໑໓. ຈູຬຣຖວິມານວຕ຺ຖຸ

໙໘໑. ‘‘ທຬ຺ຫຘມ຺ມາ ນິສາຣສ຺ສ, ຘນຸໍ ໂອລຸພ຺ຠ ຕິຏ຺ຐສິ;

ຂຕ຺ຕິໂຍ ນຸສິ ຣາຊຎ຺ໂຎ, ອທຸ ລຸທ຺ໂທ ວເນຈໂຣ’’ຕິ [ວນາຈໂຣຕິ (ສ຺ຍາ. ກ.)].

໙໘໒. ‘‘ອສ຺ສກາຘິປຕິສ຺ສາຫໍ, ຠນ຺ເຕ ປຸຕ຺ໂຕ ວເນຈໂຣ;

ນາມໍ ເມ ຠິກ຺ຂຸ ເຕ ພ຺ຣູມິ, ສຸຊາໂຕ ອິຕິ ມໍ ວິທູ [ວິທຸໍ (ສີ.)].

໙໘໓. ‘‘ມິເຄ ຄເວສມາໂນຫໍ, ໂອຄາຫນ຺ໂຕ ພ຺ຣຫາວນໍ;

ມິຄໍ ຕຎ຺ເຈວ [ມິຄໍ ຄນ຺ຕ຺ເວວ (ສ຺ຍາ.), ມິຄວຘຎ຺ຈ (ກ.)] ນາທ຺ທກ຺ຂິໍ, ຕຎ຺ຈ ທິສ຺ວາ ຐິໂຕ ອຫ’’ນ຺ຕິ.

໙໘໔. ‘‘ສ຺ວາຄຕໍ ເຕ ມຫາປຸຎ຺ຎ, ອໂຖ ເຕ ອທຸຣາຄຕໍ;

ເອຕ຺ໂຕ ອຸທກມາທາຍ, ປາເທ ປກ຺ຂາລຍສ຺ສຸ ເຕ.

໙໘໕. ‘‘ອິທມ຺ປິ ປານີຍໍ ສີຕໍ, ອາຠຕໍ ຄິຣິຄພ຺ຠຣາ;

ຣາຊປຸຕ຺ຕ ຕໂຕ ປິຕ຺ວາ [ປີຕ຺ວາ (ສີ. ສ຺ຍາ.)], ສນ຺ຖຕສ຺ມິໍ ອຸປາວິສາ’’ຕິ.

໙໘໖. ‘‘ກລ຺ຍາຓີ ວຕ ເຕ ວາຈາ, ສວນີຍາ ມຫາມຸນິ;

ເນລາ ອຕ຺ຖວຕີ [ຈຕ຺ຖວຕີ (ສີ.)] ວຄ຺ຄຸ, ມນ຺ຕ຺ວາ [ມນ຺ຕາ (ສ຺ຍາ. ປີ. ກ.)] ອຕ຺ຖຎ຺ຈ ຠາສສິ [ຠາສເສ (ສີ.)].

໙໘໗. ‘‘ກາ ເຕ ຣຕິ ວເນ ວິຫຣໂຕ, ອິສິນິສຠ ວເທຫິ ປຸຏ຺ໂຐ;

ຕວ ວຈນປຖໍ ນິສາມຍິຕ຺ວາ, ອຕ຺ຖຘມ຺ມປທໍ ສມາຈເຣມເສ’’ຕິ.

໙໘໘. ‘‘ອຫິໍສາ ສພ຺ພປາຓີນໍ, ກຸມາຣມ຺ຫາກ ຣຸຈ຺ຈຕິ;

ເຖຍ຺ຍາ ຈ ອຕິຈາຣາ ຈ, ມຊ຺ຊປານາ ຈ ອາຣຕິ.

໙໘໙. ‘‘ອາຣຕິ ສມຈຣິຍາ ຈ, ພາຫຸສຈ຺ຈໍ ກຕຎ຺ຎຸຕາ;

ທິຏ຺ເຐວ ຘມ຺ເມ ປາສໍສາ, ຘມ຺ມາ ເອເຕ ປສໍສິຍາຕິ.

໙໙໐. ‘‘ສນ຺ຕິເກ ມຣຓໍ ຕຸຍ຺ຫໍ, ໂອຣໍ ມາເສຫິ ປຎ຺ຈຫິ;

ຣາຊປຸຕ຺ຕ ວິຊານາຫິ, ອຕ຺ຕານໍ ປຣິໂມຈຍາ’’ຕິ.

໙໙໑. ‘‘ກຕມໍ ສ຺ວາຫໍ ຊນປທໍ ຄນ຺ຕ຺ວາ, ກິໍ ກມ຺ມໍ ກິຎ຺ຈ ໂປຣິສໍ;

ກາຍ ວາ ປນ ວິຊ຺ຊາຍ, ຠເວຍ຺ຍໍ ອຊຣາມໂຣ’’ຕິ.

໙໙໒. ‘‘ນ ວິຊ຺ຊເຕ ໂສ ປເທໂສ, ກມ຺ມໍ ວິຊ຺ຊາ ຈ ໂປຣິສໍ;

ຍຕ຺ຖ ຄນ຺ຕ຺ວາ ຠເວ ມຈ຺ໂຈ, ຣາຊປຸຕ຺ຕາຊຣາມໂຣ.

໙໙໓. ‘‘ມຫທ຺ຘນາ ມຫາໂຠຄາ, ຣຏ຺ຐວນ຺ໂຕປິ ຂຕ຺ຕິຍາ;

ປຫູຕຘນຘຎ຺ຎາເສ, ເຕປິ ໂນ [ເຕປິ ນ (ພຫູສຸ)] ອຊຣາມຣາ.

໙໙໔. ‘‘ຍທິ ເຕ ສຸຕາ ອນ຺ຘກເວຓ຺ຑຸປຸຕ຺ຕາ [ອນ຺ຘກເວຓ຺ຫຸປຸຕ຺ຕາ (ສີ.), ອຓ຺ຑກເວຓ຺ຑປຸຕ຺ຕາ (ສ຺ຍາ. ກ.)], ສູຣາ ວີຣາ ວິກ຺ກນ຺ຕປ຺ປຫາຣິໂນ;

ເຕປິ ອາຍຸກ຺ຂຍໍ ປຕ຺ຕາ, ວິທ຺ຘສ຺ຕາ ສສ຺ສຕີສມາ.

໙໙໕. ‘‘ຂຕ຺ຕິຍາ ພ຺ຣາຫ຺ມຓາ ເວສ຺ສາ, ສຸທ຺ທາ ຈຓ຺ຑາລປຸກ຺ກຸສາ;

ເອເຕ ຈຎ຺ເຎ ຈ ຊາຕິຍາ, ເຕປິ ໂນ ອຊຣາມຣາ.

໙໙໖. ‘‘ເຍ ມນ຺ຕໍ ປຣິວຕ຺ເຕນ຺ຕິ, ຉຬງ຺ຄໍ ພ຺ຣຫ຺ມຈິນ຺ຕິຕໍ;

ເອເຕ ຈຎ຺ເຎ ຈ ວິຊ຺ຊາຍ, ເຕປິ ໂນ ອຊຣາມຣາ.

໙໙໗. ‘‘ອິສໂຍ ຈາປິ ເຍ ສນ຺ຕາ, ສຎ຺ຎຕຕ຺ຕາ ຕປສ຺ສິໂນ;

ສຣີຣໍ ເຕປິ ກາເລນ, ວິຊຫນ຺ຕິ ຕປສ຺ສິໂນ.

໙໙໘. ‘‘ຠາວິຕຕ຺ຕາປິ ອຣຫນ຺ໂຕ, ກຕກິຈ຺ຈາ ອນາສວາ;

ນິກ຺ຂິປນ຺ຕິ ອິມໍ ເທຫໍ, ປຸຎ຺ຎປາປປຣິກ຺ຂຍາ’’ຕິ.

໙໙໙. ‘‘ສຸຠາສິຕາ ອຕ຺ຖວຕີ, ຄາຖາໂຍ ເຕ ມຫາມຸນິ;

ນິຊ຺ຌຕ຺ໂຕມ຺ຫິ ສຸຠຏ຺ເຐນ, ຕ຺ວຎ຺ຈ ເມ ສຣຓໍ ຠວາ’’ຕິ.

໑໐໐໐. ‘‘ມາ ມໍ ຕ຺ວໍ ສຣຓໍ ຄຈ຺ຉ, ຕເມວ ສຣຓໍ ວຊ [ຠຊ (ກ.)];

ສກ຺ຍປຸຕ຺ຕໍ ມຫາວີຣໍ, ຍມຫໍ ສຣຓໍ ຄໂຕ’’ຕິ.

໑໐໐໑. ‘‘ກຕຣສ຺ມິໍ ໂສ ຊນປເທ, ສຕ຺ຖາ ຕຸມ຺ຫາກ ມາຣິສ;

ອຫມ຺ປິ ທຏ຺ຐຸໍ ຄຈ຺ຉິສ຺ສໍ, ຊິນໍ ອປ຺ປຏິປຸຄ຺ຄລ’’ນ຺ຕິ.

໑໐໐໒. ‘‘ປຸຣຕ຺ຖິມສ຺ມິໍ ຊນປເທ, ໂອກ຺ກາກກຸລສມ຺ຠໂວ;

ຕຕ຺ຖາສິ ປຸຣິສາຊຎ຺ໂຎ, ໂສ ຈ ໂຂ ປຣິນິພ຺ພຸໂຕ’’ຕິ.

໑໐໐໓. ‘‘ສເຈ ຫິ ພຸທ຺ໂຘ ຕິຏ຺ເຐຍ຺ຍ, ສຕ຺ຖາ ຕຸມ຺ຫາກ ມາຣິສ;

ໂຍຊນານິ ສຫສ຺ສານິ, ຄຈ຺ເຉຍ຺ຍໍ [ຄຈ຺ເຉ (ສ຺ຍາ. ປີ. ກ.)] ປຍິຣຸປາສິຕຸໍ.

໑໐໐໔. ‘‘ຍໂຕ ຈ ໂຂ [ຍຕາ ໂຂ (ປີ. ກ.)] ປຣິນິພ຺ພຸໂຕ, ສຕ຺ຖາ ຕຸມ຺ຫາກ ມາຣິສ;

ນິພ຺ພຸຕມ຺ປິ [ປຣິນິພ຺ພຸຕໍ (ສ຺ຍາ. ກ.)] ມຫາວີຣໍ, ຄຈ຺ຉາມິ ສຣຓໍ ອຫໍ.

໑໐໐໕. ‘‘ອຸເປມິ ສຣຓໍ ພຸທ຺ຘໍ, ຘມ຺ມຎ຺ຈາປິ ອນຸຕ຺ຕຣໍ;

ສງ຺ຆຎ຺ຈ ນຣເທວສ຺ສ, ຄຈ຺ຉາມິ ສຣຓໍ ອຫໍ.

໑໐໐໖. ‘‘ປາຓາຕິປາຕາ ວິຣມາມິ ຂິປ຺ປໍ, ໂລເກ ອທິນ຺ນໍ ປຣິວຊ຺ຊຍາມິ;

ອມຊ຺ຊໂປ ໂນ ຈ ມຸສາ ຠຓາມິ, ສເກນ ທາເຣນ ຈ ໂຫມິ ຕຸຏ຺ໂຐ’’ຕິ.

໑໐໐໗. ‘‘ສຫສ຺ສຣໍສີວ ຍຖາ ມຫປ຺ປໂຠ, ທິສໍ ຍຖາ ຠາຕິ ນເຠ ອນຸກ຺ກມໍ;

ຕຖາປກາໂຣ [ຕຖປ຺ປກາໂຣ (ສີ. ສ຺ຍາ.)] ຕວາຍໍ [ຕວຍໍ (ສີ. ປີ.)] ມຫາຣໂຖ, ສມນ຺ຕໂຕ ໂຍຊນສຕ຺ຕມາຍໂຕ.

໑໐໐໘. ‘‘ສຸວຓ຺ຓປຏ຺ເຏຫິ ສມນ຺ຕໂມຕ຺ຖໂຏ, ອຸຣສ຺ສ ມຸຕ຺ຕາຫິ ມຓີຫິ ຈິຕ຺ຕິໂຕ;

ເລຂາ ສຸວຓ຺ຓສ຺ສ ຈ ຣູປິຍສ຺ສ ຈ, ໂສເຠນ຺ຕິ ເວຬຸຣິຍມຍາ ສຸນິມ຺ມິຕາ.

໑໐໐໙. ‘‘ສີສຎ຺ຈິທໍ ເວຬຸຣິຍສ຺ສ ນິມ຺ມິຕໍ, ຍຸຄຎ຺ຈິທໍ ໂລຫິຕກາຍ ຈິຕ຺ຕິຕໍ;

ຍຸຕ຺ຕາ ສຸວຓ຺ຓສ຺ສ ຈ ຣູປິຍສ຺ສ ຈ, ໂສຠນ຺ຕິ ອສ຺ສາ ຈ ອິເມ ມໂນຊວາ.

໑໐໑໐. ‘‘ໂສ ຕິຏ຺ຐສິ ເຫມຣເຖ ອຘິຏ຺ຐິໂຕ, ເທວານມິນ຺ໂທວ ສຫສ຺ສວາຫໂນ;

ປຸຈ຺ຉາມິ ຕາຫໍ ຍສວນ຺ຕ ໂກວິທໍ [ໂກວິທ (ກ.)], ກຖໍ ຕຍາ ລທ຺ໂຘ ອຍໍ ອຸຬາໂຣ’’ຕິ.

໑໐໑໑. ‘‘ສຸຊາໂຕ ນາມຫໍ ຠນ຺ເຕ, ຣາຊປຸຕ຺ໂຕ ປຸເຣ ອຫຸໍ;

ຕ຺ວຎ຺ຈ ມໍ ອນຸກມ຺ປາຍ, ສຎ຺ຎມສ຺ມິໍ ນິເວສຍິ.

໑໐໑໒. ‘‘ຂີຓາຍຸກຎ຺ຈ ມໍ ຎຕ຺ວາ, ສຣີຣໍ ປາທາສິ ສຕ຺ຖຸໂນ;

ອິມໍ ສຸຊາຕ ປູເຊຫິ, ຕໍ ເຕ ອຕ຺ຖາຍ ເຫຫິຕິ.

໑໐໑໓. ‘‘ຕາຫໍ ຄນ຺ເຘຫິ ມາເລຫິ, ປູຊຍິຕ຺ວາ ສມຸຍ຺ຍຸໂຕ;

ປຫາຍ ມານຸສໍ ເທຫໍ, ອຸປປນ຺ໂນມ຺ຫິ ນນ຺ທນໍ.

໑໐໑໔. ‘‘ນນ຺ທເນ ຈ ວເນ [ນນ຺ທໂນປວເນ (ສີ.), ນນ຺ທເນ ປວເນ (ສ຺ຍາ. ກ.)] ຣມ຺ເມ, ນານາທິຊຄຓາຍຸເຕ;

ຣມາມິ ນຈ຺ຈຄີເຕຫິ, ອຈ຺ຉຣາຫິ ປຸຣກ຺ຂໂຕ’’ຕິ.

ຈູຬຣຖວິມານໍ ເຕຣສມໍ.