໔. ມຎ຺ຊິຏ຺ຐກວຄ຺ໂຄ

໑. ມຎ຺ຊິຏ຺ຐກວິມານວຕ຺ຖຸ

໖໘໙. ‘‘ມຎ຺ຊິຏ຺ຐເກ [ມຎ຺ເຊຏ຺ຐເກ (ສີ.)] ວິມານສ຺ມິໍ, ໂສຓ຺ຓວາລຸກສນ຺ຖເຕ [ໂສວຓ຺ຓວາລຸກສນ຺ຖເຕ (ສ຺ຍາ. ປີ.), ໂສວຓ຺ຓວາລິກສນ຺ຖເຕ (ກ.)];

ປຎ຺ຈງ຺ຄິເກ ຕຸຣິເຍນ [ຕຸຣິເຍນ (ສີ. ສ຺ຍາ. ປີ.)], ຣມສິ ສຸປ຺ປວາທິເຕ.

໖໙໐. ‘‘ຕມ຺ຫາ ວິມານາ ໂອຣຸຍ຺ຫ, ນິມ຺ມິຕາ ຣຕນາມຍາ;

ໂອຄາຫສິ ສາລວນໍ, ປຸປ຺ຜິຕໍ ສພ຺ພກາລິກໍ.

໖໙໑. ‘‘ຍສ຺ສ ຍສ຺ເສວ ສາລສ຺ສ, ມູເລ ຕິຏ຺ຐສິ ເທວເຕ;

ໂສ ໂສ ມຸຎ຺ຈຕິ ປຸປ຺ຜານິ, ໂອນມິຕ຺ວາ ທຸມຸຕ຺ຕໂມ.

໖໙໒. ‘‘ວາເຕຣິຕໍ ສາລວນໍ, ອາຘຸຕໍ [ອາຘູຕໍ (ສີ.)] ທິຊເສວິຕໍ;

ວາຕິ ຄນ຺ໂຘ ທິສາ ສພ຺ພາ, ຣຸກ຺ໂຂ ມຎ຺ຊູສໂກ ຍຖາ.

໖໙໓. ‘‘ຆາຍເສ ຕໍ ສຸຈິຄນ຺ຘໍ, ຣູປໍ ປສ຺ສສິ ອມານຸສໍ;

ເທວເຕ ປຸຈ຺ຉິຕາຈິກ຺ຂ, ກິສ຺ສ ກມ຺ມສ຺ສິທໍ ຜລ’’ນ຺ຕິ.

໖໙໔. ‘‘ອຫໍ ມນຸສ຺ເສສຸ ມນຸສ຺ສຠູຕາ, ທາສີ ອຍິຣກຸເລ [ອຍ຺ຍິຣກຸເລ (ສ຺ຍາ. ກ.)] ອຫຸໍ;

ພຸທ຺ຘໍ ນິສິນ຺ນໍ ທິສ຺ວານ, ສາລປຸປ຺ເຜຫິ ໂອກິຣິໍ.

໖໙໕. ‘‘ວຏໍສກຎ຺ຈ ສຸກຕໍ, ສາລປຸປ຺ຜມຍໍ ອຫໍ;

ພຸທ຺ຘສ຺ສ ອຸປນາເມສິໍ, ປສນ຺ນາ ເສຫິ ປາຓິຠິ.

໖໙໖. ‘‘ຕາຫໍ ກມ຺ມໍ ກຣິຕ຺ວານ, ກຸສລໍ ພຸທ຺ຘວຓ຺ຓິຕໍ;

ອເປຕໂສກາ ສຸຂິຕາ, ສມ຺ປໂມທາມນາມຍາ’’ຕິ.

ມຎ຺ຊິຏ຺ຐກວິມານໍ ປຐມໍ.

໒. ປຠສ຺ສຣວິມານວຕ຺ຖຸ

໖໙໗. ‘‘ປຠສ຺ສຣວຣວຓ຺ຓນິເຠ, ສຸຣຕ຺ຕວຕ຺ຖວສເນ [ວຕ຺ຖນິວາສເນ (ສີ. ສ຺ຍາ.)];

ມຫິທ຺ຘິເກ ຈນ຺ທນຣຸຈິຣຄຕ຺ເຕ, ກາ ຕ຺ວໍ ສຸເຠ ເທວເຕ ວນ຺ທເສ ມມໍ.

໖໙໘. ‘‘ປລ຺ລງ຺ໂກ ຈ ເຕ ມຫຄ຺ໂຆ, ນານາຣຕນຈິຕ຺ຕິໂຕ ຣຸຈິໂຣ;

ຍຕ຺ຖ ຕ຺ວໍ ນິສິນ຺ນາ ວິໂຣຈສິ, ເທວຣາຊາຣິວ ນນ຺ທເນ ວເນ.

໖໙໙. ‘‘ກິໍ ຕ຺ວໍ ປຸເຣ ສຸຈຣິຕມາຈຣີ ຠທ຺ເທ, ກິສ຺ສ ກມ຺ມສ຺ສ ວິປາກໍ;

ອນຸໂຠສິ ເທວໂລກສ຺ມິໍ, ເທວເຕ ປຸຈ຺ຉິຕາຈິກ຺ຂ;

ກິສ຺ສ ກມ຺ມສ຺ສິທໍ ຜລ’’ນ຺ຕິ.

໗໐໐. ‘‘ປິຓ຺ຑາຍ ເຕ ຈຣນ຺ຕສ຺ສ, ມາລໍ ຜາຓິຕຎ຺ຈ ອທທໍ ຠນ຺ເຕ;

ຕສ຺ສ ກມ຺ມສ຺ສິທໍ ວິປາກໍ, ອນຸໂຠມິ ເທວໂລກສ຺ມິໍ.

໗໐໑. ‘‘ໂຫຕິ ຈ ເມ ອນຸຕາໂປ, ອປຣທ຺ຘໍ [ອປຣາຘໍ (ສ຺ຍາ.)] ທຸກ຺ຂິຕຎ຺ຈ [ທຸກ຺ກຏຎ຺ຈ (ສີ.)] ເມ ຠນ຺ເຕ;

ສາຫໍ ຘມ຺ມໍ ນາສ຺ໂສສິໍ, ສຸເທສິຕໍ ຘມ຺ມຣາເຊນ.

໗໐໒. ‘‘ຕໍ ຕໍ ວທາມິ ຠທ຺ທນ຺ເຕ, ‘ຍສ຺ສ ເມ ອນຸກມ຺ປິໂຍ ໂກຈິ;

ຘມ຺ເມສຸ ຕໍ ສມາທເປຖ’, ສຸເທສິຕໍ ຘມ຺ມຣາເຊນ.

໗໐໓. ‘‘ເຍສໍ ອຕ຺ຖິ ສທ຺ຘາ ພຸທ຺ເຘ, ຘມ຺ເມ ຈ ສງ຺ຆຣຕເນ;

ເຕ ມໍ ອຕິວິໂຣຈນ຺ຕິ, ອາຍຸນາ ຍສສາ ສິຣິຍາ.

໗໐໔. ‘‘ປຕາເປນ ວຓ຺ເຓນ ອຸຕ຺ຕຣິຕຣາ,

ອຎ຺ເຎ ມຫິທ຺ຘິກຕຣາ ມຍາ ເທວາ’’ຕິ;

ປຠສ຺ສຣວິມານໍ ທຸຕິຍໍ.

໓. ນາຄວິມານວຕ຺ຖຸ

໗໐໕. ‘‘ອລງ຺ກຕາ ມຓິກຎ຺ຈນາຈິຕໍ, ໂສວຓ຺ຓຊາລຈິຕໍ ມຫນ຺ຕໍ;

ອຠິຣຸຍ຺ຫ ຄຊວຣໍ ສຸກປ຺ປິຕໍ, ອິຘາຄມາ ເວຫາຍສໍ [ເວຫາສຍໍ (ສີ.)] ອນ຺ຕລິກ຺ເຂ.

໗໐໖. ‘‘ນາຄສ຺ສ ທນ຺ເຕສຸ ທຸເວສຸ ນິມ຺ມິຕາ, ອຈ຺ໂຉທກາ [ອຈ຺ໂຉທິກາ (ສີ. ກ.)] ປທຸມິນິໂຍ ສຸຜຸລ຺ລາ;

ປທຸເມສຸ ຈ ຕຸຣິຍຄຓາ ປຠິຊ຺ຊເຣ, ອິມາ ຈ ນຈ຺ຈນ຺ຕິ ມໂນຫຣາໂຍ.

໗໐໗. ‘‘ເທວິທ຺ຘິປຕ຺ຕາສິ ມຫານຸຠາເວ, ມນຸສ຺ສຠູຕາ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາວາ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໗໐໘. ‘‘ພາຣາຓສິຍໍ ອຸປສງ຺ກມິຕ຺ວາ, ພຸທ຺ຘສ຺ສຫໍ ວຕ຺ຖຍຸຄໍ ອທາສິໍ;

ປາທານິ ວນ຺ທິຕ຺ວາ [ວນ຺ທິຕ຺ວ (ສີ.)] ຉມາ ນິສີທິໍ, ວິຕ຺ຕາ ຈຫໍ ອຎ຺ຊລິກໍ ອກາສິໍ.

໗໐໙. ‘‘ພຸທ຺ໂຘ ຈ ເມ ກຎ຺ຈນສນ຺ນິຠຕ຺ຕໂຈ, ອເທສຍິ ສມຸທຍທຸກ຺ຂນິຈ຺ຈຕໍ;

ອສງ຺ຂຕໍ ທຸກ຺ຂນິໂຣຘສສ຺ສຕໍ, ມຄ຺ຄໍ ອເທສຍິ [ອເທເສສິ (ສີ.)] ຍໂຕ ວິຊານິສໍ;

໗໑໐. ‘‘ອປ຺ປາຍຸກີ ກາລກຕາ ຕໂຕ ຈຸຕາ, ອຸປປນ຺ນາ ຕິທສຄຓໍ ຍສສ຺ສິນີ;

ສກ຺ກສ຺ສຫໍ ອຎ຺ຎຕຣາ ປຊາປຕິ, ຍສຸຕ຺ຕຣາ ນາມ ທິສາສຸ ວິສ຺ສຸຕາ’’ຕິ.

ນາຄວິມານໍ ຕຕິຍໍ.

໔. ອໂລມວິມານວຕ຺ຖຸ

໗໑໑. ‘‘ອຠິກ຺ກນ຺ເຕນ ວຓ຺ເຓນ, ຍາ ຕ຺ວໍ ຕິຏ຺ຐສິ ເທວເຕ;

ໂອຠາເສນ຺ຕີ ທິສາ ສພ຺ພາ, ໂອສຘີ ວິຍ ຕາຣກາ.

໗໑໒. ‘‘ເກນ ເຕຕາທິໂສ ວຓ຺ໂຓ…ເປ…

ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໗໑໔. ສາ ເທວຕາ ອຕ຺ຕມນາ…ເປ… ຍສ຺ສ ກມ຺ມສ຺ສິທໍ ຜລໍ.

໗໑໕. ‘‘ອຫຎ຺ຈ ພາຣາຓສິຍໍ, ພຸທ຺ຘສ຺ສາທິຈ຺ຈພນ຺ຘຸໂນ;

ອທາສິໍ ສຸກ຺ຂກຸມ຺ມາສໍ, ປສນ຺ນາ ເສຫິ ປາຓິຠິ.

໗໑໖. ‘‘ສຸກ຺ຂາຍ ອໂລຓິກາຍ ຈ, ປສ຺ສ ຜລໍ ກຸມ຺ມາສປິຓ຺ຑິຍາ;

ອໂລມໍ ສຸຂິຕໍ ທິສ຺ວາ, ໂກ ປຸຎ຺ຎໍ ນ ກຣິສ຺ສຕິ.

໗໑໗. ‘‘ເຕນ ເມຕາທິໂສ ວຓ຺ໂຓ…ເປ… ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

ອໂລມວິມານໍ ຈຕຸຕ຺ຖໍ.

໕. ກຎ຺ຊິກທາຍິກາວິມານວຕ຺ຖຸ

໗໑໙. ‘‘ອຠິກ຺ກນ຺ເຕນ ວຓ຺ເຓນ…ເປ… ໂອສຘີ ວິຍ ຕາຣກາ.

໗໒໐. ‘‘ເກນ ເຕຕາທິໂສ ວຓ຺ໂຓ…ເປ…ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

໗໒໒. ສາ ເທວຕາ ອຕ຺ຕມນາ…ເປ… ຍສ຺ສ ກມ຺ມສ຺ສິທໍ ຜລໍ.

໗໒໓. ‘‘ອຫໍ ອນ຺ຘກວິນ຺ທມ຺ຫິ, ພຸທ຺ຘສ຺ສາທິຈ຺ຈພນ຺ຘຸໂນ;

ອທາສິໍ ໂກລສມ຺ປາກໍ, ກຎ຺ຊິກໍ ເຕລຘູປິຕໍ.

໗໒໔. ‘‘ປິປ຺ຜລ຺ຍາ ລສຸເຓນ ຈ, ມິສ຺ສໍ ລາມຎ຺ຊເກນ ຈ;

ອທາສິໍ ອຸຊຸຠູຕສ຺ມິໍ [ອຸຊຸຠູເຕສຸ (ກ.)], ວິປ຺ປສນ຺ເນນ ເຈຕສາ.

໗໒໕. ‘‘ຍາ ມເຫສິຕ຺ຕໍ ກາເຣຍ຺ຍ, ຈກ຺ກວຕ຺ຕິສ຺ສ ຣາຊິໂນ;

ນາຣີ ສພ຺ພງ຺ຄກລ຺ຍາຓີ, ຠຕ຺ຕຸ ຈາໂນມທສ຺ສິກາ;

ເອກສ຺ສ ກຎ຺ຊິກທານສ຺ສ, ກລໍ ນາຄ຺ຆຕິ ໂສຬສິໍ.

໗໒໖. ‘‘ສຕໍ ນິກ຺ຂາ ສຕໍ ອສ຺ສາ, ສຕໍ ອສ຺ສຕຣີຣຖາ;

ສຕໍ ກຎ຺ຎາສຫສ຺ສານິ, ອາມຸຕ຺ຕມຓິກຸຓ຺ຑລາ;

ເອກສ຺ສ ກຎ຺ຊິກທານສ຺ສ, ກລໍ ນາຄ຺ຆນ຺ຕິ ໂສຬສິໍ.

໗໒໗. ‘‘ສຕໍ ເຫມວຕາ ນາຄາ, ອີສາທນ຺ຕາ ອຸຣູຬ຺ຫວາ;

ສຸວຓ຺ຓກຈ຺ຉາ ມາຕງ຺ຄາ, ເຫມກປ຺ປນວາສສາ;

ເອກສ຺ສ ກຎ຺ຊິກທານສ຺ສ, ກລໍ ນາຄ຺ຆນ຺ຕິ ໂສຬສິໍ.

໗໒໘. ‘‘ຈຕຸນ຺ນມປິ ທີປານໍ, ອິສ຺ສຣໍ ໂຍຘ ກາຣເຍ;

ເອກສ຺ສ ກຎ຺ຊິກທານສ຺ສ, ກລໍ ນາຄ຺ຆຕິ ໂສຬສິ’’ນ຺ຕິ.

ກຎ຺ຊິກທາຍິກາວິມານໍ ປຎ຺ຈມໍ.

໖. ວິຫາຣວິມານວຕ຺ຖຸ

໗໒໙. ‘‘ອຠິກ຺ກນ຺ເຕນ ວຓ຺ເຓນ…ເປ… ໂອສຘີ ວິຍ ຕາຣກາ.

໗໓໐. ‘‘ຕສ຺ສາ ເຕ ນຈ຺ຈມານາຍ, ອງ຺ຄມງ຺ເຄຫິ ສພ຺ພໂສ;

ທິພ຺ພາ ສທ຺ທາ ນິຈ຺ຉຣນ຺ຕິ, ສວນີຍາ ມໂນຣມາ.

໗໓໑. ‘‘ຕສ຺ສາ ເຕ ນຈ຺ຈມານາຍ, ອງ຺ຄມງ຺ເຄຫິ ສພ຺ພໂສ;

ທິພ຺ພາ ຄນ຺ຘາ ປວາຍນ຺ຕິ, ສຸຈິຄນ຺ຘາ ມໂນຣມາ.

໗໓໒. ‘‘ວິວຕ຺ຕມານາ ກາເຍນ, ຍາ ເວຓີສຸ ປິຬນ຺ຘນາ;

ເຕສໍ ສຸຍ຺ຍຕິ ນິຄ຺ໂຆໂສ, ຕຸຣິເຍ ປຎ຺ຈງ຺ຄິເກ ຍຖາ.

໗໓໓. ‘‘ວຏໍສກາ ວາຕຘຸຕາ, ວາເຕນ ສມ຺ປກມ຺ປິຕາ;

ເຕສໍ ສຸຍ຺ຍຕິ ນິຄ຺ໂຆໂສ, ຕຸຣິເຍ ປຎ຺ຈງ຺ຄິເກ ຍຖາ.

໗໓໔. ‘‘ຍາປິ ເຕ ສິຣສ຺ມິໍ ມາລາ, ສຸຈິຄນ຺ຘາ ມໂນຣມາ;

ວາຕິ ຄນ຺ໂຘ ທິສາ ສພ຺ພາ, ຣຸກ຺ໂຂ ມຎ຺ຊູສໂກ ຍຖາ.

໗໓໕. ‘‘ຆາຍເສ ຕໍ ສຸຈິຄນ຺ຘໍ, ຣູປໍ ປສ຺ສສິ ອມານຸສໍ;

ເທວເຕ ປຸຈ຺ຉິຕາຈິກ຺ຂ, ກິສ຺ສ ກມ຺ມສ຺ສິທໍ ຜລ’’ນ຺ຕິ.

໗໓໖. ‘‘ສາວຕ຺ຖິຍໍ ມຍ຺ຫໍ ສຂີ ຠທນ຺ເຕ, ສງ຺ຆສ຺ສ ກາເຣສິ ມຫາວິຫາຣໍ;

ຕຕ຺ຖປ຺ປສນ຺ນາ ອຫມານຸໂມທິໍ, ທິສ຺ວາ ອຄາຣຎ຺ຈ ປິຍຎ຺ຈ ເມຕໍ.

໗໓໗. ‘‘ຕາເຍວ ເມ ສຸທ຺ຘນຸໂມທນາຍ, ລທ຺ຘໍ ວິມານພ຺ຠຸຕທສ຺ສເນຍ຺ຍໍ;

ສມນ຺ຕໂຕ ໂສຬສໂຍຊນານິ, ເວຫາຍສໍ ຄຈ຺ຉຕິ ອິທ຺ຘິຍາ ມມ.

໗໓໘. ‘‘ກູຏາຄາຣາ ນິເວສາ ເມ, ວິຠຕ຺ຕາ ຠາຄໂສ ມິຕາ;

ທທ຺ທລ຺ລມານາ ອາຠນ຺ຕິ, ສມນ຺ຕາ ສຕໂຍຊນໍ.

໗໓໙. ‘‘ໂປກ຺ຂຣຎ຺ໂຎ ຈ ເມ ເອຕ຺ຖ, ປຸຖຸໂລມນິເສວິຕາ;

ອຈ຺ໂຉທກາ [ອຈ຺ໂຉທິກາ (ສີ.)] ວິປ຺ປສນ຺ນາ, ໂສຓ຺ຓວາລຸກສນ຺ຖຕາ.

໗໔໐. ‘‘ນານາປທຸມສຎ຺ຉນ຺ນາ, ປຸຓ຺ຑຣີກສໂມຕຕາ [ປຓ຺ຑຣີກສໂມນຕາ (ສີ.)];

ສຸຣຠີ ສມ຺ປວາຍນ຺ຕິ, ມນຸຎ຺ຎາ ມາລຸເຕຣິຕາ.

໗໔໑. ‘‘ຊມ຺ພຸໂຍ ປນສາ ຕາລາ, ນາຬິເກຣວນານິ ຈ;

ອນ຺ໂຕນິເວສເນ ຊາຕາ, ນານາຣຸກ຺ຂາ ອໂຣປິມາ.

໗໔໒. ‘‘ນານາຕູຣິຍສງ຺ຆຸຏ຺ຐໍ, ອຈ຺ຉຣາຄຓໂຆສິຕໍ;

ໂຍປິ ມໍ ສຸປິເນ ປສ຺ເສ, ໂສປິ ວິຕ຺ໂຕ ສິຍາ ນໂຣ.

໗໔໓. ‘‘ເອຕາທິສໍ ອພ຺ຠຸຕທສ຺ສເນຍ຺ຍໍ, ວິມານໍ ສພ຺ພໂສປຠໍ;

ມມ ກມ຺ເມຫິ ນິພ຺ພຕ຺ຕໍ, ອລໍ ປຸຎ຺ຎານິ ກາຕເວ’’ຕິ.

໗໔໔. ‘‘ຕາເຍວ ເຕ ສຸທ຺ຘນຸໂມທນາຍ, ລທ຺ຘໍ ວິມານພ຺ຠຸຕທສ຺ສເນຍ຺ຍໍ;

ຍາ ເຈວ ສາ ທານມທາສິ ນາຣີ, ຕສ຺ສາ ຄຕິໍ ພ຺ຣູຫິ ກຸຫິໍ ອຸປ຺ປນ຺ນາ [ອຸປປນ຺ນາ (ກ.)] ສາ’’ຕິ.

໗໔໕. ‘‘ຍາ ສາ ອຫຸ ມຍ຺ຫໍ ສຂີ ຠທນ຺ເຕ, ສງ຺ຆສ຺ສ ກາເຣສິ ມຫາວິຫາຣໍ;

ວິຎ຺ຎາຕຘມ຺ມາ ສາ ອທາສິ ທານໍ, ອຸປ຺ປນ຺ນາ ນິມ຺ມານຣຕີສຸ ເທເວສຸ.

໗໔໖. ‘‘ປຊາປຕີ ຕສ຺ສ ສຸນິມ຺ມິຕສ຺ສ, ອຈິນ຺ຕິຍາ ກມ຺ມວິປາກາ ຕສ຺ສ;

ຍເມຕໍ ປຸຈ຺ຉສິ ກຸຫິໍ ອຸປ຺ປນ຺ນາ [ອຸປປນ຺ນາ (ກ.)] ສາຕິ, ຕໍ ເຕ ວິຍາກາສິໍ ອນຎ຺ຎຖາ ອຫໍ.

໗໔໗. ‘‘ເຕນຫຎ຺ເຎປິ ສມາທເປຖ, ສງ຺ຆສ຺ສ ທານານິ ທທາຖ ວິຕ຺ຕາ;

ຘມ຺ມຎ຺ຈ ສຸຓາຖ ປສນ຺ນມານສາ, ສຸທຸລ຺ລໂຠ ລທ຺ໂຘ ມນຸສ຺ສລາໂຠ.

໗໔໘. ‘‘ຍໍ ມຄ຺ຄໍ ມຄ຺ຄາຘິປຕີ ອເທສຍິ [ມຄ຺ຄາຘິປຕ຺ຍເທສຍິ (ສີ.)], ພ຺ຣຫ຺ມສ຺ສໂຣ ກຎ຺ຈນສນ຺ນິຠຕ຺ຕໂຈ;

ສງ຺ຆສ຺ສ ທານານິ ທທາຖ ວິຕ຺ຕາ, ມຫປ຺ຜລາ ຍຕ຺ຖ ຠວນ຺ຕິ ທກ຺ຂິຓາ.

໗໔໙. [ຂຸ. ປາ. ໖.໖; ສຸ. ນິ. ໒໒໙] ‘‘ເຍ ປຸຄ຺ຄລາ ອຏ຺ຐ ສຕໍ ປສຕ຺ຖາ, ຈຕ຺ຕາຣິ ເອຕານິ ຍຸຄານິ ໂຫນ຺ຕິ;

ເຕ ທກ຺ຂິເຓຍ຺ຍາ ສຸຄຕສ຺ສ ສາວກາ, ເອເຕສຸ ທິນ຺ນານິ ມຫປ຺ຜລານິ.

໗໕໐. [ວິ. ວ. ໖໔໑] ‘‘ຈຕ຺ຕາໂຣ ຈ ປຏິປນ຺ນາ, ຈຕ຺ຕາໂຣ ຈ ຜເລ ຐິຕາ;

ເອສ ສງ຺ໂຆ ອຸຊຸຠູໂຕ, ປຎ຺ຎາສີລສມາຫິໂຕ.

໗໕໑. [ວິ. ວ. ໖໔໒] ‘‘ຍຊມານານໍ ມນຸສ຺ສານໍ, ປຸຎ຺ຎເປກ຺ຂານ ປາຓິນໍ;

ກໂຣຕໍ ໂອປຘິກໍ ປຸຎ຺ຎໍ, ສງ຺ເຆ ທິນ຺ນໍ ມຫປ຺ຜລໍ.

໗໕໒. [ວິ. ວ. ໖໔໓] ‘‘ເອໂສ ຫິ ສງ຺ໂຆ ວິປຸໂລ ມຫຄ຺ຄໂຕ, ເອສປ຺ປເມຍ຺ໂຍ ອຸທຘີວ ສາຄໂຣ;

ເອເຕຫິ ເສຏ຺ຐາ ນຣວີຣສາວກາ, ປຠງ຺ກຣາ ຘມ຺ມມຸທີຣຍນ຺ຕິ [ນຕ຺ເຖຕ຺ຖ ປາຐເຠໂທ].

໗໕໓. [ວິ. ວ. ໖໔໔] ‘‘ເຕສໍ ສຸທິນ຺ນໍ ສຸຫຸຕໍ ສຸຍິຏ຺ຐໍ, ເຍ ສງ຺ຆມຸທ຺ທິສ຺ສ ທທນ຺ຕິ ທານໍ;

ສາ ທກ຺ຂິຓາ ສງ຺ຆຄຕາ ປຕິຏ຺ຐິຕາ, ມຫປ຺ຜລາ ໂລກວິທູນ [ໂລກວິທູຫິ (ກ.)] ວຓ຺ຓິຕາ.

໗໕໔. ‘‘ເອຕາທິສໍ ຍຎ຺ຎມນຸສ຺ສຣນ຺ຕາ, ເຍ ເວທຊາຕາ ວິຈຣນ຺ຕິ ໂລເກ;

ວິເນຍ຺ຍ ມຈ຺ເຉຣມລໍ ສມູລໍ, ອນິນ຺ທິຕາ ສຄ຺ຄມຸເປນ຺ຕິ ຐານ’’ນ຺ຕິ.

ວິຫາຣວິມານໍ ຉຏ຺ຐໍ.

ຠາຓວາຣໍ ທຸຕິຍໍ ນິຏ຺ຐິຕໍ.

໗. ຈຕຸຣິຕ຺ຖິວິມານວຕ຺ຖຸ

໗໕໕. ‘‘ອຠິກ຺ກນ຺ເຕນ ວຓ຺ເຓນ…ເປ…ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໗໕໘. ສາ ເທວຕາ ອຕ຺ຕມນາ…ເປ… ຍສ຺ສ ກມ຺ມສ຺ສິທໍ ຜລໍ.

໗໕໙. ‘‘ອິນ຺ທີວຣານໍ ຫຕ຺ຖກໍ ອຫມທາສິໍ, ຠິກ຺ຂຸໂນ ປິຓ຺ຑາຍ ຈຣນ຺ຕສ຺ສ;

ເອສິການໍ ອຸຓ຺ຓຕສ຺ມິໍ, ນຄຣວເຣ ປຓ຺ຓກເຕ ຣມ຺ເມ.

໗໖໐. ‘‘ເຕນ ເມຕາທິໂສ ວຓ຺ໂຓ…ເປ…ວຓ຺ໂຓ ຈ ເມ ສພ຺ພທິສ຺ສາ ປຠາສຕີ’’ຕິ.

໗໖໒. ‘‘ອຠິກ຺ກນ຺ເຕນ ວຓ຺ເຓນ…ເປ…ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໗໖໕. ສາ ເທວຕາ ອຕ຺ຕມນາ…ເປ… ຍສ຺ສ ກມ຺ມສ຺ສິທໍ ຜລໍ.

໗໖໖. ‘‘ນີລຸປ຺ປລຫຕ຺ຖກໍ ອຫມທາສິໍ, ຠິກ຺ຂຸໂນ ປິຓ຺ຑາຍ ຈຣນ຺ຕສ຺ສ;

ເອສິການໍ ອຸຓ຺ຓຕສ຺ມິໍ, ນຄຣວເຣ ປຓ຺ຓກເຕ ຣມ຺ເມ.

໗໖໗. ‘‘ເຕນ ເມຕາທິໂສ ວຓ຺ໂຓ…ເປ…ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

໗໖໙. ‘‘ອຠິກ຺ກນ຺ເຕນ ວຓ຺ເຓນ…ເປ…ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.