໑໒. ຣຊ຺ຊຸມາລາວິມານວຕ຺ຖຸ

໘໒໖. ‘‘ອຠິກ຺ກນ຺ເຕນ ວຓ຺ເຓນ, ຍາ ຕ຺ວໍ ຕິຏ຺ຐສິ ເທວເຕ;

ຫຕ຺ຖປາເທ ຈ ວິຄ຺ຄຍ຺ຫ, ນຈ຺ຈສິ ສຸປ຺ປວາທິເຕ.

໘໒໗. ‘‘ຕສ຺ສາ ເຕ ນຈ຺ຈມານາຍ, ອງ຺ຄມງ຺ເຄຫິ ສພ຺ພໂສ;

ທິພ຺ພາ ສທ຺ທາ ນິຈ຺ຉຣນ຺ຕິ, ສວນີຍາ ມໂນຣມາ.

໘໒໘. ‘‘ຕສ຺ສາ ເຕ ນຈ຺ຈມານາຍ, ອງ຺ຄມງ຺ເຄຫິ ສພ຺ພໂສ;

ທິພ຺ພາ ຄນ຺ຘາ ປວາຍນ຺ຕິ, ສຸຈິຄນ຺ຘາ ມໂນຣມາ.

໘໒໙. ‘‘ວິວຕ຺ຕມານາ ກາເຍນ, ຍາ ເວຓີສຸ ປິຬນ຺ຘນາ;

ເຕສໍ ສຸຍ຺ຍຕິ ນິຄ຺ໂຆໂສ, ຕຸຣິເຍ ປຎ຺ຈງ຺ຄິເກ ຍຖາ.

໘໓໐. ‘‘ວຏໍສກາ ວາຕຘຸຕາ, ວາເຕນ ສມ຺ປກມ຺ປິຕາ;

ເຕສໍ ສຸຍ຺ຍຕິ ນິຄ຺ໂຆໂສ, ຕຸຣິເຍ ປຎ຺ຈງ຺ຄິເກ ຍຖາ.

໘໓໑. ‘‘ຍາປິ ເຕ ສິຣສ຺ມິໍ ມາລາ, ສຸຈິຄນ຺ຘາ ມໂນຣມາ;

ວາຕິ ຄນ຺ໂຘ ທິສາ ສພ຺ພາ, ຣຸກ຺ໂຂ ມຎ຺ຊູສໂກ ຍຖາ.

໘໓໒. ‘‘ຆາຍເສ ຕໍ ສຸຈິຄນ຺ຘໍ, ຣູປໍ ປສ຺ສສິ ອມານຸສໍ;

ເທວເຕ ປຸຈ຺ຉິຕາຈິກ຺ຂ, ກິສ຺ສ ກມ຺ມສ຺ສິທໍ ຜລ’’ນ຺ຕິ.

໘໓໓. ‘‘ທາສີ ອຫໍ ປຸເຣ ອາສິໍ, ຄຍາຍໍ ພ຺ຣາຫ຺ມຓສ຺ສຫໍ;

ອປ຺ປປຸຎ຺ຎາ ອລກ຺ຂິກາ, ຣຊ຺ຊຸມາລາຕິ ມໍ ວິທຸໍ [ວິທູ (ສ຺ຍາ. ປີ. ກ.)].

໘໓໔. ‘‘ອກ຺ໂກສານໍ ວຘານຎ຺ຈ, ຕຊ຺ຊນາຍ ຈ ອຸຄ຺ຄຕາ [ອຸກ຺ກຕາ (ສີ. ສ຺ຍາ.)];

ກຸຏໍ ຄເຫຕ຺ວາ ນິກ຺ຂມ຺ມ, ອຄຎ຺ຉິໍ [ອາຄຈ຺ຉິໍ (ສ຺ຍາ. ກ.), ອຄຈ຺ຉິໍ (ປີ.), ຄຈ຺ຉິໍ (ສີ.)] ອຸທຫາຣິຍາ [ອຸທກຫາຣິຍາ (ສີ.)].

໘໓໕. ‘‘ວິປເຖ ກຸຏໍ ນິກ຺ຂິປິຕ຺ວາ, ວນສຓ຺ຑໍ ອຸປາຄມິໍ;

ອິເຘວາຫໍ ມຣິສ຺ສາມິ, ໂກ ອຕ຺ໂຖ [ກ຺ວຕ຺ໂຖສິ (ກ.), ກີວຕ຺ໂຖປິ (ສ຺ຍາ.)] ຊີວິເຕນ ເມ.

໘໓໖. ‘‘ທຬ຺ຫໍ ປາສໍ ກຣິຕ຺ວານ, ອາສຸມ຺ຠິຕ຺ວານ ປາທເປ;

ຕໂຕ ທິສາ ວິໂລເກສິໍ,ໂກ ນຸ ໂຂ ວນມສ຺ສິໂຕ.

໘໓໗. ‘‘ຕຕ຺ຖທ຺ທສາສິໍ ສມ຺ພຸທ຺ຘໍ, ສພ຺ພໂລກຫິຕໍ ມຸນິໍ;

ນິສິນ຺ນໍ ຣຸກ຺ຂມູລສ຺ມິໍ, ຌາຍນ຺ຕໍ ອກຸໂຕຠຍໍ.

໘໓໘. ‘‘ຕສ຺ສາ ເມ ອຫຸ ສໍເວໂຄ, ອພ຺ຠຸໂຕ ໂລມຫໍສໂນ;

ໂກ ນຸ ໂຂ ວນມສ຺ສິໂຕ, ມນຸສ຺ໂສ ອຸທາຫຸ ເທວຕາ.

໘໓໙. ‘‘ປາສາທິກໍ ປສາທນີຍໍ, ວນາ ນິພ຺ພນມາຄຕໍ;

ທິສ຺ວາ ມໂນ ເມ ປສີທິ, ນາຍໍ ຍາທິສກີທິໂສ.

໘໔໐. ‘‘ຄຸຕ຺ຕິນ຺ທ຺ຣິໂຍ ຌານຣໂຕ, ອພຫິຄ຺ຄຕມານໂສ;

ຫິໂຕ ສພ຺ພສ຺ສ ໂລກສ຺ສ, ພຸທ຺ໂຘ ອຍໍ [ໂສຍໍ (ສີ.)] ຠວິສ຺ສຕິ.

໘໔໑. ‘‘ຠຍເຠຣໂວ ທຸຣາສໂທ, ສີໂຫວ ຄຸຫມສ຺ສິໂຕ;

ທຸລ຺ລຠາຍໍ ທສ຺ສນາຍ, ປຸປ຺ຜໍ ໂອທຸມ຺ພຣໍ ຍຖາ.

໘໔໒. ‘‘ໂສ ມໍ ມຸທູຫິ ວາຈາຫິ, ອາລປິຕ຺ວາ ຕຖາຄໂຕ;

ຣຊ຺ຊຸມາເລຕິ ມໍໂວຈ, ສຣຓໍ ຄຈ຺ຉ ຕຖາຄຕໍ.

໘໔໓. ‘‘ຕາຫໍ ຄິຣໍ ສຸຓິຕ຺ວານ, ເນລໍ ອຕ຺ຖວຕິໍ ສຸຈິໍ;

ສຓ຺ຫໍ ມຸທຸຎ຺ຈ ວຄ຺ຄຸຎ຺ຈ, ສພ຺ພໂສກາປນູທນໍ.

໘໔໔. ‘‘ກລ຺ລຈິຕ຺ຕຎ຺ຈ ມໍ ຎຕ຺ວາ, ປສນ຺ນໍ ສຸທ຺ຘມານສໍ;

ຫິໂຕ ສພ຺ພສ຺ສ ໂລກສ຺ສ, ອນຸສາສິ ຕຖາຄໂຕ.

໘໔໕. ‘‘ອິທໍ ທຸກ຺ຂນ຺ຕິ ມໍໂວຈ, ອຍໍ ທຸກ຺ຂສ຺ສ ສມ຺ຠໂວ;

ທຸກ຺ຂ [ອຍໍ (ສີ. ສ຺ຍາ. ປີ.)] ນິໂຣໂຘ ມຄ຺ໂຄ ຈ [ທຸກ຺ຂນິໂຣໂຘ ຈ (ສ຺ຍາ.)], ອຎ຺ຊໂສ ອມໂຕຄໂຘ.

໘໔໖. ‘‘ອນຸກມ຺ປກສ຺ສ ກຸສລສ຺ສ, ໂອວາທມ຺ຫິ ອຫໍ ຐິຕາ;

ອຊ຺ຌຄາ ອມຕໍ ສນ຺ຕິໍ, ນິພ຺ພານໍ ປທມຈ຺ຈຸຕໍ.

໘໔໗. ‘‘ສາຫໍ ອວຏ຺ຐິຕາເປມາ, ທສ຺ສເນ ອວິກມ຺ປິນີ;

ມູລຊາຕາຍ ສທ຺ຘາຍ, ຘີຕາ ພຸທ຺ຘສ຺ສ ໂອຣສາ.

໘໔໘. ‘‘ສາຫໍ ຣມາມິ ກີຬາມິ, ໂມທາມິ ອກຸໂຕຠຍາ;

ທິພ຺ພມາລໍ ຘາຣຍາມິ, ປິວາມິ ມຘຸມທ຺ທວໍ.

໘໔໙. ‘‘ສຏ຺ຐິຕຸຣິຍສຫສ຺ສານິ, ປຏິໂພຘໍ ກໂຣນ຺ຕິ ເມ;

ອາຬມ຺ໂພ ຄຄ຺ຄໂຣ ຠີໂມ, ສາຘຸວາທີ ຈ ສໍສໂຍ.

໘໕໐. ‘‘ໂປກ຺ຂໂຣ ຈ ສຸຜສ຺ໂສ ຈ, ວີຓາໂມກ຺ຂາ ຈ ນາຣິໂຍ;

ນນ຺ທາ ເຈວ ສຸນນ຺ທາ ຈ, ໂສຓທິນ຺ນາ ສຸຈິມ຺ຫິຕາ.

໘໕໑. ‘‘ອລມ຺ພຸສາ ມິສ຺ສເກສີ ຈ, ປຸຓ຺ຑຣີກາຕິທາຣຸຓີ [… ຕິຈາຣຸຓີ (ສີ.)];

ເອຓີຜສ຺ສາ ສຸຜສ຺ສາ [ສຸປສ຺ສາ (ສ຺ຍາ. ປີ. ກ.)] ຈ, ສຸຠທ຺ທາ [ສໍຠທ຺ທາ (ກ.)] ມຸທຸວາທິນີ.

໘໕໒. ‘‘ເອຕາ ຈຎ຺ຎາ ຈ ເສຍ຺ຍາເສ, ອຈ຺ຉຣານໍ ປໂພຘິກາ;

ຕາ ມໍ ກາເລນຸປາຄນ຺ຕ຺ວາ, ອຠິຠາສນ຺ຕິ ເທວຕາ.

໘໕໓. ‘‘ຫນ຺ທ ນຈ຺ຈາມ ຄາຍາມ, ຫນ຺ທ ຕໍ ຣມຍາມເສ;

ນຍິທໍ ອກຕປຸຎ຺ຎານໍ, ກຕປຸຎ຺ຎານເມວິທໍ.

໘໕໔. ‘‘ອໂສກໍ ນນ຺ທນໍ ຣມ຺ມໍ, ຕິທສານໍ ມຫາວນໍ;

ສຸຂໍ ອກຕປຸຎ຺ຎານໍ, ອິຘ ນຕ຺ຖິ ປຣຕ຺ຖ ຈ.

໘໕໕. ‘‘ສຸຂຎ຺ຈ ກຕປຸຎ຺ຎານໍ, ອິຘ ເຈວ ປຣຕ຺ຖ ຈ;

ເຕສໍ ສຫພ຺ຍກາມານໍ, ກຕ຺ຕພ຺ພໍ ກຸສລໍ ພຫຸໍ;

ກຕປຸຎ຺ຎາ ຫິ ໂມທນ຺ຕິ, ສຄ຺ເຄ ໂຠຄສມງ຺ຄິໂນ.

໘໕໖. ‘‘ພຫູນໍ ວຕ ອຕ຺ຖາຍ, ອຸປ຺ປຊ຺ຊນ຺ຕິ ຕຖາຄຕາ;

ທກ຺ຂິເຓຍ຺ຍາ ມນຸສ຺ສານໍ, ປຸຎ຺ຎເຂຕ຺ຕານມາກຣາ;

ຍຕ຺ຖ ກາຣໍ ກຣິຕ຺ວານ, ສຄ຺ເຄ ໂມທນ຺ຕິ ທາຍກາ’’ຕິ.

ຣຊ຺ຊຸມາລາວິມານໍ ທ຺ວາທສມໍ.

ມຎ຺ຊິຏ຺ຐກວຄ຺ໂຄ ຈຕຸຕ຺ໂຖ ນິຏ຺ຐິໂຕ.

ຕສ຺ສຸທ຺ທານໍ –

ມຎ຺ຊິຏ຺ຐາ ປຠສ຺ສຣາ ນາຄາ, ອໂລມາກຎ຺ຊິກທາຍິກາ;

ວິຫາຣຈຕຸຣິຕ຺ຖມ຺ພາ, ປີຕາ ອຸຈ຺ຉຸວນ຺ທນຣຊ຺ຊຸມາລາ ຈ;

ວຄ຺ໂຄ ເຕນ ປວຸຈ຺ຈຕີຕິ.

ອິຕ຺ຖິວິມານໍ ສມຕ຺ຕໍ.