ ວຄ຺ຄຸຣູໂປ, ປຎ຺ຈງ຺ຄິກໍ ຕຸຣິຍມິວປ຺ປວາທິຕໍ.

໑໐໒໔. ‘‘ຣຖສ຺ສ ໂຆໂສ ອປິຬນ຺ຘນານ ຈ, ຂຸຣສ຺ສ ນາໂທ [ນາທີ (ສ຺ຍາ.), ນາທິ (ປີ. ກ.)] ອຠິຫິໍສນາຍ ຈ;

ໂຆໂສ ສຸວຄ຺ຄູ ສມິຕສ຺ສ ສຸຍ຺ຍຕິ, ຄນ຺ຘພ຺ພຕູຣິຍານິ ວິຈິຕ຺ຣສໍວເນ.

໑໐໒໕. ‘‘ຣເຖ ຐິຕາ ຕາ ມິຄມນ຺ທໂລຈນາ, ອາຬາຣປມ຺ຫາ ຫສິຕາ ປິຍໍວທາ;

ເວຬຸຣິຍຊາລາວຕຕາ ຕນຸຈ຺ຉວາ, ສເທວ ຄນ຺ຘພ຺ພສູຣຄ຺ຄປູຊິຕາ.

໑໐໒໖. ‘‘ຕາ ຣຕ຺ຕຣຕ຺ຕມ຺ພຣປີຕວາສສາ, ວິສາລເນຕ຺ຕາ ອຠິຣຕ຺ຕໂລຈນາ;

ກຸເລ ສຸຊາຕາ ສຸຕນູ ສຸຈິມ຺ຫິຕາ, ຣເຖ ຐິຕາ ປຎ຺ຊລິກາ ອຸປຏ຺ຐິຕາ.

໑໐໒໗. ‘‘ຕາ ກມ຺ພຸເກຍູຣຘຣາ ສຸວາສສາ, ສຸມຊ຺ຌິມາ ອູຣຸຖນູປປນ຺ນາ;

ວຏ຺ຏງ຺ຄຸລິໂຍ ສຸມຸຂາ ສຸທສ຺ສນາ, ຣເຖ ຐິຕາ ປຎ຺ຊລິກາ ອຸປຏ຺ຐິຕາ.

໑໐໒໘. ‘‘ອຎ຺ຎາ ສຸເວຓີ ສຸສຸ ມິສ຺ສເກສິໂຍ, ສມໍ ວິຠຕ຺ຕາຫິ ປຠສ຺ສຣາຫິ ຈ;

ອນຸພ຺ພຕາ ຕາ ຕວ ມານເສ ຣຕາ, ຣເຖ ຐິຕາ ປຎ຺ຊລິກາ ອຸປຏ຺ຐິຕາ.

໑໐໒໙. ‘‘ອາເວຬິນິໂຍ ປທຸມຸປ຺ປລຈ຺ຉທາ, ອລງ຺ກຕາ ຈນ຺ທນສາຣວາສິຕາ [ໂວສິຕາ (ສ຺ຍາ.), ຠູສິຕາ (ກ.)];

ອນຸພ຺ພຕາ ຕາ ຕວ ມານເສ ຣຕາ, ຣເຖ ຐິຕາ ປຎ຺ຊລິກາ ອຸປຏ຺ຐິຕາ.

໑໐໓໐. ‘‘ຕາ ມາລິນິໂຍ ປທຸມຸປ຺ປລຈ຺ຉທາ, ອລງ຺ກຕາ ຈນ຺ທນສາຣວາສິຕາ;

ອນຸພ຺ພຕາ ຕາ ຕວ ມານເສ ຣຕາ, ຣເຖ ຐິຕາ ປຎ຺ຊລິກາ ອຸປຏ຺ຐິຕາ.

໑໐໓໑. ‘‘ກຓ຺ເຐສຸ ເຕ ຍານິ ປິຬນ຺ຘນານິ, ຫຕ຺ເຖສຸ ປາເທສຸ ຕເຖວ ສີເສ;

ໂອຠາສຍນ຺ຕີ ທສ ສພ຺ພໂສ ທິສາ, ອພ຺ຠຸທ຺ທຍໍ ສາຣທິໂກວ ຠາຓຸມາ.

໑໐໓໒. ‘‘ວາຕສ຺ສ ເວເຄນ ຈ ສມ຺ປກມ຺ປິຕາ, ຠຸເຊສຸ ມາລາ ອປິຬນ຺ຘນານິ ຈ;

ມຸຎ຺ຈນ຺ຕິ ໂຆສໍ ຣູຈິຣໍ ສຸຈິໍ ສຸຠໍ, ສພ຺ເພຫິ ວິຎ຺ຎູຫິ ສຸຕພ຺ພຣູປໍ.

໑໐໓໓. ‘‘ອຸຍ຺ຍານຠູມ຺ຍາ ຈ ທຸວທ຺ຘໂຕ ຐິຕາ, ຣຖາ ຈ ນາຄາ ຕູຣິຍານິ ຈ ສໂຣ;

ຕເມວ ເທວິນ຺ທ ປໂມທຍນ຺ຕິ, ວີຓາ ຍຖາ ໂປກ຺ຂຣປຕ຺ຕພາຫຸຠິ.

໑໐໓໔. ‘‘ອິມາສຸ ວີຓາສຸ ພຫູສຸ ວຄ຺ຄູສຸ, ມນຸຎ຺ຎຣູປາສຸ ຫທເຍຣິຕໍ ປີຕິໍ [ຫທເຍຣິຕໍ ປຕິ (ສີ.), ຫທເຍຣິຕມ຺ປິ ຕໍ (ສ຺ຍາ.)];

ປວຊ຺ຊມານາສຸ ອຕີວ ອຈ຺ຉຣາ, ຠມນ຺ຕິ ກຎ຺ຎາ ປທຸເມສຸ ສິກ຺ຂິຕາ.

໑໐໓໕. ‘‘ຍທາ ຈ ຄີຕານິ ຈ ວາທິຕານິ ຈ, ນຈ຺ຈານິ ຈິມານິ [ເຈມານິ (ສີ.)] ສເມນ຺ຕິ ເອກໂຕ;

ອເຖຕ຺ຖ ນຈ຺ຈນ຺ຕິ ອເຖຕ຺ຖ ອຈ຺ຉຣາ, ໂອຠາສຍນ຺ຕີ ອຸຠໂຕ ວຣິຕ຺ຖິໂຍ.

໑໐໓໖. ‘‘ໂສ ໂມທສິ ຕຸຣິຍຄຓປ຺ປໂພຘໂນ, ມຫີຍມາໂນ ວຊິຣາວຸໂຘຣິວ;

ອິມາສຸ ວີຓາສຸ ພຫູສຸ ວຄ຺ຄູສຸ, ມນຸຎ຺ຎຣູປາສຸ ຫທເຍຣິຕໍ ປີຕິໍ.

໑໐໓໗. ‘‘ກິໍ ຕ຺ວໍ ປຸເຣ ກມ຺ມມກາສິ ອຕ຺ຕນາ, ມນຸສ຺ສຠູໂຕ ປຸຣິມາຍ ຊາຕິຍາ;

ອຸໂປສຖໍ ກໍ ວາ [ອຸໂປສຖໍ ກິໍ ວ (ສ຺ຍາ.)] ຕຸວໍ ອຸປາວສິ, ກໍ [ກິໍ (ສ຺ຍາ.)] ຘມ຺ມຈຣິຍໍ ວຕມາຠິໂຣຈຍິ.

໑໐໓໘. ‘‘ນຍີທມປ຺ປສ຺ສ ກຕສ຺ສ [ນຍິທໍ ອປ຺ປສ຺ສ ກຕສ຺ສ (ສີ. ສ຺ຍາ.), ສາເສທໍ ອປ຺ປກຕສ຺ສ (ກ.)] ກມ຺ມຸໂນ, ປຸພ຺ເພ ສຸຈິຓ຺ຓສ຺ສ ອຸໂປສຖສ຺ສ ວາ;

ອິທ຺ຘານຸຠາໂວ ວິປຸໂລ ອຍໍ ຕວ, ຍໍ ເທວສງ຺ຆໍ ອຠິໂຣຈເສ ຠຸສໍ.

໑໐໓໙. ‘‘ທານສ຺ສ ເຕ ອິທໍ ຜລໍ, ອໂຖ ສີລສ຺ສ ວາ ປນ;

ອໂຖ ອຎ຺ຊລິກມ຺ມສ຺ສ, ຕໍ ເມ ອກ຺ຂາຫິ ປຸຈ຺ຉິໂຕ’’ຕິ.

໑໐໔໐. ໂສ ເທວປຸຕ຺ໂຕ ອຕ຺ຕມໂນ, ໂມຄ຺ຄລ຺ລາເນນ ປຸຈ຺ຉິໂຕ;

ປຎ຺ຫໍ ປຸຏ຺ໂຐ ວິຍາກາສິ, ຍສ຺ສ ກມ຺ມສ຺ສິທໍ ຜລນ຺ຕິ.

໑໐໔໑. ‘‘ຊິຕິນ຺ທ຺ຣິຍໍ ພຸທ຺ຘມໂນມນິກ຺ກມໍ, ນຣຸຕ຺ຕມໍ ກສ຺ສປມຄ຺ຄປຸຄ຺ຄລໍ;

ອວາປຸຣນ຺ຕໍ ອມຕສ຺ສ ທ຺ວາຣໍ, ເທວາຕິເທວໍ ສຕປຸຎ຺ຎລກ຺ຂຓໍ.

໑໐໔໒. ‘‘ຕມທ຺ທສໍ ກຸຎ຺ຊຣໂມຆຕິຓ຺ຓໍ, ສຸວຓ຺ຓສິງ຺ຄີນທພິມ຺ພສາທິສໍ;

ທິສ຺ວານ ຕໍ ຂິປ຺ປມຫຸໍ ສຸຈີມໂນ, ຕເມວ ທິສ຺ວານ ສຸຠາສິຕທ຺ຘຊໍ.

໑໐໔໓. ‘‘ຕມນ຺ນປານໍ ອຖວາປິ ຈີວຣໍ, ສຸຈິໍ ປຓີຕໍ ຣສສາ ອຸເປຕໍ;

ປຸປ຺ຜາຠິກ຺ກິຓມ຺ຫິ ສເກ ນິເວສເນ, ປຕິຏ຺ຐເປສິໍ ສ ອສງ຺ຄມານໂສ.

໑໐໔໔. ‘‘ຕມນ຺ນປາເນນ ຈ ຈີວເຣນ ຈ, ຂຊ຺ເຊນ ໂຠຊ຺ເຊນ ຈ ສາຍເນນ ຈ;

ສນ຺ຕປ຺ປຍິຕ຺ວາ ທ຺ວິປທານມຸຕ຺ຕມໍ, ໂສ ສຄ຺ຄໂສ ເທວປຸເຣ ຣມາມຫໍ.

໑໐໔໕.

‘‘ເອເຕນຸປາເຍນ ອິມໍ ນິຣຄ຺ຄຬໍ, ຍຎ຺ຎໍ ຍຊິຕ຺ວາ ຕິວິຘໍ ວິສຸທ຺ຘໍ.

ປຫາຍຫໍ ມານຸສກໍ ສມຸສ຺ສຍໍ, ອິນ຺ທູປໂມ [ອິນ຺ທສ຺ສໂມ (ສ຺ຍາ. ກ.)] ເທວປຸເຣ ຣມາມຫໍ.

໑໐໔໖. ‘‘ອາຍຸຎ຺ຈ ວຓ຺ຓຎ຺ຈ ສຸຂໍ ພລຎ຺ຈ, ປຓີຕຣູປໍ ອຠິກງ຺ຂຕາ ມຸນິ;

ອນ຺ນຎ຺ຈ ປານຎ຺ຈ ພຫຸໍ ສຸສງ຺ຂຕໍ, ປຕິຏ຺ຐເປຕພ຺ພມສງ຺ຄມານເສ.

໑໐໔໗. [ກຖາ. ໗໙໙]‘‘ນຍິມສ຺ມິໍ ໂລເກ ປຣສ຺ມິໍ [ນຍິມສ຺ມິໍ ວາ ໂລເກ ປຣສ຺ມິໍ (ກຖາວຕ຺ຖຸ ໗໙໙), ນຍິມສ຺ມິ ໂລເກ ວ ປຣສ຺ມິ (?)] ວາ ປນ, ພຸທ຺ເຘນ ເສຏ຺ໂຐ ວ ສໂມ ວ ວິຊ຺ຊຕິ;

ອາຫຸເນຍ຺ຍານໍ [ຍມາຫຸເນຍ຺ຍານໍ (ກ.)] ປຣມາຫຸຕິໍ ຄໂຕ, ປຸຎ຺ຎຕ຺ຖິການໍ ວິປຸລປ຺ຜເລສິນ’’ນ຺ຕິ.

ມຫາຣຖວິມານໍ ຈຸທ຺ທສມໍ.

ມຫາຣຖວຄ຺ໂຄ ປຎ຺ຈໂມ ນິຏ຺ຐິໂຕ.

ຕສ຺ສຸທ຺ທານໍ –

ມຓ຺ຑູໂກ ເຣວຕີ ຉຕ຺ໂຕ, ກກ຺ກໂຏ ທ຺ວາຣປາລໂກ;

ທ຺ເວ ກຣຓີຍາ ທ຺ເວ ສູຈິ, ຕໂຍ ນາຄາ ຈ ທ຺ເວ ຣຖາ;

ປຸຣິສານໍ ປຐໂມ ວຄ຺ໂຄ ປວຸຈ຺ຈຕີຕິ.

ຠາຓວາຣໍ ຕຕິຍໍ ນິຏ຺ຐິຕໍ.