໓. ປາຣິຈ຺ຉຕ຺ຕກວຄ຺ໂຄ

໑. ອຸຬາຣວິມານວຕ຺ຖຸ

໒໘໖. ‘‘ອຸຬາໂຣ ເຕ ຍໂສ ວຓ຺ໂຓ, ສພ຺ພາ ໂອຠາສເຕ ທິສາ;

ນາຣິໂຍ ນຈ຺ຈນ຺ຕິ ຄາຍນ຺ຕິ, ເທວປຸຕ຺ຕາ ອລງ຺ກຕາ.

໒໘໗. ‘‘ໂມເທນ຺ຕິ ປຣິວາເຣນ຺ຕິ, ຕວ ປູຊາຍ ເທວເຕ;

ໂສວຓ຺ຓານິ ວິມານານິ, ຕວິມານິ ສຸທສ຺ສເນ.

໒໘໘. ‘‘ຕຸວໍສິ ອິສ຺ສຣາ ເຕສໍ, ສພ຺ພກາມສມິທ຺ຘິນີ;

ອຠິຊາຕາ ມຫນ຺ຕາສິ, ເທວກາເຍ ປໂມທສິ;

ເທວເຕ ປຸຈ຺ຉິຕາຈິກ຺ຂ, ກິສ຺ສ ກມ຺ມສ຺ສິທໍ ຜລ’’ນ຺ຕິ.

໒໘໙. ‘‘ອຫໍ ມນຸສ຺ເສສຸ ມນຸສ຺ສຠູຕາ, ປຸຣິມາຍ ຊາຕິຍາ ມນຸສ຺ສໂລເກ;

ທຸສ຺ສີລກຸເລ ສຸຓິສາ ອໂຫສິໍ, ອສ຺ສທ຺ເຘສຸ ກທຣິເຍສຸ ອຫໍ.

໒໙໐. ‘‘ສທ຺ຘາ ສີເລນ ສມ຺ປນ຺ນາ, ສໍວິຠາຄຣຕາ ສທາ;

ປິຓ຺ຑາຍ ຈຣມານສ຺ສ, ອປູວໍ ເຕ ອທາສຫໍ.

໒໙໑. ‘‘ຕທາຫໍ ສສ຺ສຸຍາຈິກ຺ຂິໍ, ສມໂຓ ອາຄໂຕ ອິຘ;

ຕສ຺ສ ອທາສຫໍ ປູວໍ, ປສນ຺ນາ ເສຫິ ປາຓິຠິ.

໒໙໒. ‘‘ອິຕິສ຺ສາ ສສ຺ສຸ ປຣິຠາສິ, ອວິນີຕາສິ ຕ຺ວໍ [ອວິນີຕາ ຕຸວໍ (ສີ.)] ວຘຸ;

ນ ມໍ ສມ຺ປຸຈ຺ຉິຕຸໍ ອິຈ຺ຉິ, ສມຓສ຺ສ ທທາມຫໍ.

໒໙໓. ‘‘ຕໂຕ ເມ ສສ຺ສຸ ກຸປິຕາ, ປຫາສິ ມຸສເລນ ມໍ;

ກູຏງ຺ຄຈ຺ຉິ ອວຘິ ມໍ, ນາສກ຺ຂິໍ ຊີວິຕຸໍ ຈິຣໍ.

໒໙໔. ‘‘ສາ ອຫໍ ກາຍສ຺ສ ເຠທາ, ວິປ຺ປມຸຕ຺ຕາ ຕໂຕ ຈຸຕາ;

ເທວານໍ ຕາວຕິໍສານໍ, ອຸປປນ຺ນາ ສຫພ຺ຍຕໍ.

໒໙໕. ‘‘ເຕນ ເມຕາທິໂສ ວຓ຺ໂຓ…ເປ…ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

ອຸຬາຣວິມານໍ ປຐມໍ.

໒. ອຸຈ຺ຉຸທາຍິກາວິມານວຕ຺ຖຸ

໒໙໖. ‘‘ໂອຠາສຍິຕ຺ວາ ປຖວິໍ [ປຐວິໍ (ສີ. ສ຺ຍາ.)] ສເທວກໍ, ອຕິໂຣຈສິ ຈນ຺ທິມສູຣິຍາ ວິຍ;

ສິຣິຍາ ຈ ວຓ຺ເຓນ ຍເສນ ເຕຊສາ, ພ຺ຣຫ຺ມາວ ເທເວ ຕິທເສ ສຫິນ຺ທເກ [ສອິນ຺ທເກ (ສີ.)].

໒໙໗. ‘‘ປຸຈ຺ຉາມິ ຕໍ ອຸປ຺ປລມາລຘາຣິນີ, ອາເວຬິນີ ກຎ຺ຈນສນ຺ນິຠຕ຺ຕເຈ;

ອລງ຺ກເຕ ອຸຕ຺ຕມວຕ຺ຖຘາຣິນີ, ກາ ຕ຺ວໍ ສຸເຠ ເທວເຕ ວນ຺ທເສ ມມໍ.

໒໙໘. ‘‘ກິໍ ຕ຺ວໍ ປຸເຣ ກມ຺ມມກາສິ ອຕ຺ຕນາ, ມນຸສ຺ສຠູຕາ ປຸຣິມາຍ ຊາຕິຍາ;

ທານໍ ສຸຈິຓ຺ຓໍ ອຖ ສີລສໍຍມໍ [ສຎ຺ຎມໍ (ສີ.)], ເກນູປປນ຺ນາ ສຸຄຕິໍ ຍສສ຺ສິນີ;

ເທວເຕ ປຸຈ຺ຉິຕາຈິກ຺ຂ, ກິສ຺ສ ກມ຺ມສ຺ສິທໍ ຜລ’’ນ຺ຕິ.

໒໙໙. ‘‘ອິທານິ ຠນ຺ເຕ ອິມເມວ ຄາມໍ [ຄາເມ (ສ຺ຍາ. ກ.)], ປິຓ຺ຑາຍ ອມ຺ຫາກໍ ຆຣໍ ອຸປາຄມິ;

ຕໂຕ ເຕ ອຸຈ຺ຉຸສ຺ສ ອທາສິ ຂຓ຺ຑິກໍ, ປສນ຺ນຈິຕ຺ຕາ ອຕຸລາຍ ປີຕິຍາ.

໓໐໐. ‘‘ສສ຺ສຸ ຈ ປຈ຺ຉາ ອນຸຍຸຎ຺ຊເຕ ມມໍ, ກຫໍ [ກຫໍ ເມ (ປີ.)] ນຸ ອຸຈ຺ຉຸໍ ວຘຸເກ ອວາກິຣິ [ອວາກຣິ (ສ຺ຍາ. ກ.)];

ນ ຉຑ຺ຑິຕໍ ໂນ ປນ ຂາທິຕໍ ມຍາ, ສນ຺ຕສ຺ສ ຠິກ຺ຂຸສ຺ສ ສຍໍ ອທາສຫໍ.

໓໐໑. ‘‘ຕຸຍ຺ຫໍນ຺ວິທໍ [ຕຸຍ຺ຫໍ ນຸ ອິທໍ (ສ຺ຍາ.)] ອິສ຺ສຣິຍໍ ອໂຖ ມມ, ອິຕິສ຺ສາ ສສ຺ສຸ ປຣິຠາສເຕ ມມໍ;

ປີຐໍ ຄເຫຕ຺ວາ ປຫາຣໍ ອທາສິ ເມ, ຕໂຕ ຈຸຕາ ກາລກຕາມ຺ຫິ ເທວຕາ.

໓໐໒. ‘‘ຕເທວ ກມ຺ມໍ ກຸສລໍ ກຕໍ ມຍາ, ສຸຂຎ຺ຈ ກມ຺ມໍ ອນຸໂຠມິ ອຕ຺ຕນາ;

ເທເວຫິ ສທ຺ຘິໍ ປຣິຈາຣຍາມຫໍ, ໂມທາມຫໍ ກາມຄຸເຓຫິ ປຎ຺ຈຫິ.

໓໐໓. ‘‘ຕເທວ ກມ຺ມໍ ກຸສລໍ ກຕໍ ມຍາ, ສຸຂຎ຺ຈ ກມ຺ມໍ ອນຸໂຠມິ ອຕ຺ຕນາ;

ເທວິນ຺ທຄຸຕ຺ຕາ ຕິທເສຫິ ຣກ຺ຂິຕາ, ສມປ຺ປິຕາ ກາມຄຸເຓຫິ ປຎ຺ຈຫິ.

໓໐໔. ‘‘ເອຕາທິສໍ ປຸຎ຺ຎຜລໍ ອນປ຺ປກໍ, ມຫາວິປາກາ ມມ ອຸຈ຺ຉຸທກ຺ຂິຓາ;

ເທເວຫິ ສທ຺ຘິໍ ປຣິຈາຣຍາມຫໍ, ໂມທາມຫໍ ກາມຄຸເຓຫິ ປຎ຺ຈຫິ.

໓໐໕. ‘‘ເອຕາທິສໍ ປຸຎ຺ຎຜລໍ ອນປ຺ປກໍ, ມຫາຊຸຕິກາ ມມ ອຸຈ຺ຉຸທກ຺ຂິຓາ;

ເທວິນ຺ທຄຸຕ຺ຕາ ຕິທເສຫິ ຣກ຺ຂິຕາ, ສຫສ຺ສເນຕ຺ໂຕຣິວ ນນ຺ທເນ ວເນ.

໓໐໖. ‘‘ຕຸວຎ຺ຈ ຠນ຺ເຕ ອນຸກມ຺ປກໍ ວິທຸໍ, ອຸເປຈ຺ຈ ວນ຺ທິໍ ກຸສລຎ຺ຈ ປຸຈ຺ຉິສໍ;

ຕໂຕ ເຕ ອຸຈ຺ຉຸສ຺ສ ອທາສິ ຂຓ຺ຑິກໍ, ປສນ຺ນຈິຕາ ອຕຸລາຍ ປີຕິຍາ’’ຕິ.

ອຸຈ຺ຉຸທາຍິກາວິມານໍ ທຸຕິຍໍ.

໓. ປລ຺ລງ຺ກວິມານວຕ຺ຖຸ

໓໐໗. ‘‘ປລ຺ລງ຺ກເສຏ຺ເຐ ມຓິໂສຓ຺ຓຈິຕ຺ເຕ, ປຸປ຺ຜາຠິກິຓ຺ເຓ ສຍເນ ອຸຬາເຣ;

ຕຕ຺ຖຈ຺ຉສິ ເທວິ ມຫານຸຠາເວ, ອຸຈ຺ຈາວຈາ ອິທ຺ຘິ ວິກຸພ຺ພມານາ.

໓໐໘. ‘‘ອິມາ ຈ ເຕ ອຈ຺ຉຣາໂຍ ສມນ຺ຕໂຕ, ນຈ຺ຈນ຺ຕິ ຄາຍນ຺ຕິ ປໂມທຍນ຺ຕິ;

ເທວິທ຺ຘິປຕ຺ຕາສິ ມຫານຸຠາເວ, ມນຸສ຺ສຠູຕາ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາວາ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໓໐໙. ‘‘ອຫໍ ມນຸສ຺ເສສຸ ມນຸສ຺ສຠູຕາ, ອຑ຺ເຒ ກຸເລ ສຸຓິສາ ອໂຫສິໍ;

ອກ຺ໂກຘນາ ຠຕ຺ຕຸວສານຸວຕ຺ຕິນີ, ອຸໂປສເຖ ອປ຺ປມຕ຺ຕາ ອໂຫສິໍ [ອປ຺ປມຕ຺ຕາ ອຸໂປສເຖ (ສ຺ຍາ. ກ.)].

໓໑໐. ‘‘ມນຸສ຺ສຠູຕາ ທຫຣາ ອປາປິກາ [ທຫຣາສ’ປາປິກາ (ສີ.)], ປສນ຺ນຈິຕ຺ຕາ ປຕິມາຠິຣາຘຍິໍ;

ທິວາ ຈ ຣຕ຺ໂຕ ຈ ມນາປຈາຣິນີ, ອຫໍ ປຸເຣ ສີລວຕີ ອໂຫສິໍ.

໓໑໑. ‘‘ປາຓາຕິປາຕາ ວິຣຕາ ອໂຈຣິກາ, ສໍສຸທ຺ຘກາຍາ ສຸຈິພ຺ຣຫ຺ມຈາຣິນີ;

ອມຊ຺ຊປາ ໂນ ຈ ມຸສາ ອຠາຓິໍ, ສິກ຺ຂາປເທສຸ ປຣິປູຣກາຣິນີ.

໓໑໒. ‘‘ຈາຕຸທ຺ທສິໍ ປຎ຺ຈທສິໍ, ຍາ ຈ ປກ຺ຂສ຺ສ ອຏ຺ຐມີ;

ປາຏິຫາຣິຍປກ຺ຂຎ຺ຈ, ປສນ຺ນມານສາ ອຫໍ [ອຕິປສນ຺ນມານສາ (ກ.)].

໓໑໓. ‘‘ອຏ຺ຐງ຺ຄຸເປຕໍ ອນຸຘມ຺ມຈາຣິນີ, ອຸໂປສຖໍ ປີຕິມນາ ອຸປາວສິໍ;

ອິມຎ຺ຈ ອຣິຍໍ ອຏ຺ຐງ຺ຄວເຣຫຸເປຕໍ, ສມາທິຍິຕ຺ວາ ກຸສລໍ ສຸຂຸທ຺ຣຍໍ;

ປຕິມ຺ຫິ ກລ຺ຍາຓີ ວສານຸວຕ຺ຕິນີ, ອໂຫສິໍ ປຸພ຺ເພ ສຸຄຕສ຺ສ ສາວິກາ.

໓໑໔. ‘‘ເອຕາທິສໍ ກຸສລໍ ຊີວໂລເກ, ກມ຺ມໍ ກຣິຕ຺ວານ ວິເສສຠາຄິນີ;

ກາຍສ຺ສ ເຠທາ ອຠິສມ຺ປຣາຍໍ, ເທວິທ຺ຘິປຕ຺ຕາ ສຸຄຕິມ຺ຫິ ອາຄຕາ.

໓໑໕. ‘‘ວິມານປາສາທວເຣ ມໂນຣເມ, ປຣິວາຣິຕາ ອຈ຺ຉຣາສງ຺ຄເຓນ;

ສຍໍປຠາ ເທວຄຓາ ຣເມນ຺ຕິ ມໍ, ທີຆາຍຸກິໍ ເທວວິມານມາຄຕ’’ນ຺ຕິ;

ປລ຺ລງ຺ກວິມານໍ ຕຕິຍໍ.

໔. ລຕາວິມານວຕ຺ຖຸ

໓໑໖. ລຕາ ຈ ສຊ຺ຊາ ປວຣາ ຈ ເທວຕາ, ອຈ຺ຈິມຕີ [ອຈ຺ຈິມຸຂີ (ສີ.), ອຈ຺ຉິມຕີ (ປີ. ກ.) ອຈ຺ຉິມຸຕີ (ສ຺ຍາ.)] ຣາຊວຣສ຺ສ ສິຣີມໂຕ;

ສຸຕາ ຈ ຣຎ຺ໂຎ ເວສ຺ສວຓສ຺ສ ຘີຕາ, ຣາຊີມຕີ ຘມ຺ມຄຸເຓຫິ ໂສຠຖ.

໓໑໗. ປຎ຺ເຈຕ຺ຖ ນາຣິໂຍ ອາຄມໍສຸ ນ຺ຫາຍິຕຸໍ, ສີໂຕທກໍ ອຸປ຺ປລິນິໍ ສິວໍ ນທິໍ;

ຕາ ຕຕ຺ຖ ນ຺ຫາຍິຕ຺ວາ ຣເມຕ຺ວາ ເທວຕາ, ນຈ຺ຈິຕ຺ວາ ຄາຍິຕ຺ວາ ສຸຕາ ລຕໍ ພ຺ຣວິ [ພ຺ຣຸວີ (ສີ.)].

໓໑໘. ‘‘ປຸຈ຺ຉາມິ ຕໍ ອຸປ຺ປລມາລຘາຣິນິ, ອາເວຬິນິ ກຎ຺ຈນສນ຺ນິຠຕ຺ຕເຈ;

ຕິມິຣຕມ຺ພກ຺ຂິ ນເຠວ ໂສຠເນ, ທີຆາຍຸກີ ເກນ ກໂຕ ຍໂສ ຕວ.

໓໑໙. ‘‘ເກນາສິ ຠທ຺ເທ ປຕິໂນ ປິຍຕຣາ, ວິສິຏ຺ຐກລ຺ຍາຓິຕຣສ຺ສຸ ຣູປໂຕ;

ປທກ຺ຂິຓາ ນຈ຺ຈຄີຕວາທິເຕ, ອາຈິກ຺ຂ ໂນ ຕ຺ວໍ ນຣນາຣິປຸຈ຺ຉິຕາ’’ຕິ.

໓໒໐. ‘‘ອຫໍ ມນຸສ຺ເສສຸ ມນຸສ຺ສຠູຕາ, ອຸຬາຣໂຠເຄ ກຸເລ ສຸຓິສາ ອໂຫສິໍ;

ອກ຺ໂກຘນາ ຠຕ຺ຕຸວສານຸວຕ຺ຕິນີ, ອຸໂປສເຖ ອປ຺ປມຕ຺ຕາ ອໂຫສິໍ.

໓໒໑. ‘‘ມນຸສ຺ສຠູຕາ ທຫຣາ ອປາປິກາ [ທຫຣາສ’ປາປິກາ (ສີ.)], ປສນ຺ນຈິຕ຺ຕາ ປຕິມາຠິຣາຘຍິໍ;

ສເທວຣໍ ສສ຺ສສຸຣໍ ສທາສກໍ, ອຠິຣາຘຍິໍ ຕມ຺ຫິ ກໂຕ ຍໂສ ມມ.

໓໒໒. ‘‘ສາຫໍ ເຕນ ກຸສເລນ ກມ຺ມຸນາ, ຈຕຸພ຺ຠິ ຐາເນຫິ ວິເສສມຊ຺ຌຄາ;

ອາຍຸຎ຺ຈ ວຓ຺ຓຎ຺ຈ ສຸຂໍ ພລຎ຺ຈ, ຂິຑ຺ຑາຣຕິໍ ປຈ຺ຈນຸໂຠມນປ຺ປກໍ.

໓໒໓. ‘‘ສຸຕໍ ນຸ ຕໍ ຠາສຕິ ຍໍ ອຍໍ ລຕາ, ຍໍ ໂນ ອປຸຈ຺ຉິມ຺ຫ ອກິຕ຺ຕຍີ ໂນ;

ປຕິໂນ ກິຣມ຺ຫາກໍ ວິສິຏ຺ຐ ນາຣີນໍ, ຄຕີ ຈ ຕາສໍ ປວຣາ ຈ ເທວຕາ.

໓໒໔. ‘‘ປຕີສຸ ຘມ຺ມໍ ປຈຣາມ ສພ຺ພາ, ປຕິພ຺ພຕາ ຍຕ຺ຖ ຠວນ຺ຕິ ອິຕ຺ຖິໂຍ;

ປຕີສຸ ຘມ຺ມໍ ປຈຣິຕ຺ວ [ປຈຣິຕ຺ວານ (ກ.)] ສພ຺ພາ, ລຈ຺ຉາມເສ ຠາສຕິ ຍໍ ອຍໍ ລຕາ.

໓໒໕. ‘‘ສີໂຫ ຍຖາ ປພ຺ພຕສານຸໂຄຈໂຣ, ມຫິນ຺ຘຣໍ ປພ຺ພຕມາວສິຕ຺ວາ;

ປສຍ຺ຫ ຫນ຺ຕ຺ວາ ອິຕເຣ ຈຕຸປ຺ປເທ, ຂຸທ຺ເທ ມິເຄ ຂາທຕິ ມໍສໂຠຊໂນ.

໓໒໖. ‘‘ຕເຖວ ສທ຺ຘາ ອິຘ ອຣິຍສາວິກາ, ຠຕ຺ຕາຣໍ ນິສ຺ສາຍ ປຕິໍ ອນຸພ຺ພຕາ;

ໂກຘໍ ວຘິຕ຺ວາ ອຠິຠຸຍ຺ຍ ມຈ຺ຉຣໍ, ສຄ຺ຄມ຺ຫິ ສາ ໂມທຕິ ຘມ຺ມຈາຣິນີ’’ຕິ.

ລຕາວິມານໍ ຈຕຸຕ຺ຖໍ.

໕. ຄຸຕ຺ຕິລວິມານໍ

໑. ວຕ຺ຖຸຕ຺ຕມທາຍິກາວິມານວຕ຺ຖຸ

໓໒໗. ‘‘ສຕ຺ຕຕນ຺ຕິໍ ສຸມຘຸຣໍ, ຣາມເຓຍ຺ຍໍ ອວາຈຍິໍ;

ໂສ ມໍ ຣງ຺ຄມ຺ຫິ ອວ຺ເຫຕິ, ‘ສຣຓໍ ເມ ໂຫຫິ ໂກສິຍາ’ຕິ.

໓໒໘. ‘‘ອຫໍ ເຕ ສຣຓໍ ໂຫມິ, ອຫມາຈຣິຍປູຊໂກ;

ນ ຕໍ ຊຍິສ຺ສຕິ ສິສ຺ໂສ, ສິສ຺ສມາຈຣິຍ ເຊສ຺ສສີ’’ຕິ.

໓໒໙. ‘‘ອຠິກ຺ກນ຺ເຕນ ວຓ຺ເຓນ, ຍາ ຕ຺ວໍ ຕິຏ຺ຐສິ ເທວເຕ;

ໂອຠາເສນ຺ຕີ ທິສາ ສພ຺ພາ, ໂອສຘີ ວິຍ ຕາຣກາ.

໓໓໐. ‘‘ເກນ ເຕຕາທິໂສ ວຓ຺ໂຓ, ເກນ ເຕ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເຕ ໂຠຄາ, ເຍ ເກຈິ ມນໂສ ປິຍາ.

໓໓໑. ‘‘ປຸຈ຺ຉາມິ ຕໍ ເທວິ ມຫານຸຠາເວ, ມນຸສ຺ສຠູຕາ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາວາ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໓໓໒. ສາ ເທວຕາ ອຕ຺ຕມນາ, ໂມຄ຺ຄລ຺ລາເນນ ປຸຈ຺ຉິຕາ;

ປຎ຺ຫໍ ປຸຏ຺ຐາ ວິຍາກາສິ, ຍສ຺ສ ກມ຺ມສ຺ສິທໍ ຜລໍ.

໓໓໓. ‘‘ວຕ຺ຖຸຕ຺ຕມທາຍິກາ ນາຣີ, ປວຣາ ໂຫຕິ ນເຣສຸ ນາຣີສຸ;

ເອວໍ ປິຍຣູປທາຍິກາ ມນາປໍ, ທິພ຺ພໍ ສາ ລຠເຕ ອຸເປຈ຺ຈ ຐານໍ.

໓໓໔. ‘‘ຕສ຺ສາ ເມ ປສ຺ສ ວິມານໍ, ອຈ຺ຉຣາ ກາມວຓ຺ຓິນີຫມສ຺ມິ;

ອຈ຺ຉຣາສຫສ຺ສສ຺ສາຫໍ, ປວຣາ [ອຈ຺ຉຣາສຫສ຺ສສ຺ສາຫໍ ປວຣາ, (ສ຺ຍາ.)] ປສ຺ສ ປຸຎ຺ຎານໍ ວິປາກໍ.

໓໓໕. ‘‘ເຕນ ເມຕາທິໂສ ວຓ຺ໂຓ, ເຕນ ເມ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເມ ໂຠຄາ, ເຍ ເກຈິ ມນໂສ ປິຍາ.

໓໓໖. ‘‘ອກ຺ຂາມິ ເຕ ຠິກ຺ຂຸ ມຫານຸຠາວ, ມນຸສ຺ສຠູຕາ ຍມກາສິ ປຸຎ຺ຎໍ;

ເຕນມ຺ຫິ ເອວໍ ຊລິຕານຸຠາວາ, ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

(ອນນ຺ຕຣໍ ຈຕຸຣວິມານໍ ຍຖາ ວຕ຺ຖຸທາຍິກາວິມານໍ ຕຖາ ວິຕ຺ຖາເຣຕພ຺ພໍ [( ) ນຕ຺ຖິ ສີ. ໂປຕ຺ຖເກ])

໒. ປຸປ຺ຜຸຕ຺ຕມທາຍິກາວິມານວຕ຺ຖຸ (໑)

໓໓໗. ‘‘ອຠິກ຺ກນ຺ເຕນ ວຓ຺ເຓນ…ເປ… ໂອສຘີ ວິຍ ຕາຣກາ.

໓໓໘. ‘‘ເກນ ເຕຕາທິໂສ ວຓ຺ໂຓ…ເປ… ເຍ ເກຈິ ມນໂສ ປິຍາ.

໓໓໙. ‘‘ປຸຈ຺ຉາມິ ຕໍ ເທວິ ມຫານຸຠາເວ…ເປ…

ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໓໔໐. ສາ ເທວຕາ ອຕ຺ຕມນາ…ເປ… ຍສ຺ສ ກມ຺ມສ຺ສິທໍ ຜລໍ.

໓໔໑. ‘‘ປຸປ຺ຜຸຕ຺ຕມທາຍິກາ ນາຣີ, ປວຣາ ໂຫຕິ ນເຣສຸ ນາຣີສຸ;

ເອວໍ ປິຍຣູປທາຍິກາ ມນາປໍ, ທິພ຺ພໍ ສາ ລຠເຕ ອຸເປຈ຺ຈ ຐານໍ.

໓໔໒. ‘‘ຕສ຺ສາ ເມ ປສ຺ສ ວິມານໍ, ອຈ຺ຉຣາ ກາມວຓ຺ຓິນີຫມສ຺ມິ;

ອຈ຺ຉຣາສຫສ຺ສສ຺ສາຫໍ, ປວຣາ ປສ຺ສ ປຸຎ຺ຎານໍ ວິປາກໍ.

໓໔໓. ‘‘ເຕນ ເມຕາທິໂສ ວຓ຺ໂຓ…ເປ…

ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

໓. ຄນ຺ຘຸຕ຺ຕມທາຍິກາວິມານວຕ຺ຖຸ (໒)

໓໔໕. ‘‘ອຠິກ຺ກນ຺ເຕນ ວຓ຺ເຓນ…ເປ… ໂອສຘີ ວິຍ ຕາຣກາ.

໓໔໖. ‘‘ເກນ ເຕຕາທິໂສ ວຓ຺ໂຓ…ເປ… ເຍ ເກຈິ ມນໂສ ປິຍາ.

໓໔໗. ‘‘ປຸຈ຺ຉາມິ ຕໍ ເທວິ ມຫານຸຠາເວ…ເປ…

ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໓໔໘. ‘‘ສາ ເທວຕາ ອຕ຺ຕມນາ…ເປ… ຍສ຺ສ ກມ຺ມສ຺ສິທໍ ຜລໍ.

໓໔໙. ‘‘ຄນ຺ຘຸຕ຺ຕມທາຍິກາ ນາຣີ, ປວຣາ ໂຫຕິ ນເຣສຸ ນາຣີສຸ;

ເອວໍ ປິຍຣູປທາຍິກາ ມນາປໍ, ທິພ຺ພໍ ສາ ລຠເຕ ອຸເປຈ຺ຈ ຐານໍ.

໓໕໐. ‘‘ຕສ຺ສາ ເມ ປສ຺ສ ວິມານໍ, ອຈ຺ຉຣາ ກາມວຓ຺ຓິນີຫມສ຺ມິ;

ອຈ຺ຉຣາສຫສ຺ສສ຺ສາຫໍ, ປວຣາ ປສ຺ສ ປຸຎ຺ຎານໍ ວິປາກໍ.

໓໕໑. ‘‘ເຕນ ເມຕາທິໂສ ວຓ຺ໂຓ…ເປ…

ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

໔. ຜລຸຕ຺ຕມທາຍິກາວິມານວຕ຺ຖຸ (໓)

໓໕໓. ‘‘ອຠິກ຺ກນ຺ເຕນ ວຓ຺ເຓນ…ເປ… ໂອສຘີ ວິຍ ຕາຣກາ.

໓໕໔. ‘‘ເກນ ເຕຕາທິໂສ ວຓ຺ໂຓ…ເປ… ເຍ ເກຈິ ມນໂສ ປິຍາ.

໓໕໕. ‘‘ປຸຈ຺ຉາມິ ຕໍ ເທວິ ມຫານຸຠາເວ…ເປ…

ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໓໕໖. ສາ ເທວຕາ ອຕ຺ຕມນາ…ເປ… ຍສ຺ສ ກມ຺ມສ຺ສິທໍ ຜລໍ.

໓໕໗. ‘‘ຜລຸຕ຺ຕມທາຍິກາ ນາຣີ, ປວຣາ ໂຫຕິ ນເຣສຸ ນາຣີສຸ;

ເອວໍ ປິຍຣູປທາຍິກາ ມນາປໍ, ທິພ຺ພໍ ສາ ລຠເຕ ອຸເປຈ຺ຈ ຐານໍ.

໓໕໘. ‘‘ຕສ຺ສາ ເມ ປສ຺ສ ວິມານໍ, ອຈ຺ຉຣາ ກາມວຓ຺ຓິນີຫມສ຺ມິ;