໖. ທທ຺ທລ຺ລວິມານວຕ຺ຖຸ

໖໑໙. ‘‘ທທ຺ທລ຺ລມານາ [ທທ຺ທຬ຺ຫມານາ (ກ.)] ວຓ຺ເຓນ, ຍສສາ ຈ ຍສສ຺ສິນີ;

ສພ຺ເພ ເທເວ ຕາວຕິໍເສ, ວຓ຺ເຓນ ອຕິໂຣຈສິ.

໖໒໐. ‘‘ທສ຺ສນໍ ນາຠິຊານາມິ, ອິທໍ ປຐມທສ຺ສນໍ;

ກສ຺ມາ ກາຍາ ນຸ ອາຄມ຺ມ, ນາເມນ ຠາສເສ ມມ’’ນ຺ຕິ.

໖໒໑. ‘‘ອຫໍ ຠທ຺ເທ ສຸຠທ຺ທາສິໍ, ປຸພ຺ເພ ມານຸສເກ ຠເວ;

ສຫຠຣິຍາ ຈ ເຕ ອາສິໍ, ຠຄິນີ ຈ ກນິຏ຺ຐິກາ.

໖໒໒. ‘‘ສາ ອຫໍ ກາຍສ຺ສ ເຠທາ, ວິປ຺ປມຸຕ຺ຕາ ຕໂຕ ຈຸຕາ;

ນິມ຺ມານຣຕີນໍ ເທວານໍ, ອຸປປນ຺ນາ ສຫພ຺ຍຕ’’ນ຺ຕິ.

໖໒໓. ‘‘ປຫູຕກຕກລ຺ຍາຓາ, ເຕ ເທເວ ຍນ຺ຕິ ປາຓິໂນ;

ເຍສໍ ຕ຺ວໍ ກິຕ຺ຕຍິສ຺ສສິ, ສຸຠທ຺ເທ ຊາຕິມຕ຺ຕໂນ.

໖໒໔. ‘‘ອຖ [ກຖໍ (ສີ. ສ຺ຍາ.)] ຕ຺ວໍ ເກນ ວຓ຺ເຓນ, ເກນ ວາ ອນຸສາສິຕາ;

ກີທິເສເນວ ທາເນນ, ສຸພ຺ພເຕນ ຍສສ຺ສິນີ.

໖໒໕. ‘‘ຍສໍ ເອຕາທິສໍ ປຕ຺ຕາ, ວິເສສໍ ວິປຸລມຊ຺ຌຄາ;

ເທວເຕ ປຸຈ຺ຉິຕາຈິກ຺ຂ, ກິສ຺ສ ກມ຺ມສ຺ສິທໍ ຜລ’’ນ຺ຕິ.

໖໒໖. ‘‘ອຏ຺ເຐວ ປິຓ຺ຑປາຕານິ, ຍໍ ທານໍ ອທທໍ ປຸເຣ;

ທກ຺ຂິເຓຍ຺ຍສ຺ສ ສງ຺ຆສ຺ສ, ປສນ຺ນາ ເສຫິ ປາຓິຠິ.

໖໒໗. ‘‘ເຕນ ເມຕາທິໂສ ວຓ຺ໂຓ…ເປ…ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

໖໒໙. ‘‘ອຫໍ ຕຍາ ພຫຸຕເຣ ຠິກ຺ຂູ, ສຎ຺ຎເຕ ພ຺ຣຫ຺ມຈາຣໂຍ [ພ຺ຣຫ຺ມຈຣິໂນ (ສ຺ຍາ.), ພ຺ຣຫ຺ມຈາຣິເຍ (ປີ. ກ.)];

ຕປ຺ເປສິໍ ອນ຺ນປາເນນ, ປສນ຺ນາ ເສຫິ ປາຓິຠິ.

໖໓໐. ‘‘ຕຍາ ພຫຸຕຣໍ ທຕ຺ວາ, ຫີນກາຍູປຄາ ອຫໍ [ອຫຸໍ (ກ. ສີ.)];

ກຖໍ ຕ຺ວໍ ອປ຺ປຕຣໍ ທຕ຺ວາ, ວິເສສໍ ວິປຸລມຊ຺ຌຄາ;

ເທວເຕ ປຸຈ຺ຉິຕາຈິກ຺ຂ, ກິສ຺ສ ກມ຺ມສ຺ສິທໍ ຜລ’’ນ຺ຕິ.

໖໓໑. ‘‘ມໂນຠາວນີໂຍ ຠິກ຺ຂຸ, ສນ຺ທິຏ຺ໂຐ ເມ ປຸເຣ ອຫຸ;

ຕາຫໍ ຠຕ຺ເຕນ [ຠທ຺ເທ (ກ.)] ນິມນ຺ເຕສິໍ, ເຣວຕໍ ອຕ຺ຕນຏ຺ຐມໍ.

໖໓໒. ‘‘ໂສ ເມ ອຕ຺ຖປຸເຣກ຺ຂາໂຣ, ອນຸກມ຺ປາຍ ເຣວໂຕ;

ສງ຺ເຆ ເທຫີຕິ ມໍໂວຈ, ຕສ຺ສາຫໍ ວຈນໍ ກຣິໍ.

໖໓໓. ‘‘ສາ ທກ຺ຂິຓາ ສງ຺ຆຄຕາ, ອປ຺ປເມຍ຺ເຍ ປຕິຏ຺ຐິຕາ;

ປຸຄ຺ຄເລສຸ ຕຍາ ທິນ຺ນໍ, ນ ຕໍ ຕວ ມຫປ຺ຜລ’’ນ຺ຕິ.

໖໓໔. ‘‘ອິທາເນວາຫໍ ຊານາມິ, ສງ຺ເຆ ທິນ຺ນໍ ມຫປ຺ຜລໍ;

ສາຫໍ ຄນ຺ຕ຺ວາ ມນຸສ຺ສຕ຺ຕໍ, ວທຎ຺ຎູ ວີຕມຈ຺ຉຣາ;

ສງ຺ເຆ ທານານິ ທສ຺ສາມິ [ສງ຺ເຆ ທານໍ ທສ຺ສາມິຫໍ (ສ຺ຍາ.)], ອປ຺ປມຕ຺ຕາ ປຸນປ຺ປຸນ’’ນ຺ຕິ.

໖໓໕. ‘‘ກາ ເອສາ ເທວຕາ ຠທ຺ເທ, ຕຍາ ມນ຺ຕຍເຕ ສຫ;

ສພ຺ເພ ເທເວ ຕາວຕິໍເສ, ວຓ຺ເຓນ ອຕິໂຣຈຕີ’’ຕິ.

໖໓໖. ‘‘ມນຸສ຺ສຠູຕາ ເທວິນ຺ທ, ປຸພ຺ເພ ມານຸສເກ ຠເວ;

ສຫຠຣິຍາ ຈ ເມ ອາສິ, ຠຄິນີ ຈ ກນິຏ຺ຐິກາ;

ສງ຺ເຆ ທານານິ ທຕ຺ວານ, ກຕປຸຎ຺ຎາ ວິໂຣຈຕີ’’ຕິ.

໖໓໗. ‘‘ຘມ຺ເມນ ປຸພ຺ເພ ຠຄິນີ, ຕຍາ ຠທ຺ເທ ວິໂຣຈຕິ;

ຍໍ ສງ຺ຆມ຺ຫິ ອປ຺ປເມຍ຺ເຍ, ປຕິຏ຺ຐາເປສິ ທກ຺ຂິຓໍ.

໖໓໘. ‘‘ປຸຈ຺ຉິໂຕ ຫິ ມຍາ ພຸທ຺ໂຘ, ຄິຊ຺ຌກູຏມ຺ຫິ ປພ຺ພເຕ;

ວິປາກໍ ສໍວິຠາຄສ຺ສ, ຍຕ຺ຖ ທິນ຺ນໍ ມຫປ຺ຜລໍ.

໖໓໙. ‘‘ຍຊມານານໍ ມນຸສ຺ສານໍ, ປຸຎ຺ຎເປກ຺ຂານ ປາຓິນໍ;

ກໂຣຕໍ ໂອປຘິກໍ ປຸຎ຺ຎໍ, ຍຕ຺ຖ ທິນ຺ນໍ ມຫປ຺ຜລໍ.

໖໔໐. ‘‘ຕໍ ເມ ພຸທ຺ໂຘ ວິຍາກາສິ, ຊານໍ ກມ຺ມຜລໍ ສກໍ;

ວິປາກໍ ສໍວິຠາຄສ຺ສ, ຍຕ຺ຖ ທິນ຺ນໍ ມຫປ຺ຜລໍ.

໖໔໑. [ວິ. ວ. ໗໕໐; ກຖາ. ໗໙໘] ‘‘ຈຕ຺ຕາໂຣ ຈ ປຏິປນ຺ນາ, ຈຕ຺ຕາໂຣ ຈ ຜເລ ຐິຕາ;

ເອສ ສງ຺ໂຆ ອຸຊຸຠູໂຕ, ປຎ຺ຎາສີລສມາຫິໂຕ.

໖໔໒. [ວິ. ວ. ໗໕໑; ກຖາ. ໗໙໘] ‘‘ຍຊມານານໍ ມນຸສ຺ສານໍ, ປຸຎ຺ຎເປກ຺ຂານ ປາຓິນໍ;

ກໂຣຕໍ ໂອປຘິກໍ ປຸຎ຺ຎໍ, ສງ຺ເຆ ທິນ຺ນໍ ມຫປ຺ຜລໍ.

໖໔໓. [ວິ. ວ. ໗໕໒; ກຖາ. ໗໙໘] ‘‘ເອໂສ ຫິ ສງ຺ໂຆ ວິປຸໂລ ມຫຄ຺ຄໂຕ, ເອສປ຺ປເມຍ຺ໂຍ ອຸທຘີວ ສາຄໂຣ;

ເອເຕ ຫິ ເສຏ຺ຐາ ນຣວີຣສາວກາ, ປຠງ຺ກຣາ ຘມ຺ມມຸທີຣຍນ຺ຕິ [ຘມ຺ມກຖໍ ອຸທີຣຍນ຺ຕິ (ສ຺ຍາ.)].

໖໔໔. [ວິ. ວ. ໗໕໓; ກຖາ. ໗໙໘] ‘‘ເຕສໍ ສຸທິນ຺ນໍ ສຸຫຸຕໍ ສຸຍິຏ຺ຐໍ, ເຍ ສງ຺ຆມຸທ຺ທິສ຺ສ ທທນ຺ຕິ ທານໍ;

ສາ ທກ຺ຂິຓາ ສງ຺ຆຄຕາ ປຕິຏ຺ຐິຕາ, ມຫປ຺ຜລາ ໂລກວິທູນ [ໂລກວິທູຫິ (ສ຺ຍາ. ກ.)] ວຓ຺ຓິຕາ.

໖໔໕. [ວິ. ວ. ໗໕໔; ກຖາ. ໗໙໘] ‘‘ເອຕາທິສໍ ຍຎ຺ຎມນຸສ຺ສຣນ຺ຕາ [ປຸຎ຺ຎມນຸສ຺ສຣນ຺ຕາ (ສ຺ຍາ. ກ.)], ເຍ ເວທຊາຕາ ວິຈຣນ຺ຕິ ໂລເກ;

ວິເນຍ຺ຍ ມຈ຺ເຉຣມລໍ ສມູລໍ, ອນິນ຺ທິຕາ ສຄ຺ຄມຸເປນ຺ຕິ ຐານ’’ນ຺ຕິ.

ທທ຺ທລ຺ລວິມານໍ [ທທ຺ທຬ຺ຫວິມານໍ (ກ.)] ຉຏ຺ຐໍ.